Ke Alaula, Volume V, Number 9, 1 December 1870 — Page 36

36 KE ALAULA.

ILI IKI.
Leo: "LITTLE PEBBLE."--Songs of Gladness.
(E hui ke kula a pau ma ka leo Ninau. Ma ka leo Pane, i hookahi wale no.)

1. Ninau. He--a-ha kau hai, i-li i-ki, i-li i-ki. He--a-ha kau hai i-li i-ki o ke kai? Ke a-no kou mo-e nei, Ha-wa-na-wa-na mai. Pane. Ke a-lo-ha ia o kuu Ma-ku-a ma ka la-ni, Ke A-kua no-na kau-a i ha-na mai-kai ia'i. Ke hai mau nei kuu mo-e nei, I ko-na na-ni e.
2. Ninau--Heaha kau hai, pua iki, pua iki?
Heaha kau hai, e ka pua makalii?
Ke ano o kuu ala nei,
Hawanawana mai.
Pane--Ke aloha ia o kuu Makua ma ka lani,
Ke Akua nona kaua i hana maikai ia'i,
Ke hai mau nei kuu ala nei
3. Ninau--Heaha kau hai, manu iki, manu iki?
Heaha kau hai, e ka manu makalii?
Ke ano o kou mele nei,
Hawanawana mai.
Pane--Ke aloha ia o kuu Makua ma ka lani,
Ke Akua nona kaua i hana maikai ia'i,
Ke hai mau nei kuu mele nei
I kona nani e.I kona nani e.
4. Ninau--Heaha kau hai, kamaiki, kamaiki?
Heaha kau hai, kamaiki makamae?
Ke ano o kou oli nei,
Hawanawana mai.
Pane--Ke aloha ia o kuu Makua ma ka lani,
Ke Akua nona kaua i hana maikai ia'i,
Ke hai mau nei kuu oli nei
I kuu hoomaikai ae.
Pau loa--A i ke Lii i ka Makua ma ka lani.
Ke Akua nona i hana ia'i na mea a pau,
Ko kakou mele hoomaikai
A mau loa aku no.

MOHAI KUNI.

KE KAUA HEMOLELE.--Mok. 2.

                Maanei e kamailio iki kakou no keia nunui, oia hoi o Diabolo; a mahope e hapai hou kakou i ka moolelo no kona hoopio ana i ua kulanakauhale kaulana nei o Kanaka.
                O ua o Diabolo nei, he alii kiekie a ikaika no ia, a he lapuwale nae, a me ka pupuka. A eia kona moolelo. I kinohi, o kekahi no ia o na kauwa a ke Alii Sakai. A ua haawiia iaia ke kulana kiekie iwaena o na kauwa ponoi a ua alii nei; oiai ua hoonohoia oia maluna o na apana makamae loa o kona aupuni. Ua lilo oia i "Keiki na ke Kakahiaka" (Isa. 14:12), a he kulana maikai loa kela. Ma ia noho ana, ua nui loa kona hanohano, a me kona nani, e lawa ai ka makemake a pau loa o ka naau. Eia nae, he naau ana ole kona.
                Ike iho la oia i kona loaa ana i keia kulana kiekie a hanohano hoi, akena nae oia e kiekie hou ae. Nolaila, hoomaka aku la oia e imi i ka hana e lilo mai ai iaia ka mana a pau loa o ke aupuni malalo o ke Alii nui, o Sakai. Eia nae, ua haawi mua ke alii i ua mana nui nei na kana Keiki. Nolaila, noonoo iho la o Diabolo iloko ona iho i ka mea e ko ai kona manao. Alaila, wehe ae la oia i kona manao imua o kekahi mau hoa ona, a ua ae mai lakou. A ma ko lakou kuka pu ana, ua hooholoia ka manao, e pepehi lakou i ua Keiki nei a ke Alii, i lilo mai kona hooilina ia lakou. Hooholoia hoi keia manao kipi a lakou, o ka hoomakaukau koke no ia, hoakoakoa ia na kipi a pau, hoonohoia ka manawa, a hoao lakou e hooko i ko lakou kipi. Aka, ua ike e ke Alii a me kana Keiki i keia hana a lakou; no ka mea he maka ike loa kona, a hiamoe ole no hoi, e ike ai oia i na mea a pau ma na wahi a pau o kona aupuni.
                A i kona ike ana i keia hana ino a lakou, ua inaina loa ke Alii. A i ka hoomaka mua ana o ka lakou hana kipi, hoopaaia lakou e ke Alii, a kiola aku oia ia lakou iwaho o na oihana a pau a lakou i noho mua ai. Alaila, kipaku oia ia lakou mai ke alo alii aku, a hoolei iho ia lakou iloko o ka lua hohonu, me ko lakou paa i na kaulahao. Aole loa lakou e hiki ke manaolana hou i ka lokomaikai a ke Alii, aka e noho mau loa lakou malalo o ia hoopai. (2 Pet. 2:4; Iuda 6.)
                Ia lakou e noho lawehala ana iloko o ia lua po, aole no e nele ka pakui ana mai o ko lakou ukiuki a me ko lakou huhu me ko lakou naau hookiekie, e kue ia Sakai ke alii, a me kana Keiki. Nolaila, ia lakou e holoholo ana i o ia nei, me ka uwo nui (1 Pet. 5:8), e imi ana e hooko i ko lakou huhu maluna o kekahi waiwai a ke Alii, komo aku la lakou iloko o ua aina akea nei o Honua, a hele aku la a loaa i ke kulanakauhale o Kanaka. A olioli loa iho la lakou me ka hooho nui weliweli. No ka mea, ua ike no lakou, na ke Alii, na Sakai, ua kulanakauhale nei o Kanaka, a oia no hoi kekahi o kana mau hana kaulana a nani loa hoi, ana i makemake nui ai. Ua ike no lakou i keia, no ka mea, o lakou pu kekahi ilaila i kona wa i kukulu ai, a i hoonani ai i ua kulanakauhale nei nona iho. Nolaila, olioli loa lakou me ka hooho nui, "Ua loaa ka mea makamae, e ku ai ko makou makaia i ke Alii ia Sakai."
                Noho iho la lakou i ko lakou aha kaua, a kukakuka ae la i ka hana e lilo mai ai ua kulanakauhale kaulana nei o Kanaka ia lakou. Eha manao kuka i hoopukaia.
                1. O ka pono e hoike lakou ia lakou iho a pau ma keia kaua ana i ke kulanakauhale o Kanaka.
                2. O ka pono e hoomoana kue lakou i ke kulanakauhale o Kanaka me ia aahu weluwelu inoino a lakou i aahu ai.
                3. O ka pono e hele kue aku lakou i ke kulanakauhale o Kanaka ma ke ano enemi maoli paha, a ma ke ano hoopunipuni paha.
                4. O ka pono e kauoha mua i kekahi mau mea o lakou e hoohalua aku i kekahi mea, a mau mea paha o na kanaka koikoi o ua kulanakauhale nei, a e kipu aku ia lakou ina ua manaoia he mea ia e kokua ana i ka holo o ka lakou hana. (Aole i pau.)

