Ke Alaula, Volume II, Number 5, 1 August 1867 — Page 20

20 KE ALAULA.

pono ke hele me ka lohi; nolaila, ku oia iluna a hele lelele aku i ke kula. A hiki nae i ka hale kula ua kiia ka puka, a e kau ana kekahi palapala liilii me keia mau hua, "Komo Hope." Uwe o Jessie me ka ukiuki loa iaia iho. "Auwe! auwe! e loaa ana ia'u kekahi kiko hewa, no ka mea aole wahi olelo hoakaka e pale aku ai i ka hewa."
                A weheia ka puka komo oia iloko, a i ke awakea hai aku oia i kona kumu, ia Miss Marvin, i ke kumu o kona komo hope. Pane mai o Miss Marvin penei: "Ua nalowale ia oe kekahi mea maikai i ke kahawai; e loaa hou ole ana ia ia oe. Aole anei?"
                Pane aku o Jessie me ke kahaha: "Nalowale! Heaha ia mea i nalowale? Aole i haule kekahi mea ia'u; aole i haule ka'u buke-pela."
                "O ka mea lilo, ua oi aku mamua o ka buke-pela, no ka mea, he hiki no ke kuai hou mai ia buke ke haule," wahi a ke kumu.
                Haha o Jessie iloko o kana eke, a olelo, "Aole i haule ka'u komo kala."
                Pane mai o Miss Marvin, "Ina he komo kala, e loaa hou mai no. Aka, aole loaa hou kela mea."
                Ninau aku o Jessie, "Manao anei oe ua nalowale ka'u pahu hua lei?"
                "Ke manao nei au, ina ua nalowale ia, e hiki no ia oe ke kuai i pahu hou." "Hiki no ia'u ke kuai i peni pohaku hou, ina ua nalowale ka'u."
                Ae mai o Miss Marvin: "aka o ka mea i nalowale ia oe, aole hiki ke looa hou, aole hiki ke kuai hou, aole hiki ke hana i kekahi pani hakahaka no kela mea, ua nalowale loa."
                Ninau mai o Jessie me ka minamina a me ka pilikia o ka manao, "Heaha la keia mea o'u i lilo aku, Miss Marvin?"
                Pane mai ke kumu ia Jessie penei: "Ua nalowale ka manawa. A puka mai oe ma ka ipuka o ka hale kula, alaila ua manao nui oe i ka mea nalowale."
                Ae o Jessie ia Miss Marvin, "Ae, ua ike no au, ua ike no au; a ina hiki ke kuai i hookahi minute hou me ko'u waiwai a pau, ua ae no au."
                Aka, ina ua haule kekahi minute, aole hiki ke hoihoiia mai, ua nalowale loa. Aole hiki ke loaa hou mai ma ke noi ana a ma ke kuai ana, ua lele loa aku no. O kekahi wahine waiwai i ka wa e make ana, hooho uwe nui, penei: "Elima tausani dala no kekahi iniha o ka manawa;" aka, aole paa kona ola ma na dala he elima tausani. Ke haawi nei ke Akua ia kakou i na minute gula e hana aku ai, aole no ka hoopau wale. E na keiki, e malama pono i na minute, i hiki ia oukou ke hoike aku i ka la mahope i kekahi hana maikai i hanaia i kela la, keia la. F. M.

MAI HOOMAUNAUNA I KO KAKOU MAU KUKUI.

I o'u mau Makamaka Opio--Aloha pu kakou:--
                Ma na la i kaahope ae, ua ike maka au i kekahi mau makamaka opio o'u e hana ana i kekahi hana kupono ole i ka rula maikai, a me na makua pu hoi kekahi--oia hoi, o ka hoolilo ana o kekahi hoa opiopio i ko kakou kamalei opio, ke ALAULA. Ninau mai paha kekahi, "Ua hooliloia i mea aha?" Ka i no hoi i mea hoolele lupe; no ka mea, mamua aku nei, ia'u e hele ana ma ke alanui, ike aku la au i kekahi lupe e lele ana. A mahope, no ka palaawili o kona lele ana, nolaila, hukihuki; mai la oia i ka lupe, alaila, ike aku la au i ka huaolelo e kau ana, ke ALAULA, a me na kii e kau ana; alaila, nune iho la au iloko o'u, me ka olelo ana: "Kahaha! aole no ka paha i ike keia hoa opio o'u i kela mau olelo ao a'u ma ka Buke 1 o ko kakou kamalei, helu 6?"
                Aole o na keiki wale, aka o na makua pu no kekahi; no ka mea, ma kekahi hale e kokoke ana i ko'u wahi hale, ike aku la au i kekahi o ko'u mau makamaka e wahi ana i ko kakou kamalei i ka baka--ua olaniia i ke ahi; alaila pane aku la au penei: "Aole anei ou minamina i keia pepa ma na kii maikai maloko?" Pane mai kela, "He pepa haole keia la, no ka mea, ea, he kii ko keia--he pepa haole." Olelo aku la au, "Kuhihewa oe, no ka mea, he ALAULA keia, he pepa no na kamalii." Alaila, pane mai la kela, "He kuhihewa ko'u--kuhi au he pepa haole!"
                Nolaila, ea, e kuu hoa opio, a me na makua, mai hana aku pela. E like me ka Iesu olelo, "Aole i hoaia ke kukui i mea e waihoia'i malalo iho o ke poi, aka, ma kahi e kau ai o ke kukui, i malamalama no ka poe a pau iloko o ka hale." Mat. 5:15. He malamalama ke ALAULA no ko ka hale a pau, ke malamaia a heluheluia.
Me ke aloha. Na'u, na
S. M. P. KALEO-OPIO.

