Ke Alaula, Volume IV, Number 4, 1 July 1869 — Page 13
KE ALAULA.
BUKE IV. HONOLULU, IULAI, 1869. HELU 4.
KA NENE KEOKEO. (KUANA.)
(THE WHITE SWAN.)
Heaha la ka waiwai o kuu noho mau maanei?" wahi a kekahi kuana keokeo i kona lana ana maluna o kekahi loko wai ma kahi awawa nani o kuahiwi. "Ua inea au i ke kaapuni mau ana i keia wahi loko uuku. Ahea la au e lele haaheo ai maluna o ka ululaau a me na wailele, a kau aku paha ma na piko o na mauna a me na wahi oioi o na pali, e like me na manu e ae?"
"E aho no e noho akahai oe ma kahi kupono no nou mamua o ka pikoi wale aku i na wahi kiekie, i ikeia kou hemahema a me ka makaukau ole malaila," wahi a kekahi kuana elemakule.
Pane huhu mai ka manu opio, "Aole ka anei e hiki ia'u ke lele aku a kau ma na wahi kau o na manu e ae."
"He okoa na talena a kekahi, a he oka ka kekahi," wahi a ka manu elemakule. " O kou a-i loloa a me kou mau wawae palaulau, he hoike ia o ka wai kahi kupono nou e noho ai. He pomaikai ka mea i ike i kahi kupono nona e noho ai, a noho oluolu iho ma ia wahi."
Pane koke mai ka mea opio, "Aole anei i hanauia au ma ka aina maloo? He mea aha hoi ko'u mau eheu."
Olelo oluolu mai ka elemakule, "He manawa no e lele aku ai me kou mau eheu, aka he makehewa ka lele wale aku a ma kahi o ka poino a me ka make."
Pai ikaika iho ka manu opio i ka wai a olelo mai, "Ua ino ka wai o keia loko."
Pane hou mai kela, "Na ka naau uluhua e hoolepolepo i na wai o ka punawai olino;" alaila holo aku ka manu makua ma kahi e.
Lele aku ke kuana opio ma kapa o ka loko, hoohola aku i kona mau eheu, a lele aku i ka lewa.
Me ka pai ikaika ana o kona mau eheu, lele kaumaha aku keia nene a haalele i kona home lai o ka loko o kuahiwi. Ike na manu o kela a me keia ano hulu i ka lele ana ae o keia manu okoa, a ninau ae lakou, "Owai la keia lolo a-i loloa e lele hawawa mai nei?" Kikoo aku no keia malihini imua a hala aku maluna o na papu, na awawa a me na ululaau. Ua loihi ke kiai ana o kekahi aito maluna o ka lala o luna loa, e kali wale ana a loaa he mea e paina aku ai no kona aina kakahiaka. O kona maka ua like ka ike ma kahi loihi me ko ka ohe nana; o kona pepeiao ua lohe i ka hehi ana o na holoholona liilii malalo. Lelele ae na manu liilii, lele poai puni mai na kaka, aka o ka leo walaau nui o ke kuana oia ka i pa mai ma ka pahu-kani o ka pepeiao o ka aito. Lulu oia i kona mau hulu a mukiki kona waha. Me ka hooho leo nui haalele aku oia i kona lala i kau ai, a hahai aku i ka manu nene hawawa. Auwe ka pilikia o kahi nene! Lele ino kela i o a ia nei, a alo i kona enemi. Ake nui kela e luu ilalo i ka wai o ka muliwai e pee ai, aka ua ike no ka aito i ka manao o ka nene a lele ae kela malalo me ka nahu mai, e keakea ana i ole kela e hoi i ka wai. Pauaho koke no ka nene, a hahau mai ka aito, a haule kela i ka lepo. Hehi mai ka aito iaia, a uhai mai me kona mau maiuu ikaika. E noho kiai mai ana ka wahine o keia aito ma kona oioina, e ike ana i ka imi ana o kana kane i ka ai, a i kona kahea ana lele aku kela a inu pu laua i ke koko, a haehae a ai pu i ka io o ko laua pio.
Aloha ino ke kuana keokeo! O ka hoowahawaha i ka noho haahaa ana, oia ka mea e pio ai kakou i na enemi.
O POHO NUI.
He keiki ilihune kekahi i hele mai i ke kula me ka poho nui ma kona kuli. Hoonaulu mai kekahi o kona mau hoa kula iaia, me ke kapa mai iaia "o Poho," a "o Poho nui," a "o Poho kahiko." Kahea mai na keiki e ae, "E kui aku oe iaia; no keaha la e ae wale aku oe iaia e kapa mai ia oe i na inoa ino? E aho no e hakaka olua." Pela i hoohakaka mai na keiki kolohe iaia.
Pane mai kela wahi keiki, "Manao anei oukou e hilahila ana au no ka pohoia o kuu lole? Ao'e loa; pomaikai loa no wau i ka loaa ana he makuahine nana e hana i na poho o kuu mau lole, i ole e weluwelu lakou." Ike iho na keiki, a olelo iho, "Aole ka he hilahila iki kela keiki."
Aole i hiki ia lakou ke hoopilikia iki aku iaia, nolaila mahalo na haumana a apu o ia kula iaia no kona ano koa io.