Ke Alaula, Volume IV, Number 12, 1 March 1870 — Page 46
46 KE ALAULA.
O SAMESONA MA KA AHAAINA O DAGONA.
Nui na mahiai o Same sona i wili ai i ka palaoa maloko o ka halepaahao. Ua makapo ia, a ua ohule no hoi mamua; hiki wawe nae ka ulu o kona lauoho, aole nae i loloa e like me mamua, aole hoi i maheleia i na wili ehiku.
Ia Samesona i hooluhiia'i maloko o ka halepaahao, olioli na 'lii i ko lakou pio, a mahalo hoi i ko lakou akua ia Dagona. Hooholo lakou i ahaaina nui e hoomana ai i ko lakou akua, a e kaumaha ai i na mohai iloko o kona luakini. Koiia mai na kanaka no na kulanakauhale a pau mai o na Pilisetia. Akoakoa mai la lakou i Gaza, a komo mai la iloko o ka luakini o ke akua o Dagona.
Kei ka pupuka o ua akua kii la! Ko luna me he kanaka la, ko lalo me he ia la. He mau lima no; aohe nae wawae, he hiu ko lalo. Hoonaniia no nae a hoomaikaiia hoi o nei wahi kii hoopuiwa e na tausani o na kane a me na wahine i akoakoa mai i ka ahaaina. Hooho ae la lakou, "No ko kakou akua i haawi mai ia Samesona, ko kakou enemi, iloko o ko kakou lima, ka mea
i anai i ko kakou aina, a i luku hoi ia kakou."
Ia lakou e hoonani ana a e lealea ana, ua komo mai ia lakou ka manao e kii aku ia Samesona mai loko mai o ka hale-paahao. Heaha la ko lakou manao iaia? E henehene aku no paha iaia, a e hoolilo iaia i mea lealea no lakou.
Na kekahi keiki i kai mai ia Samesona; i kai lima ia mai no o ua makapo poino la. I kona komo ana mai i ka luakini, huro o uwa wale ae la ka poe Pilisetia.
He wahi nui no ka luakini o Dagona. Me he lanai kiekie no ia i hoopuni i ka pa mawaena, He palahalaha ka hale maluna, o ua paapu i na kanaka e nana iho ana i na mea i hanaia malalo. Ekolu tausani na kane a me na wahine maluna o ka hale, a maloko hoi ua nui loa ka poe koikoi. Aia no na 'lii nui elima o na Pilisetia, a me na kaukaualii, a me na 'lii wahine.
Aia a lohe o Samesona i ko lakou akaaka ana, a me ka henehene mai iaia e haha ana io ia nei, pehea la kona manao? Hoomanao no paha ia i kona wa i luku ai i na tausani me ka iwia o ka hoki, a me kela manawa no hoi ana i hehi wale ai ia lakou e like me ka nenelu o ke alanui. Ua ike pono no ia ua hoolilo ke Akua iaia i mea nana e hoola i kona lahui mai loko mai o na lima o na Pilisetia. Ua loihi nae kona noho wale ana me ka hooikaika ole. Ua nui no paha kona mihi i kona noho nanea ana me kela wahine hoopunipuni o Delila. I kona wa ikaika, ua haalele ia i ke kaua ana no Iehova, a ano la, ua nawaliwali, ua makapo, aole e hiki iaia ke kaua. Nui no kona uwe ana i kona hewa.
Aole no e hiki ia Samesona ke ike aku i na kanaka, aole hoi i ka hale nui. Mamua nae ua hoomaopopo oia i ke ano o ia hale, i kona wa i hele mai ai i Gaza e launa me kona poe hoa naaupo ma ia wahi. A hoomanao no ia i ke ano o ua hale la, ua paipaiia maluna o kekahi mau kia nui.
Olelo aku la ia i ke keiki nana e alakai, "E hoomaha mai ia'u, i haha aku ai au i na kia e paa ai ka hale, i hilinai hoi au ma ia mau mea." Kuhihewa ke keiki ua maluhiluhi o Samesona i ka hula a me ka hoolealea ana ia lakou, a ua kai aku la iaia i na kia waenakonu elua e paa ai ka hale.
Aole nae o Samesona i hilinai a hoomaha. Hoomaka iho la ia i ka pule: "E ka Haku, e Iehova e, e hoomanao mai oe ia'u; ke nonoi aku nei au ia oe e hooikaika mai oe ia'u, e ke Akua e, i keia manawa hookahi no, i uku koke ia mai au, e ko Pilisetia, no ko'u mau maka elua."
