Ke Alaula, Volume IV, Number 10, 1 January 1870 — Page 39
KE ALAULA. 39
MAKAHIKI HOU.
Leo: WON'T YOU VOLUNTEER?--Happy Voices.
1. Kani, kani na bele me na pu,
Lea no na pepeiao, lea na naau;
Oli, oli, pai na lima, e,
No ka makahiki hou, hape-nuia nei.
HUI—Kui a nauwe, nauwe like e.
Kai a nauwe me ka pa-ko-li;
Nauwe oli, la hauoli nei,
Oli, oli, hape-nuia, e.
2. Ko Hawaii kini kamalii,
Me ko Maui poe pokii, olioli e;
Ko Oahu, me ko Molokai,
Kauai, Lanai, Niihau pu, hape nuia e.
HUI—Kai a nauwe, nauwe like e, &c.
3. Uwe, uwe no ka po ana'e
O ko Waialua la, lama ao laelae;
Mai auwana, e na kamalii,
Hui, imi, naauao, ma na kula e.
HUI--Kai a nauwe, nauwe like e, &c.
4. Makahiki ano e no nei,
Makahiki Iubile, olioli e;
Imi, noke, hooikaika mau
Ma na kula Sabati, kula e a pau.
HUI—Kai a nauwe, nauwe like e, &c.
5. Anai, anai i na pahi e,
Oki, huki, hoolei ae i na ino nei;
Waele, mahi, kanu nui ae
I na anoano hou o ke akamai.
HUI—Kai a nauwe, nauwe like e, &c.
6. Mai poina, e na kamalii,
Ke ALAULA, lama ao, lawe nui e,
Heluhelu, ao na himeni,
Me na leo hou maikai, kani lea mai.
HUI—Kai a nauwe, nauwe like e, &c.
7. Mele, mele, haleluia e.
I ka Haku ka Moi o na kamalii;
Noi, noi i loaa a pau
Keia makahiki hou, me ka malu pu.
HUI--Kai a nauwe, nauwe like e,
Kai a nauwe me ka pa-ko-li;
Nauwe oli, la hauoli nei.
Oli, oli, hape-nuia e.
WAIKOLOA.
HAAWINA KULA SA BATI NO KA MAKAHIKI 1870.
Eia mai malalo na haawina kula Sabati no ka makahiki 1870 i hoopukaia e kekahi nupepa kula Sabati o Amerika i kapaia ke Kumu Kula Sabati. Ua paiia, hoi ma na pepa liilii hookahi miliona o keia papa haawina i mea e alakai ai i na kula Sabati o ia aina e ao i ka haawina like.
Ua apo mai ke Kula Sabati o Kaumakapili i keia papa hoonoho haawina no keia makahiki e hele nei; a ke hoopuka aku nei makou i keia ma ke ALAULA i ike mai na kahu kula Sabati, a o ka poe e makemake ana e alakai i ka lakou mau kula mamuli o keia moohana ua hiki no.
KA MOOLELO O IESU KRISTO
1870.
Ian. 2. Ka Logou, - - - Ioane 1:1-10
" 9. Lilo ka Lohou i kanaka. - Ioane 1:11-18
" 16. Hai mua ia mai ka hanau ana o Iesu, - - Luka 2:8-20
" 23. Ke keiki liilii ma ka luakini, Luka 2:25-35
" 30. Ka hoku ma ka hikina, - Mat. 2:1-12
Feb. 6. Ka holo ana i Aigupita, Mat. 2:12-23
" 13. Ka noho kamalii ana o Iesu, Luka 2:40-52
" 20. Ka leo ma ka waonahele, Mat. 3:1-10
" 27. Ka leo mai ka lani mai, Mat. 3:13-17
Mar. 6. Ka hoowalewaleia ana. - Mat. 4:1-11
"13. E nana aku i ke keiki hipa, Ioane 1:29-34
Mar. 20. Na haumana mua, - - Ioane 1:37-51
" 27. Iesu ma ka ahaaina mare, Ioane 2:1-11
Apr. 3. Hoomaemaeia ka luakini. Ioane 2:13-22
" 10. Hoike hope a Ioane Bapetite, Ioane 3:25-36
" 17. Heaia na haumana, - - Mat. 4:12-22
" 24. Ka uhane haukae, - - Mar. 1:23-28
Mei 1. Puni nui ka ia, - - Luka 5:1-11
" 8. "E huikalaia oe." ka lepera, Mar. 1:40-45
" 15. Kalaia na hewa, - - Mar. 2:1-12
" 22. Beteseda, - - - - Ioane 5:1-18
" 29. Ka lima maloo, - - Mat. 12:9-12
Iune 5. Ka luna aupuni i manaoio, Mat. 8:5-13
" 12. Keiki a ka wahine kanemake, Luka 7:11-16
" 19 Ke koraka ma na ilina, - Mar. 5:1-20
" 26. Hoolaia ke kaikamahine uuku Mar. 5:35-43
Iulai 3. Ka make ana o Ioa. Bapetite, Mar. 6:14-20
" 10. Hanaiia elima tausani, - Ionae 6:1-13
" 17. Hele ana maluna o ka wai, Mat. 14:22-33 " 24.
