Ke Alaula, Volume III, Number 5, 1 August 1868 — Page 20

20 KE ALAULA.

NANI KE AO.
THE BEAUTIFUL WORLD.—Happy Voices.

1. He na - ni na ku - ku - na O - li - no o ka la, Ma - li - e a ma - ha - na A na - ni ke na - na. He na - ni no ke a - nu, Ka mea e o - la ai, He na - ni hoi ke u - a mai, i mau na ki - ha - pai. HUI. Na - ni ke ao, na - ni ke ao, Na - ni, he na - ni ke ao; Na - ni ke ao, na - ni ke ao, Na - ni, he na - ni ke ao.

2. He nani na awawa,
Na mauna, na papu,
Na kula uliuli,
Na mala pua mau;
He nani no na aina,
Na mokupuni nei.
A me na muliwai.
HUI. - Nani ke ao, nani ke ao, &c.

3. Ke ao no nae maluna
Ka i nani oi ae.
He nani mau ko laila.
He nani mae koonei;
Pa ole ae malaila
Na iho nae ia nei.
Aohe wela e mae ai
Na lani, na puu maikai.
HUI. - Nani ke ao, nani ke ao, &c.

4. Uwe maanei a luhi.
Aohe uwe mao.
Aole he waimaka,
He oli ko lakou;
Aohe pua make
E lele luku mai,
Aohe lua kupapau
E weliweli ai.
HUI. - Nani ke ao, nani ke ao, &c.

5. E mau ke kau olaila,
He awakea mau,
Aole he hooilo,
Aole hoi he po,
Aohe he pololi,
Aole makewai,
Maona no a ola mau.
A mau ka pomaikai.
HUI. - Nani ia ao nani ia ao,
Nani, he nani ia ao,
Nani ia ao, nani ia ao,
Nani, he nani ia ao.
H. M. H.

KULA POKII.

SABATI I.
KOMO O IESU I IERUSALEMA.—MAT. XXI: 1-11, 14-17.

1. O ka hana hea la ka i oi o na hana mana a pau a Iesu?
O ka hoola ana ia Lazaro, ka mea i make a moe eha la ma ka lua kupapau.
2. Oluolu anei ka poe ino i ko lakou lohe ana i keia hana a Iesu?
Aole; o ka oi aku no ia o ko lakou huhu.
3. Pehea ka lakou olelo?
E pepehi koke kakou iaia, o manaoio anei na kanaka a pau iaia oia ke Keiki a ke Akua.
4. Ike anei o Iesu i ko lakou manao pepehi?
Ae, ike no oia, a pee iho.
5. He hiki anei iaia ke noho loa ma kana wahi e pee ai?
Aole; i hele mai oia e make no kakou, nolaila olelo kela i kana mau haumana, e hele kakou i Ierusalema, a ilaila e pepehiia au a make, a ekolu no ia e moe ai i ka lua kupapau alaila e ala hou mai.
6. Hahai anei na haumana ia Iesu i kahi o ka make?
Ae, hahai no.
7. Pehea ko Iesu hele ana?
Hele wawae aku oia me ka mama.

SABATI II.

1. A kokoke aku lakou i Ierusalema, pehea o Iesu?
E holo aku wau i Ierusalema maluna o ka piula.
2. Kena aku oia i na haumana elua e kii i piula ihea?
I kahi kokoke mai, a loaa he piula me ke keiki e ku ana, a na ka mea nona ia mau holoholona e kuu mai.
3. A loaa aku ia laua ka piula e ku ana, a wehe mai ka hana, pehea mai ka mea nona ia mau piula?
E aha una olua e wehe nei i ka piula?
4. A hai aku laua, pehea mai kela?
Ae oluolu mai. He hoa'loha paha ia na ka Haku.
5. A hiki aku lakou, pehea la ka hana?
Kau na haumana i kekahi mau kapa maluna o ka piula keiki, a kau aku o Iesu.
6. A holo aku o Iesu ihea maluna o ka piula ?
Holo aku kela i Ierusalema.

SABATI III.

