Ke Alaula, Volume IV, Number 12, 1 March 1870 — Page 48
48 KE ALAULA.
NO O NO WAU.
Leo: HEAVEN IS MY HOME.--Oriola.
1. He ma-li-hi-ni au, Ke he-le nei; Ua pu-ni au maa-nei, I ka ma-ke me ka uwe; Ke ao kuu ai-na mau, No o no wau. Keia ao pa-no-a n, No o no wau;
2. Ke pae na ale nei.
Ku paa no wau;
Aole emo ku,
Kokoke pae:
Na nalu nui e,
Ke hala koke nei;
Ke ao kuu aina mau,
No o no wau.
3. Aole luli wau,
Ke hele nei;
Pau olo keia ao,
No o no wau.
Malaila ku no wau,
Ma kou aoao akau;
Ke ao kuu aina mau,
No o no wau.
WAIALUA.
KE KI-PU IA ANA O REV. J. H. MAHOE.
Ua lohe ka lehulehu i ke kipi ana o kekahi hapa o na kanaka o Tarawa, ma ka Pae Aina o Kilipati, i ko lakou alii, a holo aku o Kaiea, ke alii o Apaiana, i Tarawa e kokua i kona makamaka, ko laila alii. Alaila holo mai keia poe kipi o Tarawa maluna o na waa a lakou, a lilo o Apaiana ia lakou. I keia mau makahiki ekolu paha ua noho haakei keia poe kipi ma Apaiana, me ka hoopilikia ia Binamu a me Mahoe, me ka aihue a kaili wale, a me ka hooweliweli mai. Hele mai a noi mai no kela mea keia mea a lakou i makemake ai, a i haawi ole ia aku o ka hana ino mai no ia.
I ka malama paha o Maraki, 1869, hele mai kekahi o keia poe pegana i ka hale a Binamu i kukulu ai, a hooweliweli mai ia Rev. J. H. Mahoe, a i ka napoo ana o ka la, ua a ke kukui, ki-pu mai oia ia Mahoe me ke kumu ole, a komo ka poka ma ka umauma, a hala aku ka poka malalo o ka iwi hoehoe, a pa aku i kekahi pou hale. Ike makou i keia poka, i hoikeikeia e Rev. J. F. Pogue i kona haiolelo ana ma Kaumakapili i ka po o ka la Sabati, Feberuari 6. Ia manawa haalele o Mahoe a me kana ohana i ko laua hale, a hookipa aloha ia me ka maluhia ma ka hale o kekahi haole, o Mr. Randolph.
I ka hiki ana aku o Pogue maluna o Hoku Ao ma Apaiana, loaa keia hoahanau aloha a kakou iaia e waiho ana me ka pilikia ma ka hale o ka haole. Ua lolo ka lima o ka aoao i ku i ka poka, aka ua koe mai ke ola, a ke hele aku nei i ke ola loa.
Ua manao paa ia e hoihoiia mai o Mahoe i Hawaii nei e hoolana i kona mai, aka, no ka ili ana a nahaha o Hoku Ao, oia ka mea i ike ole aku ai kakou i keia manawa i keia paahana i aloha nui ia.
TOTEMANA ALOHA.
Aole au e akaaka ana ia "Aloha ilihune." Na ke Akua i uhi i kona uhane aloha me ka ili eleele, aka, o ka mea keia e akaka lea'i kona maikai a me ka haahaa. A i ko'u manao, ua manao oia he lokomaikai ia o ka ike ana me na maka elua, a kakaa ole.
Mahope o kona mai ana i ka piva kalatina, ua kuli oia ma kekahi pepeiao. "Ua maikai ia," wahi ana, "ina e makemake au e hiamoe ma kahi o ka walaau." Aloha ino na kanaka me na pepeiao elua.
Noho o Mika Totemana me kona ipubaka, aka aole oia i manao he kanaka molowa a hilahila ole oia e hooluhi ana i kana kaikamahine i na hana kupono ole iaia. Aka, uwe o Aloha ina nuku aku kona hoalauna i kona makuakane, a olelo me ka aka iki mawaena o na waimaka, "No ke aha ka oukou kamailio ana pela no kuu papa? Aole inu rama pinepine oia, aole hili ia'u ina nui ka baka ma ka hale."
