Ke Alaula, Volume III, Number 6, 1 September 1868 — Page 22

22 KE ALAULA.

HE HONI ANA NO KA HAHAU ANA.

                "E hahau aku au ia oe: wahi a kekahi wahi keiki huhu i kona kaikuahine.
                "E honi aku au ia oe: wahi a ke kaikuahine, a mea ae la oia e hani aku i kona wahi kaikunane.
                Nana mai la o Toma me ke kahaha; he oiaio anei e honi mai ana kona kaikuahine ia ia, oiai ua huhu aku oia ia ia? Aka, i kona nana ana i na maka oluolu ona, pau koke kona huhu, a lele aku la me ka olelo.
                "E honi aku au ia oe!" O kona noho oluolu iho la no ia ma ka poli o kona kaikuahine aloha.
                E na pookii, aole anei he oi aku ka maikai o ka honi ana mamua o ka hahau ana? L. L. N.

KO MAKOU PEPE.

                "Aole paha he pepe e ae i like ka maikai me ko kakou mahi milimili nei? He aloha no wau i kahi ilio ia Poni, aka, ua oi loa aku kuu aloha i kahi pepe nei;" wahi a Ruta, a holo mai a honi i ke keiki.
                Pane oluolu mai kona makuwahine, "No ke aha la e oi ae kou aloha i ka pepe? Aole i hiki ia ia e holo pu me oe ma ke kula e paani ai e like me Poni."
                "Aole no ka paha, aka he uhane kona e like me ko'u," wahi a Ruta. "E loaa anei ia ia nei ke kamailio, ka noonoo, ka makaukau, a nui ae e hele pu no me au i ke Kula Sabati. Ua hoonoho mai ke Akua he uhane maloko o kona kino, aka aole he uhane iloko o ka ilio. Aole no paha e ola mau loa ka ilio e like me au nei, a me kahi pepe?"
                Pane ae ka makuwahine, "Aole no; ina e make ka ilio, a hoolei ia'ku kona kino, o ka pau no ia o kahi Poni. Aka ina e make oe, a o kahi pepe nei paha, a hoomoe ia ko olua mau kino aia ka lua kupapau maloko o ka lepo, aole no e hoi ko olua mau uhane malaila, malalo o ka lepo, aka e ola aku no na uhane o olua."
                "Mahea e noho aku ai?" wahi a Ruta.
                Olelo ka makuahine, "Elua no wahi i hai ia mai ma ka ke Akua olelo, kahi e hoi ai na uhane o na kanaka ma hope o ka make ana o ke kino; ma ka lani kekahi, ma kahi a ke Akua e noho ai me na anela maikai, a ma ka po kekahi, kahi o ke diabolo a me kona mau anela ino."
                Ae aku la o Ruta, "Ae, ua ike no au i ka mea i kapa ia ka Ipuka o ka lani. Oia o Iesu ke Keiki a ke Akua kuu Hoola. Olelo mai kela, "Owau no ka Ipuka. E kikeke a e wehe ia." Ina no e hiki aku na uhane o na keiki liilii ma ka ipuka o ka lani a kikeke aku, e wehe mai no kela i ka ipuka a komo aku lakou. Ina hoi e pule aku kakou maanei iaia, e ike aku no kakou iaia, a e ike mai no kela ia kakou. O ka mea uhane ole, aole ia e aloha aku ia Iesu. Pomaikai maua me ka pepe i ka loaa ana i ka uhane make ole. Aole o maua e like me Poni e make wale a nalo loa."
                Ninau mai ka makuahine; "Ke hoomaikai nei anei oe i ke Akua no kona haawi ana ia oe he uhane make ole?"
                "Ae," wahi a Ruta; "Pule hoomaikai aku no au ia Iesu i kela la keia la, e malama oia i kuu uhane me ka maemae, a e hookipa aku i kuu uhane ke make ke kino a moe ma ka lepo. I keia manawa, ke hookomo pu nei no hoi au i ka pepe iloko o ka'u pule."
                Olioli ka naau o ka makuahine haipule i ka lohe ana i keia mau olelo a kana kaikamahine liilii. Pela anei oukou na makuahine e alakai nei i ka oukou mau keiki, me ke ao aku hoi ia lakou e pule?

NO WASINETONA OPIO A ME KONA MAKUAKANE.

