Ke Alaula, Volume II, Number 9, 1 December 1867 — Page 34

34 KE ALAULA.

keke i na ohelo, a laweia i ka hale kuai, a kuai aku, a loaa mai ka uku. Nolaila mai keia wahi keneka. Ua ike a ua hoapono mai kuu mau makua i keia hana ana a'u. Ua ao mai laua ia'u e kokua i ka poe pilikia, me ka hoolana i kuu manao ma keia olelo, "Ua oi aku ka pomaikai o ka haawi ana aku mamua o ka loaa ana mai."
                "He kaikamahine maikai oe," wahi a ua koa nei; "na ke Akua e hoopomaikai ia oe me kou mau makua no keia aloha ana mai ia'u."
                A hoi aku o Agata a hai i kona mau makua i keia mau olelo a ua koa pilikia nei, a me ko ke Akua ae ana i kana pule. Mahope iho, komo kekahi Generala nui hanohano iloko o ia kulanakauhale, a lohe oia i ka pilikia o ua koa nei, a hele oia e ike iaia, no ka mea he hoa kahiko oia nona. A hai aku ua koa nei i ka Generala i ka hana lokomaikai a Agata, pane kahaha oia: "Ka! he kaikamahine liilii ilihune anei ka i hana pela ia oe? Nani kona aloha! ua oi aku i ko'u." A lawe oia i ua koa mai nei i ka hale malama i ka poe mai, alaila kii aku ua Generala nei i ke kaikamahine lokomaikai a kamailio pu me ia, a hoopuka i na olelo hooluolu iaia, a hai mai o Agata i kana mau pule a me kona olioli no ko ke Akua ae ana iaia e hoohalike me ke kanaka no Samaria, ma ke kokua ana i ua koa pilikia nei. O keia hana, a me keia kamailio ana o ke kaikamahine, ua lilo ia i mea e huli mai ai ua Generala hanohano nei, a lilo oia i kanaka pono.
                Ea, e na kaikamahine, me na keikikane no hoi, ka poe e heluhelu ana i keia wahi moolelo maikai no Agata, e hele oukou e hoohalike me ia; e imi, a e hana lokomaikai aku i ka poe pilikia. W.

NA KEIKI MA KA LANI.

( GOLDEN CHAIN.)

[LEO:-- Children in Heaven.]

1. E mele aku ia Iesu,
Na kamalii oonei,
Me kamalii maikai mao,
I ku a a mele e.
CHO.--Mele, nani, nani,
Nani, haleluia,
Mele, nani, nani,
Nani, haleluia.
2. Pehea lakou i hiki ai.
I kela ao maikai,
Nawai lakou la i kaikai
Ia wahi e mele ai?
CHO.—Mele, nani, nani,
Nani, haleluia,
Mele, nani, nani, Nani, haleluia.
3. Ua hele mai la no Iesu,
A make no lakou,
A nona mai ka makaukau
E mele pu mao.
CHO.--Mele, nani, nani,
Nani, haleluia,
Mele, nani, nani,
Nani, haleluia.
4. E ae e komo mai Iesu,
E hoomakaukau no
Na pokii nei e mele pu,
Me kamalii mao.
CHO.--Mele, nani, nani,
Nani, haleluia,
Nani, nani, nani,
Nani, haleluia.
WAIKOLOA.

IE RUSALEMA.

                E like me Honolulu ma Hawaii nei, pela o Ierulasema ma Palesetina. O ke kulanakauhale alii kela o ka aina o na Iudaio. Aia no ua kulanakauhale la i keia wa, ke ku nei no ma kona kahua kahiko, aole nae i like kona nani i keia wa me ka nani o ka wa mamua, ka wa ia Solomona, a me ka wa mahope mai i hele pinepine ai ko kakou Haku, Iesu Kristo, ilaila e hoike ai imua o na kanaka na waiwai lana ana i lawe mai ai i ko kakou honua nei.
                Aole nae o ka moolelo o Ierusalema ka kakou e noonoo ai i keia wa, aka o ke ano o keia kii oia ka kakou e hoomaopopo iki ai. Ke ike nei kakou he awawa uliuli mawenakonu o ua kii la. O ke kahawai ia o Kederona i oleloia ma ka moolelo o ke kumakaia ana o Iesu. O kela mau laau he mau laau oliva. O ka puu ma ka aoao lima hema o ke kii, e pii la kahi alanui e kuakea mai la, oia no ka Mauna o Oliveta, kahi i pii pinepine ai o Iesu me kona mau haumana, e hooluolu ai ia lakou iho i ka liula o ke ahiahi.

