Ke Alaula, Volume IV, Number 9, 1 December 1869 — Page 36

36 KE ALAULA.

KAI POLOLEI.
Leo: KEEP TO THE RIGHT.--Fresh Laurels.

1. Nau-we pu a li-ke, Ku-paa no a mau; Nu-i no na ma-ka i kau mau ia ou-kou. Ma na la ma-ka-ni, Ma na la lae-lae, Kai po-lo-lei la, Kai po-lo-lei,
2. Kau ka hae iluna
I hulili ae.
Me na eheu manu
I ka pii ana'e;
A i hee a holo
Kou mau enemi,
Kai pololei la,
Kai pololei.
3. Noi i ka Haku
I makoa ae,
Nona mai ka ikaika,
Nana e kaei mai;
E kaua maikai ai;
Kai pololei la,
Kai pololei.
4. Aloha no ke Kumu,
Me ka pono pu;
Nauwe lanakila,
Mai nei ae a o;
Paio no ka lei la,
Lei mae ole no,
Kai pololei la,
Kai pololei.
WAIKOLOA.

NO KU RO.

                Elima haneri a me kanakolu kumamawalu paha makahiki mamua o Iesu e noho ana kekahi alii nui ma Peresia, o Kuro kona inoa. Lawe oia i na koa he nui loa a hele i ke kaua, me ka manao e lawe pio i ke kulanakauhale hanohano o Babulona.
                He kulanakauhale alii keia, he nui loa a he ikaika loa, a ua hoopuniia i ka pa kiekie loa, a o na puka pani kahi e komo mai ai i ke kulanakauhale, he mau puka keleawe; he paa loa, aole he wahi e hiki ai ka enemi e komo aku iloko. He nui loa hoi ka ai maloko o keia kulanakauhale, nolaila aole e wi koke lakou ke hoopuniia mai i na enemi.
                Ma ka nana ana aole he hemahema o Babulona, a ua hiki iaia e pale aku ia Kuro a me kona mau puali kaua, a e hoi nele aku oia me ka lawe ole ia Babulona. Aka ua hai mua mai ke Akua ma ka wanana o Isaia e lawe pio ana oia i keia kulanakauhale. E nana iho oukou i ka wanana o Isaia e pili ana i keia alii o Kuro, ma ka mokuna 44 a me 45, i hoopuka ia 174 makahiki mamua aku o ka hiki ana mai o Kuro. Ua ko no, a e ko ana na manao paa a pau a ke Akua. Ma ko ke kanaka nana ana, aole e lilo ana o Babulona ia Kuro, aka ua ko ka ke Akua manao no ia mea.
                Ku ke kulanakauhale o Babulona ma na aoao elua o ka muliwai o Euperate a ua kahe aku ka wai malalo o ka pa e hoopuni ana i ke kulanakauhale, a puka aku ma kela aoao malalo o ka pa. Noonoo hohonu o Kuro i ka mea e lilo ai o Babulona iaia.  Manao kela e eli i auwai hou a e hoohuli i ka muliwai nui o Euperate ma kahi e, alaila e hiki iaia e hookomo aku i kona poe koa iloko o ke kulanakauhale maloko o ka auwai o ka muliwai i hoomaloo ia.
                Pela i hana aku ai o Kuro. Eli oia i auwaha nui, a i kekahi po hoohuli ae oia i ka wai o Euperate a pau ma ka auwaha hou, a hookomo koke aku oia i kona mau koa ma ke kahawai i hoomalooia, a pio koke ke kulanakauhale iaia. E ahaaina ana, a e inu ona ana na kanaka o ke kulanakauhale, ia po, me ka manao ole ua kokoke mai ka poino ia lakou.
                Ia po hana o Belehazara, ke alii, he ahaaina nui ma kona hale alii. Lawe ia mai i kela ahaaina na kiaha gula laa o ka hale o Iehova i lawe pio ia mai Ierusalema mai e Nebukaneza, ka makuakane o ua o Belehazara. Iwaena o ko lakou inu ona ana, ua loohia lakou i ka makau i ka ike ana i ka hapa pulima e kakau mai ana ma ka paia o ka hale alii. Aole he kanaka, aole he lima, o ka pulima wale no. A eia na hua olelo i kakau ia: "Mene, Mene, kekelu, uparesina." Haohao nui lakou i ke ano o keia mea, alaila, kiiia o Daniela ka Iudaio i lawe pio ia mai e Nebukaneza, e hai mai i ke ano o keia mau olelo i kakau ia ma ka paia.
                Hai mai o Daniela i ke alii e kau mai ana ka hoopai a ke Akua maluna ona no kona hewa a e lilo ana kona aupuni iloko o na lima o kona mau enemi. E loaa aku ia oukou ka moolelo o keia mea kupaianaha ma ka mokuna elima o Daniela. Ua heluhelu mua paha oukou malaila. Penei na olelo hope loa oia mokuna: "Ia po no pepehiia iho la a make o Belehazara ke alii o ka poe Kaledea. A lilo ke aupuni ia Dariu i ka Media, he kanaono kumamalua ona mau makahiki."
                O keia Dariu, he hoahanu ia no ka makuakane o Kuro, a oia kekahi i hui me Kuro ma ia kaua ana, a nolaila i hai ia ua lilo ke aupuni iaia, aka ua lilo pu no ia laua a elua ke aupuni.

