Ke Alaula, Volume IV, Number 7, 1 October 1869 — Page 28

Page PDF (441.52 KB)

28 KE ALAULA.

 

KAI A NAUWE I KA NANI.
Leo: OUR VICTORY.--Fresh Laurels.

1. Kai a nau-we i ka na-ni, Kai a nau-we i ka na-ni, Kai a nau-we i ka na-ni, Nau-we ma ka hae au-lii; Na-na ka-kou e kai ae I na pu-ka o ke ao mai-kai. Me-le ae, Me-le ae, No ka la-na-ki-la na-ni e; Me-le ae, Me-le ae No ka la-na-ki-la na-ni e. Nau-we me ka mi-li-la-ni, Nau-we me ka mi-li-la-ni, Nau-we me ka mi-li-la-ni, Ia Ie-su ke A-la-kai,
2. Aia onou mai na ino,
Aia onou mai na ino,
Aia onou mai na ino,
Ko ke ao me ko ka po,
Ko ka uhane, ko ke kino,
Ko ka uhane, ko ke kino,
Ko ka uhane, ko ke kino,
Lanakila ia Iesu.
Hapai nui i ke Lii
No ka lanakila nani e.
HUI--Mele ae, mele ae,
No ka lanakila nani e;
Mele ae, mele ae,
No ka lanakila nani e.
3. Aia pouli ae maluna,
Aia pouli ae maluna,
Aia pouli ae maluna,
A kau mai ka ino e,
Nana a kiai Iesu la,
Nana a kia Iesu la,
Nana a kiai Iesu la,
A hoomalu maikai mai,
A malalo ona no,
E hoomaikai oli ai kakou.
HUI--Mele ae, mele ae
No ka lanakila nani e;
Mele ae, mele ae,
No ka lanakila nani e.

NA LOLEWAWAE I POHOIA.

