Ke Alaula, Volume III, Number 4, 1 July 1868 — Page 16

16 KE ALAULA.

HELE I KE KULA.
Leo—CHRISTMAS SONG.

Allegretto.
1. Ho, ho, ho, ko - ko - ke no Koo - nei wa ku - la, e o - li pu; Ua pau ka hoo - ma - ha, mai a ka - kou; E a - la e - le - u, hoo - lana ma - nao. Ha, ha, ha! e o - li pu la, Ua pau ka ma - ha, hoi e ku - la; E pa - pa - na 'ku no i o, i ka ha - le ku - la i na - au - ao.
2. O, O, O! he bele no,
Kani ka bele a o, o, o;
Hoolohe a ku, a lelele pu,
Mai hele lolohi, e awiwi no.
HUI—Ha, Ha, Ha! e pii pu la,
Ua pau ka maha, hoi e kula;
E papana ka no i o,
I ka halekula i naauao.
3. Nou, nou, nou ! makani no,
Luli, ke hele, io io;
E ku kanalua anei kakou,
E ku olioli a hoholo pu.
HUI—Ha, ha, ha! e oli pu la, &c.
4. Ka ha, ha! he ua ka!
Pulu ke hele, e noho la;
E holo kiki, hoopau molowa,
E pau e ka ua, a poha ka la.
HUI—Ha, ha, ha! e oli pu la, &c.
5. Ho, ho, ho ! i ke kula no.
Kula ia noa, a Sabati pu,
E imi a mau i ka naauao,
E huli, halalo, a pii aku no.
HUI—Ha, ha, ha ! e oli pu la, &c.
6. Ho, ho, ho! e ike no.
O no ka bele, a o, o, o;
E huli i pau ae ka naaupo,
E pule ia Iesu, e kokua mau.
HUI—Ha, ha, ha! e oli pu la, &c.

KULA POKII.

SABATI I.
LAZARO.—IOANE XI., 1-47.

1. He mau hoa'loha e ae anei ko Iesu, o na haumana he umi-kumamalua wale no anei?
He mau hoa'loha e ae no kekahi, o Lazaro a me kona mau kaikuahine elua.
2. Owai ko laua mau inoa?
O Mareka laua o Maria.
3. Launa pinepine anei lakou me Iesu?
Ae; hele pinepine mai o Iesu i ko lakou hale a kamailio pu me lakou.
4. Heaha ka Mareka mea i manao nui ai e hana lokomaikai aku ia Iesu?
Manao nui kela i ka hoahaaina aku iaia i na mea ai maikai.
5. Heaha ka Maria mea i manao nui ai?
E noho ma kona wawae e hoolohe i kana olelo.
6. Owai ka i mai loa iho?
O Lazaro.
7. Hoouna aku na kaikuahine ia wai e hele mai a hoola iaia?
Hoouna aku laua ia Iesu ma kahi loihi.

SABATI II.

1. A hiki mai o Iesu, pehea o Lazaro?
Ua make e no; eha la i nalo ai.
2. Kanuia oia mahea?
Ma kekahi ana nui, ua paniia i ka pohaku.
3. A hiki mai o Iesu, owai ka i hoohalawai me ia ma ke alanui?
O Mareka.
4. Pehea aku oia?
Ina maanei oe, ina aole i make kuu kaikunane.
5. Pehea aku o Iesu?
E ala hou mai no kou kaikunane.
6. Kii malu aku o Mareka ia wai?
Kii aku oia ia Maria e hele io Iesu la, a hele pu laua me ka uwe nui.
7. Owai ka i hahai pu me laua?
O ka lehulehu o ko laua mau makamaka e uwe pu ana.

SABATI III.

1. A hiki aku o Maria io Iesu, pehea aku oia?
E ka Haku, ina maanei oe, ina aole i make kuu kaikunane.
2. I ninau aku o Iesu pehea?
Mahea la oukou i waiho ai iaia.
3. A hele pu lakou e ike i ka lua kupapau, e uwe nui ana kanaka, pehea o Iesu?
Uwe waimaka ia.
4. A hiki lakou i ke ana kahi i kanuia o Lazaro, pehea o Iesu?
I mai kela, e lawe ae i ka pohaku e pani ana.
5. Pehea ka manao o Mareka?
Kuhihewa kela e manao ana o Iesu e nana i ke kupapau.
6. Pehea aku o Mareka?
E ka Haku, ua pilau ia, no ka mea o ka ha keia o ka la.
7. Pane mai o Iesu pehea?
E manaoio oe, a e ike oe i ka nani o ke Akua.

SABATI IV.

