Ke Alaula, Volume VI, Number 2, 1 May 1871 — Page 7

KE A LA ULA. 7

NA KAMAA BUTI HOU.

                Aia la! Loaa na kamaa buti a Wili! "E mama e! nana mai oe i kuu kamaa buti nani! kanaka nui wau." Pela iho ka olelo a ua wahi Wili nei. No ka mea, ua hele pu oia me kona makuakane i ka halekuai, a ua kuai ua makua nei ona i na kamaa buti maikai nona. Hookano loa o ua o Wili nei. Hoi aku i ka hale, hoikeike aku kona mau buti i na mea a pau. Ma ke alanui halawai aku oia me kona mau hoa kula, me Keoni a me Hale, aole nae he ike aku. Haaheo ka maka, kapukapu ka hele ana. Kani ka ui ui o na buti i ka ua mea la he hele heahea ma ke alanui, "Nana mai, nana mai! nani ea, nani ea!"; pela ka leo kahea o ka ui ui ana o na buti. A hoi aku i ka hale, kulikuli na pepeiao i ka walaau o na buti a ua wahi Wili nei i ka holoholo io ianei, me ka hehi ino. O ka holoholo no ia maloko o ka hale a mawaho o ka lanai, ku mai ana na keiki ma ke alanui mawaho e kiei ana i nei mea hou. Aole i ike o Wili i ke poo o ke kui ma ka papa hele o ka lanai, ku aku la kahi buti i ua kui nei, palaha pu ana o Wili, kani mai la ka aka o kona mau hoa. Pela hoi ka olelo o ka mea ike:
                "Mamua o ka hina ana, ka haaheo,
                A mamua o ka haule ana, ka naau kiekie."

KA AINA APIKIPIKI—HE OLELO NANE.

