Ke Alaula, Volume V, Number 6, 1 September 1870 — Page 22

22 KE ALAULA.

 

KE ALAULA.

He Nupepa Hoikeike Kii,

Hoopau mau ia ma Honolulu, i kela malama keia malama e ka PAPA HAWAII, no na Kamalii Hawaii.

25 keneta ka uku no ka makahiki no ka pepa hookahi; 20 keneta pakahi ka uku no na pepa ke iwakalua a oi aku paha ma ka ope hookahi,

ME KA HOOKAA MUA IA MAI.

A. O. POLEPE,

Luna Hoopuka.

 

KA UKU O KA HANA PONO.

            He keiki o Iosepa no na makua ilihune, aka, he keiki hoopono ia. Aole hiki iaia ke hoopunipuni, aole hiki ke hana i ka mea lapuwale. Ua hoouna ia oia i kekahi la e hele i ka hale kuai e wawahi i kekahi mau dala.

            A i kona hoi ana mai, i helu iho ka hana i ke kala, ua oi mamua o ka mea kupono. Hoi hou aku la oia i ka hale kuai, a i aku la i ke kupakako, e, ua hewa nae

            I aku la ke kupakako, "aole, ua pono no kuu wawahi ana, ua haule paha kekahi dala i ko hoi ana."

            I aku la o Iosepa, "aole i haule, ua wahiia ke dala iloko o keia pepa, a i helu iho kuu hana, ike au ua oi." "Uoki," wahi a ua kupakako nei, "he mea ole ia'u ko hai ana mai i kau mea i ike ai. Ua pono ko'u wawahi ana i ke dala. Ua hewa oe i ko malama ole."

            Ia wa lohe iho la ka mea nona ka hale kuai i ko laua hoopaapaa ana, hele mai la kela, a ninau mai la ia Iosepa, "heaha kau mea haule?" I aku la o Iosepa, "aole a'u mea haule, aka, ua hoihoi mai au i keia apana dala, he hapawalu ulaula, ua kuhi hewa ke kupakako i ka wawahi ana i kuu dala, he dime ka mea pono ke haawi mai ma kahi o keia apana gula; a oia ka'u i hoihoi mai nei." I mai la ka mea hale kuai, "Ke mahalo nei au i kau hana. He keiki ilihune oe, aole e ole ko hoowalewale ia e lawe i keia apana dala; aka, ua pale oe i ka manao hewa.''

            I aku la o Iosepa, "ua ao ia au e hana aku ia hai, e like me ko'u makemake ia hai e hana mai ia'u. Nolaila au i hoihoi koke mai nei i keia dala."

            Ma ia hope, ua loaa ia Iosepa ka hana maloko o ia hale kuai, a ua mahaloia oia no ka hana pono. Ua hauoli ka naau o kona mau makua iaia. A i kona lilo ana i kanaka makua, ua lawe ia oia i hoa hui iloko o ia hale.

            Ke ike nei oukou i ka hope o ka hana pono. E hele oukou a e hoohalike.

 

HE MAU AO ANA A KA BAIBALA I KA POE OPIO.

            1. E kuu keiki, mai haalele oe i ko'u kanawai; e waiho hoi i ka'u mau kauoha ma kou naau.

            2. No ka mea, oia ka mea e nui ai na la a me na makahiki o kou ola ana, a o ka malu hoi e haawiia ia oe.

            3. I ole e haalele ia oe ka lokomaikai a me ke aloha, e hawele ia mau mea ma kou a-i, e kakau hoi ma ka papa o kou naau.

            4. Pela e loaa'i ka lokomaikai a me ka ike oiaio, imua o Iehova a me na kanaka.

            5. E paulele ia Iehova me kou naau a pau, mai hilinai hoi ma kou naau iho.

            6. Ma kou aoao a pau iaia no oe e nana aku ai, a nana no e hoopololei i kou hele ana.

 

            A hala ka ua, puka ka la, a hala ka hooilo, puka ke kau, a hala ka po, puka ke ao, a hala ka poino, puka ka pomaikai.

 

O IESU E HOOLA ANA I KE KEIKI A KA WAHINE KANEMAKE O NAINA.

            I kekahi la, e hele ana o Iesu ma ke alanui e hiki aku ai i ke kulanakauhale o Naina, "a hookokoke aku la oia i ka ipuka o ua kulanakauhale la, aia hoi, ua naliia mai iwaho kekahi kanaka make, ke keiki kamakahi a kona makuahine, he wahinekanemake ia ; a nui mai la ka poe o ke kulanakauhale me ua wahine la. A ike ka Haku iaia, hu ae la kona aloha iaia, i mai la oia iaia, mai uwe oe. Hele no la o Iesu, a hoopa ae la i ka manele: ku malie iho la ka poe e hali ana. I ae la ia, e ke kanaka opio, ke kauoha aku nei aku ia oe, E ala'e.

            Alaila noho mai la iluna ua kanaka make la, a hoomaka mai la e olelo: a haawi ae la o Iesu iaia i kona makuahine."

 

HE PALAPALA MAI AMERIKA MAI.

