Ke Alaula, Volume IV, Number 5, 1 August 1869 — Page 20

20 KE ALAULA.

EIA NO MAKOU E IESU.
Leo: WE ARE COMING, BLESSED SAVIOR.--Golden Censer.

1. E-ia no ma-kou e Ie-su, Me kau i ke-na mai, E li-lo nou mau lo-a, A nou e li-lo ai. HUI. E-ia ma-kou, e-ia ma-kou, E-ia no ma-kou e Ie-su, E-ia ma-kou, e-ia ma-kou, Me kau i ke-na mai.
2. Eia no makou e Iesu,
E kau mai ia makou,
Kou maka oluolu,
A launa pono pu.
HUI.--Eia makou, &c.
3. Eia no makou e Iesu,
E haawi no makou,
I naau makemake,
Ia aina nani mau.
HUI.--Eia makou, &c.
4. Eia no makou e Iesu,
Ia oe e hoolei ai,
A ae i kou hoomalu,
Ia makou na pokii.
HUI.--Eia makou, &c.
5. Eia no makou e Iesu,
Ina i makaukau,
Nau makou e lawe,
Ia wahi nani ou.
HUI.--Eia makou, &c. WAIKOLOA.

KA HAUMANA HOU.

                Mahope iho o ka hoomaka ana o ka hapaha kula, hiki mai he haumana hou nona ka helehelena maikai a me na kapa kohu pono. Hoopuni koke mai na keiki uhauha o ke kula iaia, me ke koi ikaika aku iaia e hele pu me lakou i na hale keaka, na wahi inu rama; a me na hana lealea. Lilo nui ko lakou mau dala ma ka ai ana a me ka inu ona ana, a hoopilikia pinepine ia na makua a me na makamaka i ka hookaa ana i na aie a lakou. He kakaikahi na keiki a lakou i makemake ai i pakele i ka upena a keia mau keiki kolohe. Ina e hoole kekahi i ko lakou manao, heneheneia lakou a hoowahawahaia imua o na hoa kula, nolaila he makau ka nui o na keiki ia lakou. Kono aku lakou i keia keiki i komo hope mai o hele pu me lakou a hoole kela. Kapa mai lakou iaia "he pi!" "He pi ka anei," wahi ana. "Auhea la ka ma-ua o ka hoolilo ole ana aku i na dala a na makamaka i kokua mai ai ma ke ano a lakou i apono ole mai ai; no ka mea aole na kakou i imi a loaa i na mea e lako ai kakou. Ua ike like kakou no na makua mai na loaa a pau a kakou. Auhea oukou, ea, aole no au e ae ana e hoolilo i hookahi keneta ma ke ano i hiki ole ai ia'u ke hoike aku i kuu makuakane a me kuu makuahine, ke ninau mai laua ia'u."
                “He makau wale ka oe i kou makuakane; makau paha o hahau mai kela ia oe; makau oe i kou luaui makuahine! Aole anei kela e haawi mai he wahi ko mea ono nau. Nani ka hoi ua keiki makau wale i na makua," wahi a lakou.
                Pane mai ke keiki malihini me ka wiwo ole, "Ke hoao nei oukou e hooweliweli mai ia'u, i makau au ia oukou, na keiki kolohe. Auhea la ka makau kupono—ka makau i na hana ino, ka makau me ka hoolohe i na makua, ka makau paha ia oukou. He makehewa ka oukou e hana nei e hookue ia'u i na oleloao a kuu mau makua aloha."
                Alaila ike iho na keiki kolohe he hiki ole ia lakou ke alakai hewa i keia haumana hou wiwo ole, no ka mea i ko lakou paio ana, o lakou la no ka i eha, aole i pilikia iki kahi malihini i ka lakou mau olelo henehene. Makau na keiki kolohe, a haalele mai iaia, aka o na keiki maikai o ke kula, pipili aku no lakou iaia, a i ka hana ana a me ka paani ana lilo oia i alakai no lakou.
                Olelo mai ke kumu, "He keiki makamae o Kahana; he keiki wiwo ole, a o na mea pipili aku iaia ua holo lakou imua ma ka paani ana a me ka huli buke ana. Aole he keiki e ae o ke kula i mahaloia e kona mau hoa e like me ia. O na hana kolohe a pau ua makau lakou iaia."

E MALAMA ANA I KA PONO I NA KAU A PAU.

