Ke Alaula, Volume III, Number 8, 1 November 1868 — Page 30

30 KE ALAULA.

na kanawai, a ua nui no hoi na pauku e ae o ka Baibala i paanaau iaia. Ua hiki loa no iaia ke pane kupono mai ke ninaninauia aku i ke ano o ke Akua, a me kana mau hana, a ke ninauia aku no Iesu a me kana hana, &c. Ua komo e keia ike me ka ike ole i ka heluhelu, a oia no ka manao o kona mau makua i hookomo e ai i keia ike.
                He poina ole no iaia ka paipai koke mai i na wa pule ohana o kakahiaka a me ke ahiahi, a he miki no hoi ma kekahi mau hana-lima, a he kakaikahi ka haule ana o kekahi kauoha a kona mau makua.
                I kona noho ana ma ke kula o Miss L. B. ua alohaia oia e kana mau kumu, oiai aole no i loihi loa aku kona mau la o ka noho ana, he 3 malama a me 5 la wale no. Olelo mai la kana kumu, "He kaikamahine hoolohe loa o Esetera, he wikiwiki loa e hooko i ka'u olelo me ke kali ole; aole e hiki ia'u ke hoomanao ua hakaka paha ia me kona mau hoa, a manao au aole no; nui ko'u aloha iaia."
                Iloko o kona mau la mai, i ka wa aole i hiki aku kona mau makua, - i ka wa ka e hele ai na haumana a pau i ko lakou pule ahiahi a me kakahiaka, a koe iho la laua me kona hoahanau, Miss M. A. Ua, olelo aku la kela, "E kuaana, e malama kaua i ko kaua pule ohana, no ka mea, ua hele lakou e pule, a pela no hoi kaua;" a pela laua e malama mau i ka pule iloko o ia mau hora a ke kupilikii.
                He mau minute mamua ae o kona haalele ana iho i kona kino lepo, a ua hookokoke loa mai hoi na hana a ka make maluna o kona kino palupalu, heluhelu mai la kana kumu i kekahi mau mokuna o ka Baibala, a na kona makuakane ka pule; a mahope iho, olelo mai la ke kumu i kona makuakane e kahea iaia, a e ninau aku, "E Esetera, he aloha anei oe ia Iesu?" Wahi ana i pane mai, "Ae." "He makemake anei oe e hele pu me Iesu i ka lani?" "Ae;" a he mau ninau e ae kekahi no kona ohana.
                I ka nana aku i kona helehelena mahope iho o kona haalele ana mai i ke kino lepo, ua ane like me ka hiamoe akaaka ana; a ua hoolilo paha ia i ka make i mea olioli nana no kona komo koke aku i kela aina lani, a ua hooluolu pu mai hoi paha i kona mau makua e noho u ana, me he mea la e olelo mai ana, "Mai hookaumaha ia olua, no ka mea, ua komo au i kahi maha, ua pau na hoehaehaia ana o ko'u kino."
                I ka nana aku, ua hele ia ma ke ano Kristo, ano oiaio, a nona ka olelo hoolana, "Pomaikai ka poe make i make iloko o ka Haku, he oiaio wahi a ka Uhane, ua hoomaha lakou i ko lakou luhi." Me ke aloha nu, G. W. P.

NO KINA.

                He kanaha tausani Pake a oi aku paha ma Kaleponia i keia wa. Iloko o na makahiki he umi i hala iho nei ua holo nui mai lakou ilaila maluna o na moku kalepa e eli gula a e imi loaa no lakou ma ia aina. Ma Kaleponia ua launa nui na lahui o ka hikina me ke komohana, ko Europa, a me Amerika launa me ko Asia.
                Ua kukulu na Pake ma ke kulanakauhale o Kapalakiko, Kaleponia, he hale hoamana pegana no lakou, ilaila e hoomanaia'i na uhane o na kupuna o lakou e like me ka hoomana o ko lakou aina. Nolaila ke ike nei kakou ua komo ka hoomana pegana iloko o na palena o Amerika Huipuia.
                O keia hiki nui ana o na Pake i Amerika, oia no paha kekahi mea i hoala mai i ka manao o na haipule o Amerika e nana aku i ka poino nui o Kina, a e hoouna nui aku i na misionari ilaila e ao i ka ke Akua olelo, a e hoohuli ia lakou no Kristo.
                O ka hapalua paha o na kanaka ma ke ao nei aia ma Kina kahi i noho ai; a ke manaoia nei o ke kahua nui keia o ke kaua ana iwaena o ka pouli o ko Satana aupuni a me ka malamalama Keristiano ma keia mua aku.
                He makaala no ka noonoo o na Pake. He lolo ikaika ko lakou. Ma ka papa akahi o ka makahiki 1854 ma ke Kula Nui o Yele, ma Nu Hawena, Amerika, he Pake opiopio, a ua lilo iaia na makana elua no ka pii o kona ike a me ka makaukau mamua o na hoa ona. He kulana hanohano no kona i keia wa ma kona aina hanau, a he haumana oiaio no ia no Kristo e noho nei. Na ke Akua e hoolilo iaia i mea e hoohuli nui i kekahi poe o kona lahui i ke Akua.

HOOLOHE ANA I KE KAUOHA.

