Ke Alaula, Volume IV, Number 12, 1 March 1870 — Page 47

KE ALAULA. 47

MAKE O GOLIA IA DAVIDA.

                Ua ae mai o Saula ia Davida e hele e kaua aku i ka Pilisetia nunui. Aka aohe o Davida pahikaua, aohe ona aahu hao e uhi ai i kona kino. Nolaila hoaahu mai la o Saul iaia me kona aahu kaua, a kau mai la hoi i kona mahiole keleawe maluna o kona poo a hookomo iaia i kona puliki koa. Kaei hoi o Davida i ka pahikaua a Saula ma kona puhaka.
                Hoao o Davida e hele aka aole ia i walea i kela mau aahu kaua kaumaha, aole i hoao. Hoole aku la ia i ke alii, "Aole au e hiki ke hele me keia mau mea." Kala ae la o Davida ia mau mea mai ona aku la.
                Pehea, ua pau anei ka manao o Davida e kaua? Aole i pau. Aole ia i hilinai i ka pahikaua a me ka aahu kaua. Ua hilinai oia i ka mana o Iehova e kokua iaia. Haalele ia i kela mau mea kaua a pau. Huli ia i kona mau mea i walea ai. Hele aku la ia i kahawai, a ohi iho la i na ala elima, a hahao iloko o kona kieke. Alaila, ua makaukau o Davida. Lawe ia i ke kieke a me kona maa, a paa hoi kona kookoo ma kona lima, a o kona hele aku la no ia e halawai me ke kanaka nunui.
                Lohe ae la o Golia ua loaa kekahi Iseraela nana e kaua mai iaia. Hookokoke mai la ia, a imua ona ke kanaka nana e hali i kona palekaua.
                Nana ae la ka Pilisetia a ike mai la ia Davida. Hoowahawaha o Golia iaia. Huhu aku la a hoino aku iaia me na olelo ino, a me ka hoohiki ino me na akua ona. Henehene aku o Golia iaia, "E hele mai io'u nei, a e haawi aku au i kou io no na manu a me na holoholona e ai."
                Aole i makau o Davida. I aku la ia i ke kanaka nunui, "He pahikaua kou, a he ihe, a he palekaua, aka, me a'u no o Iehova, ke Akua ola. Nana no e kokua mai ia'u, a e pepehi aku au ia oe, a e oki aku au i kau poo mai ou aku la. A e ai na manu a me na holoholona i na io o na Pilisetia. A pela e ike ai na kanaka a pau, o ke Akua o Iseraela, oia no ke Akua oiaio, nana hoi e hoola i kona mea i makemake ai."
                A lohe ka Pilisetia i kela olelo, hookokoke ia e halawai me Davida. Aole i makau iki o Davida. Lalelale iho la ia, a holo aku la e halawai me ia. Nanao iho la o Davida i kona lima iloko o koha aa, a lawe mai i kekahi ala, a hooponopono ma kona maa. Haka pono aku la kona maka i ke poo o Golia, a wiliwili oia i kona maa. Hele ikaika mai ke kanaka nunui me na maka inaina, a hapai ae la i kona ihe iluna e hou ia Davida. Wiwo ole o Davida i ke kino nui, a me ka helehelena inaina a me ka ihe oniuniu. Haalulu ole kona lima. Luli ole kona maka. Nana mai na koa a pau o na aoao elua, me ka hoopaa i ka hanu e ike aku i ka ihe loloa e hou ana i ke kino palupalu o ke kanaka opio. Aole i lele ka ihe. Maa e aku la o Davida i ka ala me ka lima ikaika, a me ke akamai. Lele pololei aku la ka ala e like me ka poka o ka pu, pa aku la i ka lae o ke kanaka nunui, a komo iho la iloko o kona lae. Luli ae la ka ihe weliweli, a haule iho la ke kanaka nunui i ka honua ilalo ke alo.
                Holo koke aku la o Davida a ku maluna o kona enemi. Aohe ona pahikaua. Hopu iho la ia i ko Golia pahikaua, a unuhi ae mai loko mai o kona wahi, a hapai iluna me na lima elua, a pepehi iho la i ka Pilisetia, a oki aku la i kona poo.
                Lawe aku la o Davida i kela poo nunui ana i oki ai a hoike aku i na kanaka o Iseraela. Malama hoi ia i na mea kaua a Golia maloko o kona halelewa. Mahalo nui mai na Iseraela a pau ia Davida, ka ke Akua mea i hoolilo ai i koa ikaika a i hoola nui iwaena o lakou. Aka o Davida, ua hoonani aku ia ia Iehova, nana i haawi mai iaia i ka naau koa, a me ka lima haalulu ole. Hiilani aku o Davida i ke Akua, me na mele a me ka hookani lira.
                E ka'u mau keiki aloha, e pule oukou ia Iehova, a e hilinai oukou i ko oukou Makua ma ka lani. E loaa ana no paha ia oukou mahopo na pilikia nui, a me na mea hoowalewale. Mai makau, e hele wiwo ole e pale aku i na hewa a pau, a e kokua mai no ka Uhane Hemolele ia oukou, a e lanakila no oukou, a na Iesu e mahalo mai ia oukou, i kona poe koa ikaika.
                Ua loaa ia Davida he lei alii o keia ao. Aka, i wiwo ole oukou ma ka pono o Iesu, e haawiia mai no oukou na lei alii lani.
                "Pomaikai wale ke kanaka, ke kupaa ia i ka hoowalewaleia mai. No ka mea, a pau kona hoaoia mai, e loaa auanei iaia ka lei o ke ola i oleloia mai ai e ka Haku no ka poe e aloha ana aku iaia."--Iakobo 1:13.