                "E Keoni! e hoi mai a hooponopono kau mau buke," wahi a kona makuahine.
                "Keoni e! eia kou mau kamaa i loaa mai nei ia'u ma na alapii," wahi a koma kaikuahine.
                I mai ka makuakane iaia, "Keoni ua minamina au i ka ike ana i kou ano, he keiki kapulu."
                A pae hou mai la ka leo ma kona pepeiao; o kona kupunawahine e i mai ana iaia penei: "Ahea la paanaau ia oe keia olelo, 'he wahi no na mea a pau, a o kela mea keia mea ma kona wahi ponoi.'"
                Aole ekemu o Keoni, a me ka huhu ua haalele i ka hale, a ua hele i kae o ka muliwai e noho ai, a pai kona wawae iloko o ka lepo. "Eia ka'u i makemake ai," wahi ana "e hele ma kahi lohe ole ia keia olelo, 'he wahi no na mea a pau.'"
                Ia wa ike oia i kona huinahelu kahiko i haalele pinepine ia ma o a maanei, aole loaa iki ia ma kona wahi,—e hele mai ana ma ke alanui. Kahaha nui i ka ike ana, a maka'u iki no hoi, aka ua o aku o Keoni iaia, me ka i ana, "e hele ana oe ihea?"
                Pane ae la ka Huinahelu, "Ke manao nei au, ua lawa keia, ua paupauaho loa wau i ka ohumu pinepine ana o kela a me keia mea no kaua. E hele ana au i ka aina Apikipiki kahi e noho huikau o kanaka, a e waiho wale ana na mea a pau, hoolei ia i o a ia nei e like me ka manao o kaka; aole no i pinepine ana kekahi i kona hoa e hooponopono i kona mau mea."
                "Oia paha kahi kupono loa no'u," wahi a Keoni. "E hele pu kaua ilaila."
                Hele pu oia me ka Huinahelu i ka aina Apikipiki. Kahaha paha na makamaka o Keoni i kona hele ana me kana Huinahelu—oiai aole he mau hoa aloha paa loa laua. Meia no ka naue malie ana a loaa ka weuweu e ulu ana me na aa iluna. "Eia paha kahi a kaua i manao ai," wahi a ka Huinahelu. "Ea, e nana i ka mau'u a me kela laau kukui! ha! ha! ha!" "Heaha la kau e akaaka nei," wahi a ka laau kukui. "Ia oe, no hoi. Ano e loa ka oe, me kekahi o na lala ma kahi o na aa; a o na aa, aia maluna loa; o na hua kukui e ulu ana ma ka ili o ke kumu laau, a o ka lau e ulu ana mai loko o kahi lau."
                "Aole maopopo ia'u ke kumu malaila e ku ka aka ou," wahi a ke kumu kukui. "Ma keia aina aole ulu makou mamuli o ke kanawai paa, e like me kou aina hupo, aka e like me ka manao iho. Oia ka mea maikai loa." Aole i kamailio mai o Keoni,--manao nae ia, ina meia ka ulu ana o ka laau kukui mamuli o kona manao iho, aole ia he maikai, a ku i ka mahalo ia no ka nani.
                Naue hou aku laua, a pololi o Keoni. Kipa laua ma ka hale hana palaoa, i mea ono na laua.
                "Mea ono?" wahi a ka mea hana palaoa me ka manao e kii i ka mea i makemake ia; "ae, he mea ono no, eia nae aole loaa ia'u i keia wa," e huli ino ana no hoi ia iwaena o na popo palaoa, a me na berena ko i hoolei huikau ia ma kahi hookahi.
                Ninau o Keoni iaia, "Ka! aole anei he wahi no na mea ono?" "He wahi okoa ka, no lakou!" wahi a ka mea hana palaoa; "ka! he hana nui loa ia; he luhi loa ka hooponopono ana ina he wahi okoa no lakou."
                Ukiuki iho la o Keoni, a haalele ia hale. Ninau oia no kahi e loaa hou i ka mea hana palaoa. Pane ae ka mea i ninau ia, "aole no i maopopo ia'u. E hoololi mau ana makou, e hele ana i o a ia nei; aka, inehinei e noho ana ka baker ma ka huiana o ka alanui o Maine."
                Hele aku laua o Keoni me ka Huinahelu e nana ana i na papa kuhikuhi ma na huina alanui, aole i hoomaopopo ia kekahi mea malaila, no ka mea ua huikau loa na hua ma ka pela ana i na inoa alanui.
                "Aole au i makemake iki i keia aina," wahi a Keoni. "Ea! e kau ma ka waapa a hoi i ka home o kaua."
                Ninau laua mahea kahi pae ka waapa. "Aole maopopo," wahi a kekahi. "i kahi manawa ma kauwahi, a i kahi wa ma kahi e."
                "Ina pela, ma ke kaa ahi kaua," wahi a ka Huinahelu. Aole nae maopopo i kekahi no na kaa. He kakaikahi wale no ka holo ana, no ka mea ua poino i ka mea hooholo ka enegine, kahi i haalele ia, a o na kaa ua kau liilii, mai o a o o ke kulanakauhale; a no ka hooponopono ole ia i ka papa manawa i ka wa e hooholo ana na kaa, nolaila ku pinepine kekahi kaa i kekahi; a eia hou he uuku loa ka hele makaikai ana o kanaka ma ka aina Apikipiki no ka mea aole maopopo kahi e ike ia, a e loaa ia paha ka mea i makemake ia. Hiki ole ke hele, a he make hewa no hoi.
                "O dia mi! Ina owau ma kuu home," wahi a Keoni. "Ala ae la ia, a e noho ana ma kapa muliwai e like me mamua."
                Na kakou e koho i ka mea maikai, ina o ka noho ana ma ka aina Apikipiki; a o ka malama ana paha i ka olelo naauao, "he wahi no na mea a pau."

                "No ka mea ua aloha nui mai ke Akua i ko ke ao nei, nolaila, ua haawi mai oia i kana keiki hiwahiwa, i ole e make ka mea i manaoio iaia, aka, e loaa iaia ke ola mau loa."--Ioane 3:16

                "E pale aku i ka diabolo, alaila e holo aku ia mai o oukou aku."—Iak. 4:7.