                Aia ma na kapa kahakai o Enelani he kulanakauhale uuku o kekahi poe lawai. He poe kanaka ilihune, aka he naauao, a he malama ana i ka pono o ka Haku. I kekahi makahiki i kaa hope ae nei ua pilikia loa lakou i ka pakuikui mai o ka makani ino makai mai, a hiki ole ia lakou ke holo aku ma na waa a e kuu aku i na upena lawaia. Ua hala hookahi mahina okoa i ka makani ino wale no; a i ke kakahiaka o kekahi la Sabati malie mai, a huli ka makani mauka mai. Hoomaka aku kekahi poe paujlele kapekepeke i ke Akua i ka hele aku i kahakai a hoomakaukau i na waapa a lakou. Olelo ae na wahine, "Ua minamina makou i ka hiki ana mai o ka malie maikai i ka la Sabati, aka ua nele loa makou, o ka hooikaika hana aku paha ka hiki i loaa iki mai kau wahi ola iki."
                Ala kue ikaika mai kekahi kanaka ano koa iwaena o na kanaka lawaia, a olelo mai: "Auhea oukou e na hoalauna o'u, aole paha oukou e ae e uhai wale i ka ke Akua kanawai i mea e loaa ai kekahi pono kino." Hoakoakoa mai lakou a pau e hoolohe iaia, a pane hou mai kela: "E malama ana au i ka pono i na kau a pau, i ka wa ino a i ka wa malie, i ka wa e pakuikui mai ka makani mamua mai, a i ka wa hoi e pea uini mahope mai. Eia ke aloha i ke Akua, 'e malama oukou i kona kanawai.' 'E hoomanao i ka la Sabati a e hoano ia;' oia ke kanawai, e na makamaka. I hele mai hoi ko kakou Haku aole e hoole i ke kanawai, aka e hooko. He ilihune kakou, aka heaha ka hewa oia? E aho ka noho ilihune me ka aponoia mai e ke Akua mamua o ka noho waiwai ana malalo o kona huhu. E hele no oukou, ka poe i makemake i ka lawaia, i keia la Sabati, aka aole no wau i ike kekahi pomaikai nui i ukali i ka poe i haalele i ka malama ana i ka pono mamuli o ka huli ana o ka makani."
                Na keia mau olelo wiwo ole o ke kanaka kupaa i hoopaa mai ia lakou, a holo ole lakou i ka lawaia. Hoi no lakou i na kau hale, hookomo i na kapa, a hele aku i ka hale o ke Akua, ilaila e hoomana a hoomaikai aku iaia. Ia ahiahi, i ka manawa e maa ai na lawaia e hoi mai, ala koke mai kekahi ino ikaika loa. Ina ua holo na lalawaia, ina no ua make lakou i kela makani ino. Elua la i paa ai ua makani ino la, alaila malie loa iho, a ua nui loa na ia i puni i na lawaia o ia kulanakauhale, a pau ko lakou kaniuhu ana.
                Eia, ea, ka pono kupaa i na kau a pau. E hoomanao kakou i keia: "E hilinai aku ia Iehova, a e hana i ka pono; a e noho no oe ma ka aiha, a e hanai io ia'ku oe."

MAKE I KA UAHI BAKA.

                Hoolilo kekahi mau kanaka opio ekolu ia lakou iho i ahahui puhi baka. Aole i hala na makahiki elua ma ia hope iho, a pau lakou ekolu i ka make. Ua ninauia aku ko lakou kahuna nana i lapaau i ka mai i make ai lakou, pane ae kela, "I make lakou i ka uahi."
                Komo aku kekahi keiki nona na makahiki he umi-kumamaono iloko o kekahi hale kuai rama, a ku malaila e puhi kika ana. Hina koke oia ma ka papahele, a make koke no malaila. Kaheaia kekahi kiure e nana i kona mea i make ai, a hoopuka mai lakou ke olelo penei: "I make oia mamuli o ko ke Akua manao mua i ike ole ia'ku." Pela hoi ka olelo o ke kahunapule e hooluolu aku ai i na pilikana i ka wa o ka hoolewa ana. Ua ike kekahi wahine naauao i ka puhi baka mau o keia keiki, a olelo ae kela, "I make iho oia i ka baka." Na ka baka i hana ino i na io o loko o kona opu a me ka puuwai; inoino iho la kona puuwai, pau kona pauma ana, o ka make emoole no ia!

KA PULE A KA HAKU.

                E ko makou Makua iloko o ka lani, e hoanoia kou inoa. E hiki mai kou aupuni; e malamaia kou makemake ma ka honua nei, e like me ia i malamaia ma ka lani la; e haawi mai ia makou i keia la i ai na makou no neia la; e kala mai hoi ia makou i ka makou lawehala ana, me makou e kala nei i ka poe i lawehala i ka makou. Mai hookuu oe ia makou i ka hoowalewaleia mai; e hoopakele no nae ia makou i ka ino; no ka mea, nou ke aupuni, a me ka mana, a me ka hoonaniia, a mau loa aku. Amene.

KE ALAULA.
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.

                25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
O. H. KULIKA, Luna Hoopuka.