Ke Alaula, Volume VI, Number 2, 1 May 1871 — Page 5

KE ALAULA.
BUKE VI. HONOLULU, MEI, 1871. HELU 2.

KE KANAKA NAAUAO.

                Eia ua kanaka la, aole no i aoia ma na kula naauao. Eia nae ua lilo oia i kanaka kaulana no ka ike. Ilihune kona makua, aole hiki ke hoouna iaia i ke kula. O ka hana wale no ka mea i loaa i ua keiki nei i kona wa opiopio. Ua hana pu oia me kona makua a makaukau pono ma kona oihana, oia hoi ka hana ana i na mea tini, hau, piula, a pela aku. Paa mau i ka hana, no ka mea, o kona ola no ia. Aka ua komohia loa ua keiki nei i ka iini e loaa ka naauao. Pehea la e hiki ai? Aohe manawa kaawale e kula ai, aole dala e uku aku ai. Nolaila, kuai aku la ua wahi keiki nei i ka buke, a lilo ua buke nei i hoahele, hoa noho, a hoakuka nona ma na wahi a pau. I ka wa hana, waihoia ka buke ma kahi e ike aku ai ka maka, a o kona wa kula no ia. Pela no i hooikaika mau ai me ka hoomanawanui, a mahope ua kaulana loa kona inoa no ka ike.

KA HAPALUA MANAWALEA.

                He wahi keiki o Kale nona na makahiki he umi. Haawi mai la kona kupunakane iaia, he hapalua i makana Hapenuia. Hele aku la o Kale i ka halekuai e imi ai i mea kuai no kona hapalua. Iaia e hele ana, e hoomanao ana oia i ka pauku Baibala a kona makuwahine i ao mai ai iaia ia kakahiaka, penei, "O ka mea manawalea aku na ka ilihune, haawi aku oia na Iehova, a o kana mea i haawi ai, na kela no e hoihoi mai iaia."
                Hele aku la o Kale a kokoke i ka halekuai, loaa iaia kekahi wahine ilihune e uwe ana no ka pilikia o kona ohana. Ua pau loa ko lakou ai, a ua pololi loa ua wahi keiki liilii, aole hoi he dala a ua makuwahine nei e kuai aku ai no ka ai. Aloha loa o Kale, a haawi aku la i kona hapalua ia lakou. O kona huli koke no ia, a hoi aku i kona home. A hiki i ka hale, ninau ae la ke kupunakane, "Heaha kau i kuai iho nei me kahi hapalua?"
                "Ua haawi aku wau na ka mea hoihoi mai."
                "He keiki naaupo oe. Aole oe e ike hou i kou hapalua."
                "E loaa hou mai ana no, no ka mea ua haawiia mai ia'u ka bila aie."
                "He mea ole paha ua wahi bila nei. Aia mahea ua bila nei? Hoike mai, i ike au."
                "Eia no hoi iloko o ka Baibala, 'O ka mea manawalea aku na ka ilihune, haawi aku oia ia Iehova, a o kana mea i haawi ai, na kela no e hoihoi mai iaia."
                "Ka, ua haawi wale aku paha oe i ka mea palaualelo. Ole oe e ike hou ana i kou hapalua. A oiai ua nele oe, e haawi hou aku paha wau i hapalua nou."
                "Aia la!" wahi a Kale, "Ua hoihoi hou mai ka Haku i kuu hapalua, e like me ka olelo a ka pauku."

KA MU.

                Nana aku la au i kekahi laau kanu iloko o ke kihapai. He laau maikai, uliuli, a ua ulu ikaika no. Hala aku la kekahi mau la, nana hou aku la wau, aole no i mae na lau, aole i make na lala, aka aole nae i like loa ka hinuhinu o na lau me mamua. Haohao iho la wau. Huli iho la wau i ke ano o keia mea. Aole nae i loaa. Ua maemae ka ili o ka laau, a ua maikai hoi na lala. I kekahi la nae, ia'u e nana ana i ka lepo ma ke kumu o ka laau, ike aku la au i na hunalaau makalii loa e paapu ana ma kahi i pili aku ai ka lepo i ke kumulaau. Kulou iho la au, a haka pono aku la, loaa iau kekahi mau puka makalii i wiliia iloko o ke kumu. Eia ka! he mu ko ua laau nei. Maopopo koke ke kumu o kona pilikia. Noonoo iho la au, aole o ka laau wale no ka i loaa i ka mu. O kanaka no kekahi. Ua nui na hewa makalii, i ike ole ia, a manao ole ia paha, aka ke nalinali nei lakou a pukapuka ka uhane. He mea uuku loa ka hoomaka ana, he make nae ka hope.

                E hele pu ana kekahi kaikamahine uuku me kona makuwahine i kekahi po. Nana aku la ua wahi kaikamahine nei iluna a ike iho la i na hoku, ninau aku la i ka makuwahine, "E mama e, heaha la kela mau mea alohilohi maluna ma ka lani?" "He mau hoku," wahi a ka makuwahine. "Ea?" wahi a ke kaikamahine. "I kuhi hoi au he mau puka liilii i wiliia i mea e puka mai ai ka nani ilalo nei."

                "O ka mea noi ma ko'u inoa, o wau no e hana."