Ke Alaula, Volume III, Number 11, 1 February 1869 — Page 42

42 KE ALAULA.

kou e hana mamuli o ko kakou makemake iho. Ina i pule mau o Iuda. Mai hookuu mai ia'u i ka hoowalewaleia, ina no aole oia i kumakaia aku i kona Haku."
                Aole i huli ka manao o Beni; hilinai oia ma kona ikaika iho e pale aku i na pilikia a pau Eia kana: "E mama, e hookuu wale mai ia' e hoao i keia la me ka pule ole; malie paha apopo e noi aku au i ke Akua e kokua mai."
                "E hoao oe i keia la, a na ka Makua Aloha e alakai ia oe."
                Ka holo lelele aku la no ia o Beni.

HAKAKA NUI O BENI ME KE KUKE.

                Aole emo loheia he leo hakaka nui ma ka hale kuke. Holo koke o Patona wahine a ike aku i ka wahine kuke e hoopaa ana ia Beni ma kekahi lima, a e pai ana iaia me kekahi lima. Oki koke ka wahine i kona hoopai ana, a ulaula loa kona maka. Ninau mai kela i ke kuke i ke kumu o ka pilikia.
                Pane mai kela, "Ua kauoha mai o papa e wiki kona aina no ka mea e holo ana oia i ke kaona. E awiwi ana au i kona ai, a holo mai o Beni e hana au i poi nona e hoopili i kona lupe. Olelo aku au iaia e kali iki a pau kuu pilikia, alaila e hana au i kana. O ko ia la huhu koke iho la no ia, a lalau i ka io a'u i koala ai no papa a hanai aku oia i ka ilio. O kuu lalau aku no ia iaia, a o kou komo ana mai no ia."
                Huli ae ka makuahine a ninau ia Beni, "He oiaio anei keia?"
                Hoole kela, "Aole, he hoopunipuni o Ana, he wahahee ia."
                Lawe aku oia i kana keiki ma kahi e, a kamailio pu me ia no ka hewa o ka hoopunipuni. Hai mai oia ia Beni i ka moolelo o na keiki kupaa mamuli o ka oiaio, he poe keiki i kupaa mamuli o Iesu a make i ka hoomaauia. Ua haawiia ko lakou ola ina e hoole mai lakou i ka Haku, aka, ua luli ole ka manao, aole hoopuka i ka huaolelo hoopunipuni hookahi i mea e hoopakele ai i ke ola. Hai aku kela iaia i ka moolelo o kela keiki o Kurila, ka mea i make i ke ahi no kona kupaa ana mamuli o Iesu. A ma ia kupaa ana ua lilo ia poe keiki i mau mea nui e lanakila nui ana. "E hoomanao oe, e kuu keiki, o ka Haku Hoola i kona wa i hoinoia aole ona hoino aku."
                Kulou iho ko Beni poo ilalo; ike oia ua hewa ia, aka no ka hookiekie o kona naau aole oia i ae mai i kona hewa.

HOLO O BENI I KE KULANAKAUHALE.

                Ku malie iki iho o Beni a pane mai, "E mama, e holo ana o Keo i ka hale makeke ma ke kulanakauhale; e oluolu oe e holo pu au me ia ma ke kaa, a hoi mai no i keia ahiahi."
                Ae mai kona makuahine, "Ae, e hele no oe, aka, mai haalele iki oe ia Keo. Ina e nalowale kuu wahi keiki, e pilihua loa auanei kuu naau i ka ehaeha loa."
                Hoopili iho o Beni i kona wahi papalina palupalu i ka papalina o kona makuahine, a hoopahee mai i kona lauoho a pane mai, "E hoopili no au ia Keo, aole au e haalele iaia. Aia ke kali nei kona lio ma ka ipuka pa, a ke hea mai nei oia ia'u e hele pu me ia. E aloha oe."
[Aole i pau.]

                No ka naau haahaa ka makau ia Iehoba, ka waiwai hoi a me ka hanohano a me ke ola.—Solomona.

PAE AINA O KILIPATI, OIA O TARAWA.

                I na la hope o Dekemaba ku mai o "Hoku Ao" mai Maikonisia mai, a hoi pu mai hoi o Rev. H. Binamu a me kana wahine. Ma ka palapala a na makamaka a makou a me ka hai ana mai o Mr. Binamu he mau mea no i loheia e hoolana ai i ka manao no na paahana ma ia kahua kaua me ke aupuni o ke Alii o ka Pouli.

KUPAA KA EKALESIA MA KUSAIE.

                Ke mau nei no ke kupaa ana o ka ekalesia kanaka makua kahu ole o Kasaie. O lakou hoahanau no ka poe i malama i ka pono malalo o ke alakaiia e ke Kahuhipa Nui o ka Iseraela. Holo mau hoi o Rev. Mr. Snow mai Ebona aku e ike ia lakou i kela a me keia makahiki.
                Ma Namarika ke holo imua nei na kamaaina ma ke alakaiia e Kaelemakule. O kana wahine nae ka i pilikia i ka omaimai.

HOLO KA IKE MA BUTARITARI.