                E kokoke ana ka hora e hele ai i ke kula, aka e hoololohi ana o Toma ma ka hale a pipili aku oia i kona makuahine. A lawa ae ka maka o kona makuahine mai kana lole humuhumu a ike i ke kaumaha loa o ka maka o Toma. Ninau mai kela me ka minamina, "Heaha ia kou pilikia nui e kuu keiki; ua hana ino mai anei kekahi ia oe?" Pane mai o Toma, "Aole au makemake e hele i ke kula." "Aole ka oe i makemake e hele i ke kula! No keaha hoi? kainoa e lealea nui ana oe i keia la me kou mau hoa kula i ka hoolele ana i ka lupe hou a oukou," "Pela no," wahi a Toma. "aka ina e hele au e oluolu oe i lole wawae hou aku ka'u, aole o keia." No keaha la e kuu keiki; aole anei pili pono ia mau lolewawae aole hoi he wahi weluwelu?" Ae aku o Toma, "ae, aka he poho ma kekahi kuli a he poho ma kekahi; aole au makemake i na lole i pohoia."
                Aneane kani ka aka o kona makuahine i ka lohe ana i keia olelo a Toma, aka, huna iho oia i kona aka, a ninau mai, "Aole anei i hele aku kekahi mau keiki i ke kula me na lole i pohoia?" Pane mai o Toma, "Ua hele no kekahi mau keiki me na lole i  pohoia, e laa o VVili a me Keoni Balaunu, a me kekahi o na keiki uuku, aka, he keiki nui kekahi, o Keoki aole loa oia i hookomo i ka lole i pohoia. A ina e ike mai oia i kekahi keiki me ka lole i pohoia, henehene mai oia me ke kapa mai i na inoa  kapakapa; me ke kahea leo nu 'eia la o Pohonui-e, o Pohonui-e, o Lole weluwelu e, o Lole weluwelu.' Pela ia e henehene mai ai. Aole au makemake i ka heneheneia mai." A uwe waimaka iho la o Toma.
                Ike mai ka makuahine ua ehaeha loa ka naau o kana keiki, aka aole ona manao he pono iaia e haalele mai i ke kula ia la, aole hoi he pono e wehe ia mau lole i pohoia.
                A ninau oluolu mai kela ia Toma; "Pehea la kou manao, he keiki maikai a wiwo ole anei o Keoki?" Hoole mai o Toma, "Aole, he keiki no ia a he makau wale. I kekahi la mamua aku nei kaili aku oia i ka papale a Wili liilii a hoolei aku iloko o ka loko wai, a i kona ike ana i ke kumu kula e hele mai ana, papa koke aku oia ia Wili mai hai aku i kana i hana ai, a holo kela a pee maloko o ka nahelehele."
                Aka iki ka makuahine, a pane mai, "he makau wale no ka hoi kela keiki nui. Aka, ua lohe pinepine au i kou manao e noho me ka makau ole, he koa io. Aole anei e hiki ia oe e kinai iho i na manao makau wale a hele no i ke kula me keia mau lole i pohoia, no ka manao o kou makuahine, ua pono keia lole?" Pilikia iho la o Toma, a liuliu iki kona noonoo ana, alaila ae mai la ia, "ae, e hoao no wau."
                "Ua ike no wau he mea hooehaeha i ka manao ka henehene ia mai, a he aloha ole o Keoki i kana hoopilikia ana mai i na keik liilii, aka ea, ke manao nei wau e imi oe i ka wa kupono e hana aku ai oe i kekahi hana aloha iaia. E makaala oe a loaa i ka wa kupono."
                Honi mai ka makuahine iaia, a lawe oia i kana eke buke, a me kahi pakeke mea ai no ke awakea, a hele aku i ke kula.
                A kokoke aku i ka hale kula, halawai mai me ia ka mea ana i makau nui ai, oia o Keoki. Aloha aku oia ia Keoki, a pane mai kela, "aloha oe Toma liilii." Lana kona mahao e ike ole mai ana o Keoki i na poho o kona lolewawae, aka, he minute hookahi wale no paha, a ike koke o Keoki i na poho a kahea leo nui ae, "Eia ka ua hui aku o Toma me Pohonui ma? eia ae o Pohonui la e, o Pohonui la e, o Pohonui la e." A akaaka mai na keiki nui a pau. Pilikia loa o Toma, a holo aku ia i kona noho kula a huna i ke kulu ana o kona waimaka maloko o kona pahu kula. Hoomakaia ke kula, a hoikaika loa o Toma i kona mau haawina, aka, e kani mau ana ma kona pepeiao ka inoa hoino a Keoki i kapa mai ai iaia. Hiki i ka hoomaha awakea ana o ke kula, lele hou mai o Keoki a kapa mai no iaia, o Pohonui. Aka no ka ike o Toma e hooko ana oia i ka makemake o kona makuahine, malaila ua hooluoluia oia, aole hoi i pilikia loa.
                Hele mai o Kimo a me Jose, a kamailio pu no ka pono o ka hoolele ana i ka lupe a lakou, aka, no ka wela loa o ka la, a me ka pohu loa, hooholo ae la lakou e waiho i ka lupe a e hele i ke kahawai e auau ai. Holo kiki aku lakou i kahawai, a emo ole ua hemo na kapa a lehai aku lakou iloko o ka wai. Ia manawa hoea koke mai o Keoki a me kekahi o na keiki nui e manao ana e auau.
                Pane mai o Keoki, "E, e huna kakou i na lole o keia poe keiki liilii. Ea e nana mai, eia ka ka lole o ka hanau muli loa o ua o Pohonui ma, ka lolewawae keia o Toma, e huna mua au i kona." Lawe ua keiki ino la a huna ia lole iloko o ka nahelehele loloa. Wehe ae lakou i na lole a lele aku i kahi papau o ka muliwai. Hoomaka koke o Keoki e hoopilikia i na keiki liilii e auau ana. Kopi mai i ka wai ma ko lakou maka, a ukiuki kahi keiki liilii o Jose a kopi ikaika mai oia i ka wai ma ka maka o Keoki a eha kona maka, emi i hope oia, a haule aku iloko o kekahi lua hohonu iwaena ae o ke kahawai.
                Uwe a hooho leo nui mai o Keoki i kona pilikia, no ka mea, aole oia i ike i ka au, a poho koke aku oia iloko o ka wai. Aole wahi keiki o lakou a pau i ike i ka au o Toma hookahi wale no. Ku na keiki a pau e nana ana kekahi i kekahi me ka pilihua i ka makau, a me ka ike ole i ka lakou mea i hana aku ai.
                Hoomanao o Toma i ka olelo a kona makuahine, "E makaala oe a loaa ka wa kupono." Hoopoina oia i na hana hoomaewaewa a pau a Keoki iaia, a au koke aku e hoopakele iaia. Me ka hooikaika nui ua huki mai oia ia Keoki mai kahi poho a pae aku oia i kna aina maloo. Ua piha ko Keoki waha a me ka ihu i ka wai, a mai make maoli oia ke ole o Toma e kokua. Pae aku oia i kapa me ka hilahila i kana hana ino ana ia Toma me ka huna ana i kona lolewawae a me ke aloha hoi iaia no kona hoopakele ana i kona ola.
                Mai kela la aku ua okoa ke ano o Keoki; pau kona hoopilikia ana i na keiki uuku, a ua hoike mai oia i kona aloha ia Toma, ka mea i hoopakele iaia mai ka make mai. Ua olioli hoi o Toma i kona hoolohe ana i ka manao o kona makuahine a hele i ke kula me na lolewawae i pohoia.

KA BUKE WAIWAI LOA.

                "He nui na makahiki a'u i heluhelu ai i ka Bai bala," wahi a Lutera, "a elua hele ana a huli i ka makahiki hookahi. He laau nui keia a kiekie, me kona mau lala a me na lau ulu wehiwehi. Aole he wahi lala i lulu ole ia e a'u, ina paha e loaa mai i kekahi hua. Aole i nele ia'u i ka huli ana ma na lala uuku loa i ka loaa mai i na hua momona—ekolu a eha paha ohia nunui i loaa ia'u ma ka lala uuku loa."

KE ALAULA.
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.

                25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
O. H. KULIKA, Luna Hoopuka.