1. Ua lohe nui na kanaka o Ierusalema i keaha?
I ko Iesu hoola ana i Lazaro.
2 Pehea lakou ?
Holo nui mai lakou ma na alanui e ike iaia e holo ae ana.
3. Hoonani aku lakou iaia me ke kapa aku pehea?
Kapa aku iaia, "Ke Alii."
4. Heaha na hana hoonani iaia ?
Wehe ae i na kapa, a haliilii iho, a me na lala laau e hele ai ka piula maluna.
5. Pehea na keiki liilii?
Hoonani lakou iaia, me ke kapa aku iaia, "He Alii."
6. Pehea ka manao o na kanaka hoikeike?
Huhu lakou, me ka ninau aku iaia, no keaha la e papa ole aku oe ia lakou nei?
7. Pehea o Iesu i ka na keiki leo hoonani?
Oluolu kela i ko lakou hoonani ana?
Aloha keia lakou; aloha hoi lakou iaia.

SABATI IV.
KA LUAKINI.—LUKA XIX. 47, 48; xx: 19, 20; xxi: 37, 38.

1. Heaha ka hale nui ma Ierusalema me he halepule la?
Oia ka luakini. He hale nani loa.
2. Pehea na ipuka?
Hamama mau, a hele pinepine kanaka ilaila e pule.
3. Owai ka i hele pinepine ilaila?
O Iesu.
4. A pehea kana hana?
Hoola oia i na oopa a me na makapo i hele aku i o na la malaila, a ao aku ia lakou no kona Makua.
5. Pehea na kanaka haakei?
Hele lakou ilaila e hoino ia Iesu, ahonui nae kela.
6. I ka po hele o Iesu ihea?
Hele kela maluna o kekahi mauna e pule ai i ke Akua.
7. Pehea ka olelo o na kanaka kolohe i ko lakou manao ana e hana ino ia Iesu?
Pehea e make ai o Iesu ia kakou? Ina ma ka luakini, makau kakou i na kakou; ina e loaa i ka po, paa ia kakou a hookolokoloia.

HE KEIKI KOLOHE I IKE I KONA HEWA.

                O Hale ka inoa o keia keiki, a he wahi popoki uuku kana, he milimili ana i aloha ai. I kekahi manawa lawe mai oia he ilio hae, a hookomo iho la iloko o ka pa i maea paani nana, a hookiki aku la oia i ua ilio hae nei e alualu i kahi popoki, aka nui loa ka makau o ka popoki i ka ilio hae, a holo kiki aku la a pii iluna o ka laau, no ka makau no, a ma ia hope iho imi hele mai la ka hookepuhi nana ka ilio, a loaa ma kahi o ke keiki,  ninau mai la, "Ea, nawai la i lawe mai i keia ilio maanei? Mamuli make ko oukou popoki i kau ilio," wahi ana, a eha la ma ia hope iho make iho la ua wahi popoki nei. Kaumaha loa ka naau o ke keiki, no ka make ana o kana wahi milimili, a ike lea iho la oia i ka hewa maoli o kana hana mua.
                A mahope mai koi aku oia i kona mau makua e hoopaa iaia iloko o ka rumi. Ninau mai la na makua iaia, "Pehea la oe i makemake ai e hoopaa i ka rumi?" Wahi aku a ke keiki, " I mea e ao mai na ia'u, a i hiki ole ai hoi ia'u ke hana hou aku i keia mea ino mahope." Kupaianaha maoli ka loli ana o na iini hewa o keia keiki, a koi ikaika'ku la i na makua e hana mai laua e like me kona makemake, i kumu e maikai ai oia ke hiki aku i kona kanaka makua ana. Pomaikai kakou, na keiki Hawaii ke like me nei wahi eueu (aole nae i ke kolohe) ka ike iho no ua hewa, a koi aku i na makua, a i ka oukou mau kumu kula Sabati i paha, e hoopaa i ka rumi, a i ole ia, e hoopai mai, i mea e kolohe ole aku ai.

KE ALAULA.
He Nupepa Hoikeike Kii,
Hoopuka mau ia ma Honolulu, i kela malama keia malama o ke PAPA HAWAII, no na Kamalii Hawaii.

                25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ka ope hookahi, ME KA HOOKAA MUA IA MAI.
O. H. KULIKA, Luna Hoopuka.