Ke Kulanakauhale.

                Aia no ma ka aoao lima akau o ke awawa uliuli, ma ke ahua e keokeo mai la, aia malaila ke pa pohaku kiekie a puni, a aia maloko na hale, he kinikini wale, aole no e hiki ke hoomaopopo loa ma ke kii ka nui wale o na hale o loko o ua pa kulanakauhale nei. E nana pono iho oukou, a e ike no he hale nui poepoe o luna kekahi. Ua kapaia, kela hapa poepoe maluna he dome. O kela hale nui oia ka luakini o na Mahometa; ua kapaia ko lakou mau luakini he mau moke, a o ka inoa o keia moke nui, oia no ka "'Moke o Oma." Ua kukuluia ma ke kahua kahiko kahi i ku ai ka Luakini a Solomona, a he kahua kapu loa kela i ka manao o na Iudaio a me na Mahometa. Aole nae i ae iki ia na Iudaio  e komo maloko o kela moke i keia wa, mawaho wale no lakou e uwe mai ai i ka pau ana o ka nani o ko lakou luakini kahiko.

Na Alanui.

                Ke ike nei no hoi kakou ma keia kii he mau alanui; ua iho mai kekahi alanui mai loko ae o ka puka pa o Ierusalema, a i ke awawa o Kederona a kakou i kamailio mua ai. Ma ia alanui i iho mai ai o Iesu me kana mau haumana a komo i ka mala o Ketesemane, i ka po ana i pule ai me ke kaumaha o ka naau, a i kumakaia ai e Iuda. Aia paha kela mala iwaena o kela ululaau ma ka pii ana aku i ka Mauna o Oliveta. Pomaikai paha kekahi mau kapuai o kakou ke hehi ma kahi i hoomalumaluia i kela mau laau oliva kahiko loa.
                Aia ma ka lima akau kekahi alanui e waiho loihi la, a he huakai kanaka e hele la me ko lakou mau kamelo lawe ukana. Mai ka muliwai Ioredane mai paha ia poe e hele nei, a e komo ana paha lakou i na ipuka o ke kulanakauhale Hemolele.

Siloama.

                Aia mao aku o ke awawa uliuli he awawa hohonu, a he paliku na aoao. Aia ma na poopoo o ia awawa ke kiowai o Siloama a me kekahi mau wai mapuna. Aia no malaila ke alanui e hele aku ai i Betelehema. E nana hoi kakou i ka poe e hoomaha ana ma ke oioina ma ka aoao mamua mai o ke kii. Aia no hoi na ao e kau mai la maluna o ke kulanakauhale, ua like paha me ka opua o Hawaii nei ke kau ana mai o ia mau ao, aole nae he kai malalo, he mau kualapa loihi ke waiho mai la. Ua lawa paha ia kakou keia nana kii ana, nolaila e hooki paha i nei kamailio ana a i kekahi wa hou ae. C. L.

MAMA LAWE PAU LOA KO.

                I ke kamailio ana o kekahi kumu iloko o kekahi Kula Sabati, hoopuka oia i keia moolelo: E ninau mai paha auanei kekahi o oukou, e na keiki, ia'u. Pehea la e lilo ai au i keiki na ka Haku? a nolaila, e hai aku au ia oukou no kekahi kaikamahine. E paani ana kekahi kaikamahine uuku loa ma ka moena, ua piha kona wahi lima i na ko momona, a ua piha ka naau i ka makemake no ia mea ono. I mai ka makuahine, "E Fane, e ho mai ia mama i ko."
                Nana iho kahi keiki, eha ona wahi ko; kali iki iho, a haawi aku hookahi i ka makuahine. Pane hou mai ka makuahine, "E Fane, e ho mai ia mama i ko."
                Kali iki iho ke keiki, a haawi aku hookahi, koe elua.
                Olelo hou mai ka makuahine, "E haawi hou mai i ko na mama."
                Nana iho ke keiki, elua wale no ko i koe ma kona lima: kanalua kona manao, a kali iki iho, alaila kikoo iho kekahi lima a haawi aku hookahi, koe iho hookahi.
                Pane hou mai ka makuahine, "E haawi hou mai i ko na mama."
                Nana iho o ua o Fane, hookahi no ona ko i koe. Pupuku iho ka io o kona auwae, a helelei iho na kulu waimaka ma kona papalina. Kali