Ke Alaula, Volume II, Number 12, 1 March 1868 — Page 47

KE ALAULA. 47

maa na hoahanau i ke kokua mahina hou i ke aupuni o ka Haku, a me ka hookaa i na lilo no ka lakou mau buke a palapala liilii. Aole no i holo pono keia hana ma na mokupuni e ae, ma ia mau wahi elua wale no. O ka aila niu ka mea nui i kokuaia mai. O ka nui hoi o na loaa o ka aila o ia mau wahi elua i laweia mai ma keia hoi ana mai o Hoku Ao, ua like me $300. E mahaloia keia hana a keia mau keiki a kakou. E ao paha na makua o Maui a e hoomahui i keia hana maikai o na keiki hou o ka Pae Aina o Ebona a me Kusaie.

Ko Maikonisia Nonoi.

                Lohe o Paulo i ka po, ma ka hihio, i kekahi kanaka no Makedonia e nonoi mai ana, i mai la, "E hele mai i Makedonia e kokua mai ia makou." Oia no ka leo kahea o ko Maikonisia i ko Hawaii nei, "E hele mai e kokua ia makou." Ua hooholo ka aha misionari o Maikonisia i ewalu misionari hou no ka Pae Aina o Kilipati, a i eha no ka Pae Aina o Ebona, huiia he umi-kumamalua misionari hou me ko lakou mau wahine he umi-kumamalua. Elua kakini misionari hou! Auhea oukou na haumana o ke kula kahuna o Wailuku, a me na haumana o na kula nui e ae, a me na kula kaikamahine! Eia ke hamama nei he ipuka nui e komo aku ai e hana ma na kihapai. Pomaikai oe, e Hawaii, ke lilo oe i makua-hanai pono i na keiki he nui. E ku mai auanei lakou mahope a e hoomaikai mai ia oe.

KEIKI MOA.

"E ioio ana
Na keiki moa nei,
E holoholo ana
Ma kahi ino e.
Kahea ka makua,
E hoi mai oukou,
Malalo o kuu malu,
A lohe ole no.
"Mau ko lakou hookuli
A ioio ae;
Hoolohe ka popoki,
Kiai a poi mai.
Auwe na keiki moa!
Auwe no hoi oukou,
Ke noho a haalele
I ka Makua mau."

EONO RULA NO KA MALAMA ANA I KE OLA KINO.

                Akahi, i mehana mau ke kino. Elua, e hoomaopopo i ka wa pono e ai ai, a e paina me ke akahele. Ekolu, i like na hana o kekahi la me kekahi, aole o ka pakele loa ko kekahi a noho wale kekahi. Eha, e ai pakiko i ka aina ahiahi, aole hoi e ai i ke aumoe, aka i ke ao no. Alima, i maemae mau ka lili a kou kino holookoa. Aono, e hoolawa pono i na hora hiamoe o ka po, aole o ka hoopokole mai.

HE MANEAPA NO KA PAE AINA  KILIPA TI.

                Ei'ae he kii no na hale ahaolelo nui o ka Pae Aina o Kilipa ti. Ma ia mokupuni aku, ia mokupuni aku, kahi i nui ai na kanaka, ua kukuluia ka hale ahaolelo nui, e hakahaka ana o lalo a puni, e like me ke ano o ka lakou mau hale a pau. Akoia ko laila hale i ka lauhala. Nui maoli keia mau hale ahaolelo; he hiki no i kekahi mau haneri kanaka ke komo a noho iho i ka manawa hookahi. Kapa aku lakou i keia mau hale nui he maneapa. Ma keia mau hale nui e hui ai na 'lii a me ka lehulehu o na makaainana e kukakuka pu a e hooholo ai i na manao e pili ana i ka lehulehu.
                Ma keia kii ke ike nei kakou ia Hoku Ahiahi, he wahi kiakahi i haawiia e na keiki kula Sabati o Kaleponia i na misionari o ka Pae Aina o Kilipati. Ma kahi mamao iki aku ke ike nei kakou i kekahi waa maoli o lakou e holo ae ana.

KE KAPA KOMO KEOKEO.

