Ke Alaula, Volume IV, Number 8, 1 November 1869 — Page 29

KE ALAULA.
BUKE IV. HONOLULU, NOVEMABA, 1869. HELU 8.

KA ILIO MALAMA KEIKI.

                "E Lowa, Lowa; ina kakou e holoholo me ka bebe." Lele koke mai ka ilio, e kahili ana i kona huelo me ka olioli. Aloha loa o Lowa i ka bebe, me he la, e manao ana ia, oia iho no ke kahu o ke keiki. Ua hana o Keoki he ili kauo no ka ilio e hoopaa iho ai iaia i ke kaa liilii o ke keiki, a holo aku o Lowa e kauo maikai ana i ke kaa. Lealea maoli makou a pau, o Lowa, o Keoki, o Wili liilii, a me a'u.
                Aia a ku malie makou, huli ae o Lowa i hope a kau aku i kona nuku a me kona mau wawae maluna o Wili. Alaila hoopaa aku o Wili iaia me ka milimili aku i kona poo, a olioli loa ka ilio.
                I kekahi wa, ua waihoia o Wili ma ka maniania, a na ka ilio e kiai. Makaala loa o Lowa i ke kiai i ke keiki, aole e haalele, aka, e noho pu a malama. Ina hoi e hele mai kekahi malihini a Lowa i ike ole ai, a pane mai, a hoopaa mai paha ia Wili, huhu koke mai no ia me ka nunulu o kona leo, me he mea la e papa mai ana i ka malihini, "mai hoopa mai oe i ko'u wahi haku."
                I ka nana aku i ke kii maluna, he ilio Nupounelani paha keia; he loloa ka hulu, a he ano ilio aloha loa no kela i na kahu.
                He hoolohe pono loa o Lowa, a ina e kamailio aku oe, a maopopo ole iaia kou manao kauoha, nana pono mai kela, e imi ana i kou manao. A ike kela i ka manao o kona kahu, eleu loa oia i ka hana aku.
                Ina pela ka hoolohe o na keiki a pau me ka eleu i ka wa e pane ia aku ai, ina ua pono loa.

KA MAKUA O NA KEIKI MAKUA OLE.

                E noho pili ana na kanaka elua, he wahine ko kekahi me na keiki liilii, a pela hoi kekahi, he wahine a me ke keiki. Ulu mai ka noonoo ma ka naau o kekahi o keia mau kanaka, penei; Ina e mai au, a make paha, pehea ka'u wahine a me na keiki; e pilikia auanei lakou. Pilikia oia i keia mau manao pihoihoi oloko. Loaa hoi i ka lua o laua ka manao like no kana wahine a me na keiki ke make oia, aka, aole ona pihoihoi iki; no ka mea, i iho la ia, na ka Mea e malama nei i na mea a pau a kona lima i hana ai, nana no e malama ia lakou.
                I kekahi la e hana ana ka mua o keia mau kanaka ma ka waena me ke kaumaha o kona manao, a ike oia i kekahi mau manu e lele aku ana iloko o kekahi ulu laau a puka hou mai iwaho, a liuliu iki aku hoi hou na manu iloko o ka laau. Hele kela i ike i ke kumu o keia, a loaa aku iaia elua punana me na manu liilii, akahi a hanau, a e halihali mai ana na makuahine i ka ai na lakou. Hoi aku oia i kana hana a nana pinepine i na manu e lele ae ana e imi ana i ka ai a hoihoi aku na na keiki a laua. E ho mai ana kekahi o na manu e paa ana i ka ai na kana keiki ma kona nuku, a lele mai kekahi aukuu nui a hopu i keia manu liilii a kaili aku iaia i mea ai nona. I iho la ke kanaka i ka make ana o ka makua e make pu ana na keiki, no ka mea, aole mea nana e malama ia lakou o kahi makua wale no. "Pela paha auanei ka'u mau keiki; ke make au ao'e mea nana e malama." No ka nui o kona noonoo ana pela me ka pihoihoi, hiaa oia ia po, hiamoe ole a ao ka po. I ke kakahiaka hele hou kela i ka waena, a olelo kela ua pau paha na manu liilii i ka make i ka pololi no ka mea ole nana e malama a hanai ia lakou. Hele kela i ka laau a nana, aole manu i pilikia, e ola maikai ana lakou a pau. Kahaha loa kona naau i keia; a huna oia iaia iho ma ka nahelehele e ike i ke kumu o keia pilikia ole ana o na manu liilii. Emoole lohe oia i ka leo o ka manu makuahine hookahi i koe, e hoi mai ana, a lele koke mai ia me ka ai e paa ana ma kona nuku. Lawe ka manu makua i ka ai a mahele like aku na na keiki liilii o na punana no a elua, a ola lakou a pau.
                Pela i hoolako ia kela mau keiki makua ole; aole i make wale lakou i ka poino ana o ka makua. Ia ahiahi hai aku keia kanaka i keia mea ana i ike ai i kona hoalauna e noho pu ana. Pane mai kela, "Aole paha i pihoihoi hou oe no kau mau keiki. Aole loa e haalele ana ke Akua i kona poe kanaka a i ka lakou mau keiki. He hohonu loa kona aloha. Aole a kakou i ike i na mea kupanaha a kona aloha e hana mai ai. Nolaila e hilinai kakou maluna ona ma ke aloha aku, a e hele imua me ka manaolana. Ina e make mua au nau e malama mai i ka'u mau keiki. A ina no hoi e make pu kaua a elua i ka wa liilii o ka kaua mau keiki, na ke Akua no ka Makua ma ka lani e malama a e hoolako ia lakou."