Ke Alaula, Volume III, Number 11, 1 February 1869 — Page 44
44. KE ALAULA.
HUI PU ANEI MA KA MULIWAI MAIKAI!
SHALL WE GATHER AT THE RIVER?—Happy Voices.
1. Hu-i pu a-nei na ho-a Ma ka mu-li-wai mai-kai, E ka-ka-he mau loa a-na Ma ka no-ho o ke Lii? HUI. Ae, e ha-i no na ho-a Ma ka mu-li-wai, ka mu-li-wai na-ni, Hu-i me la-kou ma ka la-ni, Ma ka no-ho o ke Lii.
2. Hui no a poai nani
Ma ia muliwai maikai,
A malaila e mililani,
A hoomana mau loa'e.
HUI.—Ae, e hui no na hoa, &c.
3. Ma ia muliwai maikai la
E kaa ai na luhi nei,
A ma ko Iesu aloha
E lei ai ko laila lei.
HUI.—Ae, e hui no na hoa, &c.
4. Ani mai ia muliwai la,
Kolonahe a mau no,
Oli like na haipule,
A hoomaikai ia Iesu.
HUI.—Ae, e hui no na hoa, &c.
5. Ane hiki ae na hoa
I ua muliwai mua,
A pau ae koonei auwana,
Hui mele malu pu.
HUI.—Ae, e hui no na hoa, &c.
KULA POKII.
SABATI I.
1. I ke kakahiaka nui ka hele ana o na wahine i ka lua kupapau; i ke ahiahi owai ke hele pu ana mawaho o ke kulanakauhale?
He mau makamaka elua.
2. Ua lohe anei laua no ko Iesu ala ana mai ka make mai?
Aole no laua i i lohe; e kamailio ana laua no kona make ana.
3. Owai ka i hookokoke mai io laua la ?
He malihini a laua i ke ole ai.
4. Heaha la ka ninau o keia malihini?
Ninau mai kela, "Heaha ka olua e kamailio ai a e uwe nei?"
5. Pehea ko laua pane ana?
E kamailio ana maua no Iesu. Aole ka oe i lohe nona i kona hoola ana i na mai a me na makapo a me na kuli.
6. Pehea hou aku laua?
Aloha loa na kanaka iaia, aka ua hopuia oia a kaulia ma ke kea. Ua manao makou la oia ke Keiki a ke Akua, aka make oia ma ke kea.
7. Pehea ka wehewehe ana o kahi malihini?
Wehewehe oia no Iesu, me ka hoike aku oia no ke Keiki a ke Akua
SABATI II.
1. Pehea hou ka wehewehe ana o ka malihini i na kamaaina elua e hele ana ?
Hai aku oia he mea pono ko Iesu make ana; e ala hou mai ana a e hoi hou i kona Makua; a olioli laua i kana wehewehe ana.
2. Ma ia hele ana hiki aku na makamaka i hea?
Hiki laua i ka hale o kekahi o laua.
3. Pehea la ka malihini?
Me he la e hele aku imua, a kahea laua iaia e kipa pu me laua i ka hale.
4. Kahea laua iaia e ai pu me laua, a pehea iho?
Noho lakou ekolu e ai, a lawe ka malihini i ka berena a hoalohaloha aku.
5. A pehea ia manawa ?
Ike koke laua o ka Haku o Iesu no keia, a nalo koke aku oia mai luna aku.
6. Hiamoe anei laua ia po ?
Aole ; i iho laua, e hoi kaua i Ierusalema a e hai aku i na haumana i ko kaua ike ana i ka Haku.
7. Pehea ko laua hele ana ?
Hele mama laua a loaa aku na haumana ma Ierusalema.
SABATI III.
KA IKEIA ANA O IESU E NA HAUMANA.—LUKA XXIV: 1-43.
1. A hiki na makamaka elua i Ierusalema, ua akoakoa na haumana ma kekahi hale, a ua paniia na ipuka ; pehea aku laua nei ?
Ua ike maua ia Iesu; ua hele pu ia me maua ma ke alanui, aole nae maua i ike o Iesu keia a hiki i ka hale a wawahi i ka berena.
2. Pehea aku na haumana ?
Pane aku lakou, ua ikeia o Iesu e kekahi mau wahine a me Petero.
