Ke Alaula, Volume V, Number 3, 1 June 1870 — Page 12

12 KE ALAULA.

 

AOLE O'U MAKAU.

Leo:    "NEVER BE AFRAID." - Golden Censer.

 

            Ao-le o'u ma-kau e hai no Ie-su; I ka ole-lo e o-la'i; Ao- le o'u ma-kau e

HUI.

            paa no Ie-su, Na-na i a-lo-ha mai. Ao-le o'u ma-kau, o-le o'u ma-kau,

            O-le, o-le, o-le. Ie-su no kuu hoa a-lo-ha, Ao-le lo-a o'u ma-kau.

 

2. Aole o'u makau e kaa no Iesu

Ma na mala   e hana'i;

Hana no e uku mai.

HUI— Aole o'u makau, &c.

 

3. Aole o'u makau e kai no Iesu

I na ino o ke ao;

Ahonui au ke hoao ia, Ahonui no Iesu.

HUI- Aole o'u makau, &c.

 

4. Aole o'u makau ke pau no Iesu

Keia ola kino o'u;

Naua wau e kii a kai malie

I ka lani ao mau no.

HUI- Aole o'u makau, &c.

 

KO KALE   MAALEA.

            "Aole no e hiki ia'u ke kokua," wahi a Ioane Hale, he kanaka waiwai mahiai, i ke noi ana iaia e haawi no ka hana ma na misiona.

            I ka lohe ana o Kale, (he moopuna makaala ia nona,) ua kaumaha a ukiuki no hoi. Pane ae la ia, "Aloha ino na kanaka o na aina pouli; aole anei he mea kaumaha no kakou ka nele i na hale pule, hale kula, a me na buke?"

            "Heaha la kau i hoomaopopo ai no na kanaka p na aina e ? " wahi a ka elemakule, me ke ano huhu. " Makemake anei oe ia'u e haawi aku ka'u mea i loaa mai ma ka hana oolea? Ke i aku nei au ia oe, aole loa e hiki ia'u ke kokua."

            Aka, ike no o Kale i na nuhou mai na aina e mai, a i kela la i keia la huli ae oia i ke ala e hiki ai iaia ke loaa i kala no keia hana hanohano mai keia kupuna makemake ole ona mai. I ka wa e hauoli ana kona kupuna i ka lohe ana i na nuhou maikai no ke koho balota, pane o Kale iaia penei: "E kuu kupunakane, ina aole e kiki ia oe ke haawi i kala no ka Papa Misionari, e haawi anei oe i hookahi uala kahiki ?"

            " He uala kahiki ka !" wahi a Mika Hale, me ka haalele ana i kona heluhelu nupepa ana.

Ae mai la o Kale; "A me ka aina, kahi e kanu aku ai, a me na uala e hua mai ana i na makahiki eha."

            Ae mai kona kupuna, a kau hou i kona maka aniani ma kona ihu me ka olioli no ka pakele koke ana mai ka hoopilikia mau ana o ua keiki nei me keia kumukuai uuku.

            Kanu aku o Kale i kona uala, a i ka makahiki mua hua mai he umi-kumamakolu uala. Kanu hou ia ua mau uala nei he umi-kumamakolu, a loaa mai he peka uala. Kanuia, ia mau uala, a hua mai he ehiku busela me ka hapalua; a i ka ha o na makahiki eia ka, ua hua mai ia uala hookahi he kanahiku busela—ua like me na barela he iwakalua a keu. I ke kuai ana, ua haawiia na kala i loaa mai ma ka waihona o ka Haku me ka naau hauoli. O ka elemakule mahiai kekahi i kahaha nui, me ka i ana, "Aole no i kaumaha iki au ma ia haawina kokua. E Kale, ua noonoo au, ina he wahi misionari liilii e like me oe ma kela hale keia hale, a loaa pakahi ia lakou he uala, a mea e ae paha e hua nui, mai ana, e houluulu auanei lakou i puu kala nui no keia hana."

 

NA HUEWAI ILI.

            He mau mea halihali wai keia, o ka wa kahiko, o na Iudaio. Aole i loaa na omole aniani i kela manawa. He mau huewai ili ka lakou. O ka ili kao, a me ka ili hipa, na ili i hana nui ia i huewai. Lole okoa ia, alaila humuhumuia a paa ma kahi i kahaia'i ka opu a me ka a-i a me na wawae, a lilo ka ili okoa i eke. "Ma ka a-i, kahi i okiia'i ke poo a kaawale, oia ka nuku o ka huewai. A ma na wawae eha, ua hoopaaia na kaula haawe, e like me ka oukou e ike nei ma ke kii. O keia no ke ano huewai a Iesu i olelo ai ma Mataio 9: 17. "Aole hoi e ukuhi na kanaka i ka waina hou maloko o na hue ili kahiko, o nahae na hue, a kahe aku ka waina, a pau na hue: aka, ukuhi no lakou i ka waina hou iloko

o na hue hou, a koe pu ia mau mea i ka malamaia."

