Ke Alaula, Volume III, Number 10, 1 January 1869 — Page 39
KE ALAULA 39
Puiwa iho la o ua Beni a olelo iho, "Ia nei ka ke Akua!"
"Ae, i kii mai oia a lawe aku i ko kakou wahi keiki o Paulo."
"Ua hala ka Paulo?"
"Ae, ua hala aku la ia i ka lani, a e ike ana oia i kona makuahine. Aole oe e ike hou ana iaia, aole hoi e lohe hou i kona leo aloha."
He mea pohihihi ia ia Beni ka hoomaopopo iho i ka hala ana o Paulo i kahi e, oiai e waiho mai ana kona kino. Makemake oia e ike a hoomaopopo i keia mea kupanaha he make. Hoopa oia i ka lima o kona makuahine, a komo laua i ke keena kahi e waiho ana ke kupapau. Ua haalele mai ka uhane i ike kino, kahi ana i noho ai i na makahiki ewalu. Ua nani kona helehelena. Ua pili na maka me he mea hiamoe la. E kau ana kekahi wahi lima liilii maluna o kona umauma, a o kekahi lima e paa ana i kekahi opuu rose.
"He hiki anei ia'u ke hoopa aku iaia, e mama?"
"Ae, he hiki no."
Kau aku oia i kona wahi lima puipui maluna o ka lae. Ume koke mai oia i kona lima me ka olelo iho, "Auwe, he koekoe loa ka hoi oe, e Paulo; o ka make anei keia?"
Aoia o Beni ma ko Paulo hele ana.
He nui ka noonoo o Beni i kekahi mau la ma ia hope mai. He nui kona kamailio no ka lani, a no ka hele ana ilaila o kahi keiki makau ole o Paulo, a i kana olelo ana, "E kii mai, e Iesu, ia'u." Puai mai na manao iloko ona e like me keia: E mehameha anei o Paulo ma ia aina? E luhi anei oia i ka himeni mau ana a me ka hookani mau ana i kona mau hookani gula. He kino paha kona malaila, e like ana me ke kino ana i haalele ai maanei. Ina e make koke oia, e ike aku anei oia ia Paulo ma kela aina, a e hoomaopopo anei oia iaia mawaena o ka lehulehu o ia aina lani? Pela wale kona noonoo nui ana no keia mea, no ka haalele ana o ka uhane i ke kino.
Hoole o Beni i ka Pule.
Hala nae kekahi mau la, ike kona makuahine e nalo ana keia mau olelo ao mai kona naau aku, a i kona kamailio aku iaia no "ka aina maikai mao aku o ka muliwai o ka make," ua molowa o Beni i ka hoolohe mai. I kekahi po e kukuli iho ana kona makuahine e pule pu me ia i ka pule a ka Halu, a olelo oolea mai o Beni, "Ua pau kuu pule ana; aole no au e pule hou ma keia hope aku; he keiki nui au i keia manawa, a he hiki ia'u ke malama ia'u iho e like me papa."
Pilikia loa iho o Patona wahine i keia pane ana o Beni. Kali iki iho oia, e noonoo ana, alaila pane mai oia me ka leo haalulu, "Ua manao oe, e kuu keiki, e hiamoe aku me ka nonoi ole i ke Akua e malama mai ia oe i ka po?" "Olelo o papa he mea pono no ka haipule no na wahine, he mea makehewa nae no kane. Aole o papa i pule - aole i ka ai ana, aole hoi i ka moe ana; aole no hoi au e pule."
"Manao anei oe, e kuu keiki, he pono i kou makuahine ke lawe ia oe i kekahi muliwai e kahe ikaika ana a e kau aku ia oe maluna o kekahi waapa a hookuu aku ia oe, o oe hookahi maluna o ka waapa, me ka olelo aku, 'Ua hiki no i kou makuakane e hoe, a e hoe no hoi oe?' E i mai paha auanei oe he makuahine aloha ole au. Eia no oe maluna o kekahi waapa, a e lana ana oe maluna o ka muliwai o keia Ola ana. Ua ikaika ke kahe ana o keia muliwai, a he hohonu no hoi. Ina e ikaika kou mau lima i ka hoe, e lanakila auanei oe, a ina aole, e make auanei oe. O na lima ikaika i ka hoe, oia no na pule a me ke aloha aku ia Iesu, a na ia mau lima e hookele pono ia oe."
Nana aku o Mrs. Patona, e ikaika ka imi manao ana o kahi keiki. Pane mai kela, "Aia la o papa, aole i loaa iaia ia mau lima ikaika au i olelo ai, aka, holo lanakila ae la kona waapa maluna o ka muliwai."
"E kuu keiki aloha, aole no he po i hiamoe aku ai kou makuahine me ka nonoi mua ole aku i ka Makua Hemolele e alakai i kou papa, a ua lana kuu manao aole no e ole kona huli ana mai ma keia hope aku, a aloha aku i ka Hoola i hoopomaikai nui mai ia kakou."
A pau ia pane ana o kona makuahine, lele aku o Beni a haule aku ma kona wahi moe, a hoopili iho i kona poo i ka uluna. Nana minamina mai kona makuahine, a pane mai, "Pehea la ina e kii emoole mai ke Akua ia oe, e like me kona kii ana mai ia Paulo, e makaukau anei oe e hele?"
