Ke Alaula, Volume VI, Number 2, 1 May 1871 — Page 8
8 KE ALAULA.
KUU HOME MA KA LANI.
Leo: "MY HOME IN HEAVEN."--Songs of Gladness.
D. C. Pii, pii, i ka ho-me ma ke ao, Na Ie-su la i hoo-ma-kau-kau, E wi-ki e he-------le io Ie-su, I lo-aa ka ho-----me ma ke ao. Ka ho-me, ka ho-me, ka ho-me mau, Ka ho-me mau, ka ho-me mau, ka ho-me mau, ka ho-me mau. D. C. A o-ia no hoi ke A-la-kai, ke o-la, ke a-la e o-la'i, E wi-ki e he-le io Ie-su. Pii, pii i ka ho-me ma ke ao, Na Ie-su i hoo-ma-kau-kau, E wi-ki e he------le io Ie-su, A o-ia no hoi ke A-la-kai, Ke o-la ke a-la e o-la'i.
2. Malaila ka noho alii aiai,
Ke kai aniani olino mai,
A, ku ma ke ala gula no
Ka laau hoola a hua mau,
E wiki e hele io Iesu,
I loaa ka home ma ke ao.
HUI--Ka home, ka home, &c.
3. A pa mai na leo maikai e,
Kakani na lira a oli mai,
Na leo anela hui pu
A mele hooho oli mau.
E wiki e hele io Iesu,
I loaa ka home ma ke ao.
HUI--Ka home, ka home, &c.
4. Ku puni na keiki pono a pau,
A hoonani aku ia Iesu,
"Ia oe ka Makua ke Keiki pu
Ka mana, ka nani a ola mau."
E wiki e hele io Iesu,
I loaa ka home ma ke ao.
HUI--Ka home, ka home, &c.
WAIKOLOA.
KA MALAWAINA.
Ua ike anei oukou ia mea, he malawaina? Malia paha ua ike kekahi poe, a o kekahi poe, aole. Aole no i ike'a na malawaina nui ma ko kakou aina nei. Aia nae ma Farani, a ma Sepania, a ma Potugala, a ma na aina e pili ana i ke Kaiwaenahonua, kahi i kanu nui ia'i na malawaina. He nui ka waiwai o na malawaina o ia mau aina. O na hua i pala, he mea makemake loa ia i mea ai. O na lesini, oia hoi na hua pala i kaulaiia a maloo, he mea kuai nui ia. O ka waina, oia hoi ka wai o na huawaina, oia kekahi; a o ka malakeke, oia hoi ka wai o na huawaina i uwiia, alaila ua bailaia me ke ko, a lilo i mea paa, e like me ka paa o ka waiu bata; he mea makemake nui ia e ai pu me ka berena, a he ono loa no hoi.
He nui loa ka hana ke malama pono ia na malawaina o ia ano. O ka hue ana i na pohaku, ka hoowali ana i ka lepo, ke kanu ana i na kumuwaina, ka waele ana, kiai ana, hookahe ana i ka wai, kukulu ana i na ku, paipai ana i na lala, a me ka pale ana i na enemi, na holoholona liilii, e komo malu ana, e nali i na lala, a e pepehi i na waina opiopio. A hiki i ka malama o Iune, hoomaka ka ohi ana i na hua mua; a mai ia manawa a hiki i Sepatemaba, he wa ohi hua no ia, a kaulai, a kaomi waina, a pela aku. Ia wa, pau pu na kane, na wahine, a me na kamalii i ka hana.
Ke i mai nei ka Haku Iesu, "E hele oe e hana ma kuu pawaina." Ia wai keia olelo? Ia oe no, e ka mea heluhelu, a i na mea a pau, mai na opiopio a i na kahiko. Mahea hoi keia malawaina a ka Haku? O kona Ekalesia no ia ma ke ao nei. A ua nui na lala ana i makemake ai a i aloha ai. He nui hoi ka hana ma keia malawaina no na mea a pau. O na Anela kekahi poe hana ma keia malawaina, e kiai ana i na haipule, oia hoi na lala. O na Kahu Ekalesia kekahi poe paahana iloko o keia mala. He poe kanu lakou, a hookahe i ka wai. Pela no hoi na Luna Ekalesia. A o na Misionari no hoi, e hele ana i na aina Pegana. He poe lakou e huai ana i na pohaku a e hoopalupalu ana i ka lepo a e hoomaikai ana i na wahi apuupuu. A o na Kahu Kula Sabati a me na Kumu, he poe malama i na lau opiopio a me na lala hou i ole e make i ka wela o ka la, a i ke kakani, a i ka naonao, a i ka ponalo; a i ole hoi e haihai a poino i ka makani ino. O na makua kekahi, e malama pono ana i ka lakou mau ohana. A o na keiki no hoi, e hoolohe ana i ka lakou mau makua, a e noho malie ana me ke akahai a me ke aloha. He nui wale na ano hana. He hana ko kela mea keia mea iloko o keia malawaina. He hana ko ke kane, ka wahine; ko ka makua, ke keiki; ko ka elemakalue, ka oo, ka ui, ka opio. He hana ko ka mea waiwai, a me ka mea ilihune; ko ka naauao a me ka hemahema. Aohe mea i makemake i ka hana, e nele ana. E hana kakou no ka Haku.