KA LAHA ANA O KA BAIBALA MA SEPANIA A ME POTUGALA.

                Mai ke kipakuia ana aku o ka Moi wahine ino o Sepania a hiki i keia la, he umi paha mahina, ua holo loa ka laha ana o ka olelo a ke Akua ma ia aina. Iloko o keia mau mahina, ua hoopuka ia aku ma Sepania he 10,000 Baibala, he 37,000 Kauoha Hou, a 200,000, o ka euanelio o Mataio, Mareko, Luka a me Ioane.
                He iwakalua na kanaka e kuai nei i na Baibala ma Lisebona ke kulanakauhale alii o Potugala.
                Ke wawahi nei ke Akua i na paku e hoopouli ai i na lahuikanaka. O kekahi mau alii naaupo, hookaumaha, uhauha, e like me ka Moi wahine o Sepania i hoopai ia iho nei, ke kipakuia nei lakou, a ke hookahuli ia nei ke ano o ka noho ana o kekahi mau lahui, a ke holo nei ka ike i ka olelo a ke Akua.

KA MAKE ANA O LUKA KE KAHU LIONA.

                Ke ike la kakou i ka hoopaa ia o ka waha o na liona i ole e nahu mai ia Daniela. He mea hiki no e hoolakalakaia na holoholona ano hihiu. He hoolakalaka ia no ka liona a hooikeike ia ma na hale hoike holoholona. I ka la 18 o Augate i hala iho nei e hoikeike ia ana eha liona maloko o ko lakou pa hao ma kekahi hale keaka ma Parisa Farani. Ua hoolakalaka mua ia lakou, a ua hoike pinepine ia mamua e Luka ke kahu o keia mau liona.
                Komo aku o ua o Luka maloko o ka pa liona a hoomaka e hoala aku ia lakou me kona huwipa. Ala mai ua mau holoholona weliweli nei me ka huhu, a nunulu mai ka leo me ka hae mai. Manao o Luka e hoomoe hou aku ia lakou ma ka haka pono aku o ka maka ia lakou; o ka lele koke mai no ia o kekahi liona wahine a kulai aku iaia ilalo. Hooho mai ka lehulehu me ka weliweli. Hoomaka o Luka e ala iluna, ka paa koke no ia i kekahi liona nui i lele mai a moe maluna o kona umauma. Pela i paa ai kela a nahunahu mai kekahi i kona a-i, a nahu kekahi ma ka uha. Lele koke mai o Pepe ke kauwa hana o Luka, a hahau mai i na liona hae, me ke kumu o kekahi pu kau poohiwi. Olelo mai o Luka, "E hoi aku oe, owau hookahi ke make." Pane mai kela, "E make pu no wau me oe." I ole kekahi liona makapo, ina no ua make laua a elua. Lele mai ka liona makapo iwaena o na liona me ka hae mai, a kau liilii na liona ekolu. Alaila huki ia aku o Luka mawaho o ka pa liona me ke koko e kulu ana ilalo a me na eha manaonao loa. Puka mai hoi o Pepe me ka eha ole.
                Nana na kauka ia Luka a loaa he iwakalua kumama lima wahi i nahu ia e na liona. Ma ka maka, ma ka umauma, ma ka lima a ma na uha. Elima la mahope mai olaila, make o Luka. Ke kolu keia o na kanaka i make i keia mau liona eha.
                Weliweli keia alii o na holoholona i kona wa e huhu ai. Nawai e hoopakele mai kona waha aku?

AHEA LA E HOOMAKA AKU AI.

                E hai wau ia oukou, e na keikikane, i ke ano e hana aku ai i loaa aku ia oukou ka pomaikai ma keia ola ana: I keia la no e noonoo mua aku ai i na hana a me na rula e malama paa ai no keia ola ana. Hookahi wale no ola ana ma keia ao i haawiia mai ia kakou, a he mea nui ka hoomaka pono ana aku. Nolaila, e hoomaka aku me ka noonoo akahele pono. E nana aku imua a hiki aku i ka loaa ana ia oe o na makahiki he kanaha, a e hoohiki iho oe penei: "Aia a loaa ia'u ia kiko imua, e noho ana au he kanaka pakiko, he lawelawe hana; ha malama i ka loaa me ka uhauha ole he kanaka lokomaikai aku ia hai, he kanaka ike i na mea e hoolahaia ana ma na nupepa, he kanaka e pomaikai ai ko'u lahui, a he kanaka e kupaa ana mamuli o ka pono. Pela ka'u ano kanaka e loaa aku ai. Ke hoohiki nei au e loaa ia'u ia mau ano." E o'u mau makamaka opio pela e hoohiki ai alaila e kupaa me he pohaku la mamuli o ia hoohiki e imi a loaa a hoopaa ia mau ano. E kupaa me he aalii ku makani la.