Ke Alaula, Volume V, Number 5, 1 August 1870 — Page 20

20 KE ALAULA.

 

MELE OLI AE.

Leo: "SINGING FROM THE HEART."- Songs of Gladness.

KEIKIKANE

I-na he hau-o-li koa, Me-le, Me-le; Me-le me he ma-na no, Me-le o-le ae.

KAIKAMAHINE.

Me-le a-ka ia Ie-su, Me-le me ka ha le-lu, Me-le a hoo-mai-kai pu, Me-le o-li

HUI.

Me-le me-leo-li ae, Na-ni e ka po-mai-kai No na le-o me-le mai, Me-le o-li ae.

 

2. Ina he kaumaha kou,

Mele, mele,

Na ke mele e hoopau,

He kaumaha ko Iesu,

Mele nae a oli pu;

Mele i holo ka luuluu,

Mele oli ae,

HUI- Mele, mele oli ae, &c.

 

3. Ina he pomaikai kou,

Mele, mele,

Nui no na pomaikai,

Mele oli ae,

No ke Kula Sabati,

No ka Papa Pa-ko-li,

No na leo himeni,

Mele oli ae,

HUI- Mele, mele oli ae, &c.

 

4. Ina me he waiwai kou,

Mele, mele,

Mele i ka Haku ou,

Mele oli ae;

Nona mai ka waiwai ou,

Nona hoi ka waiwai mau,

Mele oli ae,

HUI- Mele, mele oli ae, &c.

 

KA HOLO ANA I AIGUPITA.

              Iosepa keia, a me Maria, e holo malu ana me ke keiki uuku, me Iesu, i ka aina o Aigupita, i pakele ke ola o ke keiki. No ka mea, ua paa ka manao o Herode, ke alii, e pepehi i keia keiki a make. A na kena oia i kona mau luna e pepehi i na keiki uuku a pau o Betelehema, a me na wahi e puni ana. Manao hoi ua alii ino nei aole e pakele o Iesu. Aka, ua hai aku ka anela ia Iosepa ma ka moeuhane, me ke kauoha iaia e lawe i ke keiki aku i Aigupita, e noho ai a hiki i ka wa kupono e hoi aku ai. Nolaila, ua hooko koke o Iosepa e like me ka mea i kauohaia mai e ka anela. A noho aku la lakou ma Aigupita a make o Herode, alaila, hoi mai.

 

NA ANUUNUU EKOLU.

            I ka malama o Iune i hala iho nei, ua kamailio kakou no ka lua o na anuu e pii ai a komo iloko o ka Luakini nani o ka ke Akua aloha; oia ka manaoio; koe aku ke kolu o na anuu, oia ka hoolohe. Nolaila e kamailio kakou i keia wa no ka HOOLOHE.

            Ekolu ano o ka hoolohe; hookahi nae ano hoolohe i kupono i ka ke Akua makemake. E hai aku au i na ano okoa ekolu.

            1. O ka hoolohe ana mamuli o ka hooikaika ana mai o ka mea mana, e like me ka hoolohe ana o ke kauwa kuapaa i kona baku. Aole ia he hoolohe no ka manaoio a me ke aloha, aka, no ka makau o ke kauwa i kona haku. Aole hiki ia kakou ke komo aku iloko o ka ke Akua aloha mamuli o ka hoomakauia mai. O ka makau i ka make, he kumu no ia e mihi ai, a e ike ai kakou i ko kakou pilikia. Ina nae ua holo kakou io Iesu la, a ua hilinai ia ia me ka manaoio, e ulu mai ana no ke aloha a me ka hoolohe. Ina he mau keiki kakou na ke Akua, i hanauia ma ka manaoio, e ulu mai no ka makemake e hoolohe iaia. Ma ka manaoio hoi e loaa ai ia kakou ka ikaika e hoolohe i kona makemake.

            2. O ka lua o na ano hoolohe, oia no ka hoolohe ana i loaa mai ai kekahi pomaikai, e like me ka hoolohe ana o ke kanaka hoolimalima i haku, a hana i kana hana, i mea e loaa mai ai ka uku.

            3. O ke kolu o na ano hoolohe, oia no ka hoolohe ana no ke aloha maoli aku i ka mea nana ka hana ; e like me ka hoolohe ana o ke kane mare i kana wahine hou, a o ka wahinemare i kana kane hou. Pela no, a oi loa aku, ke ano o ka hoolohe ana o ka ke Akua mau keiki iaia. O ka hoolohe ana ka mea e maopopo ai ke aloha. E like me ka Iesu olelo " O oukou

e kauoha ai ia oukou." Ioane 15:14 "Ina e aloha mai oukou ia'u e malama oukou i ka'u mau kauoha." Ioane 14:15.

            Aole no e hiki ia kakou ke hookaawale aku i ke aloha mailoko ae o ka hoolohe oiaio. O ka mea i mihi i kona mau hewa a pau, a i nana aku ia Iesu Kristo me ka manaoio, ua hoomaka no ke aloha iloko o kona naau i ke Akua me ka hoolohe i kana mau kauoha. Ua awili pu ia ka hoolohe me ke aloha : aole hiki ke hookaawaleia.

