Ke Alaula, Volume IV, Number 10, 1 January 1870 — Page 40
40 KE ALAULA.
KUU AINA HANAU E.
Leo: MY COUNTRY, 'TIS OF THEE; OR AMERICA.--Oriola.
1. Kuu ai-na ha-nau e, Nou au e me-le nei, Ai-na mai-kai O na ma-ku-a o'u, Me na ke-i-ki pu, E o, mai o a o, Kuu me-le nei.
2. Kuu aina hanau e,
Kuu aina makamae,
Aloha au
I kou mau kahawai,
Na kualono e,
Na kula uli mau,
He oli ko'u.
3. Hookani na laau,
Na aheahe hau
I kou maikai;
Poha na leo e
Mai na pohaku mai,
Kanaka, kamalii,
Hookani ae.
4. E ka Makua e,
Nou mai ka malu nei,
E haliu mai,
Hoomau i ka maikai,
Ka maluhia e,
A nou, ko makou 'Lii
Ka hoomaikai.
HAWAII.
KA HOOWALEWALEIA'NA O HALE.
Ala mai o Hale i kekahi kakahiaka anu o ka malama o Ianuari, a nana aku mawaho, he nui ka hau e waiho ana ma ka ili o ka honua. No ka mea, ma kekahi aina ma ka Akau o Amerika Huipuia kona wahi i noho ai. Alohilohi mai la ka hau me he paakai aiai loa la, a ua olioli o ua o Hale i ka noonoo ana he wa kupono e paani me kona papa holua. He lealea loa na kamalii o na aina anu i ka hee holua ma ka hau. Kauo hele oia i kana holua ma ka pa hale a hiki i ka wa e hele ai i ke kula. I kona hele ana ike oia i kekahi eke waiho dala e waiho ana ma ke alanui. Lalau ae la oia me ka olioli, me ka manao hoi, "Pomaikai au ke loaa ia'u kekahi i mau dala." Nana ae la ia i o a, aole kanaka; wehe ae la ia a nana iho la iloko o ua eke la. Aia ka he mau dala pepa, oia hoi ko Amerika Huipuia dala i keia wa, hookahi bila elima dala, hookahi bila elua dala, he hapalua ma na bila pepa, a he wahi baloka holo kaa. Nani ka waiwai ! Ua lawa na dala e kuai i kekahi mea pai-palapala liilii ana i makemake nui ai.
"Aole nau ia mau dala," wahi a ka lunaikehala iloko ona, "Aole nau."
Nui ko Hale pilikia. "Aole au i ike i ka mea nana keia mau dala; aole no e loaa ia'u ke imi au i ka ona nona keia mau dala." Pela ia i pane aku ai i ka mea nana i ao mai.
"E imi ae i ka ona," wahi a ka lunaikehala.
"E malama no au, me ka hai ole aku ia hai," wahi a ua wahi keiki nei. Hele aku ia e hookiokio ana, i mea e hoonanea ai iaia iho.
Pau ke kula kakahiaka, hoi aku ia i ke awakea, aole nae hai aku i kekahi mea, no ka mea ua paa kona manao e malama i ua mau dala la i loaa iaia.
Pau ka aina awakea hoi aku la oia i ke kula. Mamua ae o ka hoomaka ana o ke kula hai mai la o Miss Benesona, ke kumu, i kona lohe ana i kekahi wahine ua nalowale kona eke dala ma ia kakahiaka no. E hele ana oia ma ke kaa holua i ke kulanakauhale e kuai i wahi kihei mahana, a i kona haha ana ma kona pakeke, ua lilo aku kona waihona dala. " Ke manaolana nei au," wahi a ke kumu, "ua loaa ua eke dala la i kekahi mea kolohe ole!"
"Kekahi mea kolohe ole!" a noonoo nui iho la o ua Hale nei. He kolohe ka o Hale? Ae, he kolohe no, ke hoihoii ole ia i ua waihona dala la i ka mea nana ia mea. Nui ka paio ana o ka pono me ka hewa ma kona naau; aka ua lanakila ka pono.
A hiki mai ka wa hoomaha, hele ae oia i ke kumu, a olelo aku la, "Ua loaa ia'u ko Mrs. Alani waihona dala; eia no. Nau no paha e hoihoi aku iaia."
"Nani ka pomaikai o ua luahine alona la!" wahi a Miss Benesona. "Nau no e hoihoi aku iaia ano. Ua ike no oe i kona wahi i noho ai; aia ma kekahi hale liilii e kokoke ana i ka hale leta."
Aole liuliu ua hiki o Hale ma ko Mrs. Alani hale, a kikeke iho la. "Nau anei keia waihona dala?" wahi a Hale.