"E ka Haku, e kokua mai," Mat. 15-21-28
" 31. Ka hoopahaoia ana, - - Luka 9:28-36
Aug. 7. Ke kanaka makapo, - Ioane 9:1-11
" 14. Hoalaia o Lazaro, - - Ioa. 11:33-44
" 21. Na lepera he umi, - Luk. 17:11-19
" 28. Batimea ka makapo makilo, Mar. 10:46-52
Sept. 4. No Zakaio ka lunaauhau, Luka 19:1-10
" 11. Ka pahu alebatero, - - Ioane 12:1-8
" 18. Hosara i ka mamo a Davida, Mat. 21:8-16
" 25. Ka laau fiku i maloo, - Mat. 21:18-22
Oka. 2. Ka holoi ana i na wawae, Ioane 13:1-11
" 9. Iuda Isekariota, - - Ioa. 13:18-30
" 16. Ka ahaaina hope, - - Luk. 22:14-22
" 23. O Iesu ma ka mahinaai, - Mat. 26:36-46
" 30. Ka hopuia ana, - - Ioane 18:2-11
Nov. 6. Kristo imua o ke kahuna nui, Mat. 26:59-66
" 13. Ko Petero hoole ana, - - Luk. 22:56-62
" 20. Ke keena hookolokolo Pilato, Mat. 27:15-26
" 27. Ka lei kakalaioa, - - Mat. 27:27-31
Dek. 4. Kaulia ma ke kea, - - Luk. 23:26-34
" 11. "Ua pau aku la," - Mat. 27:45-54
" 18. Ke ala hou ana, - - Luka 24:1-11
" 25. Ka hoi ana i ka lani, - Oih. 1:1-11
KA LAEHAOKELA.
(THE RHINOCEROS)
Kekahi keia o na holoholona i oi ka nui kino mamua o na holoholona e ae. O ka elepane wale no paha ka i oi mamua o ia nei o na mea ola e noho nei i keia kau ma ka aina maloo. O ka hipopotamu wale no paha ka mea like o ka nui kino me keia puaa kiwi loloa. Aka he okoa ka hipopotamu, a he okoa ka laehaokela. Ua nele ka hipopotamu i ke kiwi ole, a he noho nui oia maloko o ka wai o na muliwai, e au ana ma kahi hohonu, a e pii ana hoi mauka i ka imi ai, e like ana paha me he honu nui la. Aka, o ka laehaokela, he noho paa no ia ma ka maloo, e ai ana i na lau o ka ululaau e like me ka elepani. O na aina kahi i noho ai ka laehaokela, o Inia, ka mokupuni o Java, o Sumatera, a me Aferika. He okoa nae ka laehaokela o Inia, a he okoa ko Aferika. He hookahi wale no kiwi ma ka nuku o ka laehaokela o Inia, aka ua haiia mai elua kiwi ma ka nuku o ko Aferika. He kiwi loihi ma ka nuku a maluna iki aku he wahi kiwi uuku iki. He holoholona noho malie keia me ka hae ole mai, aka i kona wa e hoopilikiaia ai he hakaka mai me ka ikaika loa, e hou mai ana me kona ihu. Aole mea e pakele iaia ke loaa mai i kona hao. He manoanoa loa ka ili o keia holoholona.