                Ku mai na keiki elua ma ka ipuka pa o Ioane a kahea mai iaia, "Ea, e uhaele kakou i ka lae o kahakai." He Poakolu keia, a ua hoomaha ke kula, nolaila e noonoo ana keia mau keiki i kahi pono e hoonanea ai. E pii paha mauka e ohi ohelo, e hele paha e nana i na wili ko, e hele paha i ke kamokoi ma kahawai, e hele paha i kahakai. Ohumu pu lakou a hooholo e hele ma ka lae. He wahi pahoehoe keia e lae ana iwaho iloko o ke kai, a he ululaau ma kekahi aoao, a he hale kuai mea ono, a he mau hale kuai mea ona kekahi.
                Hele wale aku keia mau keiki i ka lae me ka hoomaopopo ole i kahi hana o ka hele ana aku ilaila. Hoonanea wale iho lakou ma ka aekai e hoolelele pahia ana i na pohaku liilii maluna o ka ili o ke kai. Naue akahele aku lakou imua, a kokoke aku lakou i kekahi hale maika a hale inu rama me ka piliwaiwai. E mumulu aku ana ma ka ipuka o keia hale he mau kaa, he mau lio, a me a kanaka, a me na kamalii, e nanea ana, e kamailio ana, a e puhi baka ana. Oloko hoi o ka hale maika ua nui na mea e paani ana. Olelo ae kekahi o keia mau keiki, "E hele kakou i ka hale maika; he lealea loa kakou malaila. Ua papa mai ko'u makuakane ia'u e hele ilaila, aka aole no ia e ike ana. Oia, ilaila kakou."
                "Aole au e hele ana," wahi a Ioane; "aole au e launa ana ma na wahi o ia ano."
                "Kahaha! e pilikia anei oe ke hele ilaila? He misionari paha oe la? E hele pu kakou ; e hele mai Piko, e hele mai o Ioane."
                Hahai aku no o Piko iaia. Olelo kela, "Aole he hewa ke hele a nana wale no. Aole e ike ko'u makuakane."
                Nana aku laua e hoololohi ana o Ioane i hope, aole no e hahai mai ana ia laua. Huli hou laua i hope a pane aku. E hele pu hoi kakou. Mai nononoho oe i hope me he bebe makau wale la."
                Pane ae o Ioane, "Aole loa au e hele a uhai i na kauoha paa."
                "Heaha la na kauoha paa i loaa ia oe? Aole no i papa mai kou makuahine hanai ia oe i ole e hele i ka hale maika."
                "He mau kauoha paa no ka'u i kakauia," wahi a Ioane.
                "Palau !" wahi a laua. "Aole he kanawai paa kau i kakauia no keia mea ; he wahahee no oe. E hoike mai oe i ua kanawai la."
                O ka wehe koke no ia o Ioane mai loko o kona pakeke he buke liilii, ili ulaula, a no loko o ua buke nei wehe ae oia he apana kanana i kakau lima ia, a haawi ae ia laua me ka olelo, "Eia ka'u kauoha paa"
                Lalau laua a wehe ae a nana iho, a heluhelu mai o Piko penei: Ma ke alanui o ka poe hewa, mai hele oe; mai hele hoi ma ka aoao o ka poe hewa. E haalele ia wahi, mai maalo ilaila; e huli ae mai ia wahi mai, a e hele aku."
                He wahi pauku Baibala wale no keia," wahi a kela.
                Ae aku no o Ioane, "Oia no. O ka ke Akua olelo no ia, o kana kauoha paa no ia ia'u. O ka'u pauku mua no keia i hoopaanaau ai, a ua hoopuka pinepine loa mai kuu makuahine ia pauku ia'u mamua o kona make ana. Ua paanaau loa keia pauku ia'u, a ina e lalau kuu lima i ke kumu kila me ka manao e kakau, paa koke no keia pauku i ke kakauia. Nolaila; lawe pu no au ia mea ma kuu pakeke, a ina e hoowalewale mai kekahi ia'u e hele ma kahi o ka poe hewa, ua loaa mai ka'u olelo pane aku, penei : Ua loaa ia'u na kauoha paa e papa ana ia'u, e i ana, 'Ma ke alanui o ka poe hewa, mai hele oe; mai hele hoi ma ka aoao o ka poe hewa. E haalele ia wahi, mai maalo ilaila ; e huli ae mai ia wahi mai, a e hele aku.' Ua maopopo loa ke kauoha, nolaila ina e hele olua i ka hale maika, e hoi no au i kuu home.'
                Ea, e ke hoa heluhelu, aole anei i koa io kela keiki ma ka pono, me ka wiwo ole imua o na hoa hoowalewale ? Ina la hoi pela wale no na keiki a pau e heluhelu kei i ke ALAULA. Ina e pomaikai io oukou ke malamaia ke kauoha a Solomona 4: 14, 15.

KOMO HOPE.

                Ua loaa mai nei ia makou, he palapala mai Rev. G. W. Pilipo he moolelo no kana kamalei i haalele mai i ka poli o kona mau makua i ka la 4 o Okatoba i hala iho nei; he haumana no ke Kula Hanai Kaikamahine o Kawaiahao. Aia ma kekahi mau kolamu e ae o keia wahi pepa e ikeia ai ua palapala la.