Ke Alaula, Volume IV, Number 9, 1 December 1869 — Page 33
KE ALAULA.
BUKE IV. HONOLULU, DEKEMABA, 1869. HELU 9.
DANIELA MA KA LUA LIONA.
I ke au ia Dariu, ke Alii o Babulona, ua hoonoho oia i hookahi haneri a me iwakalua-kumamalima mau alii maluna o kona aupuni a pau, a ekolu mau Peresidena maluna iho o lakou; a o Daniela ka mua o keia mau Peresidena ekolu. Me he la, o Daniela no ke Kuhina Nui maluna o ke aupuni a pau. O ka Moi ke poo, a o Daniela aku. No ka hoonoho o ka Moi ia Daniela maluna o lakou, lili lakou, a imi na 'lii i ka mea e hoohihia ai iaia, aka aole nae i loaa, no ka mea, ua pololei loa ko Daniela malama ana i na hana a pau o ke aupuni, na mea a pau e pili ana i kona oihana Kuhina Nui. A olelo lakou, aole e loaa ana ia kakou he mea e hihia ai o Daniela, aia wale no ma kona malama ana i kona Akua; nolaila hana lakou i pahele e hoohihia ai ia Daniela. A penei: Akoakoa lakou imua o Dariu me na olelo hooluolu, e i ana e kau aku oia i kanawai e hookapu i na kanaka a pau aole e hoopii a nonoi aku paha i kekahi kanaka, a i kekahi akua paha, a hala na la he kanakolu, i ke Alii wale no e nonoi ai, a o ka mea e uhai i keia kanawai, e hooleiia oia ma ka lua liona. Ae ke Alii i keia manao lapuwale a na 'lii, me ka ike ole nae i ko lakou hana maalea e hoopilikia ai i kona Kuhina Nui ana i aloha ai.
Hanaia ke kanawai a paa, a kakauia ka inoa o ka Mui. A ike o Daniela ua paa ke kanawai e hoopilikia ai iaia, aole ona huli iki ae, aka e like me kana hana mau mai mua mai, pela no ia i hana hou aku ai. Komo oia i kona keena, a ma ka puka makani haliu ae kona maka i Ierusalema, a kukuli iho a pule aku i ke Akua, ekolu pule ana i ka la, e like me mamua.
Akoakoa keia poe enemi i hoomakakiu iaia, a loaa koke aku oia ia lakou e pule ana i kona Akua. Olioli loa lakou, a hele koke a hai i ka Moi: "O keia Daniela, ka Iudaio i lawe pio ia mai, aole oia i malama i kou kanawai au i kau ai, aka ke pule nei oia i kona Akua, aole ia oe."
Alaila, minamina loa ke Alii, a imi i ka mea e hemo ai o Daniela. Olelo na enemi i ke Alii; he mea pau loa ke kanawai, aole hiki ke hoololi ae. Nolaila ae ke Alii, a kauoha e hooleiia o Daniela ma ka lua liona, a paniia ka waha o ka lua liona me ka pohaku a paa.
E nana ae ma ke kii. Ke kukuli la o Daniela iwaena o na liona maka ino, a ke pule la oia i ke Akua nona ka mana e hoopaa i ka waha o na liona.
Hiamoe ole o Dariu ia po a ao, e hoomanao mau ana ia Daniela, me ka hooki ai a ao ka po. "A a ae ke Alii iluna i kakahiaka nui, a hele wikiwiki aku la ma ka lua liona. A kahea aku la ia me ka leo kaniuhu ia Dainela, i aku la. E Daniela, e ke kauwa a ke Akua ola, ua hiki anei i kou Akua, ka mea au i hookauwa mau aku ai, ke hoopakele ia oe mai na liona ae? I mai la o Daniela i ke Alii, E ke Alii, e ola mau loa oe. Ua hoouna mai ko'u Akua i kona anela e hoopaa mai i ka waha o na liona, i ole e hoeha mai lakou ia'u; no ka mea, imua ona aole hala iloko o'u, aole no hoi au i hana ino aku ia oe, e ke Alii." Alaila hauoli ke Alii i ka hoopakeleia o Daniela, a hukiia oia mai loko mai o ka lua. A o na enemi o Daniela, ka poe i imi e pepehi iaia, pau lakou i ka hooleiia iloko o ka lua liona, a lanakila na liona maluna o lakou, a ua hakihaki liilii loa ia ko lakou mau iwi. Ua like ke kanaka ma ka waha o ka liona pololi, me ka iole ma ka waha o ka ilio, a o ka popoki paha. Aole he mea e pakele ae ke loaa pono mai iaia. O ka mana wale no o ke Akua ka i hoopakele ia Daniela. E nana ae oukou i ka moolelo no Luka, ke kahu liona i make i kona mau liona ma Parisa, i ka malama o Augate i hala iho nei. Ke hoopuka nei makou ia moolelo ma kekahi kolamu o keia pepa.
Owai ka mea i pii ae i ka lani, a i iho mai hoi? Owai ka mea i hooiliili i ka makani ma kona lima? Owai ka mea i hoopaa i na wai ma kona aahu? Owai ka mea i hoonoho i na welau a pau o ka honua? Owai hoi kona inoa, owai ka inoa o kana keiki?—Sol.