Ke Alaula, Volume V, Number 8, 1 November 1870 — Page 32
32 KE ALAULA.
KA HOKU PAA.
Leo: "THE POLAR STAR."--Songs of Gladness.
1. E ka au-wana ma ke kai, Mai kou ho-me mai-kai ae, Mai-lo-ko o na ao; Na-na i o, he la-ma nou I a-na-pa mai na ao; Hu-li-li o-li mai o mai, Ka Ho-ku Paa na-ni e. A kau-kai e ho-ea hou
2. E ka auwana io i o,
A iini e ike hou
I ka aina hanau ou
Mai loko o na ao;
Nana io, he lama ao
Ma ke kai i lama nou;
Hulili oli mai o mai
Ka Hoku Paa nani e.
3. E ke kiai luhi nei,
E loaa ka maha e,
A pau ae kou kanikau
Ma o Iesu la no;
Nana io he lama nou
Ma ke kai ooloku;
Hulili oli mai o mai
Ka Hoku Paa nani e.
HAAWI ME KA MAKEMAKE.
Ma ke kulanakauhale o Laiona, ma Farani, ua kukuluia he Ekalesia Hoolepope. I kekahi Sabati, ua lawe mai na hoahanau i ko lakou kokua no ke Aupuni o ke Akua. He koa kekahi o lakou. Lawe aku la oia i kona loaa a pau o na malama ekolu, a waiho aku la na ka Haku. Ike aku la ke kahunapule i keia kokua nui o ua wahi koa nei, i aku la oia, "Mamuli paha pilikia oe; e malama paha oe i kekahi hapa no kou ola iho." Kahe ae la na waimaka o ke koa, a pane mai la oia, "Ua haawi no ka Haku Iesu iaia iho a pau loa no'u, i mea e ola ai kuu uhane, a he mea hiki no paha ia'u ke haawi i ka hapaha wale no o kuu loaa makahiki nona."
E na makamaka, e mahalo like ana kakou a pau i ka hana a keia wahi koa. Ina no hoi pela ka ikaika o ka manao o na hoahanau a pau, nani ka holo o na hana a ka Haku ma ke ao nei. Ehia la na hoahanau e haawi nei e like me keia koa, i ka hapaha o ko lakou mau loaa no ke Akua? Ke haawi nei kekahi poe i ko lakou mau hapaha i ka Mahina Hou, a he hapawalu hoi i kekahi manawa. Kakaikahi hoi ka poe haawi ma ka hapalua a maluna ae. He hapa aha la ia o na loaa o ka malama okoa? Na ke Akua mai ko kakou mau loaa a pau; e hoihoi pono aku kakou i ka hapa kupono iaia. E haawi no hoi me ka olioli a me ke aloha; no ka mea, ua haawi mua o Iesu iaia iho no kakou. Aole hoi i haawi hapa, aka ua haawi iaia iho a pau loa i ola ai kakou.
MAI HOOKE.
Ua nui na kanaka maluna o ka honua, aka ua akea no hoi ka honua; nolaila, mai hooke kekahi i kekahi.
Ua ike au i kekahi mau haumana e noho ana ma ka noho hookahi, iloko o ke keena kula. Hooke aku la kekahi i kona hoa, a hiki aku i ka welau o ka noho, a haule loa aku iwaho. Aole no i pilikia ua wahi keiki nei i hooke aku ai oia i kona hoa, aka, he alunu aku no i ka noho'na o kona hoa kula.
Pela no hoi, ma na mea e ae. Ma na ahaaina momona, ua ike no wau i kekahi poe e hooke ana me ka hilahila ole ma kahi o ka ai, e hao ana i ka ia a me ka puaa, a me na mea ai momona. Ai no a maona, alaila hao iloko o ka hainaka, a iloko o ka puolo paha. Aohe manao iki ia hai. Aole no hoi i ai a maona maikai, alaila waiho i ke koena. Alunu wale aku lakou, e ake ana e pau mai ka pomaikai ia lakou iho. E aho na puaa i keia poe. No ka mea, e ai no ka puaa a maona, hoi no a moe, aole no e hao i ka hainaka, a huna malalo o ke kapa e like me lakou nei.
Pela no hoi iloko o ka luakini. Ua ike au i kekahi poe e komo ana, a hooke kekahi i kekahi e loaa i ke poo o ka noho. Ua nui no hoi na wahi hakahaka o na noho, aka o ke poo o ka noho kahi i makemakeia. Nolaila, hooke kekahi i kekahi. E manao nui ana kela mea keia mea iaia iho wale no.