Ala koke mai la kela a pane mai, "Aole e kii koke mai ke Akua. Olelo o Paulo e lilo ana au i kanaka makua. Olelo o papa he keiki maimai o Paulo mai kona hanau ana mai, a o ka make opiopio oia no kona haawina, aka, he ikaika loa kuu kino, he maimai ole."
Ike ka makuahine he makehewa ke kakaolelo hou aku me kana wahi keiki, nolaila waiho aku la oia iaia ma kona wahi moe a hele aku me ka luuluu loa o kona naau e waiho i kana wahi keiki ma ka lima o ka Mea Mana. Ua pauhia kahi keiki i ka hiamoe a loihi, e nonoi ikaika ana keia wahine haipule i ke Akua e hoohuli mai i kana kane hoomaloka, a me kana keiki uuku naau paakiki. [Aole i pau.]
BATIMEA PUAAIKI.
Ua hanauia o Batimea Puaaiki ma Waikapu, Maui. Aole akaka kona makahiki i hanau ai, aka, ua manaoia i ka makahiki o ka Haku 1785. I kona wa kamalii ua eliia kona lua e kona makuahine, me kona manao e hoolei maloko o laila, aka na ke Akua i hookomo i ka manao aloha iloko o kekahi makamaka ona, a nana oia i hoopakele. I kona wa uuku he keiki kolohe no ia; ua ono loa hoi oia i ka awa. Pela no paha kekahi mau keiki o Hawaii nei i neia kau, e hele wale ana kekahi aole papale; pela no o Puaaiki.
Ua aoia no hoi ia i ka hula, a ma ia mea ua makemake loa na 'lii iaia. Ke hoomahui nei paha kekahi o oukou, e na keiki o Hawaii nei, i nei mea he hula. Aole no i pomaikai o Puaaiki i ka loaa ana iaia keia mea he hula; nolaila, mai ae aku oukou ia hana lapuwale, he hana no ia no Satana, aka e hoomahui oukou i ka hele i ke kula Sabati, a me na hana pono a pau.
I ka hiki ana mai o na misionari ma Hawaii nei i ka makahiki 1820, e noho ana o Puaaiki ma Hawaii ia manawa, aole nae i akaka loa kona huli ana i ka pono. A ma ia hope mai ua ikeia kona huli nui ana ma ka pono, a lilo i koa ikaika no Iesu. Ua hoolilo mai ke Akua iaia i mea e nani ai kona inoa. Ua nui na kanaka ana i hoohuli. Aole o lakou wale, o na 'lii pu no hoi kekahi.
He kauwa ikaika loa o Puaaiki ma na hana a ka Haku, he paahana kupono hoi no kona mau kihapai. Ua bapetisoia oia, a ma ia bapetiso ana ua loaa iaia ka inoa Batimea, mamuli o ke kanaka makapo a Iesu i hoola ai. Ina e nana aku i ke kii, ke ike la kakou e paa ana oia i ke kookoo ma kona lima, me he kahuhipa la e ho-a ana i kana poe hipa. He hoailona no ia o ka poe makapo. Ke papale la no hoi ia i kona papale; ke aahu la no hoi oia i kona kapa. Aole no i nani kona helehelena i ka nana'ku, aka o kona naau ua maemae loa iloko o Iesu.
I kona manawa e noho ana ma Lahaina, ua alohaia mai ia e na kanaka a me ke Akua. Mahope mai holo aku oia i Hilo. Ma kekahi wahi e ae he malamalama iki no paha, aka ma Hilo, nu ka pouli, aole wahi alii haipule e noho ana malaila ia manawa; nolaila ua nui loa ka Batimea hana malaila. Aka, i ka hele ana o kekahi mau misionari malaila, ua hooikaika loa oia i ka imi naauao; aole nae i loheia ma na mea ike hohonu o keia ao kona hooikaika ana, aka ma ka olelo no a ke Akua. Nolaila, e na keiki Hawaii, mai kuhihewa oukou, o ka naauao ma na mea o keia ao, oia ka mea e pomaikai ai. Aole pela; ua oi aku ka naauao iloko o ka ke Akua olelo.
Mahope mai ua hoi mai o Batimea mai Hilo mai, a noho ma Wailuku, Maui. Malaila ua lilo oia i luna Ekalesia, a mahope mai ua lilo oia i kahuna haiolelo. I kona lilo ana i kahuna haiolelo, ua ikaika loa ia ma na hana a ka Haku i na manawa a pau.
Ma ia hope mai ua loohia o Batimea i kekahi mai nui, a oia no kona mai a hiki i kona la i make ai; aka nae, iloko o kona wa mai, manao no ia e make ana, aka, aole oia i makau i ka make. Nolaila, ua akaka mai kona wa i huli ai i ka pono a hiki i kona make ana, he kanaka maikai o Batimea. Aole no i wae mai ke Akua i kona poe kanaka mai loko mai o ka poe waiwai, aka mai loko o ka poe ilihune.
Ua kakau o Rev. J. S. Gelina he wahi moolelo no Batimea Puaaiki, a no loko mai o laila i wae ai makou i keia mau manao pokole nona.
E na keiki o Hawaii nei, e hoohalike oukou a pau me Batimea. L. P.