Ke Alaula, Volume II, Number 10, 1 January 1868 — Page 37

KE ALAULA.
BUKE II. HONOLULU, IANUARI, 1868. HELU 10.

KE KILAPE. (THE GIRAFFE.)

                He holoholona hanohano loa keia e ku nei me kana keiki uuku ma kona aoao. O ke kamelopadi ka inoa kahiko i kapaia, aka i keia wa, ke kapaia nei he kilape. Ma na aina mehana loa o waena o Aferika kona wahi i noho paa ai. Ua hopuia ekolu o keia mau holoholona kupaianaha a hoounaia ma kekahi moku i Parisa, ma Farani, i ka makahiki 1853. No ke anu o ka hooilo mua a lakou i noho ai malaila, make hookahi o lakou. Mahope mai hanau mai kekahi o lakou he keiki; oia keia wahi kilape keiki i hoikeikeia ma ke kii maluna ae nei. Akahi no paha a hanauia kekahi o keia ano holoholona ma Europa.
                He holoholona hana inu ole mai a makau wale keia. He nui kona mau maka, a he loihi loa ka a-i. Ke poo ua ano like me ko ka lio: o na pepeiao nae ua like me ko ka bipi. Maluna o ke poo elua mau kiwi pokole--ewalu paha iniha ko kekahi. He umi-kumamawalu kapuai ke kiekie o keia holoholona, ke hoopololei oia i kona a-i. Ua oi ke kiekie o ke kilape mamua o na holoholona e ae a pau e hele nei maluna o ka honua. O kana ai, ola na lau o na laau loloa a me na ululaau. He keokeo ano melemele kona hulu, i paa i na kikokiko hauliuli a puni, e like me ka mea i hoikeia ma ke kii, a he nani maoli no. I kona hiamoe ana, kukuli aku oia ilalo e like me ke kamelo, me ke pelu mai o na wawae malalo mai o kona kino. Ua like ka holo o ke kilape me ka holo o ka lio mama loa.
                Pepehiia keia holoholona a aiia ka io e na negero ma Aferika, a ua manao nui ia no hoi ka ili no ka nani o ka hulu. Make no hoi keia mea nui i na liona i kekahi manawa. He hiki ole i ka liona ke nahu mai malalo; no ka loihi o na wawae, hala loa ke kino a me ke poo iluna lilo.

I ka wa e hookokoke mai ka liona, peku mai paha kela me kona mau kapuai nui, a i ole ia, holo mama aku i kahi e. Hoomakakiu aku ka liona, a lele mai, kau ma ka hokua, malaila e paa ai a e nahu ai a make loa. I kekahi manawa hoi, no ka nui launa ole o ka holo, kapeke ae a makau paha ka liona, a lele ilalo, a ola mahunehune ke kilape, a pakele hoi i ka aiia mai o kona io.
                Ano e no na holoholona o Aferika. Ilaila e noho ai ka elepani, ka liona, ke kika, ka hipopotamu, a me ke kilape.

HE PALAPALA NO KAUAI MAI.

                Ua halawai ko makou mau maka me kekahi palapala mai kekahi haumana o ke Kula Kaikamahine o Waialua i hookuuia aku nei ma ka malu o ka makuahine nana i malama iaia i na makahiki o kona noho opiopio ana, a holo aku i ka mokupuni o Mano Kalanipo e hookomo aku i ka ike i na lolo o na kaikamahine e noho la ma ia welona o ka la. O kekahi o na manao o ia haku ana ka makou i kope malalo ae nei:

"LIHUE, KAUAI, Dekemaba 5, 1867.
                "I kuu mau hoa o ka imi naauao, mai ka makahiapo o ke kula a ka muli loa, maluna iho o oukou ko'u aloha e noho nei. Ke lohe nei au i ka inoa maikai o ka kakou kula; nolaila, o ke kulanakauhale i ku ma kahi kiekie; aole loa ia e nalowale. E hoomau oukou ma na hana a ka Haku, mai pauaho.
                "I ko maua haalele ana ia Waialua, hiki aku i kahi o Kauka Kulika ma Manoa; a hiki i ka Poano, hora eha, kau maluna o ka moku, o Mele ka inoa. Ko makou holo like ana mai me Neke Mela; a ia po a ao, mawaho ae makou o Waianae. Hoomanao ae la au i kahi a na iwa o Kaehukai i hele ai i ka makaikai, me ke kulu pu o na waimaka. Ia la no au mai i na ale o Kaieie, huli aku nana i na pali o Kaala, a e ake no ka manao o ka ike aku ia Haleiwa.
                “I ka la elua o keia malama ku mai i Nawiliwili, a holo loa aku i Lihue i kahi o Rev. J. Waiamau. I ke kakahiaka ana ae hele mai i ka hale