                Ua hoomakaukauia he ahaaina nui no na kamalii ma ka hale hanohano o Mr. Pama, a ua pau ka hapa nui o na kamalii ma ke kau hale i ke konoia. Iwaena o lakou he wahi pokii, o Dela. O kana ahaaina mua ia, a ua piha oia i ka olioli. E hanaia ana kekahi kapa komo hou nona, he kapa uliuli. Oia no kona mea i makemake nui ai; a nolaila, lele oli kona wahi puuwai, oiai ua like me na lani uliuli ana i hauoli nui ai i ka nana aku, a me na onohi maka uliuli o kana wahi kii bebe. He nui no na kapa uliuli iaia mamua, he onionio a he kikokiko, aka o keia, wahi ana, "he uliuli wale no, nani kupono i ke 'lii wahine."
                Hele mai la i kakahiaka ae ka wahine humuhumu a hookuku i ka lole, me ka olelo e hoi no ia a humuhumu, i paa pono mamua ae o ka manawa i makemakeia, oia hoi ia ahiahi ae. Nolaila ua olioli loa o ua o Dela nei, a hooikaika pono ma kona mau haawina a pau ma ke kula kamalii. I kana hoi ana i kona home, a hiamoe ia po, moeuhane iho la ia, a o na mea a pau ana i ike ai ua pau i ke kahikoia i na kapa uliuli, a ua kuai aku o Pomepe i ka lio, a ua loaa hou mai he wahi lio nani, me ka huelo uliuli a me ka hulu a-i uliuli.
                Aka, oiai e moe oluolu ana o Dela a me na pokii e ae, puoho ae lakou i ka lohe ana, iwaena o ka po, "Ua wela ka hale e! ua wela ka hale e!" a kani mai na elelo hao o na bele, e hoopuiwa ana i ke kaona. Pau ka hale kuai buke i ke ahi, a me ka hale o na wahine humuhumu la, a pau pu na mea a pau o loko i ke ahi. Nui na buke naauao i poino, a ua kaumaha loa ka mea nana ua hale kuai buke la no kona poho; pela no hoi ua wahi wahine humuhumu la, i kona ike ana i kana mau waiwai e pau ana iloko o ke ahi enaena, me ka hiki ole ke hoopakeleia, ua ehaeha loa kona naau. Aka, iwaena o na mea a pau i poho ma ua ahi la, aole i oi aku ke kaumaha mamua ae o ua o Dela, kahi pokii nana ke kapa uliuli, no ka mea ua maopopo no iaia aole oia e ike hou aku i kona kapa komo nani. Ua nui kona olioli mamua i ka manao e hele ana i ka ahaaina, kahi e lealea ai; ano nae aole hiki, no ka mea ua pono ole na kapa komo i koe, ua mae, ua pilikia, ua hele a weluwelu. Kaumaha loa ia; iloko o ka hora okoa aole hiki i kekahi mea ke hooluolu iaia. A liuliu nae, i kona noonoo ana he mea ia e kaumaha pu ai kona makuahine, hoopau ae la oia i kona uwe ana, holoi ae la oia i kona mau maka me ka hainaka, a hooikaika ia e hoopoina i kona hoohokaia ana. Aole nae hiki ke hoopoina loa, aka ulu hou mai kekahi manao: aia ka kona nahenahe keokeo! Ina hoi i aianaia, ua like me he mea hou la; e holo ae la ia e ninau i kona makuahine.
                A ahiahi ae la, hele o Dela i ka ahaaina me kona kapa komo keokeo. Iwaena o na pokii a pau ma ua rumi la, aole i oi ka olioli mamua ona. A pau, a hoi ae oia, i kona hahai ana i ka moolelo o ua ahaaina la, ninau kela, "Pehea la hoi au ina aole o kuu kapa komo keokeo?"
                Alaila haha oluolu kona makuahine i kona papalina, a nana aloha ae la i kona mau maka alohilohi, i ae la: "Eia wale no ke kapa komo e pono ai i kuu wahi pokii e kaumaha ai. Mahope e hiki mai ana he leo kahea mai ka Makua maikai e noho la ma kana home nani i ka lani, e hele ae ilaila. Alaila e ninau kakou, 'Heaha ka mea kupono e komo ai?' a nani ka pilikia ina aole i makaukau i na 'kapa komo keokeo!' O Iesu wale no ka mea e haawi mai ana i kela aahu maikai a nani. E pau ana na lole e ae i ke ahi, i ka mu, a me ka popo; ina nae e koe ana ke kapa komo keokeo mai a Iesu mai, aole no e hilahila kakou ke ku imua ona."
                E na pokii, ua lako anei oukou i ua kapa komo keokeo la? Ina aole, e pule aku ia Iesu e haawi mai i ke "kapa komo" o kona pono, i uhiia ko oukou mau kino, a i ole e kipakuia oukou mawaho ma ka pouli mau loa.