Ke Alaula, Volume V, Number 5, 1 August 1870 — Page 19

KE ALAULA. 19

KA WAI I HOOLILOIA I WAINA.

            O ka mua keia o na hana mana a Iesu i hana ai, i haiia mai ia kakou. Ma kekahi kulanakauhale,o Kana kona inoa, ma ka aina o Galilaia, ua hoomakaukauia he ahaaina mare no ka mare ana o kekahi mau mea. He poe kuonoonu paha lakou. No ka mea, he ahaaina nui ka lakou i hoomakaukau ai. Ua konoia na hoaai, ua makaukau na kauwa lawelawe, a he waina ko lakou mea inu. Mai kuhihewa nae kakou he waina i like me ka waina o keia wa e ikeia nei ma na pahu a me na omole o na hale kuai wai ona. O ka hapanui o ka waina o keia wa, he wai ona wale no i kawiliia noloko mai o na mea ino e ona ai na kanaka, a e make ai ke kino. O ka waina o ia wa, oia no ka wai maoli o na huawaina, i kaomiia a uwiia me ke kawili ole ana i na mea e ae. A he mea inu mau no ia no ka poe kuonoono a hanohano o ia aina i ka wa a Iesu i noho ai ma ka honua nei. E like hoi me ka inu mau ana o na haole i ke kope a me ke ti i keia wa. Ua hoolako paha ka mea nona ka ahaaina i ka waina e like me kona manao e lawa ana. Eia nae, i ka ahaaina ana, aole i lawa. Pilikia ka ole o ka waina. E noho ana no hoi o Iesu a me Maria kona makuahine malaila, no ka mea, o laua kekahi o na mea i konoia. A i ka pau e ana o ka waina, i aku la o Maria ia Iesu. " Aohe o lakou waina." Me he mea la e paipai ana oia ia Iesu e kokua i keia pilikia o lakou Aole nae i makaukau o Iesu e hana koke ia wa. Nolaila, pale aku la oia i ka olelo a Maria me ka olelo " Heaha la ia ia kaua? Aole i hiki mai ko'u manawa." Me he la, e olelo ana, mai pihoihoi wale kou manao no ia mea. Alia iki a hiki i ka manawa kupono." Huli ae la o Maria a i aku la i na kauwa, "O ka mea ana e olelo mai ai ia oukou, oia ka oukou e hana ai." Mahope iho, nana iho'la o Iesu, a ike ae la oia i na ipu wai holoi e ku ana ma hai; he mau ipu i kalaiia noloko o na pohaku nui. Eono mau ipu pohaku nui. lna e piha i ka wai, ua aneane 27 galani a oi aku paha ko ka ipu hookahi; kokoke i like ka nui me ka pahu barela. Aole nae i piha lakou a pau i ka wai. Nolaila, kena aku la o Iesu i na kauwa e hoopiha pono i ua mau ipu nei eono i ka wai. Hoopiha no hoi lakou, a pau ka hoopiha ana. Ia manawa no, kauoha koke ae la o Iesu ia lakou e ukuhi iloko o na pika, a e lawe aku i mea inu na ka poe ahaaina. Eia ka, i ka inu ana, he waina maikai, momona loa. Mahalo loa lakou a pau i keia waina maikai, a ke kuhihewa nei lakou, he waina momona okoa keia i hoolako mua ia e ke kane mare nona ka ahaaina. No ka mea, aole paha i ike lakou ua pau e ka waina i hoolako mua ia. O ka haku hale wale no paha, a me kona ohana ka i ike, a o Maria wale no paha a me Iesu ka i lohe i ka pau ana o ka waina. No ia kuhihewa o na hoaai, ku ae la ka Lunahoomalu o ka ahaaina, a haawi aku i ka mahalo o ka aha i ke kane mare. Penei ke ano o kana olelo : " Ma na ahaaina e ae, he mea mau i na haku hale ka haawi mua ana i ka waina maikai loa, a mahope iho ka waina lahilahi ; eia ka o kau ka haawi mua i ka waina lahilahi, a o keia waina hope mai nei ka waina oi o ka momona.'' Oiai hoi ua wai nei a Iesu i hoolilo ai i waina. Nani ka mana o kana hana. Kohu keia hana i ke Akua wale no; aole i ke kanaka. O Iesu, o ke Akua Iehova no ia.

 

KE KAUWA MAKAUKAU.

            He misionari kaulana o Kauka Morisona,no Kina. No ka nui o kana hana, oiai e unuhi ana i ka Baibala okoa ma ka olelo Puke, kauoha oia i ka Ahahui ma Enelani e hoouna i misionari opio e kokua iaia. I ka loaa ana o kana palapala, ua ninau na lala o ka Ahahui iwaena o na makamaka i kanaka ui kupono e hele i Kina, e kokua ia Kauka Morisona, ma ke ano misionari.

A hala kekahi wa, hele kekahi kanaka ui, mai kahi kuaaina mai—he kanaka haipule, i aloha nui ia    Iesu—me ka hai ana i kona makamaka e hele ma ia aina. Ua ilihune oia, aole maikai hui, a kamailio pu.

            Hookuu mai lakou iaia e kukakuka nona. I mai lakou, aole paha oia ka mea kupono e kokua ia Kauka M , aole kupono ia kakou e hoouna i keia kanaka kuaaina misionari.

