Ke Alaula, Volume V, Number 12, 1 March 1871 — Page 48
48 KE ALAULA.
E HOOLOHE E NA KAMAIKI.
Leo: "NO CRUMB FOR ME."--Songs of Gladness.
Na ka-mai-ki e hoo-lo-he I ko Ie-su he-a nei. He-le mai, he-le mai, Le-o mai-kai a a-lo-ha "Na ka-mai-ki, he-le mai. Na ka-mai-ki he-le mai."
2. Ina papa na haumana,
A hoole ke ao nei,
A onou na hoa paani,
Na kamaiki, hele mai,
Hele mai, hele mai,
Na kamaiki hele mai.
3. Hele mai i loaa wale
Ka waiwai, ka pomaikai,
Oiai he wa malie,
Na kamaiki, hele mai,
Hele mai, hele mai
Na kamaiki hele mai.
4. Ke ae nei makou e hele,
Hele ioula e Iesu,
Nou makou e lilo loa.
Lilo me ka oli pu,
Lilo nou, lilo nou,
Lilo me ka oli pu.
WAIKOLOA.
HE BARELA HOONAUKIUKI.
Ua hui na keikikane a kekahi elemakule mahiai me ka Ahahui Hoole Waiona. Ua hauoli no ka makua no ia mea, aole nae maopopo iaia ka pono o kona hui ana me lakou. Ua kupono no na kanaka ui, wahi ana.
He barela rama i malamaia ma ke keena malalo o ka hale. Hoomaopopo iho na keiki ua pilikia malaila, aole wahi e ku ai. Ua hooia ma ke keena malama waiwai; piha ua keena nei me ka olona hana lilina, a me ka huita hou, aole koe kau wahi no ia pahu. Nee hou ia ua pahu nei i ke keena moe. Pilikia ka hana ana i keia rama hohono, a hoole like ia ka waiho ana malaila. I ka hale waiho kulina ka haliia ana; eia ka, ua nui ke kulina oia hooili ana, a ua kipaku koke ia ka pahu mai ia wahi aku.
Noonoo iho la ka elemakule, heaha la ka pono no keia pahu hoonaukiuki? Aole he mai lele keia ma kuu ike ana; aka, ua makau kanaka, me he mea la he mai puupuu liilii keia. O ka pono e hana, i ole ikeia a i ole honiia paha.
I kekahi la kahea oia ia Pika e kokua iaia i ka huki ana i keia barela iluna, iloko o kahi waiho mauu maloo. "E hana no na keiki me ka lakou i manao ai ma keia mea, aole nae maopopo ia'u ka pono," wahi ana. Kokua no o Pika iaia i ka hoihoi ana i ka barela ma kona wahi hou. "Keia pahu hoonaukiuki!" wahi a ka elemakule. Aole ekemu o Pika.
Ina ua ono ka puu o kahi kanaka mahiai nei i ke kiaha rama, o ka hele no ia i ka hale waiho mauu, pii aku ma ke alapii, a haha iwaena o ka mauu i loaa; no ka mea aole i hiki i na keiki e kokua iaia, no ko lakou hoohiki, "aole lalau, aole hoao, aole hoopa aku;" aole no hoi e noi ana kela ia lakou e kokua iaia; aole loa oia e i aku i kekahi e kii nona.
Ua maa no ia i ka hele ana ma ia wahi i ka wa aole kanaka malaila e ike mai ana, aka i kekahi la, lohe oia i ka nakeke ana o kekahi e hookokoke mai ana, pakika kona wawae, a haule ia, a moku kona wawae.
Elua mahina ka hoopaahaoia ana o keia kanaka ma kona hale e kona wawae. Malama maikai na keiki iaia i kona wa pilikia. A ola kupono, ua hele oia e makaikai ma kona hale waiho mauu. E Pika, wahi ana, ua maopopo lea ia'u i keia wa ka pono o ka haole waiona; ke ike lea nei au, no ka mea ua oi ka makaukau e noonoo i keia wa, i ko na makahiki he kanaha i hala ae nei; a ina ua hiki ia'u e ola i na malama elua me ka inu ole i ka rama, e hiki no e ola i na makahiki elua me ka inu ole, a i ka hopena o kuu ola no hoi.
Hauoli na keiki i ka lohe ana i keia manao, wawahi lakou i ka pahu hoonaukiuki, a puhiia i ke ahi, no ka hiki ole ke holoi a maemae, mau no ka hohono o ka rama. I ka pii lapalapa uli o ka pahu rama, hui lakou me ke mele ana i kekahi himeni hoole waiona.
O ka hooko pololei i kekahi hana ka mea e hoakeaia'i ke ala e hana pololei ma na mea e. Hoomaka keia elemakule e hele i ka halawai me kana mau keikikane, a ua lilo i ohana Karistiano, e malama ana i na kanawai a ke Akua. E hele oukou a hoohalike me ia.
KO WILI MANU LIILII.
O Wili Wilikini he keiki na John Wilikini, he amala e noho ana ma kekahi kaona o Amerika. He kanaka pono ua amala la, a luli ole kona ano maikai e like me ke kua hana hao. Ua ao pono oia ia Wili ma na mea pono. A ua hooikaika nui oia e ao pono iaia ma ke ano wahahee ole, i ole hoi oia e lawe wale i ka hai. Ua hoowahawaha loa o Wili i ka wahahee, a me ka aihue, a ua hilinai kona makuakane iaia no kona malama pono ana. Aka mai pilikia oia i kekahi wa.