1. A lawe lakou i ka pohaku, pehea o Iesu?
Nana aku kela i ka lani, a hoomaikai i ka Makua no kona kokua mau mai iaia e nana i na hana mana.
2. Owai e ku ana malaila?
Na kanaka he nui wale, e nana mai ana iaia.
3. Pehea o Mareka laua o Maria?
E ku ana no laua, e ake ana e ike aku ia Lazaro.
4. Kahea aku o Iesu me ka leo nui pehea?
E Lazaro, e hele mai oe iwaho.
5. Pehea ua kupapau nei?
Lohe no oia i ko Iesu leo, a hele mai i ka puka o ke ana.
6. E paa ana oia i keaha?
Ua wahi paa ia i na lole kupapau.
7. Pehea aku o Iesu?
E wehe iaia a hookuu aku.
8. Pehea loa laua; a ike na kanaka a pau o Iesu ke Keiki no ia a ke Akua.

KA HOLO ELUA ANA O HOKU AO HOU.

                Haalele mai o Hoku Ao i ke awa o Honolulu i ka la 26 o Iune, e alo i na ale o ke kai lipolipo o ka Moana Pakipika, a e imi mai aku i na paahana a na ekalesia e noho ia ma Maikonisia. Ua hala aku maluna o Rev. H. Binamu opio a me kana wahine e noho iki aku ma ka Pae Aina o Kilipati, a hoomau aku i ka unuhi ana i ka ke Akua olelo iloko o ka olelo o ka aina.
                Holo pu aku hoi o G. Leleo, ka mua o na haumana o ke Kula Kahuna o Wailuku i holo i na aina e, a me kana wahine o Loe, ka mua o na haumana o ke kula o Waialua i holo aku e lawe i ke ola no ko na aina pouli. Ukali aku kekahi o kona mau hoa kula, o na kaikamahine o ke kula o Waialua, a maluna o Hoku Ao, a uwe pu i kona haalele ana mai i kona one hanau. E na hoa e ukali aku oukou i keia mau koa opio i hele mua ma ke alanui o ke ola. "O ka mea haalele i na hale, i na hoahanaukane, i na hoahanau wahine, i ka makuakane, i ka makuahine, i ka wahine, i na keiki, i na aina hoi, no ko'u inoa, e loaa mai iaia he pahaneri, a e lilo mai iaia ke ola mau loa. Pomaikai io no! Aloha olua na koa opio. Na ka Haku e hoopomaikai ia olua a hiki aku i ka hopena o ka olua kaua ana.

NA BAIBALA HOU.

                Ua hiki mai nei iloko o keia mau la na Baibala hou o ka pai hou ana malalo o ka hooponopono ana o Rev. E. W. Kalaka, me na kuhikuhi ma na aoao a me na Kauoha Hou hoi, me na kuhikuhi ma na aoao. Eono ano okoa o keia mau Baibala, o ka ili a me ka wahi ana. Ua hoohinuhinuia kekahi me ka wai gula, a nana hiehie loa no. Ua hooponoponoia ke kumukuai e like me ke ano nani o ka ili i wahiia, mai ka $3 a hiki aku i ka $12. I keia wa ua paiia a ua lahaka ke Akua olelo a pau ma ka olelo Hawaii, ka olelo Tahiti, ko Hamua, ko Tonaga, a me ko Piki. O ka hana nui no keia o na misionari Euanelio a pau ma na aina kahi a lakou e hele aku ai. O ka hana hoi keia a na misionari Katolika e waiho loa ai; aole loa no e hapai iki i keia hana maikai, ka mea hoi e alakai pono i na kanaka a pau a hoopakele ia lakou mai ka make aku, ke hoolohe pono ia kana mau kauoha.

KE KULA NUI O MAKAWAO.

                Ua lohe mai nei makou, e hoike makahiki ana ke Kula Nui o Makawao i ka la 23 o Iulai e hele nei. Aole e ole ka hoi hauoli mai o ka poe a pau e naue aku ilaila e hoolohe a e ike i na hana a na kaikamahine i noho i ka iu ano o ia hale hoonaauao a na hoa'loha o ka lahui Hawaii e malama nei. Kekahi no keia o na puu oioina a ka maka e ike ai ma keia waoakua. E hele mai na makua e hoolana i ka manao o na keiki a oukou.

                O ka hana, oia ka hua o ka laau; o ka olelo waha, he lau wale no ia.

KE ALAULA.
He Nupepa Hoikeike Kii.
Hoopuka mua ia ma Honolulu, i kela makahiki keia makahiki e ka PAPA HAWAII, no na Kamalii Hawaii.

                25 keneta ka uku no ka makahiki no ka pepa hookahi, 20 keneta akahi ka uku no na pepa ke iwakalua a oi aku paha ma ke ope pakahi, ME KA HOKAA MUA IA MAI.
O. H. KULIKA, Luna Hoopuka.