Ke Alaula, Volume IV, Number 8, 1 November 1869 — Page 30
36 KE ALAULA.
I kekahi ahiahi mahope mai o ka aina ahiahi, ua hoi mai ka makuakane o Ediwina, mai ke kulanakauhale, kahi o ka makeke mai. Noho oia ma ke koki ma ke kihi. Aia maloko o ke kapuahi he ahi nui, hele mai o Edewina a noho maluna o kekahi noho liilii imua ona.
"E papa," wahi a Edewina, "e hai maiia makou i na mea pili i kou hele ana, Heaha ka mea kupanaha loa au i ike ai?"
"Aneane akaka ole ia." wahi a kona makuakane. "Ua ike no au i na mea kupanaha he nui, hookahi nae mea i oi ma ke ano kupanaha, he wahi mea i hana ia no kekahi kanaka."
"He mea hana?" wahi a Ediwina.
"Ae, he mea hana, he mea e hana ai i kekahi mau mea."
"E papa, owai kona inoa? he mea aha?" wahi a Ediwina. "He mea hou paha?"
Olelo ka makuakane, nui na hana i hiki ke hana ia me keia mea, a noilaila ke kumu o kona kupanaha. Makena na hana e hana ia me ia. A he pono ke kapa ia he mea hana ma na wahi a pau.
"Heaha kekahi o na mea i hiki ke hana me ia mea?"
Eia kekahi mau hana kupono i keia mea, he hamare laau, he komo lima, he wili kolu, he hinai.
"E papa, e hoopunipuni wale mai ana paha oe ia'u." "Aole, he oiaio no keia, ina aole au i ike maka, alaila, ua manao paha wau he hoopunipuni," wahi a papa.
"Pehea la e hiki ai ke lilo ka mea hookahi i hamare laau, a i komo lima?"
He mau hana e ae i hiki ia ia ke hana, hiki ke lilo i hoe, a i kope lepo, a i kopala, a i pahu kahi e lawe ai i ke kala.
Aka, ua manao o Ediwina, aole he oiaio na olelo a kona makuakane, aka i ka nana'ku, he oiaio no, a pololei loa.
"I kekahi manawa, lilo keia mea hana i pakeke, a i mea pai, a i kiaha, a i makau, a i pu olelo, a i ohe nana, a i upa umii, a i mea wili, a i paku, a i umii amala, a i mea kau paona, a i oo."
Ua hiki anei i keia mea ke eli ma ka lepo? Ae, wahi a kona papa, "A e kau paona hoi?" Ae, a he upa ahi, a he omoki, a he mea wehe omoki, a he ana lole, he ana laau, he ana wai.
"Kupanaha io keia mea," wahi a Ediwina. He wahi mea hou, a nui ke kumukuai, wahi ana.
Aole, he mea loaa koke ia, ke manao e hana, I ko'u nana ana nae, he naauao loa ka mea nana i hana i keia mea.
"He mea loaa wale anei keia, e papa?" wahi a Ediwina. I ko'u manao ana he mea ane loaa ole keia. E loaa wale no, wahi a kona makuakane. Aole nui na lala e pili ana iaia, ma kuu ike ana, aole paha i oi i na lala eono.
A hiki no ka ke hana i keia mau mea me keia mea hookahi?
Ae, ma ka hoololi ana i keia mau lala, e hiki ke hana i keia mau mea a pau, a nui loa aku.
E papa, no ke aha la kou kuai ole i kekahi o keia mau mea hana, a lawe pu mai me oe i ka hale nei?
"Ua lawe mai no au," wahi a ka makuakane, a eia no ia; A o aku oia i kona lima akau ia Ediwina e nana mai ai.
E papa, aole paha o kou lima keia mea kupanaha?
Ae, oia no, aka i ko'u manao, aole paha eono lala, akahi, elua, ekolu, a helu pu i ka manamana nui, a me ka manamana uuku, eha, elima. Elima wale no ka, a hiki no ke hana i keia mau hana a pau me keia mea.
Aole o'u manao o kou lima keia mea, wahi a Ediwina, a ke manao nei au, aole hiki ke hana i keia mau mea a pau me ka lima.
Ninau ka makuakane, heaha ka mea i hiki ole ai ke hana me ka lima?
O ka pu kani, wahi a Ediwina.
Hiki no, wahi a kona papa, ina ma ka nahelehele O aku kakou ma ka lima i lohe pono ia, o ka palake. Ae, palake no kakou i kekahi mea me ka lima, a he pahu kala? a e lawe no au i ke kala ma ko'u lima, a he oo? Ae, he oo no ka lima e eli ai i ka lepo, a he hoe no, e hoe ai i ka waa. a e au ai, he kope opala, he kopala, he wili, he paku, he peahi, he hamare laau, a me ka lima hoi e kaupauna ai i kekahi mau mea, i akaka ke kaumaha, ka mama.
E papa, wahi a Ediwina, aole au i ike mamua, ua hiki ia'u ke hana i keia mau mea he nui wale me ka lima.
He wahi mea hana kupanaha no ka lima, a eia nae ka mea kupanaha loa, o ka hoole o kekahi poe, aole he mea nana i hana i ka lima.
No ke aha la i manao ai lakou, aole he mea nana i hana i ka lima? wahi a Ediwina.