HE ILIO I HOOLA I KE KEIKI.

                He hiki no i na ilio a pau ke au i ka wai, aka o ka ilio Nupaunelana ka oi ma ka ikaika a me ka makaukau i ka au, a me ka noonoo e hoola i ka poe i haule i ka wai. Ma na aina haole, he hapa uuku loa ka poe i ike i ka au; aole e like me ko Hawaii nei—ua ike na mea a pau mai ka wa liilii loa mai. E paani pu ana kekahi keiki nona na makahiki eono me kekahi ilio ma ka uapo o kekahi kulanakauhale, a haule aku ke keiki iloko o ka wai. Lele koke aku ka ilio iloko o ka wai a hopu iho ma ke kapa o ke keiki, a huki aku iaia a loaa kekahi kao e lana ana, a paa aku ke keiki ilaila. Aole nae he hiki iaia ke kau aku maluna o ke kao. Ike iho ka ilio he hiki ole i ke keiki ke kau aku maluna, aka e lana ana no i ka wai me ka hoopaa no o kona lima i ke kao, haalele ka ilio a holo aku iuka, a loaa kekahi kaikamahine nona na makahiki eiwa e kaulai lole ana. Hopu aku ka ilio ma kona kapa, a kauo aku iaia i ka uapo, a ike ke kaikamahine i ke keiki e lana ana iloko o ka wai. Kokua pu ka ilio i ka huki ana i ke keiki a kau maluna o ke kao. A kau ke keiki, lele koke aku ka ilio iloko o ka wai a au aku i kela aoao mai o ka uapo, a hoi hou mai e paa ana i ka papale o ke keiki ma kona waha.

                E na kamalii, ua kukui aku paha ka lono ia oukou, he mai ahulau ma Honolulu nei. Ae paha; eia nae ka mea pono: e malama ia oukou iho--mai hele wale i ka la a me ke anu.

KULA POKII.

SABATI I.

1. O wai ka inoa o ka Maria kane mare?
O Iosepa.
2. Pehea kona ano?
He kane aloha loa i kana wahine.
3. Heaha ke kanawai a ke alii i hoolahaia mamua o ka hanau ana mai o ke keiki a Maria?
E auhauia na kanaka a pau i ke dala.
4. Haalele o Iosepa a me Maria i ko laua wahi a hele aku ihea?
I ke kulanakauhale o Betelehema.
5. E aha ai?
E hookaa aku ai malaila i ka auhau.

SABATI II.

1. A po iho, pehea la laua?
Aole he wahi e moe ai.
2. Hele aku laua ihea e imi i wahi e moe ai?
I ka hale hookipa; he hokele paha.
3. Ua hookipaia anei laua?
Aole; ua hooleia mai.
4. Pehea mai ka haku o ka hale hookipa?
Pane mai kela, "Ua piha loa kuu hale, aole wahi kaawale i koe."
5. Ua moe anei laua i ke alanui?
Aole; moe laua ma ka hale hanai holoholona e pili ana paha i ka hale hookipa.

SABATI III.

1. Heaha na holoholona i hanaiia ma ua hale la?
Ka bipi paha me na piula.
2. I ko laua moe ana i ka hale hanai holoholona, heaha la ka i loaa mai?
Hanau mai ke keiki a Maria.
3. Heaha ke ano o ia keiki?
Ua like me na keiki e ae i ka nana aku.
4. Pehea ko Maria ike no ua keiki nei ana?
Ike kela o ke Keiki no ia a ke Akua.
5. Heaha ka hana a ka makuahine i kahi keiki?
Wahi iho la iaia i ke kapa keiki.
6. He moe luliluli anei ko Maria e waiho iho ai i kana keiki?
Aole; hoomoe aku no ia iaia ma ka pahu ai o na holoholona.

SABATI IV.

1. Pehea ko Maria manao i kana wahi keiki?
Mea e ke aloha iaia.
2. Ua like anei ke ano maoli o loko o keia keiki me ko na keiki e ae?
Aole i like; he hewa wale no na keiki a pau ke nui iki ae, aka he hemolele loa keia keiki.
3. Aole anei he huhu a kolohe, a hoopunipuni keia keiki i kona wa i nui ae ai?
Aole loa no.
4. Pehea na wahi moe o na keiki a kakou?
He moe nolunolu, a he uluna palupalu.
5. Pehea ko Iesu moe ana?
He moe ma ka pahu hanai holoholona, a o ka mauu paha kona uluna.
                                Nolunolu no kau moe,
                                Ka ka Haku oolea hoi;
                                Hanau ia, moe ae la
                                Me na bipi kauo kaa.

KE ALAULA.
He Nupepa Hoikeike Kii.
Hoopukamau ia ma Honolulu, i kela malama keia malama e ka PAPA HAWAII, no na Kamalii Hawaii.