                Ua manao na makuahine he lehulehu wale oiai lakou e nana aku ana i ka paani ana a ka lakou mau wahi keiki liilii, a i ka ike ana aku paha ia lakou e naue ana i ke kula, me ka olelo iho, "Ina no hoi paha e like ana kuu keiki me Wasinetona." A he nui wale no hoi paha na keikikane, ina lakou e heluhelu ana i na moolelo hoolele oili o ke kaua Huliamahi o Amerika, e olelo iho, "Ina paha wau e like ana me Keoki Wasinetona!"
                Ua kapaia o Wasinetona, ka makuakane o kona lahui, a o kona wahi i ku ai, aohe e hiki aku kekahi ilaila. Aole no hoi paha oe e lilo ana i Kenerela, aole no hoi i Peresidena no Amerika Huipuia, aka, he hiki no ia oe ke hahai aku i ka Wasinetona mau hana, kona noeau, makaala, manao paa, hoomau ana i ka hoomanawanui ma na hana kupono. Ka makau i ke Akua, a me ka ike pono i kana mau mea a pau e hana aku ai.
                Malia paha aole i pii aku kekahi o oukou e na keiki liilii ma ke ano hookanaka makua ana i ko oukou noonoo. Aole anei he ala e hiki ai ia oukou ke hoohalike aku me Wasinetona? Ae he ala no. He hiki no ia oukou ke aloha io maoli, a ke kamailio ma ka oiaio wale no, e like me Wasinetona i kona wa uuku e like me oukou.
                I kekahi wa, ua lohe no paha oe, ua haawi aku kona makuakane ia ia he wahi koi kalakalai a hele aku la oia me ua wahi koi nei ma kekahi mala mea kanu a kona makuakane, e kupu ana, a e kimokimo ana i na laau a pau e ku ana ma kona wahi e hele ana, a hiki aku oia ma kekahi wahi laau hua, hoomaka aku la oia i ke kimokimo ana i ua laau nei me kahi koi ana, noke aku la keia i ke kimomo i ua wahi laau nei a manumanu loa, alaila haalele iho la, a hele aku la.
                O keia laau i manumanu iho la, oia no ka laau i oi o ka makemakeia o ua mala nei, a o ka laau no hoi ia a kona makuakane i makamae loa ai. Aohe i upuupu iho hele mai la kona makuakane ma kahi o ua laau nei, a ike iho la ua kimomoia ka laau ana i manao nui loa ai, pii ae la kona huhu, a ninau aku la me ke okalakala, "E Keoki, nawai i hana i keia." Ua olelo aku anei o Keoki, "Aohe au i ike?" Aole. Ua hoahewa wale aku anei oia i ka mea nana e malama ka mala a i kana keiki paha? Aole. Leha ae oia i luna i kona makuakane, a me na lehelehe e kamule ana, no ka mea, ua ike oia i ka minamina o kona makuakane i ka laau, a olelo aku la. E KUU MAKUAKANE, AOLE E HIKI IA'U KE HOOPUNIPUNI, NA'U i hana ia." Ka, o ka make ana o ka laau, he mea ole ia ke hoohalike aku me ka oiaio maoli o kana keiki. E na keiki, ua ike no kakou i ko kakou alakai hewa ia e hoopunipuni, a ina pela, e hoohalike me Wasinetona, me ka olelo iho, "Aole e hiki ia'u ke hoopunipuni." E olelo i ka oiaio wale no.

HE HALE ANO E, MALAMALAMA OLE.

                Hookahi makahiki mahina iho nei, wahi a kekahi Kumu Kula Sa bati ma Amerika, olelo mai la kekahi wahi keiki, "Ina hoi e hiki ia'u ke noho mau loa ma keia ao, pomaikai loa au." Alohilohi mai la kona mau maka eleele i kona noonoo ana ma ke ao, kahi e kau ole ai ka pouli o ka make.
                Ninau aku la au, "E pomaikai loa anei oe, e Ioane e?"
                "Ae," wahi ana, "ina ua nui ke dala e like me kuu makemake."
                Ninau hou aku au, "A no ke aha la e pomaikai ole ai oe i keia wa? Ua haawi nui ma ke Akua i na mea a pau e lako ai, a e ola ana hoi oe a pau ka hana ana i manao ai nou." Aole pane mai ke keiki, a nolaila, ninau hou aku la au.
                Mahope pane mai la oia, "Heaha la ka waiwai o ka imi ana i ka naauao, a o ka hooikaika ana i ka hana, a o kela mea keia mea hoi, ina ua kokoke mai ka make; a heaha la ka waiwai o ke aloha ana i na makamaka, ina e kaili koke ana ka make ia lakou, a ina i ole ia ia'u paha?"
                "Ke makau nei anei oe i ka make, e Ioane e?"
                "Ae," wahi ana.
                "No ke aha la, e kuu keiki?"
                "No ka mea," wahi ana, "me he la, oia ke komo ana iloko o kekahi hale ano e, malamalama ole."
                "He nui nae na kanaka," e Ioane e, "i maka'u ole i ka make, a i olioli hoi i ka wa e kii mai ai ka make ia lakou, no ka mea, ua olioli lakou i ka haalele ana i keia ao. Ua maopopo anei ia mea ia oe?"
                No ka maopopo ole ia ia, hoao aku e hoike maopopo aku ia ia ke kumu o ka maka'u ole o na kanaka haipule, na wahine haipule, a me na keiki palupalu no hoi i ka make; oia hoi no ko lakou hilinai ana ma o Iesu la. Hai aku la hoi au ia ia, i kona haka pono ana mai ia'u, o ke aloha ia Iesu, o ka manaoio i ke Akua, oia ke kumu o ka hooikaika ana o ka poe Keristiano, no ka mea, he manao lana ko lakou, a pau keia hooikaika ana, ka imi ana i ka naauao a me ka hana ana i ka hana a ka Haku, e komo aku ana lakou ma ka lani e noho loa ai me Kristo.
                Aole ona pane mai, no ka mea, ua hoopau ia ke kula. Aole au i ike hou aku i ua mau pokii aloha la, a hala ae ka makalii, a hoomaka mai ke kau anu.
                I kekahi la, mahope koke mai o kuu hoi ana mai, lohe au i ke kikeke ana ma kuu ipuka; he palapala mai ka makuahine o ua wahi pokii la, e hai mai ana i ka mai pilikia o kana keiki. Nui kona makemake e ike ia'u. Hoomakaukau koke iho la au, a hele i ka hale o kona mau makua. I kuu komo ana, aole au e poina koke i ka mea