E na pokii, e ao oukou. Mai hana oukou pela. He hana kohu ole ia i ka poe naauao, a maikai. Uoki ka hooke. E hoomanao mau i ke kanawai gula a ka Haku. "E aloha aku i kou hoalauna e like me kou aloha ia oe iho." " E hana aku oe ia hai e like me kau i makemake ai ia hai e hana mai ia oe."
"KA NANAHU."
He makua naauao o Soporonio. Aole oia i ae i kana mau keiki e launa pu me ka poe lealea.
I kekahi la, koi aku la kana kaikamahine, o Eulalia, i ka makua, e ae aku i kona hele ana me kona kaikunane e ike ia Lukineka, kekahi makamaka o lakou. Hoole nae ka makua. Ninau aku la o Eulalia, "No ke aha la e ae ole ai oe i kuu hele ana e ike ia Lukineka? He hele a ike wale no, a hoi mai. Heaha la ka hewa?"
Pane aku la ka makua, "Ua ike no oe, e kuu kaikamahine, ina he hoalauna pono oia nou, aole au e papa aku. Aka, he wahine ano lealea o Lukineka; aole kupono i hoalauna nou."
Pane aku la o Eulalia, "Ka, iaia wale aku no paha ia ano, aole paha ia he mea e hewa ai kuu launa ana me ia."
Ia pane ana a ke kaikamahine, aole i pane koke aku ka makua. E ku ana nae laua ma kahi kokoke i ke kapuahi. Lalau aku la ka makua i kekahi nanahu pio, a haawi aku la ia Eulalia, i aku la, "E lawe oe i keia nanahu iloko o kou lima. Mai makau oe; aole no i aa, aole oe e wela." Lawe aku la o Eulalia, a i ka pili ana nae o ka nanahu i kona lima, eia ka, ua pau ka maemae o ka lima, a ua lilo i ka eleele o ka nanahu. Aole hoi oia wale, aka, ua helelei kauwahi lepo nanahu maluna o kona aahu, a ua lilo kona maemae i mea kina. Ukiuki iho la o Eulalia; i aku la i ka makua, "Ka! ua ike no hoi oe he mea paumaele ka nanahu, eia ka e haawi mai ana oe i mea e haumia ai kuu lima a me kuu kapa."
Pane aku la ka makua "Ae, e kuu kaikamahine, me ia no hoi ka pono ole o ka launa pu ana me ka poe lealea. Ina no aole e wela maoli ana ke ahi o ka hewa, eia nae e kikokohu ana ka inoa, a me ka maikai o na manao o loko mamuli o ia launa ana me ka poe o ia ano. Hookahi wale no pono, o ka hookaawale loa."
MAI PAUPAUAHO.
E kaapuni ana kekahi haole hanohano ma ka hapa akau o Irelani, a lohe aku la ia i na leo keiki. I kona imi ana i kahi i akoakoa ai na kamalii, ike iho la ia he hale kula, a komo aku la. E sepela ana na keiki; a haka pono aku oia i ko lakou hana. E ku kaawale ana kekahi wahi keiki me ke ano hookulou o na maka. Ninau aku la ka haole makaikai, "No ke aha ke ku ana o kela keiki malaila?"
"Ka, he keiki molowa ia, aole ona waiwai. Aole hiki ia'u ke ao aku iaia. Ka oi ia o na keiki lapuwale o keia kula."
Kahaha ua haole makaikai nei i keia olelo a ke kumu, a ike oia he ano hookaumaha kona i ke ao ana i na keiki liilii. Kamailio oluolu aku ua haole nei a paipai aku i na haumana. Kau iho la ia i kona lima maluna o ke poo o ua keiki "lapuwale" nei, he poo maikai kona i ka nana aku, a olelo aku la iaia, "E lilo ana paha oe i kanaku akamai i ka huli palapala i keia hope aku; mai paupauaho, aka e hooikaika, e kuu keiki, e hooikaika."
Ala mai ka noonoo o ua keiki nei. Ua pau kona hiamoe ana. Mai ia hora mai, hoomaka ua keiki nei e hooikaika i ka imi naauao; a ua lanakila, no ka mea ua pau kona hoopaupauaho ana, a ua hooikaika oia.
Pela e na pokii aloha, ea, mai paupauaho i ka hana maikai,—mai paupauaho i ka hele i ke kula Sabati, aka e imi ikaika i na mea e naauao ai. Mai paupauaho i ka imi ana i ka pono ma o Iesu la, aka e noi aku i ke Akua me ka manaoio, e kokua mai. E hooikaika me ka hilinai ia Iesu, i loaa ia oukou ka lanakila maluna o ko oukou mau hewa. He Kokua aloha o Iesu. L. L. N.