Ke Alaula, Volume IV, Number 8, 1 November 1869 — Page 32

32 KE ALAULA.

HUI NA HOA.
Leo: GLADLY MEETING.--Fresh Laurels.

1. Hui na ho-a Me ke alo-ha, Ma ka Sa-ba-ti mai-kai; Wai-ho ae i na ko-lo-he, No-ho mae-mae a no-no-he, Na-na, noo-noo, a hoo-lo-he Ma ke ku-la nei.
2. Hui na hoa,
Me ke aloha,
Hui kuikahi mai;
Ala, ala na uhane,
Pule, huli, a hoonani,
Imi i na pono lani
Ma ke kula nei.
3. Hui na hoa
Me ke aloha,
Ma na Sabati oonei;
E aoia ma ka imi,
Uluhia i na iini,
Pii a hui me na kini
Ma ke ao maikai. HAWAII.

HUNAHUNA KULA SA BATI MA NA AINA E.
Kekahi hua o ke Kula Sabati ma Wale.

                Hai mai kekahi o na Lunakanawai Kaapuni o Wale, ma Beretania, iloko o kona noho Lunakanawai ana, he umi makahiki, eono wale no mea i hoopai ia imua ona no ke karaima. I ka hui ana o ka Aha kiure ma kekahi apana, ua hookomo ka Lunakanawai a me na kiure i na mikini komo lima keokeo, he hoailoona ia o ka loaa ole i ka hihia hookahi, e hookolokolo aku ai ma ia kau Ahahookolokolo.
                Aole pela i na makahiki mamua aku nei ka maluhia o ka aina o Wale. Ua kupanaha ka hiki wawe o ka hobmaemaeia o ia aina, mai na hihia karaima. Ke kumu nui o keia ano e ana, oia no ka laha loa ana o na Kula Sabati ma ia aina i keia mau makahiki hope mai nei.

Aloha ke Keiki kuaaina i ke Kula Sabati.

                Ma Mikikana, kekahi o na moku aina o Amerika Huipuia, ua hele wawae mau kekahi wahi keiki i ke Kula Sabati; Elima mile kahi ana i hele wawae aku ai i kela a me keia Sabati. A hiki i ka wa anu o ka hooilo, hiki ole iaia ke hele aku i kahi loihi. Olelo ke kumu, e kokua pu oia, a e hoomaka i ke ao ano i kula ma kona wahi. Hoomaka koke aku keia keiki i ka houluulu i na haumana. I hiki aku ka hana o ke kumu, ua hoakoakoa mua ua wahi keiki nei i na haumana he kanaono ma ke Kula Sabati hou!

Ka Mauna o Ziona ma Ierusalema.

                Holo makaikai aku kekahi ma ka aina o Palesetina, a loaa aku iaia ma Iesusalema, maluna o ka mauna o Ziona, he Kula Sabati o na keiki he 64. Himeni ae lakou i kekahi o na Mele Kula Sabati o Amerika, oia paha kekahi o na mele e pai ia nei ma ke Alaula.

KO NELE HOOWALEWALE IA ANA.

                O Nele, he wahi kaikamahine nona na makahiki elima. Ua imi kona makuahine e ao iaia ma na mea pono.
                I kekahi manawa, e ku ana o ua o Nele nei ma ka puka o ka rumi ai, e nana ana me ka iini nui i kekahi hinai hua piki, e kau ana ma ka papa ai. Ua maopopo no ia Nele, aole pono iaia ke lawe me ka ae mua ole ia mai; aka ua nui ka ono o na piki. Mamuli ike kona makuahine iaia e kulou ana kona poo me ka uhi i kona mau maka me kona mau lima. "Heaha la ka pilikia, e Nele e?" wahi a ka makuahine. Hikilele ae oia i ka nana iluna, no ka mea, aole i manao oia e nana mai ana kona mama, pane mai la," "He nui ka ono o kuu puu i na hua piki, aka ua manao au e noi mua aku i ke Akua, e hoike mai oia, ina he pono ia'u ka lawe i kekahi."
                Pela i pakele ai o Nele, aole i lilo aku i ka hoowalewale ia mai. Pela no e na pokii e pakele ai kakou ke hoowalewale ia mai, ke noi aku i ke Akua e ao mai, a e hooikaika mai. He mana ko Iesu e kokua ia kakou i ko kakou wa e pilikia ai. Nolaila, he pono ia kakou e hilinai mau i ko kakou makamaka aloha.

KA WAI HOOMAEMAE, A ME KA HANA ANA I KE KANANA.