KA PUKA O KE KUIKELE.

                He nui ke kanalua o kanaka ma ke ano o kela wahi pauku ma Luka 18:25: "E hiki i ke kamelo e komo e i ka puka o ke kuikele amua o ke komo ana o ke kanaka waiwai iloko o ke aupuni o ke Akua." Ma na kulanakauhale o Asia i paa i na pa a puni, e like me Ierusalema, he mau puka nui, a he puka liilii maloko o ka puka nui. O ka puka nui ua kupono i na kaa a me na puali koa e komo ae iloko o ke kulanakauhale, a e puka iwaho paha. Aka o ka puka liilii, ua kupono i ke kanaka ke komo. Aole hiki i ke kamelo ke komo ae me ka ukana ma kona kua. Aia a hemo ka ukana, alaila me ke kulou ana e hiki i ke kamelo ke komo pilikia aku. Ua kapaia ua puka liilii la "ka puka o ke kuikele."
                "I nehinei," wahi a kekahi wahine, o Lady Duff Gordon, i kona palapala ana mai Kairo mai, "ua ike au i kekahi kamelo e komo ana ma ka puka o ke kuikele—oia hoi ka puka liilii haahaa o kekahi pa. Ma ke kulou ana i kona poo, me ke kolo ana ma kona mau kuli, i hiki ai iaia ke komo aku. Pela e hoohaahaa ai ke kanaka iaia iho, i komo ia ma ka ipuka pilikia o ka lani."

                "Ke hooalohaloha aku nei au i ke Akua." wahi a kekahi mea ma Nu Ioka. "no ka mea he makuahine haipule ko'u. Aole no he haipule kuu makuakane, aka na kuu makuahine no i malama i ka pule ohana i kela kakahiaka keia kakahiaka, a i kela ahiahi keia ahiahi. Ke hooalohaloha aku nei au i ke Akua, no ka mea, i kona wa e ola ana, ua huli mai kana kane a me kana mau keiki; a o kekahi o kana mau keiki eia ke hooikaika nei ma ka hai ana i ka euanelio o Iesu Karisto."
                Mai paupauaho e na makuahine haipule, i ko oukou hooikaika ana e hoohuli mai i ka oukou mau keiki. L. L. N.

                Mai paupauaho i ka hana ke halawai pu oe me na mea keakea. Hoolana i ka manao; hoomanawanui. Hoopaa loa i ka manao, a e lanakila no oe. Ina e napoo ka la, a uhi mai ka po, alawa ae kou mau maka iluna, a e ike auanei oe i ka malamalama o na hoku. Pela no hoi, ina e pouli mai na mea o keia ao, nana ae oe iluna, i ka lani.