Ke Alaula, Volume IV, Number 4, 1 July 1869 — Page 16
16 KE ALAULA.
KAI A MAU.
Leo: MARCHING ON.--Golden Censer.
1. Kai a mau, kai a mau, kai ma-ma li-ke nae, E na ka-ma-lii ku-la, na ko-a mai-kai; Me ka hae o ka i-ke e kau ma-lu na'e, Me ka pu ka-ni o-li e kai o-li ai. Kai a mau, kai a mau, kai a mau, ka-ni o-li ae, ka-ni o-li ae, kai a mau, kai a mau, kai a mau, kai a mau pai-o no ka lei, ka lei mai-kai, ka lei mai-kai.
2. Kikoo mau, kikoo mau, kikoo like no nae,
Me ka iini nui e naauao ae,
Me na leo paipai o ka poe makaikai,
Me na hae kuhi imua e kai oli ai.
HUI—Kai a mau, kai a mau, &c.
3. Paio mau, paio mau ma ka hoonaauao,
Me ka pale koa'e i ka diabolo,
Me ke lii, naaupo, ke alii hoolalau
A me ona mau koa, na ino a pau.
HUI--Kai a mau, kai a mau, &c.
4. Mele mau, mele mau, mele like no nae,
Ma na kula Sabati, na kula e ae,
Me na leo maikai e hoonani mau ai
I ke Lii o ka lani, ke Lii e ola'i.
Hui—Kai a mau, kai a mau, kani oli ae, kani oli ae,
Kai a mau, kai a mau, paio no ka lei, ka lei maikai, &c. HAWAII.
KUU WAHI KII BEBE.
O ko Pane la hanau keia. Ua loaa iaia na makahiki eha. Hele mai kona kupunawahine e ike iaia, a lawe mai he makana nana i huna ia malalo o kona koloka. Heaha la? He buke paha? aole, he popoki paha? aole. He wahi kii bebe. Ua aahu ia keia wahi kii i ka lole e like me ka bebe maoli, a he mea hiki ke wehe ae ia mau kapa a hookomo hou iho i mau kapa hou aku.
I ka napoo ana o ka la, hoomakaukau o Pane e hoomoe i kona wahi keiki kii, aole nae i loaa iaia he kapa moe po. Nolaila pilikia ua wahi kii nei. Aka, wehe ae la o Pane i kona mau kapa, a opiopi pono ae, a waiho pono iho la, alaila uhi aku i kona wahi bebe i ka hainaka, a moe pu laua. Hiamoe o Pane a ao.
Pane aku o Pane i kona makuwahine, e ae mai ia e hana i kapa moe po no kana wahi bebe. Ae aku hoi kona makuahine; haawi iaia he apana lole keokeo. Helehele kona makuahine i ka lole, i kapa moe po no ko Pane keiki kii, a hoonoho aku ia Pane e humuhumu.
Hooikaika aku o Pane i ka humuhumu a luhi oia. Nonoi aku oia i kona makuahine, e hookuu mai iaia e hele iki e paani, ae mai kona makuahine.
Paani kela a hoi hou mai e hoopaa loa i ka lole o kana wahi kii.
I ka pau ana o ka lole moe po, olioli loa o ua o Pane, a i ka po, wehe mau oia i na kapa komo
o kana keiki kii, a hookomo i ke kapa moe po. Pela ia i malama pono loa ai, a ua ao ia oia i ka malama keiki ma ia hana.
Mahope, ao aku o Pane i kana wahi kii i na hua heluhelu penei; a, e, i, o, u, h, k, l, a pela aku. Aole nae i hoopuka iki mai ua kii nei i na hua; o Pane wale no ka i hoopuka ae. Ma ia ao ana o Pane i kona wahi kii, ua hikiwawe ka loaa ana iaia iho na hua, a ua loaa iaia ka heluhelu ma ke Kauoha Hou, mamua o ka loaa ana iaia ka lima o kona mau la hanau.
KA HOPENA O NA HALE KULA NUI.
