Ke Alaula, Volume II, Number 6, 1 September 1867 — Page 21

KE ALAULA.

BUKE II. HONOLULU, SEPATEMABA, 1867. HELU 6.

KE KOA.

                Ma keia kii ke ike mai kakou i kekahi koa e kamailio ana me kekahi wahine a me ke keiki. Ke hilinai nei oia maluna o kana pu, a ua aloha mai ka wahine iaia i kekahi kiaha wai. E kamailio ana paha kela no kana wahine a me na keiki ana i haalele ai i ka wa ana i hele ai i ke kaua. Ua eha paha keia koa ma ke kaua ana - ua ku paha i ka pu, no ka mea ke ike la kakou ua hiiia ka lima, a ua leiia i ka hainaka.

Elua ano Nui o ke Koa.

                O kekahi ano he maikai, e kiai ana i ke ola o kona aina ponoi, e hoomalu ana a e pale aku ana i na enemi o kona aupuni, ka poe e hao ana a e kaua mai ana i kona aina. O ka lua hoi o na ano koa, oia ke koa puni lealea a puni hanohano, oia ka i hele e kaua aku i na aina e me ke kumu ole. O ka hao wale a me ka puni inoa nui paha nona iho, oia kana i inu ai. O kekahi hoi ua hapai i keia oihana mamuli wale no o ka manao i ka uku mahina e loaa mai ana. Ina e hapai kekahi i keia oihana mamuli o ka manao mua, oia hoi ke aloha lahui a aloha aina hanau, he maikai kana hana a ku no i ka mahaloia mai e kona mau hoa a me kona lahui. Aka, ina mamuli o ka lua o na ano i haiia ae la maluna, he ino kana hana, a he ku i ka hoinoia a me ka hoowahawahaia.

I ke Kaua Nui Iho nei ma Amerika.

                Ua nui na makaainana i haalele wale i ko lakou noho oluolu ana ma ka home, i haalele i ka mahiai, i na hana lima a i na oihana naauao, a hele aku i ke kaua no ke aloha i ka aina, a no ka minamina i ka pono o ka lahui, a me ka manao e kinai i ka poe kipi. Ua kaulana lakou no ke aloha aina, a no ka haawi wale i ko lakou ola no ka pono o ka lahui.
                I ka wa e paikau wale ana a e noho malie ana ke koa, oia ka wa i maikai ai kona kapa, a hanohano ka papa koa i ka nana'ku; aka, i ka wa e komo io aku ai i ke kaua, alaila pau kona hooponopono loa ana i ke kapa a me ke ano a pau o ke kino.
                O ka hapa nui nae o ka poe i hele i ke kaua a i hapai i ka oihana koa, ua hana aku lakou ma na kumu e ae, aole o ke kumu akahi i haiia ai maluna, a ua hoowahawahaia ka lakou hana.

MAI PAUPAUAHO WALE.

                Ina ua nahae ka punawelewele o ka lanalana, he hana hou no kana; pela no ina he iwakalua ka nahae ana, iwakalua ka hana hou ana. Pela kakou ina ua paa ka manao e hana paha a e hooko paha i kekahi mea, ko no, aole makehewa ka hana ana. Mai hohe wale ke loaa mai kekahi pilikia; mamuli no loaa ka maha maikai a nani no hoi.

KA HOIKEIKE NUI MA PARISA.

                Hookahi mea nui a kaulana loa e hanaia nei i keia makahiki, oia ka hoikeike nui ma Parisa. I kekahi wa i hala iho nei, kono aku ke Alii o Farani, oia o Louis Napoliona, i na aupuni a pau e hoouna aku i na mea o kela ano keia ano i hanaia ma ko lakou mau aina, a e hoike ia lakou i kahi hale hoikeike nui ana i kukulu ai ma kona kulanakauhale alii o Parisa. Hoomaopopo mua no oia i ka wa - oia keia makahiki 1867, a i ka malama o Aperila e weheia'i ka hale hoikeike.

Kahi o na mea Hoike i laweia mai ai.

                I na mahina mua o keia makahiki, halihaliia aku mai Norewai, Suedena, Rusia, Perusia, Auseturia, Denemaka, Enelani a me na aupuni a pau o Europa, na mea makaukau a me na mea nani i hana ia e lakou. Aole hoi no na aina o Europa wale no na mea i laweia'ku e hoike, aka no Asia aku kekahi, a no Amerika aku kekahi, a no Hawaii nei aku no kekahi mau mea i hoounaia'ku. Ua waeia na mea i oi ka nani a me ka maikai mai kela aina keia aina, a hoounaia'ku e ka poe nona ia mau mea, i mea hoikeike wale, a hoihoiia mai no. He hale nui a nani loa kahi i hoikeikeia ai keia mau mea a pau.

Ka Weheia ana.

                I ka la 1 o Aperila i hala ae nei,k ua weheia ua hale hoikeike nei e ka Emepera o Farani, o Napoliona, ma kona hele ana me kana wahine a me na hoa e makaikai i na mea hoikeike o loko. Ia la he kanakolu tausani kanaka ai komo e makaikai i na mea maikai o loko, me ka uku aku no he wahi auhau uuku e like me na rula i kauia no ke komo ana. He hale nui no paha kela kahi i komo ai he kanakolu tausani kanaka.

                E ku ana kekahi kanaka no Siama, ma Asia, a i ka hele ana ae o ka Moi, moe loa ia ilalo ma ka papahele e like me ke ano o ka hana ana imua o na Moi o kona aina hanau. I kona ala ana ae iluna, ua pili kona lele i ke oka laau i haule ma ka papahele, a akaaka nui i a oia no kona moe loa ana ilalo.

Ka Mahele.

                Ua maheleia keia hale nui no kela aupuni keia aupuni ke kau wahi e hoike ai i na mea i haliia mai no kona aupuni. O ka hapalua nae o keia hale nui ua hooliloia no ka hoike ana i na mea o Farani, no ka oi o kana mau mea i houluuluia e hoike. Ua oi hoi ka nani o ka hoikeike ana i na mea o Farani.
                O ka oi paha o ko Enelani a me ko Rusia mau