            I aku lakou ia Kauka P.-kekahi o na lala—e hele, a hai aku i keia kanaka i ka manao o na keonimana ; aole he kupono iaia e lawelawe ma ka oihana misionari, aka i makemake ia e hele

kahi misionari—e hoouna no lakou iaia.

            Aole makemake keia kauku e hai aku iaia pela, aka hai aku iaia penei: "Aole nui kou naauao, a ua nele ma kekahi mau mea e ae i kupono i ka misionari, aka nae ina ,manao oe e helu e kokua ma ka oihana misionari, e hoouna no keia Ahahui ia oe."

            Penei paha ka hapa nui o na kanaka ui e pane ai, "Aole, aole au manao e hana pela, ina aole hiki ia'u ke hele ma ke ano misionari, aole no au e hele; aole au e hele ana he kauwa na hai, aole loa."

            Aole nae pela ka pane ana o keia kanaka i aloha io i kona Haku. I aku ia, "Aia no ia lakou, ina aole lakou i manao ua kupono au e hapai i keia oihana misionari, e hele no au ma ke ano o ke kauwa. Ae no au e lilo i kaka-wahie, a i hali wai paha ; aia ma ka hana e holo ai ke

aupuni o kuu Haku ma ka lani, malaila au e hana ai."

            Ua hoounaia ma ke ano o ke kauwa na kanaka la, aole i hoomauia ma ia ano. Aole liuliu a hoomaka oia i ka hana ana i manao a iini nui ai, ka hai ana i ka Euanelio iwaena o ka poe pegana, ke ao ana ia lakou no ke aloha o Iesu.

            Nani ka haahaa o ua kanaka nei; o ka mea i hoohaahaa iaia iho, na ke Akua no e hookiekie ae.

            O keia kanaka, oia no o Dr. Milne, kekahi o na misionari maikai, a ikaika loa ma ka hana, a kaulana hoi o ka poe i hoounaia i na aina e.

 

KA PAHI PELU A KEO.

            E paani ana o Keo ma kae o ka lua wai me kana pahi pelu hou ma kona lima, a no ka paa pono ole, ua haule kana mea makamae, ma kahi hohonu loa.

            Lohe ae la ia i ke kani ana me ka lele ana ma na pohaku kahiko i paa i ka limu, a no kona ukiuki a me ke kaumaha, manao ola e lele ilalo i loaa hou.

            Aka o ka mea hiki iaia, oia ka hoi ana iloko o ka hale a hai aku i kona mea i kaumaha ai, i kona makuahine aloha, ka mea i hali pu i kona maikai o ka malama pono ana i na mea a pau.

            E noho ana o Ioane, ka makuakane o Keo, ma ka puka aniani, a i ka lohe ana i ka mea kaumaha a Keo i hai mai ai, niele oia ia Keo penei, "ua weheia anei kau pahi ? " Ae mai o Keo, "e hana ana au i pila kuolo me ka apana papa lahilahi."

            "Alia, e imi kaua i ka mea hiki ia kaua ke hana." Meia olelo ana, lalau oia i kahi apana aniani na maka uuku, a hele aku i ka lua wai, a me ia aniani hoolele oia i kahi kukuna o ka la maluna iho o ua pahi nei.

            " Aia la! e kuu makuakane aia la !" uwa o Keo me ka olioli loa, "ike au i ke au palaoa." "Ia no e hiki i ke kukuna la ke huki mai me he makau la, e loaa hou paha kuu pahi." Aole pane ae o Ioane, aka hele oia i ka hale a hoi hou mai me kekahi makeneka maikai i hoopaaia me kahi kaula ikaika.

            Me ke akahele hookuu oia i keia makeneka ilalo, e hoolei mau ana i ka malamalama o ka la ma kahi e moe ana ka pahi a ku ka makeneka i ka hao olino.

            Umii ikaika ka makeneka i ka pahi a hukiia mai. Lealea loa o Keo i ka ike ana, a mahalo na kanaka e nana mai ana.

Ke ike nei oukou i ka maikai o ka naauao i hoopiliia, a pela ka naauao oiaio, he mana ia i oi ma na mea a pau a oukou e hana ai ma keia ola ana.

            E hoiliili i ka naauao a nui i keia wa, ka wa opio, i ka wa e holo mama ana na makahiki o ka wa ui, i ole e kaumaha ke manao no na hora i lilo wale aku mamua. F. M.

 

HE BILA AIE. INU-O A AIE IA WAI-ONA.

No ka Lilo dala. No ka Lilo makamaka.

No ka Puu manawa. No ka Lilo maemae No ka Lilo oihana. No ka Lilo noonoo. No ka Lilo ikaika. No ka Lilo ola kino. No ka Lilo inoa maikai. No ka Lilo uhane.

            E houluulu oe i ka nui o keia bila aie, a e noonoo pono i ka hookaa ana. He bila loihi keia, a he weliweli hoi. He mea hikiwawe nae ma na hale inu bia, ke komo nei lakou iloko o keia aie. Aia na kanaka ui ma na hotele, a ma na keena bilioka, a me na hale inu ona, ke hoopihi nei lakou i keia bila. Aia na kanaka e inu nei ma ko lakou mau hale iho, e holo ana ko lakou aie. Aia na kanaka e hoi ana ma ke alanui i kela ahiahi keia ahiahi me na pu awa, ke helu ia nei keia mau aie ma ko lakou mau bila. UOKI ! EA! UOKI ANO ! O MAKE MAU LOA OE !