"Ae, no'u no e komo mai, e kuu milimili lokomaikai; e komo mai a hai mai ka moolelo no keia mea."
Hahai aku la o Hale i kona moolelo no ka loaa ana.
"E uku no au ia oe," wahi a ka luahine; "eia he hapalua."
Aole nae i makemake o Hale; holo aku la ia me ka mama a me ka olioli o ka naau i ke kula. A hoi aku ia i kona makuahine i ke ahiahi, hai aku la i na mea a pau e pili ana, a i ka lanakila ana o ka pono maluna o ka hewa.
Aole anei he mea pono ia kakou e mahalo ai ko Hale lanakila ana maluna o ka hoowalewale ana mai o kona naau iho no?
He pono ia oukou, e na pokii, e hoolohe i ka leo liilii o ko oukou mau lunaikehala e paipai ana ia oukou.
O na keiki kolohe ole, e lilo auanei lakou i mau kanaka kolohe ole.
E HOONANI ANA IA IESU.
E ke kahu ekale sia, e like me ka nui o ka hoalaia o ka heluhelu ana i na mea e pili ana i na hana hoolaha i ka malamalama ma na wahi pouli, e like hoi me ka hoomauia ana o ke kokua ana i ko na aina pegana, a e like hoi me ka nui o na hana misionari i hapaiia iwaena iho o ke kihapai, pela ka nui o ka hoonaniia o Iesu ma ia kihapai.
HE MAU NINAU BAIBALA NO NA POKII KULA SABATI.
Ua hoomakaia kela a me keia o na hua haina me ka I.
1. Owai ke kulanakauhale kaulana i kapaia ma na inoa ekolu, o ke kolu nae o ia mau inoa ka mea i kapa pinepine ia?
2. O ka wahine hea la i haiia kona moolelo ma ke Kauoha Kahiko, ua hoopuka hou ia kona inoa ma ke Kauoha Hou no kona kaulana i na hana ino?
3. Owai ka i kaulana no kona lilo ana i hoaloha a hoapili no ka mea i manaoia e kaili ana mai ona aku i kona mau pono?
4. Owai ka mea nona ka moolelo kupanaha a kaulana i makemake nui ia e ka poe a pau i lohe, a nona hoi ke ano haipule a kupaa loa mamuli o ka pono?
E imi mua na kumu a me na haumana kula Sabati i na haina no keia mau ninau; a iloko o ke ALAULA no Feberuari e hoopuka aku makou i na haina oiaio. Malia paha e loaa mua aku no ia oukou na haina oiaio.
"E PAPA, UA MAKAUKAU WAU."
Eia ka olelo a kekahi mea haku manao no ka nupepa no na kamalii ma Amerika Huipuia: Komo aku wau i kekahi ahiahi ma kona keena oihana e ike i kekahi luna aupuni, nona kekahi oihana koikoi. Ua piha loa ka manawa a me ka noonoo o keia luna aupuni i na hana e pomaikai ai ka lehulehu. Oiai e kamailio pu ana maua me ke kakau ana i na manao, komo mai kekahi keiki uuku nona na makahiki ekolu paha, me ka maka oluolu a alohilohi, a pane mai, "E papa, ua makaukau wau e pule i kau wahi pule." Hele koke mai ia a ma ka aoao o kona makuakane ma ka pakaukau.
Waiho koke iho ka makuakane i kona peni, a apo aku kekahi lima i ke keiki, a ao aku oia i ke keiki i ka pule. Maikai ka leo o ke keiki uuku e hahai ana mahope o ka makuakane. Olioli au me ka eehia i ka lohe ana i ka leo pule o kahi keiki e nonoi an a i ke Akua nona iho, no kona mau makua, ano na hoa ona. Manao iho la au e hoolohe mai no ka Makua ma ka lani i ka leo kahea o keia wahi keiki. He hapa minute paha pau ka pule, a honi mai ka makuakane iaia me ke aloha mai "good night;" hoi aku ke keiki, a makaukau hou no ka makuakane e hapai hou i kana hana.
Pomaikai ka lehulehuia kahi i loaa na luna aupuni o keia ano. Ina me ia ke ano o na luna aupuni, e malama loa ia na pono o ka lehulehu. Ina hoi pela i aoia na keiki a pau, e pau ana na hale paahao. "E ao aku i ke kamalii i kona aoao, a elemakule oia, aole ia e huli ae mai laila aku."
O ka maka i hoowahawaha i kona makuakane, a hoole hoi aole e malama i kona makuahine, e kiko iho ka poe koraka o ke awawa ia mea, a e ai iho no ka poe aito opiopio,—Sol.
KE ALAULA.
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.
25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
O. H. KULIKA, Luna Hoopuka.