3. Oiai e kamailio ana na haumana, owai ka i ikeia?
O Iesu no, e ku ana iwaena o lakou.
4. I weheia anei ka ipuka ?
Aole; e paa ana no ka ipuka, a hoea wale
5. Pehea na haumana ?
Makau lakou.
6. Pehea o Iesu?
Pane oluolu mai kela; a hoikeike mai ia lakou i na puka kui ma kona mau lima a me ka puka o ka ihe ma kona aoao.
7. Heaha hou ka Iesu i hana ai ?
Ai iho la oia he apana ia, a me kekahi meli.
8. Pehea na haumana?
Hauoli loa lakou i ka ike ana iaia.
SABATI IV.
NO TOMA.—IOANE XX: 24-31.
1. I ka wa i ike nui ai na haumana ia Iesu, owai ka haumana i ike pu ole ia Iesu?
O Toma ; aole oia pu me lakou ia manawa.
2. I ka hai ana o na haumana iaia i ko lakou ike ana ia Iesu, pehea mai ia?
Hoole oia, aole oia e hooiaio ana i ka lakou a ike maka oia i na puka kui ma kona mau lima a me ka puka ma kona aoao.
3. Ua pono anei o Toma i kona hoole ana pela?
Aole pono; aole oia i hoomanao i ka Iesu i hai mua mai ai ia lakou.
4. I kekahi Sabati hou iho ua akoakoa hou na haumana ma kekahi keena, a owai ka i hoea mai iwaena o lakou?
O Iesu no.
5. Pehea aku oia ia Toma?
E hele mai oe a e nana i na puka kui ma kou aoao a e manaoio mai.
6. Pehea aku o Toma?
Manaoia o Toma, a pane ae, "E ko'u Haku, a me ko'u Akua."
KA HUILA PULE.
Ma na kula o Fataria noho na kanaka ma na hale lole, a auwana-holo ma ia wahi aku, ia wahi aku, e imi ana i kahi ai maikai no na holoholona a lakou. Aole mea i ike i kekahi kanaka nana kau wahi o ka aina-no lakou like ia aina a pau. Aole lakou i kani i ka ai, aole no hoi ohi i ka ai; o ka io a me ka waiu ka mea e ola ai. Ka io o na lio ka maikai, wahi a lakou.
I kekahi la e kaahele ana au e haiolelo, wahi a ka misionari, iwaena o lakou, e like me ka'u hana mau. Hai mai kekahi ua kukuluia ka hale lole o kekahi alii wahine o Ralemuka, e kokoke ana i kona wahi. Manao iho la ia he wa kupono keia e hai aku iaia i ke Akua oiaio a me Iesu Kristo, ka mea ana i hoouna mai e hoola i na kanaka hewa. Aole paha e loaa hou ana ka wa e hai ai i keia mau mea, nolaila kau i ma ka lio a holo i kona wahi hale. Kahea mai oia iaia e komo mai, a loaa oia iaia e pule ana. "E pule ana ka!" Ae, e pule ana no. Kahaha paha oukou, a ninau mai auanei, ina ua huli mai ma ka pono o Kristo, aole anei oia he haumana na Iesu? Aole, he wahine pegana naaupo, a he alii no hoi e pule ana.
Pehea kana pule ana, a ia wai hoi? Oia ka'u e hai aku nei.
I hope o ka hale lole e ku ana ke kii akua oia ohana-he kii laau i kalaiia a pena eleele ia. He maka, aole nae i ike; he pepeiao, aole nae i lohe; he lima, aole nae e lawelawe; he wawae, aole hele; he waha, aole kamailio mai. Imua o ka maka o keia kii ua waihoia he huila, a ma ke apo ua okiia he mau lua a kinikini, a ma keia mau lua ua paa na pule ana i kuai ai me kekahi kahuna no ke kumukuai he nui. Noho iho keia wahine malalo ma ka papa hele a hookaa i keia huila, i ku pono ka pule imua o ke kii, e kali iki ana i heluheluia kela pule, keia pule. A manao no ia e ola ana ia ma ia hana. Nani ke kuhihewa o ka poe naaupo! Ahea la e ike ka poe kuhihewa a pau i ke Akua oiaio? Ike no kau wahi, aka iwaena no o na aina naauao a Keristiano, ke noho la na pegana, a ke kaa la ko lakou huila pule, aole noonoo iki. F. M.