Ke Alaula, Volume III, Number 7, 1 October 1868 — Page 27

KE ALAULA. 27

PALAUALELO.

                Ke ike la oukou i keia kanaka ui, kino ikaika, e lilo ana i ka hana ole loa, e ka-mokoi ana ma kahi loko, me ka hoolilo ole o kona mau lala i ka hana kupono i ke kino opiopio ikaika. Pehea la i lilo ai keia mea i kanaka palaualelo mau?
                A penei: Mai kona wa kamalii mai no ka hoomaka ana o keia ano ia ia. Hele pu no maua me ia wahi a kekahi hoalauna ona, i ke kula hookahi i ko maua wa kamalii. He hoholo no ia i ka ike i na mea o ka palapala i na la ana e hele pono ai i ke kula. Aka eia ka mea hilu ia ia. Hiki mai ka la lealea a maikai loa, olelo kela, aole o'u makemake i ka hoopaahao ia ma ke kula i keia la maikai; e hele ana au. O kona hele no ia e auwana wale ai mamuli o kona lealea, ma ka holo lio paha i na kula, ma ke ka-mokoi paha ma kapa muliwai, e palaualelo ana paha ma na uwapo, e lalau hele wale ana mamuli o kona makemake hoopau molowa.
                A hala kahi wa, mahalo ae au i kona ano lealea wale. Hoolalelale mai ko'u makuahine e hoopau i ke kaka ana i ka puu wahie, a holo koke aku i ke kula. Hoopuka aku au i kuu manao kohu ole ka hoopaahana ia ma ke kula i keia la.
                Pane mai ko'u makuahine kahaha, he kohu ole ka ka hana i ka la laelae! E mau ana no paha ka ulu uliuli mai o ka mauu i keia la laelae; e nui no paha auanei ka meli a na nalo meli e ohi ai i keia la laelae; e mau auanei ka wili ana o ka wili ko, a wili kulina i keia la laelae. Kai noa o ka la laelae oia no ka la kohu hana.
                Na ia mau manao paipai i ko'u makuahine, i hoopau i kuu mau manao molowa, a hooikaika kuu mau lima e kaka i ka wahie. Pau koke no ka puu wahie i ka ikaika o ka hana.
                Ma ia hope mai, ua okoa kuu manao, a okoa ko Mika manao. A pau kona mau makahiki kula, hele aku kela me ka naaupo no. Hoole mai ka luna o ka hale pai palapala, aole e hoolimalima oia e ao i ka humuhumu kamaa.
                Noho kela i kana oihana a noho no wau i ka'u. E iho pu ana maua i ke alanui i i kakahiaka i kahi o ka hana, a ike au e huli aku ana oia ma kekahi alanui e ae. Ninau aku wau, " e hele ana la oe i hea?" Pane mai keia he la laelae, he kohu ole i ka paahana ia, a hele kela i ka palaualelo.
                A hala ka wa o ke aoia ana, a hoolimalima maoli ia oia ma kana hana, hooikaika pokole ia ma ka hana. Aole he loihi a loaa aku au ia ia i kekahi la, ua komo i kona mau kapa maikai a e hele ae ana, ninau aku au, pehea keia e Mika? Pane mai kela, e manao anei oe e noho wale au e humuhumu kamaa i keia la laelae; aole loa no.
                Heaha la ka hope? Eia, ia hoowahawaha loa ia oia i keia manawa; he kanaka palaualelo, e ai ana i ka hai ai, e moe ana i ko hai hale, he mea hookaumaha wale aku i kona lehulehu no kona palaualelo mau.
                E na keiki, mai hoomaamaa iho oukou i ka molowa. O ka maa i ka hana ka mea e pomaikai ai.

KE KEIKI HOOMANAWANUI I KA IMI NAAUAO.