Lalau iho la o Samesona ma na kia elua. Hoomaha iho la oia iaia ma ia mau mea, o ka lima akau ma kekahi, o ka lima hema ma kekahi.
I iho la o Samesona, "E make pu au me ko Pilisetia." Kulou iho la ia me ka ikaika nui. Naue na kia, owa ae la, a hiolo mai. O ka helelei mai no ia o ka hale a pau me ka halulu nui, me na ekolu tausani kanaka maluna ka hiolo ana, a poi pu mai i na kanaka a pau malalo.
Weliweli ka uwe o na kanaka e make ana! Auhea la o Samesona? Ua make no kela malalo o ka puu pohaku helelei, make pu hoi na 'lii a pau, a me na tausani nui o na kane a me na wahine. Emo ole mai ka make ia lakou iwaena o ko lakou lealea, a me ka hoowahawaha ia Iehova, a me kona kauwa. "Ua nui ka poe make ana i luku ai, i kona make ana; he hapa ka poe ana i luku ai i kona wa i ola ai."
Lohe ae la ko Iseraela i ka lono o keia hiolo nui, a iho nui mai lakou e ike. O ko Samesona poe hoahanau kekahi. Kii rnai lakou i kona kupapau. Pau ka nui o ko Pilisetia ma ia wahi i ka make, pau na 'lii; aohe mea koe nana e keakea ia lakou. Eli iho lakou malalo o na pohaku, a me na kaola helelei, a me na mamala puna, a malalo loa o ia puu nui, ua loaa ia lakou ke kupapau o ko lakou hoahanau, a me ka lunakanawai o ko Iseraela. Pepe loa ke kino. Lawe akahele lakou me ka uwe, a kanu iho maloko o ka ilina o Manoa koha makuakane.
Ua nui no na hewa o Samesona, ua hooikaika no hae ia e hana i ka makemake o Iehova; ua mahaloia hoi oia ma ka Baibala (Hebera 11:32-39.) Ua loaa no ko kakou kumu kupono e manao ai ua mihi ia i kona mau hewa, a i kona hope, aia no ia Iehova kona pule a me kona hilinai. Ua kala mai ka Haku i kona mau hewa no Iesu, ka mea hemolele i make no ka poe lawehala. Ua ohi no nae oia i ka poino nui mamuli o kona lulu ana i ka lealea.
KA MAKEMAKE A KEKAHI KAHUNAPULE.
1. I wahine ano kumu,
I wahine akahai,
I wahine humuhumu,
I wahine akamai,
I wahine ano lede,
Ke hiona aulii ae,
He nonohe a eeke,
Aole hewa ke waiwai.
2. I wahine ano kuene,
E hookipa olu no
I ka poe malihini,
I na hoa kahuna o'u;
Lokomaikai a aloha,
Me ka ohumu ole nae
I na hana, na kauoha
A'u e haawi aku ai.
3. I wahine ano mano,
Launa me na hoahanau,
Me ka poe hanohano,
Me na ilihune pu.
A i nalo na haumana
Hele e huli i o ia nei
I ka poe e auwana'na,
I loaa a hoi mai.
4. I wahine mikioi,
A kapulu ole ae;
Kui a hoowali poi,
I ka wa kupono nae.
I wahine ahonui,
Akakuu, a hoohaahaa,
I wahine nuku ole,
Aole hoi e hoopaapaa.
5. I wahine e hookumu
I na aha halawai,
I na aha humuhumu,
I na aha himeni,
I loaa na mea hoonani
No ka luakini o'u,
Na kokua he nui wale
No ke aupuni o Iesu.
6. I wahine puni buke,
Hilahila ole nae
I ka oihana kuke,
Me na hana e ola'i;
I wahine akahele,
Naau io a maemae,
I wahine hemolele,
Oia ka'u e imi nei.
Na'u, na -----
O KA HOOLOHE, HE HOIKE IA O KE ALOHA IO.
Ua hoowalewaleia kekahi keiki liilii e kona mau hoa paani e ohi i hua mai kekahi laau a kona makuakane i papa aku iaia mai lalau iki. I mai kona hoa iaia, "Mai makau oe, no ka mea ina e ike kou makuakane i kau hana ana, aole oia e hoeha mai ia oe, no ka mea he kanaka oluolu a lokomaikai ia." Pane mai ke keiki, "Ae, pela io no, a no kona ano aloha a lokomaikai, nolaila aole o'u makemake e hoeha aku iaia."