Ke Alaula, Volume II, Number 9, 1 December 1867 — Page 33

KE ALAULA.
BUKE II. HONOLULU, DEKEMABA, 1867. HELU 9.

KA PAE ANA O NA MAKUA HELE MALIHINI.

                Ua hala na makahiki elua haneri me kanaha-kumamahiku mai ka wa i pae mai ai na Makua Hele Malihini ma Masakuseta mai Enelani mai, e imi ana i wahi e noho maluhia ai, me ke keakea ole ia mai o ko lakou hoomana ana i ke Akua mamuli o ko lakou manao he pono. Ua kau kanawai ia ka hoomana ana i ke Akua i kela kau ma Enelani, a ma ke ano hookahi wale no i aeia na kanaka, e hoomana iaia; oia ka aoao hoomana aupuni ma Enelani i kapaia ma Hawaii nei o ka aoao Bihopa. Manao kekahi poe haipule he waiwai ole keia mau kanawai a me na rula i kauia no ka hoomana ana, a he mea keakea hoi i ka pono uhane. O ka hoohaahaa iho imua o ke Akua ka lakou i makemake ai, aole o ka hoohanohano ma na mea a me na hana pili i ka hoomana. Kue ka manao o ka Moi a me na 'Lii i keia manao, a hoopilikia mai lakou i na Puritano no ko lakou hoomana okoa. No ka loaa ole i keia poe ka maha a me ka maluhia o ka noho ana ma ko lakou mau home ma Enelani, a keakea mau ia ko lakou hoomana ana, haalele iho lakou i ko lakou one hanau, a holo aku i na aina e a hiki loa iho i Amerika. He mea pilikia loa no paha i ko lakou manao ka haalele ana i na home oluolu, na mahinaai maikai, na luakini, na kula, na hoalauna, a me na pilikana a pau, e holo aku i ka aina waoakua o Amerika, a ma Nu Enelani e noho aku ai i kahi aina o na Ilikini hihiu, o na bea a me na iliohae, a me na ululaau loloa pouliuli. Aka ua manao iho lakou he oi aku ka pono o ka noa ana e hoomana i ke Akua, mamuli o ka makemake, mamua o ka oluolu a me ka lealea a pau o ka noho ana ma Enelani.
                Maluna o kekahi moku i kapaia ka Pua-o-Mei (Ma yflower) i holo ai ka mua o lakou a hiki i Amerika. Holo pu na wahine a me na keiki. He hookahi haneri me umi-kumamahiku ka huina pau o lakou, ke helu pu ia na wahine a me na keiki. He kanaha-kumamakahi ka nui o na kane kanaka makua. Loaa aku ia lakou ka Lae Koka; a i ka la 22 o Dekemaba, 1620, pae lakou i uka ma ka pohaku kaulana o Pelimauka (Plymouth), ma Masakuseta, ma ka hema iki mai o kahi i kukuluia ma ia hope mai ke kulanakauhale nui o Bosetona. I ka hooilo ko lakou pae ana i uka ma kela aina waoakua a kukulu aku i ka lakou mau hale me ka pilikia loa iloko o ke anu a me ka hau. Ma ia hope mai ulu ae lakou a piha ia aina i ka lakou mau mamo a hu iwaho. a hiki loa mai kekahi o lakou i keia welelau o ka honua e hoolaha ana i ka pono--oia o Tatina ma, Binamu ma, a me ko lakou mau hoa hana.

HE WAHI KAIKAMAHINE LOKOMAIKAI.

                Agata ka inoa o ua kaikamahine nei; he mau makua ilihune kona--he mau makua alakai pono nae iaia. Oia hookahi wale no ka laua keiki, a ua ao laua iaia e makau i ke Akua, a e aloha i kona hoalauna me ia i aloha'i iaia iho. A ma kekahi ahiahi o ka la Sabati, heluhelu kona makuakane iaia i kela wahi moolelo ma Luka 10:30-37, no ka hana lokomaikai a kekahi kanaka no Samaria. (Heaha Samaria? Aia mahea? Heaha ka manao o na Iudaio no ia wahi?) A pau ka heluhelu ana, olelo oia iaia, "he nui na mea e hiki ai ia oe ke malama i keia kauoha a Iesu; 'e hele oe e hoohalike me ia.'" (E hai mai kekahi haumana i ka hana aloha a ua kanaka Samaria nei.)
                A lohe o ua o Agata i keia olelo a ka makua, lilo oia i ka noonoo, a i ka pule i ke Akua i hoomaopopoia, a i kuhikuhiia kekahi hana aloha i hiki iaia ke hana. Aole liuliu a loaa kana mea i noi aku ai. Hoea mai ma kona wahi he kanaka koa, ua lilo kekahi wawae ona, a he wawae laau kona pani--aloha ino! a ua loohia koke ia oia i ka mai nui. Ua waihoia oia maloko o kahi hale ino; he opala wale no kahi moe, a nui kona pilikia. A lohe o Agata i kona mai, hu kona aloha, a hele oia e ike iaia i kela la i keia la, me ka lawe pu me ia i wahi keneka, i mea kokua iaia. A ma kekahi la, olelo ua koa mai nei: "E ke kaikamahine aloha, ua lohe au he mau makua ilihune kou. Nohea mai ke keneka au e lawe mai nei no'u i kela la i keia la? Pilikia paha oe? Aole o'u makemake e hoopilikia ia oe."
                Pane aku oia: "Aole o'u pilikia. Ma ka'u hana lima no i loaa ai keia mau keneka. ma ko'u hele ana i ke kula, hele e au mamua ma kahi o na ohelo papa, a ohi a hoopiha i kuu ba-