No ka mea, aole lakou makemake e manao i ke Akua wahi a kona papa. Ua like lakou me na keiki kula, e paani ana i ka wa hoomaha o ke kula, a hele mai kekahi, a olelo, ua kani ka bele, a pane aku lakou, hoopunipuni oe, aole i kani.
Eia ke kumu o ko lakou manao ole; o ka makemake e noho a paani hou. A nolaila, haalele, a kue i ka mea i hoike pololei.
Oia anei ka mea i lilo ai kekahi poe i poe hoole i ke Akua? wahi a Ediwina.
Ae, aole lakou makemake e manaoio he Akua, makemake lakou e noho nanea wale iloko o ka hewa. F. M.
AOLE HE KEIKI I LIKE ME KA'U.
Oia no ka manao o ka naau o ka makuahine nana i hanau i ke keiki. Ua oi kona aloha, a me ka minamina, a me ka makemake i kana keiki ponoi iho, mamua o na keiki e ae a pau loa. Na ke Akua i hookomo i keia manao aloha iloko o ka naau o ka makuahine, i malama pono oia i kana keiki, me ke kiai i kona wa liilii, i hiki ole e malama iaia iho. Na ka makuahine e pale aku i na mea hoeha mai, a hana ino mai i kana keiki.
Aole e minamina ka makuahine aloha, i kona ola iho, ina he mea e hana ino mai ana i kana keiki. Aole he mea ma ke ao nei e hiki ke hookaawale iho mai ka makuahine aku, ke aloha i kana keiki ponoi; o ka make wale no ka mea e kaawale ae.
Nolaila, ina i naauao ka makuahine a ike i ka pono io, oia no ka makau i ke Akua, aole e ole kona alakai pono ana i kana keiki ma ke alanui o ka pono a me ka pomaikai.
Ina he naauao na makuahine o kekahi lahui, e alakai ia na keiki a lakou mai ka wa liiliii loa mai me ke aloha, ma na alanui maniania o ka pono, a o ke aloha makua, ao ke aloha lahui, a e pii koke ai keia lahui a loaa aku i ke kulana hanohano a me ka pomaikai.
Ma ka pono o na makuahine e pii ai ka lahui, a ma ka naaupo a kolohe paha o na makuahine e mau ai ka poino o ka lahui.
E na keiki, e aloha aku oukou i na makuahine o oukou. E hoolohe, a e malama i na olelo ao maikai a Iesu. Aole mea e ae i aloha mai ia oukou e like me ko oukou mau makuahine ponoi.
"E hoomaikai oe i kou makuakane, a me kou makuahine; i loihi ai kou mau la maluna o ka aina a Iehova a kou Akua i haawi mai ai ia oe." Pukaana 20:12.
HE KAIKAMAHINE ALOHA.
I kekahi kakahiaka, ua loaa ia'u o Dora, he wahi kaikamahine liilii, e hooikaika ana e aiana i na kawele a me na kakini.
"Aole anei he kaumaha keia hana no na lima liilii a palupalu?" Pela kuu ninau i ua wahi pokii nei.
Alohilohi ae la kona mau maka me he mea la ua pa mai ka la, a nana ae la ia i kona makuahine e hii ana i ke keiki.
"Aole no he kaumaha ina no e kokua ana au ia mama," wahi a ua pokii aloha nei.
Pela io no. Ina he aloha ke kumu o ka hana, ua mama ka hana. Pela no hoi, ina aloha kakou ia Iesu, aole no e kaumaha ka hooikaika ana nona: O ke ALOHA ka mea e mama ai kana auamo.
Aole anei he pono ia kakou e aloha ia Iesu ko kakou makamaka i aloha lua ole ia kakou?
L. L. N.
NA RULA BAIBALA NO KE KANAKA OPIO.
E hoonaaupono. Ma na mea a pau, e hoike aku oe ia oe iho he kamu no na haha maikai; a me ke ao ana'ku hoi, he wahahee ole, he hanohano, a he oiaio; e hoike i ka olelo pono, aole e hiki ke hoole ia mai; i hilahila ai ka mea e hookoa ana, no ka loaa ole iaia ka hala e olelo ino mai ai ia oukou. Tito 2: 6, 7, 8.
E hoomauia ka maikai o ka oukou olelo, i miko ia i ka paakai, i ike oukou i ka mea e pono ai ke olelo i kela kanaka a i keia. Kol. 4: 6. Mai manao aku i na mea kiekie, aka, e alakaiia e na mea haahaa.
Mai manao iho ia oukou iho, ua akamai. Roma 12:16.
E hoowahawaha i ka ino; e hoopili aku i ka maikai. E launa aku hoi kekahi i kekahi ma ke aloha hoahanau, e hoopakele aku kekahi i kekahi ma ka hoomaikai ana. I ka hana mau ana, mai hoopalaleha; i ikaika hoi oukou ma ka naau; e malama ana i ka Haku. Roma 12; 9, 10, 11.
E hoomanao oe i kou Mea nana i hana, i na la o kou noho opiopio ana; oi hiki ole mai na la ino, a hookokoke ole ia mai na makahiki au e olelo ai, aole ou oluolu i keia mau mea. Kek.