                I ka malama o Dekemaba o ke kau anu o ka makahiki 1867, he nui ka pilikia o na kamaaina i ke anu, oia hoi na kamaaina o na moku ma ka akau o Amerika. Hiki e mai ka hau a me ke anu, a ua makaukau ole na kamaaina ilihune.
                Koe nae kekahi wahi keikikane, he umikumamalima kona mau makahiki. He keiki loihi kekahi, ua ane kanaka makua kona ano. E noho ana ia ma kapuahi, no ka mea he ino mawaho, a he anu, e haule ana mai ka hau. Aole i ike oukou ia mea, he hau e na pokii. He okoa ka hau paa i laweia mai e na moku ahi ma Honolulu. He wai paa kela; aka o ka hau i haule mai ka lani mai, ua like me he paakai aiai loa i ka nana aku, he mama loa nae. Ma na aina anu paapu loa ka ili o ka honua i ua mea la, he hau mama.
                E noonoo ana ua wahi keiki nei, o Iona kona moa i kapa ia, i kana mea e hana ai. No ka mea, he nui kona makemake i ka naauao, a ua ninau pinepine oia, "Pehea la au e loaa ai i ka naauao?"
                I kona noho liuliu ana me ka noonoo ma ia mea, komo mai la kekahi makamaka, a i kona kamailio ana, hoike mai la ia, he kula maikai ma Plainfiela, o Mr. Maynard ke kumu. Me he mea la aia no ka pane ana mai i kona ninau, "Pehea la au e loaa ai i ka naauao?"
                Ala malie mai la ia mai kona noho mai, me ka manao paa nae, a olelo mai la, "E hele ana au i Plainfiela i kakahiaka."
                "Pehea la oe e hiki aku ai ilaila, he nui ka ino, he hohonu ka hau, he nui ka makani."
                "E hooikaika no au a hiki aku," wahi ana.
                Pane mai la ka makuakane, "Pehea e la hiki ai ia oe e noho ma Plainfiela? Aole hiki ia'u ke haawi aku ia oe i ke dala e lako ai, oiai he nui, kuu makemake ia oe e imi i ka naauao."
                "Ua maopopo no ia ia'u," wahi ana, "aka ua paa kuu manao e imi i ka naauao."
                Aloha ae la ia i ka ohana, a pii ae la i kona wahi moe maluna. Penei oia i nalu ai ia ia iho, Ae, oia no kuu mea e hana ai. E hele aku au i Plainfiela i ka la apopo no. Aole au i makau i ke anu a me ka hau. Heaha la ia i keia wahi keiki? Ua paa kuu manao e hele ma kahi e loaa ai ka naauao. Malie paha e kokua mai o Mr. Maynard ia'u ma keia mea."
                I kakahiaka nui no la, he anu loa, ua hohonu loa ka hau; aole nae i wiwo wale ua wahi keiki nei. Me kekahi puolo lole, a me na buke, hele ae a ia i ka imi naauao.
                I ko Mr. Maynard komo ana ma ka hale kula, ike iho la ia i kekahi keiki malihini, e noho ana ma kapuahi, e hoopumehana ana ia ia iho. Ninau aku la oia ia ia,
                "Ua hele mai anei oe e komo i ke kula?"
                "Ae, ehiku mile kuu hele ana mai i keia kakahiaka, a pela no kuu manao."
                "He makamaka anei kau ma Plainfield?"
                "Aole, he nui nae kuu makemake e loaa i ka naauao. Ua lohe nae au i ka po nei ia oe, he kumu kula oe maanei; a ua hele mai au e kuka pu me oe no ia mea."
                “Aole anei e hiki i kou mau makua e kokua ia oe?"
                "Aole no e hiki,"
                "Aole anei he mau makamaka kau e kokua ai ia oe?"
                "Aole."
                "Pehea ia e hiki ai ia oe?"
                "Aole i maopopo ia'u, ua hele mai au e ike ia oe, ua paa kuu manao e imi i ka naauao."
                No ke ano ikaika o kona manao, a no ke ano hoomanawanui i na pilikia, o ua wahi keiki nei, ke kokua maoli me ke dala. Imi oia a loaa kekahi ohana kahi e waiho aku ai ua keiki la, me ka hooikaika i ka hana i ka wa kula ole. Pela i kaa ai ka uku no ka ai a me ka ia.
                Ikaika ka imi ana i ka naauao o ua wahi makamaka nei. Mahope hoi hou ia e noho me na makua, a hele eha mile i kela la a i keia la e hai aku i kana mau haawina i kekahi kahunapule. Pela i hooikaika ai oia he mau makahiki, a komo i ke kula nui (college.) Malaila i noho ai eha makahiki, me ka hooikaika no e loaa i ka ai a me ka ia. A pau ia mau makahiki eha ma ke kula nui, komo aku la oia i ke kula kahuna pule ma Anedova, a malaila i noho ai he mau makahiki ekolu. Iloko o keia mau makahiki he kanaha a oi, ua noho ia me ka hooikaika wiwoole, a me ka hoomanawanui loa iwaena o na Helene ma Atenai, e imi ana i ko lakou pomaikai ma o Kristo la.
                O kona inoa o Kauka Jonas King, ka misionari kaulana, no kona hoomanawanui ana iwaena o na pilikia he nui wale.
                E na makamaka opio, e hoomanao oukou i keia moolelo. 'Ma ka hooikaika ana, a ma ka hoomanawanui ana e loaa ai ka naauao. Aole no e loaa ana ia kakou me ka hooikaika ole.
L. L.

                O ka makaala mau, oia wale no ke kumukuai o ka noho hooluhi ole ia ana o ka lahui.

                E ao aku i ke kamalii i kona aoao, A elemakule oia, aole ia e huli ae mailaila aku.