 

HOIKE   MAKAHIKI O KE KULA SABATI O KAWAIAHAO.

            He uuku na mea hou a'u e hai aku ai imua o keia Ahahui:

            Ua holo pono ko makou Kula iloko o ka makahiki i hala, aka aole i ku like loa me ka makemake o ke Kahu Kula. Ua emi ka huina o na haumana malalo iho o ka makahiki mua, aka, ua oi ko keia makahiki ma ka hele mau ana o na haumana, ua oi aku ka makemake o na haumana i ke Kula, a ua oi ko lakou ikaika ma ha hana.

            He nui no na kumu o keia a kekahi kumu nui; oia paha no ke no ia o ke Kula a pau ma ka haawiia hookahi. Mai ka malama o Okatoba, 1869, ka haawi ana o keia haawina. Ua wae pono ia na haawina mailoko ae o ka Buke o Ioane, ma kahi o ka ehiku pauku ma ka haawina hookahi. Ua heluhelu ia, ua wehewehe ia na haawina, e na papa o na Makua a me na haumana Baibala, a ua hoopaanaau ia e kela hapa o ke Kula i ike ia ma ka Apana A, a ua ao ia iloko o ke Kula o na Pokii e na Kumu a lakou. "

            Eia paha kekahi kumu o ka hele mau o na haumana, oia hoi o ko lakou hapanui, he poe keiki o na makua Karistiano, a ua maa lakou i ka hele ana i ke Kula Sabati no na makahiki he nui. Nolaila ua maa lakou, a ua makemake hoi

            Ua mahele ia ke Kula i na Apana ekolu, i mea e pololei ai na papa helu, ua kapaia keia mau Apana, A. B. a me C.

            O ka Apana A, oia kela hapa o ke Kula i ike i ka heluhelu, a i makaukau hoi ma ke kukakuka ana o na haawina ; aole nae he poe Makua.

            O ka Apana B, oia na Pokii, Ua no ia lakou ma ka olelo waha wale no, o ka nui o ka lakou hana, oia ka himeni.

            O ka Apana C, oia na Makua.

 

AOLE AU E   HOOPUNIPUNI.

            He wahi keiki uuku, o Auguseto kona inoa. I kekahi la, haawi mai la kona makuwahine i ka pika ma kona lima me ke kauoha iaia e kii aku i ka waiu no lakou. Puka aku la ia, a ma ke alanui, alualu aku kona kaikaina a loaa aku iaia. "Ho mai ka pika ia'u ; na'u e lawe," wahi a ke kaikaina. Hoole aku nae o Auguseto, a hoopaa iho i ka pika, e hooko i ke kauoha a ka makuwahine. O ka lalau mai no ia o kahi kaikaina i pika e kaili aku, a ia laua e aumeume ana, haule iho la ka pika, a nahaha. Pilikia loa o Auguseto a uwe ehaeha me ke kaumaha o ka manao. Maalo ae kekahi wahine, a aloha aku oia i ke keiki i kona pilikia ana, i aku la oia ia Auguseto, " E hoi aku oe a i kou makuwahine, olelo aku iaia, i haule ka pika a nahaha i ka mea nana ka waiu kuai; alaila aole oe e pilikia."

            Holoi ae la o Auguseto i na kulu waimaka, haka pono aku la i ua wahine alakai hewa nei, pane aku la iaia, "Aole au e hoopunipuni. E hai aku no wau i ka oiaio, a ina e huhu mai kuu makuwahine, oia iho la no. E aho ia mamua o kuu hoopunipuni ana, a huhuia mai e ka Makua ma ka lani."

            Nani kahi keiki hana pololei! Ina pela oukou a pau, e na keiki, e hana'i ma ka oiaio, me ka makau aku i ko oukou Makua ma ka lani, pomaikai oukou, pomaikai na makua, pomaikai ka lahui.

 

            O ka mea makemake i ke aoia mai, oia ka i makemake i ka ike, o ka mea hoowahawaha i ke aoia mai, he holoholona ia.— Solomona.

 

KE ALAULA.
He Nupepa Hoikeike Kii,

Hoopau mau ia ma Honolulu, i kela malama keia malama e ka PAPA HAWAII, no na Kamalii Hawaii.

25 keneta ka uku no ka makahiki no ka pepa hookahi; 20 keneta pakahi ka uku no na pepa ke iwakalua a oi aku paha ma ka ope hookahi, ME KA HOOKAA MUA IA MAI.

A. O. POLEPE, Luna Hoopuka.