Mahope lele kekahi huna ahi mai loko ae o ka ipubaka o Mika Totemana a haule iloko o kekahi opala, a pau ka hale i ke ahi. Nana o Aloha a olelo, "Pomaikai maua—aole pau loa ko maua lole, a ua pakele ka ipubaka o papa."
Aole hiki ia Aloha ke nana nui i ka palapala no ka mea, nui kana hana i ka ai a me ka lole no laua elua. "Heaha ka hewa," wahi a keia kaikamahine wiwo ole, "ke lawe au i kekahi hapa o na hora moe a hoolilo ia no ka nana palapala? Ua olioli au, no ka mea ua hanau wau ma kuu home nei, aole ma kahi hupo a na pegana, a o na wahine ike ole i kekahi hua palapala hookahi."
Mahope o ka make ana o kona makuakane, o Aloha ka mea e pomaikai ai kona mau hoalauna no na makahiki he nui wale. O na mea hiki iaia, hana oia me ka ikaika, ina e hana ana i kekahi kuka, a ina e poho ana ka lupe o kekahi keiki liilii. Aka i ka wa kaua nui ma ka Hema, piha loa o Aloha i ka manao e kahea mai ana kona aina iaia, a nele oia i ka Hema i wahine malama i na koa ku i ka poka.
Olelo kekahi kaikamahine liilii iaia, "E Totemana, he ino kou helehelena; aole anei ou manao mamuli makau na koa mai, a nawaliwali ia oe?"
"Ua ike no au," wahi a Aloha me ka leo haalulu, "he maka ino ko'u, a i kekahi manawa, makemake au i maka maikai, aka o kela manao ua hewa ia. Aole nana ke Akua i ke ano o ka maka. Ina he maka ino ko'u, aole nana ke Akua ia mea. Aka, olelo mai oia me ka olioli e alohi mai ana mai loko mai o kona maka, "ina e hiki aku au i ka lani, aole e like ana kuu maka me keia. Ua lohe anei oukou i kekahi anela he helehelena ino kona?" F. M.
NA HAINA NO NA NINAU BAIBALA. HELU 2 I HOOPUKAIA MA KE ALAULA O FEBERUARI NO KA HUA L.
1. Owai ka pili koko i kekahi ohana ma Palesetina, aole nae oia i hele kino aku ilaila? Haina.--O Labana pili ia Rebeka.__Kin. 28:2.
2. O ka pua hea la o ke kula ka i hooliloia i kumu e ao ia kakou e manaoio? Haina.--O ka lilia.--Mat. 6:28.
3. Owai la ka i hoopoino nui ia no kona koho ana i wahi ino e noho ai me kona ohana? Haina.--O Lota.--Kin. 13:12.
4. Ma ka inoa hea la i kapaia aku ke kerokodile e Davida ma ka Helelu?--Haina.--O leviatana.--Halelu 104:26.
5. Owai ka i noho he luna auhau mamua o ka loaa ana iaia ka oihana luna olelo? Haina.--O Levi a Alapaio, i kapaia o Mataio.--Mar. 2:14.
E HOOMAIKAI I NA MAKUA.
Ua hai mai kekahi keikikane i ke kanawai elima, "E hoomaikai i kou makuakane a me kou makuahine." a ua noi mai kekahi iaia e wehewehe i ke ano. Ulaula loa ka papalina o ua keiki nei, a pane mai oia me ka leo uuku loa: "Inehinei alakai au i kekahi mau malihini maluna o ka mauna. Eha loa ko'u mau wawae i ka pohaku oioi. Ike ae la na malihini i ke kahe ana o ke koko, a haawi mai lakou ia'u i dala e kuai i kamaa. Ua haawi aku ia mau dala i kuu makuahine, no ka mea aole ona kamaa."
KE ALAULA.
He Nupepa Hoikeike Kii.
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.
25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
O. H. KULIKA, Luna Hoopuka.