            E KE ALAULA -Aloha oe:-E oluo|u paha kou lehulehu e lohe i kekahi mea a makou i ike ai i ka holo ana mai e makaikai i ka aina o na makua o makou. Ku mai makou mai Kapalakiko i ka la 4 o Iulai, oia ka la Kulaia o ko Amerika poe. Ua paniia na hale kuni, a ua lilo ka lehulehu i ka hooluolu, a me ka lealea. I ko makou komo ana aku iloko o ke kai kuono o Kapalakiko, ike makou i na moku kialua, kiakahi, e hookele ana me na ohua he nui wale, a me na hae nani e welo ana i ka makani. Ia po, hele makou e ike i na mea nani i hoikeia ma ka ma lamalama, o ke ahi. He kupaianaha no na mea i hoikeia mai. He kao lele, he ahi pona mai he ahi ulaula, omaomao, melemele. Ma ke ahi, ua hoike a mai me he hinai pua nani la, me he lio la, me he mokuahi la, na hua olelo, "Wasinetona," "Linekona," "Kaleponia," a nui wale aku no. Nani loa no na mea i hoike ia mai ma ka lapalapa o ke ahi.

Ike makou i ka moana Atelanika.

            Hala ia makou he mau la ma Kaleponia, alaila, i ka la 11 o Iulai, kau makou ma na kaaahia holo mai i ka Hikina, e ike i na moku aina o ka Hikina o Amerika. Elima la o ko makou holo na papu palahalaha, a hiki makou i Kikako, (Chicago) a mai laila aku hookahi la a me ka hapa, a ike makou i ka moana Atelanika ma Nu Ioka.

Na Ilikini.

            I ko makou holo ana aku mawaena o ka waoakua o na Mauna Pohaku, ike makou i na kanaka hihiu ili ulaula, na kamaaina kahiko o keia aina. i ke ku malie ana o na kaa ahi ma kahi hale paina ma ka aina mauna, hele mai na wahine Ilikini, a me na keiki a lakou, e noi kala ana me ka olelo haole mai penei, "give me dime," "give me quarter," " give me dollar." Ua uhi paa ia na kino o lakou i na kapa lole lepo, a weluwelu kekahi. O na keiki liilii ka'u i aloha loa ai. Penei i halihali ia na keiki liilii, malalo o ka makahiki hookahi, maluna o na kua o na makuahine. Lawe ka makuahine he papa lahilahi, wahi ia ke keiki a paa i ka lole, alaila hoopili i ke kua

o ke keiki i ka papa, a hauhoa iaia mai ke poo a ka wawae a paa loa, aole e hiki e oni iki kekahi lala. Hanaia he wahi lanai maluna iho o ke poo o ke keiki, i wela ole ai i ka la, alaila hoopaa ia keia papa ma na poohiwi o ka makuahine; pela ia e lawe hele ai i kana keiki ma kona kua, me he kii la ke keiki; aole oni iki ae, o ka imo wale mai no o na maka. He mau keiki hoomanawanui loa na keiki Ilikini. He uwe ole.

Na Holoholona Hihiu o ka Waonahele.

            Ka Bufalo, oia kekahi o na holoholona hihiu e hele wale nei ma na kula o na Mauna Pohaku a me na papu. Me he bipi ahiu la keia o Halemano, a o Mauna Kea paha. Okoa iki nae keia, he kiekie kona hokua, a he loloa ka hulu o kona a-i, a me ke poo. I ka holo ana mai maluna o na kaa ahi, aole i loaa ia makou kekahi bufalo, aka ma Kikake a ma Nu Ioka nei, ua ike makou ma ka hale hoikeike holoholona.

            Ka Anetilopa; he ano dia liilii mama loa i ka holo, oia ka makou i ike ai, me he kao nunui la e holo ae ana.

            Ka Hea; (hare) he ano labita nunui kekahi a makou i ike ai.

            Ka Ilio o ke kula; (prairie dog) oi kekahi i loaa ia makou. Ma kahi papu, ike makou i na puu lepo, o na lua i eli ia e keia mau lio a nui wale. Hai mai na kamaaina o ke alanui ia makou, he noho pu ka ilio liilii hookahi ka pueo hookahi, a me ka nahesa hookahi, okolu ano iloko o ka lua hookahi, me he lua iole la1 i eliia a poopoo. O ka ilio wale no ka makou i ike ai ma ia wahi. He ilio liilii loa, me he kino popoki la ka liilii, a o na pepeiao ua muumuu loa.

            Na Uhini.-I kekahi la o ka holo ana mai o na kaa ahi mawaena o na Mauna Pohaku, loaa i makou na uhini nunui, he paapu loa. He nui ae keia mau uhini mamua o ko Hawaii; hookahi iniha a me ekolu hapaha ka loa o ke kino, a he puipui hoi. Aole he omaomao e like me ko Hawaii, aka he eleele e like me ka eleele o ka elelu. Ma ke kauwahi, ua hele ka lepo a eleele i ka nui o na uhini. Koe ole ka maua ia lakou i ka ai ia. He mea ai na uhini na na Ilikini. Ua hiki paha i na keiki Kula Sabati e hai mai i ka inoa o ke Kaula o ke Akua i noho ma ka waonahele o Iudea, a ai i na uhini a me ka meli o ka nahelehele. Malia paha ua like me keia na uhini ana i ai ai.

            Me ke aloha pumehana i na keiki hele mau i ke Kula Sabati. Na'u na O. H. KULIKA.

Nu Ioka, Iulai 30, 1870.