Ua paa o John i ka hana ma kona hale amala; a nolaila ua maa ia i ka hoouna ana ia Wili i ka hale leta, a i ka hale kuai paha, e kii i na pepa a me na leta paha, a me na mea ai. I keia wa ua kii aku o Wili i kekahi puolo ma ka hale kuai. I kona hiki ana aku ilaila e wehe ana ke kalepa i kekahi mau pahu alani, a e wae ana i na mea maikai e waiho aku ma kekahi papa maluna, ma kahi e kau maikai ai.
Ua makaukau ko Wili puolo, a ua ane hoomaka kona hoi ana, komo mai ka makemake i kekahi alani; aole nae he kala e kuai ai. Ono loa iho la ka puu o ua o Wili nei i ka alani. Huli ae ke kalepa ma kahi e, a lalau koke o ua o Wili nei i kekahi alani, a holo aku. Aka i kona holo anu kaumaha iho la ua alani la, a kaumaha pu iho no hoi kona naau.
Ke lawe nei na keiki a pau i kekahi wahi manu liilii ma ko lakou mau poli. Hoomaka mai la ko Wili wahi manu liilii e kamailio mai iaia, penei: "Heaha kela ma kou pakeke?" wahi a ua manu liilii la.
Ku malie iho la o Wili, a pane, "Ka, he alani no hoi."
"Nohea mai ua alani nei?" wahi a ka manu liilii.
"No ka hale kuai mai," wahi a Wili.
"Ua kuai pono mai anei oe?" wahi a ua manu hoonaukiuki nei.
Me he mea wela ua wahi alani nei iloko o kona pakeke. "Aole, aole no au i kuai," a uwe iho la o ua o Wili nei i ka pilikia.
"Mai uwe, mai uwe, aka e hookanaka, a e hoihoi aku i ka alani," wahi a ka manu liilii.
"Pela au e hana ai," wahi a ke keiki, a huli ae, holo aku la ia me ka mama loa, a hoihoi aku la i ka alani i ka mea nona ka hale kuai, me ka olelo, "E Mr. Benesona e, ua aihue au i keia alani mai kahi waiho alani, he hapalua hora mamua ae nei, aole nae hiki ia'u ke paa, aole loa hiki, a ua hoihoi mai nei au. Aole loa au e aihue hou. E kala mai paha oe i kuu hewa?"
Kahaha iho la ke kalepa, no ka mea ua mahalo ia i ka wiwo ole o ua wahi keiki nei, a pane aku la, "E kuu pokii, aole au e kala wale aku no, aka e haawi pu aku ia oe i hookahi kakini alani, no ka mea aole oe i makau i ka i hoolohe ana i kou luna-ike-hala i kou wa i hoaoia."
Hoi aku la o Wili me ka olioli, me ka manao paa hoi, aole oia e lawe hou i ka hai waiwai. Oia no kona aihue mua ana, a oia no hoi kona aihue hope ana.
E na pokii, ina i hoowalewaleia oukou e hana i ka mea hewa, u'oki a hoolohe i ka paipai ana mai o ka manu liilii, oia hoi ka luna-ike-hala, ma ko oukou mau umauma, i lanakila oukou e like me Wili Wilikini. E.
KA HOOMALOKA.
Ua kapaia ka hoomaloka ka makuahine o na hewa a pau; no ka mea, nana i hooulu i na hewa e ae a pau. O ka hoomaloka, he mea hoopaakiki i ka naau, 2 Na Lii 17:14; he mea hookulanalana i ka naau, Isaia 7:9; he mea hoole i na elele o ke Akua, Matt. 21:32; he mea keakea i ka hana a ka olelo a ke Akua, Hebera 4:2; he mea hoole i na hana mana, Ioane 7:27; he mea e huhu ai ka naau i ka oiaio, Oihana 17:5; he mea e pono ole ai ka pule, Roma 11:4 ; he mea e oluolu ole ai ke Akua, Hebera 11:6. O ka poe hoomaloka, aole lakou he poe kanaka no Kristo, Ioane 10:26 ; aia lakou malalo o Satana, 2 Korineto 4:4; aohe mea maemae iloko o lakou, Tito 1:15. O ka manaoio, he lima ia e puliki ana a paa. O ka hoomaloka, e pale ana ia i ka mea e ola ai.
E MALAMA PONO!
"E na pokii, e malama pono i ko oukou mau alelo, i ole oukou e wahahee, i ole oukou e olelo huhu aku, i ole puka aku na olelo haukae mai ko oukou mau waha aku.
"E malama pono i ko oukou inoa maikai i na manawa a pau; no ka mea ua oi aku kona waiwai i ke gula, a i na mea hanohano a pau.
"E malama pono i ka oiaio maoli; no ka mea ua oi aku ka waiwai o ka naau maemae mamua o na momi.
"E malama pono i wela ole ko oukou mau naau i ka huhu i ka wa a hai e hoopilikia mai ai ia oukou;" no ka mea, wahi a Solomona, "maikai ke ahonui mamua o ka ikaika, a o ka mea hoomalu i kona uhane mamua o ka mea hoopio i ke kulanakauhale."
KE ALAULA.
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.
25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
A. O. POLEPE, Luna Hoopuka.