Ke Alaula, Volume III, Number 8, 1 November 1868 — Page 32

32 KE ALAULA.

pu ana o na kumu kula me ka Luna Kula, e kula pu ai a hoomakaukau pono ia lakou iho ma ka haawina, i hemahema ole lakou imua o na haumana, aka, i hiki ia lakou e ao aku me ka oiaio a me ka malamalama.
                He mea mau no ma na kula a pau ka huki ana o kekahi poe, a o kekahi mau papa kula paha, mamuli o ko lakou manao iho, e koi ana e kula aku lakou ma kahi e, aole ma kahi e kula like ia ana ke kula a pau. He pono e hoole ia keia manao e ulu ae ana, a e alakai like ia ke kula a pau ma ka haawina hookahi.
                Ina nae he keena kaawale kahi e kula ia'i na pokii o ke kula, oia paha na keiki malalo iho o na makahiki he umi, he apono no e kula okoa ia lakou ma na Ui kupono i na pokii.

IOANE BUNIANA.

                Ua hanauia o Ioane Buniana i ka makahiki 1628, he mau makua ilihune kona, ua pau kona imi ana i ka naauao, a ua huli i ka hewa, i kona wa uuku, ua nui kona hoino ana, a me ka olelo kuamuamu ana, ua pinepine loa kona malamaia e ke Akua, oiai oia e aneane aku ana e make emoole, aka ua nui loa no ke oolea a me ka paakiki o kona naau, me ka nui o ka hoao i loaa mai ia ia. Aole oia i maeele wale i na pilikia a ka hewa, aka, he enemi nui i ka poe maka hanohano, a haipule, a na hana pili hoomana! a pau loa, o ka poe haipule, ua lilo ia me he haawe kaumaha loa 'la ia ia.
                A i kona mare ana i kekahi wahine haipule, ua lilo ia he mea e hoopomaikai nui ana ia ia. O kana mau Buke elua kapaia, "Ka Hoomaamaa ana e Aloha i ke Akua" a me "Ke Ala Moakaka o ke kanaka e hiki ai i ka Lani," o keia mau buke elua ka ua Ioane Buniana nei i heluhelu ai, a na ka Uhane Hemolele oia i hoololi, a i hoopalupalu i kona naau koni-a. Haalele koke oia i kona mau hewa, a ua lilo koke oia he kanaka hou i loko o Kristo, a o ka pule ana a me ka hoonani ana i ke Akua kona olioli.
                Heaha la kela mea ana i heluhelu ai no ke Akua, a lilo ai oia i kanaka pono ma ia hope mai. O KA HELUHELU ANA I KA BAIBALA! Ma ia hope mai, ua lilo oia i mea hai aku i na waiwai hiki ole ke huliia o Kristo; a no kona hana ana pela, ua hoopaahao ia o ia no na makahiki he umikumamalua. He mea kaumaha loa ia ia kona hookaawaleia ana mai kona poe mai, o kana wahi keiki makahiapo no nae kana mea kau nui o kahi manao, aka ia ia maloko o ka hale hoopaa ua heluhelu oia a ua kakau no hoi i kekahi mau hana e waiwai ai, oia hoi ka mea nana i kakau kekahi buke i kapiia, "Ka Hele Malihini ana," oia kekahi o na buke waiwai loa i ka heluhelu ana a ke aka ana aku no hoi. Mahope iho o kona hookuuia ana mai ka hale paahao mai, ua lilo oia he "malamalama nui." e haiolelo ana me ka ikaika, a ua kakau oia nona iho. "Aole o'u makemake e niania wale me na mea lalau wale i mea e hoopaapaa aku ai i ka poe pono a pau loa, aka he oluolu loa au e paio aku me ka wiwo ole, a me ka manao hoihoi i ka olelo o ke ola, a me ke kala ana i na hala ma ko Iesu hoomanawanui ana i ka make. Ua ike aku au i ka'u mau hana e kololio ana mamua o'u maloko o kekahi auwai, oia hoi ka lawe ana i ka olelo hoalala; a ma keia mau mea au i hoopipili loa aku ai." Make oia i ka makahiki 1688.

HOAO E HOOHALIKE ME IESU.
TRY TO BE LIKE JESUS.—Golden Censer.