                E na pokii heluhelu Alaula, e hoakaka iki au no ka hana ana i ke kalana, pepa keokeo. Ma na aina naauao o Amerika a me Europa, ua ohi ia na welu o kela ano keia ano, koe nae na welu huluhulu, i mea hana pepa.
                O ka hana mau.— E wae a kaawale na welu o kela ano keia ano. Na welu lilina ma kekahi paila, a o na welu pulupulu ma kekahi paila. Ua ohi ia keia mau welu mai na aina e mai kekahi, mai Palermo mai, a mai Semurena mai, a mai kekahi mau kulanakauhale e ae kekahi. He lepo, a ino no i ka nana aku. Pela i hoohalike ia ko kakou pono e Isaia 46: 6, "Aka ua like makou a pau me ka mea haumia, ua like hoi ko makou pono me ke kapa pea."
                O ka hana alua.— A pau ka wae ana, ua hookomo ia na welu lepo iloko o kekahi kio wai nui. Malaila no i hoohui ia kekahi laau hoomaemae me ka wai i holoi ia na welu a aiai loa. Ua okioki liilii ia hoi e na pahi hoopaa ia ma kekahi wili nui. Pela i holoi ia a maemae loa, a lilo hoi me he wauke la i kuku ia.
                Ka hana akolu.—Oia no ka hapai ana i keia mea, me he poi la, a kau ia ma na mea huluhulu i hohola ia mawaena o na wili nui e kawi aku i ka wai, a pela aku no mawaena o na wili e ae, a lilo i pepa keokeo a maloo.
                Pela no ko kakou mau naau, e na pokii ua haumia, ua ino. Aole no e hiki ia kakou ke holoi. Ina nae e luu kakou iloko o ka punawai a Iesu i hoomakaukau ai, nana no e holoi a aiai loa e like me he hau la.
                Me ka manaoio kakou e noi aku ai i ka Haku e holoi mai ia kakou a maemae loa. L. L. N.

NO TE ROISA.

                He umi makahiki ke kaua ikaika ana a ko Helene poe me ke kulanakauhale o Teroi sa, a he nui ka poe i make ma kela aoao a ma keia aoao, aka, aole he hiki i ko Helene poe e hoopio mai no ke kiekie o ka pa kaua ikaika e hoopuni ana i ke kulanakauhale o Teroisa a puni. Hookahi no hoi ipuka ma keia pa a puni.
                Hana maalea iho la ko Helene poe. Hana lakou i lio laau nui, e ku ana kona mau wawae eha maluna o na kaa. Lawe lakou i keia lio a kokoke i ka ipuka o ka pa, a olelo aku i ko Teroisa poe, "he makana keia no kekahi akua o oukou maloko o ke kulanakauhale." Ae ko Teroisa poe e hookomo mai ka lio a waenakonu o ke kulanakauhale. I ka po, puka mai na kanaka i hunaia maloko o keia lio, a wehe i ka ipuka o ke kulanakauhale, a komo na koa o Helene, a pau ko Teroisa poe i ka lukuia.
                Hookahi wale no ipuka o ia kulanakauhale; a ina e poai hele ia kona pa a puni, hookahi wale no ipuka e loaa aku ana. Pela hoi ke kulanakauhale o ka lani, nona na alanui gula, hookahi wale no ipuka e komo aku ai. Ua hai mai hoi o Kristo, "owau no ka ipuka."

HE MAU NINAU PILI BAIBALA.

Heaha na mahele nui elua o ka Baibala?
O ke Kauohahou a me ke Kauohakahiko.
Owai ka mahele nui o laua?
O ke Kauohakahiko. He kanakolu kumamaono buke ma ke Kauohakahiko, a he iwakaluakumamahiku ma ke Kauohahou.
Ehia makahiki ka paa ana o ke Kauohakahiko mamua o ka hoomaka ia o ke kakau ana o ke Kauohahou?
He ekolu haneri a me kanaiwa kumamahiku makahiki mahope o ka paa ana i ke kakauia o ke Kauohahou.
Ehia la makahiki o ke kakauia ana o ke Kauohahou a paa ia i ke kakauia?
He kanalimakumamawalu paha.
Heaha na mahele ano nui maloko o ka Baibala?
Ka Moolelo lahui, ka Moolelo kanaka, na Mele, na Wanana, ka Euanelio, a me na Episetole.
Ma na buke hea la e loaa ai ka Moolelo lahui? ka Moolelo kanaka? na Mele? na Wanana? ka Euanelio? Na Episetole?
Mahea ke ao nui o ka Baibala ia kakou, no na mea e pili ana i ko keia ao, i ko kela ao anei?
Heaha kau ike nou iho i loaa mai ia oe noloko o keia buke?

No ke aha la keia? he kumukuai ma ka lima o ka mea lapuwale, e kuai aku ai i ke akamai, aole manao ona malaila.--Solomona.

KE ALAULA.
He Nupepa Hoikeike Kii.
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.

                25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
O. H. KULIKA, Luna Hoopuka.