            O na anela ma ka lani, ua hoolohe lakou i ke Akua me ka oluolu loa; me ke aloha kanalua ole. Pela no na mea i hoopakeleia mai na pilikia o keia ao, na mea e noho nei ma ka lani me Iesu, me Aberahama, me na hoaloha mai Hawaii nei e noho la ma ke alo o ko kakou Makua ma ka lani, ua hoolohe lakou iaia me ke kanalua ole a me ke aloha pau ole.

            Pela e hoomaka ai he wahi lahi iloko o ko kakou mau naau, ke ulu ae ko kakou manaoio a me ko kakou aloha ia Iesu, a lilo ia i mea e hoolohe mau ai kakou i Kana mau kauoha me ke kanalua ole.

            Oia no ka mea e olioli ai kakou ma ka lani, ke hiki aku kakou ma ia wahi hoano. O ka hoolohe ana i ka ke Akua makemake me ka wikiwiki, me he uwila la ka lele ana i oi anei, e hooko ana i kana mau kauoha, oia no ka olioli o ko laila poe anela.

            Pela no kakou e noho oluolu ai iloko o ka luakini a ka ke Akua aloha, a ana kakou i kona nani, ke noho me ka manaoio a me ka hoolohe aloha ana i kona makemake.

            E na hoa heluhelu Alaula, aole anei he waiwai maoli ka ke Akua aloha? Aole anei i oi aku ka maikai o kona aloha i na aloha e ae a pau ? Aole anei he mea pono ia kakou e imi me ka mihi io a me ka manaoio a me ka hoolohe oluolu ana i kana mau kauoha e noho mau iloko o kona aloha?

            Nolaila, e noi aku kakou i ke Akua e hoouna mai i ka Uhane Hemolele, i noho mau mai oia me kakou, i piha ko kakou mau naau me na mea maikai a pau iloko o Kristo Iesu ko kakou Haku e ola'i. Alaila e piha io no ko kakou mau naau me ke aloha i ke Akua a me na kanaka a pau, a e ulu ae kakou a mahuahua ko kakou like ana me Iesu.

 

AHEA?

            He wahi keiki maikai o Pilipo. I kekahi la, ua hoouna kona makuakane iaia maluna o ka lio e holo aku iloko o ke kulanakauhale,e kii i kekahi mau mea a ua makua nei i makemake ai. Ia Pilipo e hele ana ma ke alanui, loaa aku la oia i kekahi keonimana maikai e holo ana ma ia ala hookahi no. Aloha mai no hoi kela, aloha aku no hoi keia. Ninau mai la ke keonimana ia Pilipo, "E hele ana oe ihea?" Pane mai la o Pilipo, "E hele ana au iloko o ke kulanakauhale." I mai la kela "Owau hoi kekahi e hele ana ilaila ; ina he mea oluolu ia ia oe, e hele pu paha kaua." O ko laua hele pu aku no ia, a ninau hou mai ua keonimana nei, " E hele pu ana kaua i ke kulanakauhale; pehea aku mahope? Ma ke ala hookahi paha kaua e hele ai, aole paha." Pane aku la o Pilipo, "Aia a pau kuu hana malaila, e hoi mai ana wau." "Ae," wahi a kona hoahele, "aka e hele ana au i ke kulanakauhale i hookumuia, a o kona mea nana i hana a i kukulu, o ke Akua no ia. Ke naue aku nei anei oe i kela kulanakauhale?"

            " Aole i akaka ia'u."

            " Aole ka i hoomaopopo oe i kou hele ana, ke hele nei paha oe i ka lani, ke hele nei paha i ka lua ahi?"

            " Ua akaka no ia'u, aole au he haipule."

            " Aole ou makemake e lilo i haipule?"

            " Ae, e manao ana no wau pela mamua o kuu make ana."

            "Ahea la oe i make?"

            " Aole ou i ike."

            " Kupaianaha kou ike ole."

            " Ka he mea kupaianaha anei kuu ike ole i kuu wa e make ai? Auhea hoi ke kanaka i ike

ia mea?"

            " Eia ke kupaianaha, o kou manao e huli i ka pono ma keia hope aku, mamua o kou make ana, eia nae, aole oe i ike i kou wa e make ai. Malia paha, e make koke oe i keia la. Alaila pehea kou huli ana au e hoopanee nei. Ano iho nei, ua hele aku wau i ka hoolewa ana o kekahi keiki opio, e like rne oe nei, a ua like hoi kona manao e huli i ka pono mamua o kona make ana. E holo ana no hoi maluna o ke kaa i nehinei, me ka lio laka e kauo ana. A hiki aku i kahi ihona, hemo ae kekahi i huila o ke kaa, lu ia ua keiki nei i ka honua, ku ke poo i ka pohaku, a o ka make no ia. Aole i loaa kona manawa e huli ai i ke Akua. Auhea hoi ko kaua ike aku, malia paha, e loaa ia oe ka make hikiwawe i ka manawa i manao ole ia, e like me ko ia la."

            " E manao ana au e huli koke no."

            " Ahea i I keia la anei ?"

            " Aole paha i keia la."

            " Apopo anei ?"

            " Aole paha."

            " Ahea hoi ? No ke aha la e huli ole ai i keia la ? E imi aku i ka Haku oiai ka wa kupono e loaa aku ai. O keia la ka wa kupono. Malia paha aole oe e loaa aku iaia apopo."