KA HONI ANA O KA ILIO I KA AIHUE.

                Hele aku la kekahi kanaka i ka hale hookipa ma Depetefoda ma Enelani, a olelo aku la i ka mea hale, e moe oia malaila i kekahi mau po. Olelo no laua a pono alaila, i mai la ia, Mai Inia Komohana mai nei au, a ahiahi, hele mai ko'u mau kanaka e lawe mai i ko'u pahu lole, a apopo, hele mai au. A i ka iwa o ka hora o ka po, hele mai na kanaka me kona pahu, e like me kana i i mai ai, a kuhikuhi aku ka mea hale i ke keena maluna, a lawe laua i ka pahu ilaila, a hoi aku la. Kokoke lakou e moe, hele ka ilio uuku o ka hale i ka puka o ke keena kahi i waiho ai ka pahu, a nui loa kona hae ana, a me kona hooikaika ana e komo. Wehe lakou i ka puka, a lele koke ua ilio la i ka pahu me ka huhu nui uwauwau nui loa, aneane wawahi i ka pahu. Manao lakou e kipaku i ka ilio iwaho, aole loa ia i hele. Alaila, manao lakou ua hewa, a imi iho la lakou.
                Kii aku lakou i kekahi mau kanaka ma kahi e, no ka mea, makau lakou ke wehe wale i ka pahu o ka malihini, ke ike ole ia mai ke kumu o ka wehe ana. A hiki mai na kanaka, alaila, lawelawe lakou i ka pahu, a maopopo iho la ia lakou he mea ola maloko. Wawahi ae la lakou i ka pahu, aia hoi ke kanaka i hele ma i ke ao a olelo i ka mea hale, e moe ana ia iloko o ka pahu. No kona manao aihue keia. Aole wahi e komo ai iloko o ka hale i ka po, nolaila kona komo ana iloko o ka pahu, a mai pau loa ka waiwai o ia hale i ka aihueia, ina aole i hai mai kela ilio.
                Na kela ilio uuku i hoopakele mai i ka hale a me ka waiwai o kona kahu; a ina aole i hai ka ilio, ina ua make paha no kanaka o ka hale i ka pepehiia, no ka mea, o ka mea komo malu pela iloko o ko hai hale, aole ia e makau iki i ka pepehi wale aku, a me ka powa. Nolaila, he mea pono ia kakou ke hana lokomaikai aku ia holoholona, a e aloha aku no hoi i ke Akua no kona haawi ana mai i kela mea oluolu e pomaikai ai.

KE KEIKI O HINEDU.

                Ua hahai kekahi keiki Hinedu i kahi misionari o laila, e koi ikaika ana iaia e hoolilo oia iaia i Kristiano. Olelo aku ka misionari iaia, "Aole hiki ia'u, e kuu keiki; aole o'u mana e hana ia mea; o ka Haku Iesu Kristo hookahi wale no e hiki ke oolilo ia oe i haumana nana. E noi aku oe iaia." Hele aku ke keiki, a liuliu iki hoi mai oia, a pane aku i ka misionari me ka leo olioli, "Ua komo mai ka Haku Iesu Kristo iloko o ko'u naau." Ninau aku ka misionari, "Pehea ia?" Pane mai ke keiki, "Ua pule au iaia penei: 'E ka Haku Iesu Kristo, ina e oluolu oe, e hoolilo mai ia'u i Kristiano;' a no kona lokomaikai loa ua iho mai oia mai ka lani mai, a mai ia manawa mai ua noho oia iloko o ko'u naau." A pehea oukou, e na keiki, ina e pule oukou i keia pule, aole anei e hoolohe o Kristo i ko oukou pule? Hoolohe no.

HALELUIA.

                Ua mai loa elua mau keiki ma ke keena hookahi; ao pinepine ae la ke kaikuaana i kona kaikaina e olelo ka huaolelo "Haleluia," aka aole loaa iaia. Make e keia wahi pokii me ka loaa ole ia huaolelo. A lohe ae la ke kaikuaana ua make kona kaikaina, noho malie oia hookahi minu te, alaila nana aku i kona makuahine, a olelo aku iaia, "Ua loaa no ia Ioane ka olelo haleluia i keia manawa." He mau hora mahope aku halawai laua ma ka lani a "haleluia" pu. Heaha la ke ano o keia huaolelo "haleluia?" Eia ia: e hoonani oukou ia Iehova.