Ke Alaula, Volume IV, Number 5, 1 August 1869 — Page 17

KE ALAULA.
BUKE IV. HONOLULU, AUGATE, 1869. HELU 5.

KA MAKUAHINE A ME KANA BEBE.

                He makuahine keia me kana wahi bebe, a he popoki a me kana mau bebe elua. Ke palu nei kekahi o na popoki liilii i ka waiu ma ke pa, a o ka lua hoi ke paani nei, e hukihuki ana i ka lole. Ua hanauia mai laua nei me ka paa loa i na aahu mehana kupono, oia ka hulu pahee paina loa; nolaila aole i luhi ka makuahine i ka imi i kapa komo no laua. E hanai pinepine ana keia popoki i kana mau keiki i ka waiu o kona u, a hoopumehanaia lakou me kona kino, a hoohiamoeia lakou me kona leo nunulu. I kona wa e haalele ai ia laua, aole o laua uwe a nonoi aku iaia e kaikai ia laua a hooluliluli, aka e hiamoe malie wale no laua a hoi mai ia. A nunui iki ae laua, hopu ka makuahine i na iole a halihali mai na kana mau keiki e ai, a hookuu ola aku oia i ka iole iwaena o laua, e ao ia laua i ka hopu iole. A nui hou ae laua, a hala he mau pule hou aku, ua loaa no ia laua ka hopu iole no laua iho, a ua pau koke no ko ka makuahine malama ana mai. Hooliloia aku kekahi o kana mau keiki i kekahi, a lilo hoi kekahi i kekahi aku. Aole o laua pilikia nui i ka hookaawaleia mai ka makuahine aku, aole hoi e uwe nui ka makuahine i ke kailiia'ku o kana mau keiki mai ona aku. Mahope make no ka popoki makuahine, a make no hoi na keiki, a o ka hopena no ia o lakou.
                A pehea hoi ka makuahine nona ka bebe e paa la ma kona palule? He okoa kona noho ana. He nui loa ka hemahema o kona wa uuku. Na ka makuahine i hooaahu iaia, a i holoi, a hii ma kona poli, a hooluliluli a hoomalielie. He nui ka humuhumu ana i kona mau lole; he mau hoi ke kiai ana iaia i ke ao a i ka po. He nui ka malama ana i kona wahi kino uuku, aka aole oia wale. He uhane kekahi ona, a o kekahi hana nui, oia no ka hoomakaukau ana i ua uhane la e noho ma ka aina lani. Aole he uhane ko na popoki liilii; aole he manao ko laua makuahine ma ia mea. Aka he uhane ko ke keiki a ke kanaka, a mahope o ka make ana o keia kino a hoi hou ia i ka lepo, e ola aku ana kona uhane, ma ka lani paha, ma kahi pomaikai, a i ole ia, ma ka po poino e ehaeha mau ai. Ua ike ka makuahine i keia, a ke i iho nei ia, "O ka'u hana nui oia no ka hoomakaukau ana i ka'u wahi keiki e hoi a noho me ke Akua a me na anela." Aka ke ike pinepine nei ka makuahine i na ano hewa iloko o kana keiki. He huhu, a he hoolohe ole, a he kolohe maoli no i kekahi manawa. Pehea la e hiki ae oia i kela wahi maikai? Hoomanao nae ka makuahine i ka Hoola a na keiki, ka mea i iho mai mai kona noho alii ma ka lani a i noho he keiki uuku ma ke ao nei. He aloha ko ia Hoola i na keiki a pau, a ina e paulele keia wahi keiki iaia, nana no e holoi aku i kona mau hewa a pau, a e wehe ae i ka ipuka o ka lani e komo aku ai keia mau kapuai liilii. Nolaila pule pinepine, a pule ikaika aku keia makuahine i ke Akua no kana keiki, a ao aku hoi oia i kana wahi keiki palupalu e pule, me ke kukuli iho i kona mau kuli, a me ka hoopili pu ana o kona mau lima. A nui ae ua keiki nei a lilo i kanaka makua, hoomanao no oia i ke ao maikai ana o kona makuahine, me ke aloha aku a mahalo aku iaia, a me ka hoolohe i kana mau olelo ao. I ka wa i luahine ai a palupalu kona makuahine, imi oia i na mea e hooluolu a e hoopomaikai ai iaia. Ua ike oia i ke aloha o kona makuahine i kona wa uuku, a  imi oia i mea e hookaa aku ai ia aie. A make aku laua a elua, e hui hou no laua, aole kaawale ana, aka ma ka lani no e hui pu ai, a e noho pu me ka Haku o Iesu, a me na anela, a me na uhane o ka poe pono i hoolaia. Ilaila e pomaikai loa ai laua, a kau, a kau, a mau loa aku no.

HE MAU PULE POKOLE NO LOKO O KA BAIBALA.

                E ka Makua, ua hana hewa aku wau i ka lani a ia oe.--Luka 25:21.
                E ke Akua, e aloha mai oe ia'u i ka mea i hewa.--Luka 18:13.
                E ka Haku, e hoola mai ia makou, o make makou.--Mat. 8:25.
                E ka Haku, heaha kou makemake e hana aku ai au?--Oih. 9:6.
                Mai noho a haalele mai ia'u, e Iehova, e kuu Akua, mai noho a manao aku ia'u. E wiki mai i ke kokua ia'u, e kuu Moi, kuu mea e ala'i.--Hal. 38:21, 22.