1. Ho - no ka - kou i li - ke Me ko ka - kou Ie - su, Ka ma - ka - ma - ka alo - ha, A - lo - ha o - i lo - a, A - lo - ha o - ia mau, A - lo - ha o - ia mau. HUI. Ho - ao, ho - ao ka - kou la, Na kei - ki o ka ku - la, i li - ke me Ie - su la, Ke ho - a ma - ka - mae.
2. Hoao kakou i like
Me ko kakou Iesu,
Maemae, a hemolele,
Haahaa, a akahele,
A lokomaikai pu.
HUI.—Hoao, hoao kakou la.
Na keiki o ke kula,
I like me Iesu la,
Ke hoa makamae.
3. Hoao kakou i like
Me ko kakou Iesu,
E hele ae imua
E pili i ke Akua.
E hana pono mau.
HUI.—Hoao, hoao kakou la, &c.
4. Hoao kakou i like
Me ko kakou Iesu:
A pau koonei ola'na,
E pii ae a hosana
Me lakou ma ke ao.
HUI.—Hoao, hoao kakou la.
Na keiki o ke kula,
I like me Iesu la,
Ke hoa makamae.
WAIKOLOA.

KULA POKII.

SABATI I.
O IESU MA KA HALE ALII.—MAT. XXVI: 57-68.

1. I ka loaa ana o Iesu i na makai a me na koa ma ka mahinaai, alakai aku lakou iaia i hea?
I ka hale o ke kahuna nui ma Ierusalema, kahi i akoakoa ai kona mau enemi.
2. Heaha ka lakou i ninau mai ai iaia ?
Mea mai lakou, "O oe anei ke keiki a ke Akua?"
3. Pehea ka Iesu i pane aku ai ?
Ae aku no ia, Ae, a mahope aku nei e ike ai oukou ia'u e hele mai ana maluna o na ao me na anela.
4. Pehea iho la lakou ?
Huhu lakou iaia, pai mai, a kuha mai iaia.
5. Pehea hou aku?
Olelo lakou, e lawe iaia i ka lunakanawai e hooholoia mai ka make maluna ona.

SABATI II.
KO PETERO HOOLE ANA I KA HAKU.—MAT. XXVI: 69-75.

1. Ka hopuia ana o Ie su, hele na haumana i hea?
Holo lakou a pee no ka makau.
2. Pehea ka Petero i olelo mua ai?
Olelo kela e make pu oia me ka Haku.
3. Pehea ka Petero i hana ai ?
Makau no ia a holo no, a mahope hahai aku a i ka hale o ke kahuna nui e ike i ka lakou e hana aku ai ia Iesu.
4. Pehea kona manao ?
Manao oia aole o lakou e ike mai iaia oia kekahi o na haumana a Iesu.
5. Ehia mea i ninau mai iaia ina i ike oia ia Iesu?
Ekolu:
6. Pehea kona pane ana aku?
Hoole kela aole no wau i ike ia Iesu.
7. A lohe oia i ka ooo ana o ka moa, heaha kana i hana ai ?
Hele aku kela iwaho a uwe nui.

SABATI III.
NO PILATO.—IOANE XVIII: 22 - 40.

1. Heaha ka lakou i hana aku ai ia Iesu ia po a ao?
Hoomaewaewa a hoomainoino lakou iaia?
2. A kakahiaka ae lawe lakou iaia i hea?
Lawe lakou iaia io Ponetio Pilato, ke kiaaina.
3. A ninau mai oia ia lakou heaha ka hewa a Iesu i hana ai, pehea ko lakou pane ana?
Olelo lakou, ua kapa oia iaia iho he alii.
4. A imi o Pilato e hoola iaia pehea mai lakou?
E kau aku oe iaia ma ke kea.
5. Pehea aku o Pilato ia lakou?
E hahau wau iaia a hookuu aku no.
6. A hahauia o Iesu, a kahe ke koko ma kona kua, a kauia he lei kakalaloa ma kona poo, a hoikeia aku oia pela i ka lehulehu, minamina anei lakou iaia?
Aole he minamina; olelo lakou. "E kau iaia ma ke kea, e kau iaia ma ke kea."
7. Alaila pehea aku o Pilato?
Olelo oia, aole no i hewa o Iesu, aka e ae aku no oia i ko lakou manao e make oia, a maluna o lakou ka hewa.

SABATI IV.
IUDA.—MAT. XXVII: 3 - 5.

1. Owai ka i kumakaia aku ia Iesu?
O Iuda Isekariota.
2. No na dala ehia i kuai aku ai oia i kona Haku?
No na apana dala he kanakolu.
3. I ka loaa ana iaia ia mau dala, olioli anei kela?
Aole; ehaeha loa no kela, a hoihoi aku ke dala i na kahuna nui, a hoolei aku ma ka lepo, me ka olelo iho, ua hewa wau i ke kumakaia aku i ke koko hala ole.
4. Heaha hou kana i hana ai?
Hele aku ia a li iaia iho, a make oia.
5. Pehea anei ka pono?
Hookahi wale no pono, e mihi oia, a nonoi aku i ke Akua e kala mai i kona hewa.