Ke Alaula, Volume IV, Number 3, 1 June 1869 — Page 12

12 KE ALAULA.

PIINA I KO ZIONA PUU.
Leo: CLIMBING UP ZION'S HILL.--Golden Censer.

1. Ke pii au i ko Zi-o-na Puu, Ke ka-hea mai nei Ie-su la, Ma-la-lo nei he pou-li e, Na-ni ke ao ma-lu-na; E pii no au la puu ao mau; I ka aina o ka na-ni; Ke a-la o'u He alo-hi no, A e hi-ki i ka la-ni. Ke pii la no au ia Puu, Ke pii la no au ia Puu, Pii la, Pii la no au ia Puu.
2. He wahi keiki liilii no au,
A he hapa kuu ikaika, Na Iesu nae e kokua mai. I ka pii ia Puu maikai la;
E pii no au. E pii a mau Ia Puu la o Ziona; Malalo nei, He make e, A maluna no ke ola.
HUI—Ke pii la no au ia Puu,
Ke pii la no au ia Puu,
Pii la, pii la,
Pii la no au ia Puu.
3. E hui kakou a pii puu no,
I ka Puu no o Ziona. Iini no, a e kikoo mau,
E mau ka pii, Ia Puu Alii; A hiki ae i luna, E ku poai. Ia Puu maikai, A e mau na haleluia.
HUI—Ke pii la kakou ia Puu, Ke pii la kakou ia Puu, Pii la, pii la, Pii la kakou ia Puu.
HAWAII.

HE KEIKI HOOLOHE, O KALE WARENA.

                "E Kale e, ke makemake nei au ia oe," wahi a ka leo oluolu o kekahi wahine i kona kahea ana i kona wahi pokii e paani ana me na mabala imua o kekahi hale uinihapa maikai.
                Ua puni o ua o Kale nei i ke paani kinikini. Ua nui kona olioli iloko oia mea lealea. E hoolohe anei ia i ke kahea ana o kana makuahine? Nana iho la makou me ke kali i kana hana. Pehea, ina o oe maliala e hoolohe ana paha oe, e ka pokii puni mabala?
                Aka ua pane koke mai o Kale, "Ae mama," a hoouluulu iho la i kana mau mabala, a holo aku me ka olioli, a komo aku la i ka hale. Manao iho la au. "He keiki maikai kela, owai la ia?" He mea nani ke loaa ia'u ke keikikane, a he kaikamahine paha, i maa i ka hoolohe koke me ka olioli a me ka aloha! Nui ko'u hoomanao ana i ua wahi pokii la, a ua makemake au e ike hou iaia, a e lohe ka moolelo o kona noho ana.
                Pinepine kuu hele ana ma ke alanui kokoke i ua hale la, a ua noonoo au i ua wahi keiki maka oluolu la; a i kuu noonoo ana olioli iho la au iaia. He nui na keiki kolohe au i ike ai. I kekahi manawa elua la kuu imi ana i kekahi keiki kolohe, i mahuka mai kona mau makua aku. Nui ko laua kaumaha nona; a i kuu loaa ana iaia ua lilo aku i ka aihue ia kona koheoheo, kona papale a me kahi puolo lole, a ua pau hoi kana wahi dala. I kekahi manawa aku ua alualu aku au i kekahi mau keiki mahuka, he keikikane a me ke kaikamahine, a iwaena o ka po ka loaa ana ia laua, i pulu i ka ua, a ua hele a maeele i ke anu. Ua hookuli laua i ko laua makuahine, a ua mahuka mai ke kula aku e hele i ka paani; a ua pilikia laua i ka mai no kekahi mau hebedoma. O ke keiki hoolohe—he momi ia!
                He nui kuu hana, a ua imi wale aku au i keiki malama pono, i keiki hoolohe, aole nae i loaa. A aneane paupauaho au i ka imi ana, manao iho la au aole e ae hou aku au i kekahi keiki ina aole he maopopo loa kona ano maikai. Hele mai iho la kekahi mau keiki imi hana, aole nae kupono i kuu manao. A mahope loa hele mai kekahi keiki maka oluolu, o na makahiki he umikumamalua. He maikai kona ano i ka nana aku. Aole anei i ike au iaia mamua?
                "O wai kou inoa?"
                "O Kale Warena kuu inoa. Ke noho nei au ma ke alanui Feranikilini. He kamana kuu makuakane, aka ua oopa i keia wa, aole hiki ke hooikaika i ka hana, a nolaila ua ae mai kuu makuahine ia'u e komo iloko o kekahi hale kuai, ina e loaa ia'u ka hana."
                Oia no ua Kale la au i ike ai e paani kinikini ana. Aole au i poina i kona hoolohe pono ana i kona makuahine; aole au i imi hou aku i keiki, aka ua hoopapalua au i ka uku malama au i manao ai.
                Hele mai la o Kale i ka hana ma ia Poakahi mai. He oolea no ka hana i ka pule mua, aka ua hookanaka ia. Hele mai na keiki e e hoowalewale iaia, aole nae ia i ae aku. I kekahi kakahiaka lohe iho la au i na keiki elua e olelo ana iaia e hele e nana i ka heihei waa ia kakahiaka. "Aole," wahi a Kale, "ua kauoha mai kuu makuahine ia'u e malama pono i kuu hana. Ua uku ia au no ka hana maanei; aole pono ia'u ke haalele i ka hana me ka ae ole o kuu haku."
                He wahi olelo wiwo ole kela, a ua oi loa kuu mahalo ana iaia ma ia hope mai.
                He umi na makahiki i hala mahope mai o ia manawa, aole no hoi he keiki i oi aku ka akamai mamua ona iloko o kuu hale kuai. I nehinei ua kau ia ko Kale inoa ma ka papa maluna ae o ka puka o ka hale kuai i kakauia me na hua gula.