                Ma Butaritari, kahi i pepehiia na luina Hawaii e ke alii o na rama, ke kihapai a Kanoa a me Maka, malaila kahi i mikiala loa na kanaka i ke kuai buke a huli palapala, me ke kokua pu hoi i ka aila mahine hou. He hookahi haneri galani aila a oi ka Kanoa ma laua me Maka i hoouna mai ai ma "Hoku Ao." O ke alii uhauha o Butaritari ke koi nei i kanaka e hula, aka, kau nui ka manao o na kanaka ma ke huli palapala Ke holo imua nei o Butaritari.

KE KAUA MA TARAWA A ME ABAIANA.

                He kaua kipi nui ka i ulu mai mawaena o na kanaka o ka aoao pegana ma Abaiana a me Tarawa a me na 'lii o ka aoao Kristiano. He hana ino loa ka na kipi-he powa wale;he puhi i na hale i ke ahi, a me ke kua ilalo i na laau e ulu ana. Ua hoopakeleia ke ola o na misionari; aole nae i maopopo ka hopena o keia hana ana. Ua nee mai ke kahua kaua a hapalua mile wale no ke kaawale mai kahi o Haina kau.
                Ke hoike nei makou maluna he kii o na kanaka o Tarawa i paa i na pale kaua, a e paa ana hoi ma ka lima o na ihe niho mano e hou aku ai a make na enemi. Aia ma ke keena waihona buke o ka Papa Hawaii he aahu kaua a ke alii o Abaiana i make i ke kaua i ka makahiki 1857 paha. Oia ka makuakane o keia alii o Abaiana e noho nei. Ua hiliia mai loko o ka pulu niu a manoanoa. Aole nae i pakele kona ola i ua aahu la; houia no a puka, a make ia iloko o ke kaua. I keia wa ua loaa aku ia lakou kekahi mau pu me ka paula.

KE KIHAPAI HOU O TABITEUEA.

                O ko lakou mau hoa lawe-hana opiopio o G. Leleo laua me Loe, ua hoonoho pu ia aku me W. B. Kapu me kana wahine ma ka mokupuni o Tabiteuaea, he moku aina ma ka pae aina o Kilipati, ma ka hema aku o Tarawa. He 36 paha mile ka loa o keia aina, a he 5,000 a 6,000 paha kanaka ma ia mokupuni. Paapu na kanaka a me na keiki.
                He pilikia ka imi ana i kahua kahi e kukulu ai i hale no lakou, no ka minamina o kanaka i ka lakou mau niu - me he mea la he hookahi kumu niu no ke kanaka hookahi ma ia aina, a o ka wi ka mea i makau loa ia. Aka, ma ka hooikaika nui ana o Rev. H. Binamu, ua loaa he kahua hale, a ua noho aku na misionari mauka i ka la 22 o Augate; pela ka palapala ana mai o Leleo a me Loe ia makou.
                Me lakou ko makou aloha, me ka nonoi mau i ke Kahuhipa Nui e kiai mau ia lakou a e hooauhee i ka pouli mai ia aina kau ma ko lakou hai ana i ka olelo maikai.

HE LUNAIKEHALA MAKAALA.

                Alana! Mahea la o Alana? Ia nei iho nei ia e paani ana me kona kaa uuku, e hoopiha ana i ka lepo ma na kumu waina. Ua paa loa kona lima i ka hana me he kanaka makua la. Aka ua nalo aku nei ia. Eia kona kaa e ku nei.
                Alana! Alana!
                Pane mai kahi leo uuku mai ke keena pala, "Eia no wau."
                Wehe mai kona makuahine i ka ipuka a ninau mai. "E aha ana la oe malaila?" Aole pane koke mai o Alana. E ku ana oia ma kekahi kihi o ke keena me ka haaloulou o kona maka.
                I mai kona makuahine, "E hele mai paha iwaho nei. Eia kou kaa uuku e ku hana ole nei, e kali ana ia oe."
                "Aole i lawa kuu ku ana maanei," wahi a ke keiki uuku.
                Ninau mai kona makuahine, "E aha ana la hoi oe e ku wale ana malaila?"
                "E hoopai ana au ia'u iho," wahi a Alana.
                "No keaha?"
                Pane mai o Alana, "Ua ohi aku i kekahi mau hua waina maka a ua hookomo ma kuu waha."
                "Me kou ike no i ka papa ana o kou makuahine, a o na hua waina maka no. Mamuli mai kuu keiki uuku."
                "Aole paha oe e hoopai mai ia'u. E hoopai ana no au ia'u iho."
                Ua maa kona makuahine i ke kukulu aku iaia ma ia keena i kona hana i na mea kupono ole, nolaila kona hele ana ilaila e ku a e hoopai iaia iho. Ninau ka makuahine ia Alana. "Ua kaumaha anei oe no kou hoolohe ole i kou makuahine?"
                "Ae, ua kaumaha no wau, aka aole i lawa ko'u kaumaha, kuu mihi ana. E hoopai no au ia'u iho. E noho no au maanei a loihi e noonoo ai."
                Aole anei he pololei keia olelo a Alana? O ke kaumaha, a o ka mihi wale no, aole e lawa.