I ke awakea o ka la Sabati, Iune, ka la 6, ua puhiia ka hale kula nui o Makawao i ke ahi e ka lima o ka mea manao lokoino. Oiai ua pau ka nui o ka ohana kaikamahine i ka pule, a e noho ana ke kumu alakai o ke kula, oia o Rev. J. Porter Gerina, me ka pilikia o kona wawae, ua laweia mai iaia ka lohe, "Ua wela ka hale i ke ahi!" No ka hoomaka ana mai o ke ahi ma ka aoao makani mai, he manawa ole pau ka hale kula a me ka hale noho, a koe iho he puu lehu wale no. Iloko o na minute pokole loa ua pau i ke ahi na hale elua, na lako o ka hale kula a me ka hale noho, a me ka nui o na lole, a me na kapa komo o na kumu a me na haumana. O kekahi hapa uuku wale no o na lako hale a me na kapa komo ka i hoopakeleia, no ka pokole loa o ka manawa, a piha e ka hale i ka uwahi a me ka wela o ke ahi.
Ua ehaeha ka naau o na makamaka a pau o ka lahui Hawaii i ka lohe ana i keia pilikia nui i ili mai maluna o kekahi o na hale hoonui ike, a ua hu ke aloha i na kumu a me na haumana a pau o ia kula nui i hoopuehuia mai ko lakou home ua ukiukiu aku.
Ua lono wale ia mai e alu pu ana na makamaka o na kaikamahine Hawaii e kukulu hou aku i ua kula la.
Ke noonoo nei makou i keia poino hookahi i ili mai maluna o na kula nui e ae. I ka makahiki 1863, ua hoopauia i ke ahi ka hale kula o Wilikoke ma Hanalei; mamua o laila ua pau na hale o Lahainaluna i ke ahi, a mamua loa aku hoi ua wela ka hale kula mua o ke kula hanai o Hilo i ke ahi. Ua manao paa ia ua puhiia keia mau hale kula a pau e ka lima o ka mea opuinoino. Ua paio mau ka pouli me ka malamalama, aole nae i lanakila ka pouli. Ua ku hou no ia mau hale hoomalamalama, a ke hoolei nei i ko lakou mau kukuna ma na wahi a pau o keia pae aina a hiki aku i na aina e. Ina pela e ku hou ae ke kula nui o Makawao, e olioli pu no kakou.
KA PULE A HALE.
Hoihoiia keia wahi keiki uuku, o Hale K----, i kona wahi moe pumehana e hoomoe aku ai, a pane mai kona makuahine, "E pule oe i kou wahi pule." Hoole mai kela, "Aole; aole make pule," wahi ana. "He hiki anei ia mama ke malama a hoomau mai i kou ola?" "Aole; na ke Akua no paha ia." "A pehea kuu wahi keiki, aole e hoomaikai aku i ke Akua nana i malama mai? Pehea la i ka wa e hiamoe ai kou makuakane a me kou makuahine, nawai la e malama ia oe ia mau hora o ka po?"
Piha mai na wahi maka o Hale i na waimaka, a pane mai kela, "E nonoi aku no wau i ke Akua e malama mai ia'u i keia po, aka i ka la apopo na Hale no e malama iaia iho." Ao hou mai kona makuahine, "Aole no e hiki ia oe, e Hale, ke malama ia oe iho i hookahi minute." Pane ae kela, "He hiki no paha ina no i ke ao." Ninau mai ka makuahine, "Pehea la ina e manao ke Akua e lawe i kou ola, he kiki anei ia oe ke hoopaa iho ia?" "Aole no." "A pehea la ina e manao ke Akua e lawe aku i kou makuakane a me kou makuahine, a me na mea e ae ou, he hiki anei ia oe ke hoopaa iho i lilo ole aku?" Pane ae kela, "Aole; aole no e hiki ia'u." "Aka hoole ka'u wahi keiki, aole oia e nonoi aku i ke Akua e malama mai iaia, no kona manao e malama iaia iho." Hoole hou keia, "Aole e hiki ia'u ke malama ia'u iho." Kulu hou kona mau waimaka a hoopili iho oia i kona mau lima, a papani i kona mau maka, a pule aku penei: "E ke Akua, e aloha mai oe ia'u, a malama mai ia'u i keia po, a i ka la apopo. E aloha mai i kahi Hale uuku no ka pono o ka Haku, o Iesu, no ka mea, he hiki ole iaia ke malama iaia iho. Amene."
He wahi pule pokole keia, kupono no nae i keia wahi keiki uuku nona na makahiki ekolu wale no. He pule io no keia, a he pule naauao, no ka mea ua ike o Hale i kona nele, a ua paulele i ke Akua.
KE ALAULA.
He Nupepa Hoikeike Kii,
Hoopuka mau ia ma Honolulu i kela malama keia malama e ka PAPA HAWAII, no na Kamalii Hawaii.
25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
O. H. KULIKA, Luna Hoopuka.