Kupanaha no na ano lehulehu o na holoholona i hanaia e ke Akua ma ia aina aku, ia aina aku.
E HOOPILI AKU KAKOU IA IESU.
E na pokii heluhelu i ko kakou nupepa nani, he wahi makemake ko'u e kamailio pu kakou. Eia nae ka pilikia: aia oukou e kau liilii nei mai Hawaii a Niihau, a owau hoi ua pili i keia wahi one hanau o'u ma Oahu. Aole nae au e kanalua ana no ia mea, no ka mea, me ka maka o kuu peni e kamailio aku ai au ia oukou. A eia kuu manao, ua pili i kuu wa uuku. He wahi keiki auwana no au—aole au i hahai pono ia Iesu, aka ua hookuli i kona leo oluolu e kahea pinepine ana ia'u e haalele i ka hewa, e haalele i na mea lapuwale, a e hahai mamuli ona. Ua oi aku kuu makemake i ko'u aoao ponoi iho, a nolaila ua nui kuu pilikia no ia mea. Aole nae i pau ko Iesu kahea ana ia'u.
Mahope mai ua alo ae he wahi mihi iki ma kuu naau, ua imi au i ka pono; aka, no ke kapekepeke o kuu manaoio aole i loaa pono ia'u ka olioli iloko o ka Haku. Ua pinepine kuu hoi ana i hope, a nui kuu kaumaha no ia mea. Nolaila, ua komo au iloko o ka nenelu o ka manao pono. Na Iesu nae i ao mai ia'u; nana i kikoo mai i kona lima a kokua mai ia'u. Olioli maoli kuu naau oiai e paa ana kuu lima i kona lima. E like me ke keiki liilii e paa ana i ka lima o kona kaikuaana aloha, e hooikaikai ana e hele pu me ia, pela no au i paa ai i ka lima mana o Iesu, ko kakou hoahanau aloha lua ole.
Mahope nae nawaliwali kuu manaoio, oia ka lima e paa ai i ko Iesu lima, pahee ae kuu lima mai loko ae o kona lima, kapeke ae la kuu wawae, a hina iho la au, a mai make au i kuu eha.
E na pokii, ua maopopo anei keia wahi kamailio o'u? Aole paha, ea? Ninau mai paha kekahi, "Aia o Iesu i ka lani—pehea la e paa ai oe i kona lima?" Ke pane aku nei au, "Aia o Iesu ma na wahi a pau; aia no i Hawaii a puni, ma na pali a pau, ma na mauna kiekie a ma na papu; aia ma ka aina, aia hoi ma ke kai; aole wahi i hiki ole ai kona mana, kona uhane." Nolaila, he hiki no iaia ke kokua mai ia kakou ma na wahi a pau, a i na manawa a pau. Ina e noi aku kakou iaia me ka mihi io a me ka manaoio, e kokua io mai no ia.
Nolaila, e na kamalii, a me na makua no hoi, e kahea nui aku kakou ia Iesu e kokua mai, i pau ko kakou auwana ana, a i hoolohe pono kakou ka leo o ko kakou Kahuhipa maikai.
L. L. N.
NO KE ELELO.
O ke elelo o ka mea pono, he kala maikai ia.--Sol. 10:20.
O ke elelo o ka poe naauao, ma ka hoola ia. O na lehelehe oiaio, e mau ana no ia.—Sol. 12:18, 19.
Ua hoomakaukau kou elelo i na mea hewa, me he pahi-umiumi la e hana malu ana.--Hal. 52:2.
O ke elelo, aole loa e hiki i ke kanaka ke hoolakalaka ia mea; he mea ino laka ole ia, ua piha i ka mea awahia e make ai.--Iakobo 3:8.
Ma ke elelo ka make a me ke ola; o ka mea makemake malaila, e ai oia i kona hua.--Sol. 18:21.
O na olelo a ka mea holoholo olelo, ua like no ia me na olelo paani, komo ilalo nae ia a iloko lilo o ka opu.--Sol. 26:22.
O ke elelo ano hea la kou?