KA "PUNAWAI" A ME KA "AILA."
I kekahi o ko'u hele kaapuni ana ma Aferika Hema, wahi a kekahi misionari olaila, ua hiki makou i kahi kauhale ma kapa o ka muliwai Alani. He loihi ke ala i hala ia makou, a ua pololi, makewai a maloeloe. No ka makau i na liona, ua manao makou e komo a noho me na kamaaina a ao ia po. Aka i ka ike ana mai o kanaka, huhu mai lakou; aole i ae e komo a noho pu. I ke noi ana i wai, hoole lakou. Haawi au i na pihi i koe o kuu lakeke i uku no kahi waiu uuku, aole nae i ae mai lakou ia nonoi. Manao iho la makou e moe hou ia po me ka pololi a me ka makewai.
Ua napoo ka la a e uhi mai ana ka pouli maluna o ka honua, hookokoke mai la he wahine me kahi wahie ma kona poo a he omole waiu ma kona lima. Me ka ekemu ole, ua haawi mai oia i ka waiu no makou; haalele i ka wahie a ua hele aku. Aole liuliu a hoea hou no ia me ka ipuhao ma kona poo, a e paa ana he uha hipa ma kahi lima, a he wai ma kekahi. Ho-a oia i ahi a kau i ka hipa e kupa.
Ninau pinepine makou, "owai oe?" aole nae ekemu iki. I ka ninauia ana i ke kumu o kona lokomaikai nui i na malihini, kulu na waimaka ma kona papalina eleele, a i mai la ia, "Ua aloha au Iaia, ka mea a oukou e noho kauwa nei, a he hana kupono e haawi au i ke kiaha wai ma kona inoa. Ua piha kuu naau, a hiki ole ia'u ke hai aku i ka olioli launa ole no ka ike ana ia oukou ma keia wahi kuaaina loa."
I ka lohe ana i kona moolelo, a me ka ike ana i kona ano Karistiano, he malamalama hookahi e a ana ma kahi pouli, ninau aku au iaia i ka mea e hiki ai iaia e hoomau i kona noho haipule ana, oiai aole no he noe hoahanau malaila e launa me ia. Unuhi ae la ia i Kauoha Hou kahiko no Holani mai kona poli ae; na kekahi misionari i haawi iaia mamua loa. I mai oia, "Eia ka punawai kahi a'u e inu nei; eia ka aila e a mau ana kuu kukui."
PALAPALA MAI IAPANA MAI.
KE ALAULA:—Aloha oe:—Eia makou ma na aekai o ka mokupuni o Nipona, oia ka mokupuni nui o ka pae aina o Iapana. Haalele makou ia Kapalakiko i ka la mua o Feberuari, a i ka la 26 ku makou ma Yokohama, Iapana nei. Noho iho makou malaila ekolu la, a launa pu me na misionari o Amerika e noho ala malaila. Alaila kau makou maluna o kekahi mokuahi holo pili aina, a holo mai he po alua, a ku mai ma ke awa ku moku o Kobe. Eia o Kobe ma ka aoao hema o Nipona ma ke kowa mawaena o Nipona a me Kiusiu.
Noho pu maua elua pule me ka misioneri o Amerika i hiki mua mai maanei. I keia wa ua hoolimalima maua he hale, a o kahi noho paa paha keia. He 300 paha ka nui o na haole no na aina e mai, e noho nei maanei, aka he poe hoomaloka ka nui o lakou.
Ua hoomaka maua e ao i ka olelo Iapana, a ua loaa kekahi mau huaolelo. Eia kekahi o na huaolelo, o ino he uala kahiki ia; o kome he laiki; o maki he wahie; o tora he moa; o hiru go hau o ka aina awakea ia.
He poe hoomana kii na 'Lii a me na kanaka a pau o keia aina. He kauna hookahi paha o na kanaka i huli mamuli o ke ao ana o na misionari o Amerika, e hoolohe a hoomana ia Iehova. He iwakalua paha miliona a oi aku paha ka nui huina pau o na kanaka o keia aina.
Elua ano hoomana kii ma keia aina. O ka mua oia ka hoomana Buda. Ua hoolaha ia mai keia ano hoomana mai Inia, a hiki loa mai i Iapana nei. O ka lua o na ano hoomana ua kapa ia ka hoomana Sinetu. Ua kukulu ia na luakini no keia mau hoomana elua, ma na wahi anoano o na puu, ma na awawa maikai a ma na ululaau malumalu.
O. H. KULIKA.
O ka mea kuha aku i ka makani, e kuha ana oia i kona maka iho. Pela hoi ka mea hoopaapaa me ke kanaka nuku wale.