KALE WARENA,
Mea kuai lole o kela ano keia ano.

                Nana no ka hale kuai. He kanaka ui eleu a pomaikai ma kona mau hana; a ina e loihi ana kona mau makahiki, e lilo ana i kanaka koikoi, hanohano.
                Ka hua ia o ka hoolohe. Nolaila e na pokii, ina e hoolohe pono oukou i ko oukou mau makua, a i ko oukou mau kumu, oia no ka mea e pomaikai ai oukou. L. L. N.

KA MOKU AHI KOLO MOKU.

                Ua ike na keiki a pau o Honolulu i kahi moku ahi uuku ikaika nui wale i ke kolo moku, oia o "Pele." O kana hana mau no ia o ke kii iwaho e kolo mai i na moku a hookomo ia lakou ma ke awa malu o Kou, oia hoi o Honolulu. He mea puka mau ka uahi ma kona puka-uahi e like me ka uahi o ka ipupaka o ke kanaka puhi mau.
                O ke kolo moku ka hana o ua o "Pele" nei. I kekahi wa ua ike ia oia e kolo ana i ka manawa hookahi akahi moku, alua moku, a ekolu moku, e hahai lalani ana lakou kekahi mahope o kekahi, a o kahi "Pele" uuku ka lakou mea nana e huki aku. Me he mea la, he kahu lio o "Pele" e alakai lalani ana i na lio ekolu, a eha paha, i ka wa hookahi.
                Eia ka pono o na keiki kula Sabati a pau e lilo lakou i mau moku ahi kolo moku, a e kauo mai i na hoa iloko o ka hale o ke Akua, a iloko o ke kula Sabati.
                I kekahi la ua ao aku kekahi kumu kula Sabati i kana mau haumana e hoolilo ia lakou iho i mau moku ahi kolo e hoopiha ai i ke awa ku moku maikai,—oia ka hale o ke Akua. Ia Sabati iho, komo mai kekahi wahi keiki haumana uuku, ma ka ipuka luakini e hoopuka ana i ka leo ma kona waha e like me ke kani ana o ka moku ahi—penei, "puhu, puhu, puhu, puhu," a e hahai lalani mai ana mahope ona akahi kanaka, alua kanaka, akolu, aha, alima, aono, a he wahine a he wahi keiki. E kai lalahi ana keia poe e like me na moku e kolo ia ana e "Pele." Alakai keia keiki uuku a hoonoho ia lakou a pau ma kekahi noho maikai iwaena o ke anaina mamua mai o ka awai, a hoi aku kela i kona noho me ka olioli. O kahi hana kamahao no ia o keia wahi moku ahi. Pela oukou e na moku ahi liilii o na kula Sabati a pau.
                Loaa ia makou i keia manao maikai maluna ae nei no loko o ka haiolelo a Rev. Frank Thompson imua o kekahi mau haumana kula Sabati ma Hilo. Pela no paha e hana nei na moku ahi liilii a pau o Hilo. Ka mea no ia i piha mau ai ko laila mau kula Sabati. Aole he keiki i koe ma na alanui o Hilo i ka la Sabati. Lohe makou ua pau aku lakou iloko o na kula Sabati. L. H,

                O ka makau ia Iehova, he punawai ola ia, he mea ia e haalele ai i na pahele o ka make.

KE ALAULA.
He Nupepa Hoikeike Kii.
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.

                25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
O. H. KULIKA, Luna Hoopuka.