Ke Alaula, Volume V, Number 12, 1 March 1871 — Page 45
KE ALAULA.
BUKE V. HONOLULU, MARAKI, 1871. HELU 12.
Ua nui na keiki e like me keia a oukou e ike nei ma keia kii, i puni i ka holo moana. Makau ole no hoi lakou i ka makani a me ke anu, ka ino a me ke koekoe. He poe keiki kolohe a auwana kekahi o lakou, a he maikai kekahi. I kekahi la, e hele ana kekahi keonimana ma na uwapo, e makaikai ana i na moku. A ike aku la oia i kekahi keiki opio e ku ana ma ka aoao o kahi moku kialua, ninau aku la oia i ua keiki nei, "Owai kou haku?" Pane mai la ia ua keiki nei, "O ka Haku Iesu Kristo." "Ae; inahea kou kepa ana?" "Elua makahiki i hala ke hiki aku i ka la elima o Dekemaba. Ma ka Betela (halepule luina) ma Ladana kahi a'u i kepa ai, a ua noho wau malalo o keia Haku a hiki i keia manawa, a ua paa kuu manao e noho mau loa malalo ona. Eia kuu palapala kepa," a unuhi ae la oia i ke Kauoha Hou noloko ae o kona pakeke.
"Ua loaa paha ia oe malaila he panana, he palapala moana, a me na lako e ae e pono ai kou moku?"
"Ae, na ia nei no e hoopololei i kuu holo ana."
"Aia ihea ke kuhikuhi ana o ke kui o keia panana?"
"Ke kuhikuhi aku nei oia ia Iesu Kristo, ka Hokuao nani. O ka manaoio, oia kuu ohenana, a ke hoopaa nei au i ka pule, oia ke kaula huki o ka pea."
"A pehea; ua paanaau anei ia oe na wahi papau a me na pukoa, kahi e ili ai na moku?"
"Ke hooikaika nei au e kiai pono i ua mau mea la. Ua ike no wau i kahi papau i kapaia o Hoalauna pono ole. He wahi imi loa kela, e make loa ai ka moku. Makaala loa wau e hookaaokoa i kela ino."
"A pehea kou noho ana malalo o keia Haku o Iesu Kristo? He Haku maikai anei ia?"
"Ae! maikai loa! He Hoola lokomaikai oia." E na pokii, pomaikai loa oukou ke loaa ia oukou keia Haku maikai. Ina ua like na luina a pau me keia wahi luina opio, nani maoli no. Ina no hoi ua like na keiki a pau me keia wahi keiki, pomaikai wale.
E MALAMA O HINA.
E NA POKII HELUHELU ALAULA—Aloha oukou:—I kuu hoi ana mai ka halawai aku i ke awakea o kekahi Sabati, ike au i kekahi mea e moe ana ma ke alanui iloko o ka lepo. E na pokii, heaha la ia mea? E hahai aku au i kekahi mau ano e maopopo ai.
1. Ua like me he puaa la; no ka mea ua moe ma ka lepo ma kapa alanui. Aole nae he puaa.
2. Ua like me ke kanaka hilahila ole i kona moe ana malaila me kona luai e ahu koke ana iaia.
Ke hui pu kakou i keia mau hoailona elua, e hiki paha ia kakou e koho, he kanaka ona ua mea la.
I kona wa ona loa ua moe ke kanaka me he puaa la ma ke alanaui, me ka hilahila ole. Aloha ino ke kanaka ona! Ua hoohalike oia iaia iho me he puaa la.
I kona wa ona ole, he kanaka maikai ua kanaka nei, i ka nana aku; aka i kona wa ona ua like me he puaa la.
E na pokii, ina ua makau oukou i ka ona, mai hoomaka oukou i ka inu i na mea e ona ai. He pono i kela keiki keia keiki e hoohiki,
"Aole au e inu rama,
Aole inu waina hoi,
Pau ke gini, pau ka awa,
Aole loa lalau hou.
Pale au i na mea ona,
Aole loa launa hou,
Awahia kona hua,
Moonihoawa no."
O ka oukou makamaka o ka Ahahui Hoole Waiona.
Ninau aku la kekahi keiki kula Sabati i kona kumu, "No ke aha la i hana ai ke Akua i ka rama? Aole anei ia i ike he mea ia e ona ai na makuakane o na keiki liilii, a e lilo ai lakou i poe wahaino a palaualelo, a o ko lakou mau ohana i ilihune a pololi? " Aole loa i hana ke Akua i ka rama," wahi a ke kumu. "Ua hana no ke Akua i ka huita a me ke kulina, a me na mea ai e ae a maikai loa, aka aole nana i hana i ka rama noloko o ia mau mea. Na kanaka no i hookahuli i ko lakou ano a lilo i rama." Pane aku la kahi keiki, "Hewa loa ka mea nana i hana pela. Heaha la ka kela kanaka e pane aku ai ke hoike mai ke Akua i na hua ino a pau o kana hana?" Oiaio no. He ninau paakiki keia. Weliweli hoi kela hoike ana.