Ke Alaula, Volume VI, Number 3, 1 June 1871 — Page 10

10 KE ALAULA.

KE ALAULA,
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.

                25 keneta ka uku no ka makahiki no ka pepa hookahi, 20 keneta pakahi ka uku no na pepah he iwakalua a oi aku paha ma ke ope hookahi, ME KA HOOKAA MUA IA MAI.
A. O. POLEPE, Luna Hoopuka.

PALAPALA MAI IAPANA MAI.
[KOENA MAI KELA MAHINA MAI.]

                KE ALAULA—Aloha oe:
                Aia kekahi luakini nani loa no Buda ma kekahi puu mauka aku nei. He 125 anuu o na pohaku i kalai ia a maikai, ma ke alapii e loaa aku ai ke kahua o ka luakini. He kanalima ka nui o na kii pohaku i hoonoho paalua ia a puni ka luakini, maloko o na hale liilii. Elua kii iloko o ka hale, a elua iloko oia hale aku, a elua iloko o ia hale aku, a puni ka luakini nui. O ke kiekie o keia mau kii pohaku, mai ke kapuai hookahi a i na kapuai eha. He mau kii kanaka ka nui, a he kii alopeke kekahi. O kekahi o na kii kanaka ua kalai ia me na lima he umi, e like me na kii o Buda ma Inia. Elua kii laau nunui he umi paha kapuai ke kiekie. Ua olelo ia he mana ko keia mau kii nunui elua. Lawe ke kanaka i ka pepa a nau iho ma ka waha a puupuu iho alaila puhi aku a pili aku ka pepa ma ke kino o ke kii. Alaila ma ka manao naapo o ka poe hoomana, puka mai ka ikaika o ke kii a komo i ke kanaka. Ike aku makou i na pepa i nau ia e pipili ana i keia mau kii nunui elua, me he mai kakio la, mai ke poo a hala aku i na wawae. Oloko o ka luakini he nui na ipukukui keleawe a me na bele liilii, a me na ipu lanahu a me ke kuahu. Ua uhi ia kekahi o keia mau mea keleawe me ka wai gula a nani loa. Aia hoi he mau papa keleawe me na inoa paha o na akua, a me na inoa o na kupuna, a me na pule paha i haku ia, i kakau ia maluna. He maemae loa a nani hoi na kahiko apau o keia luakini Buda. O na kahuna pule e malama ana ma na luakini Buda ua kahi ia ko lakou lauoho a olohelohe ke poo.
                He okoa loa ka lua o na ano hoomana, oia ka hoomana Sinetu (Sintoo). O ka Moi o Iapana oia ka poo oi keia hoomana; a ua kapaia keia Moi ka Mikado, ke keiki a ke Akua, ke keiki a ka Lani.
                Mamua aku nei, kamailio pu na Kuhina o Amerika a me Beretania, me kekahi o na Kuhina o ke aupuni o Iapana, a olelo aku, he pono ke ae ia e aoia kona lahui i ka hoomana Keristiano. Pane mai na Kuhina la o Iapana, o ka Moi o Iapana, ka Mikado, oia ke keiki a ke Akua, nolaila, aole he pono e ao ia ka hoomana Keristiano, no ka mea ma ia hoomana ua olelo ia o Iesu Kristo ke keike a ke Akua. Ina e aeia ka hoomana Keristiano iwaena o ka lahui Iapana, e kue auanei kekahi keiki a ke Akua i kekahi keiki. Aole he pono i elua keiki a ke Akua ma ka aina hookahi, e hakaka auanei laua. Nolaila ua kapu loa ke aoia ana o na Iapana i ka hoomana Keristiano. Makau na kanaka i na 'Lii, a launa ole mai lakou me na misioneri Keristiano.
                Ko ka olelo a Davida ma Halelu elua. Kukakuka iho na 'Lii o ka honua, a o na luna hoi ohumu kue iho lakou i ka Haku a i kana mea i poni ia. Aka he manaolana ko'u aole emo e wehe ia ka ipuka e komo laulaha ka olelo a ke Akua ma keia aina.
                Aia iwaena o ke kulanakauhale o Kobe he ululaau oneanea, a iwaena he luakini no ka hoomana Sinetu, aole he akua kalai ia ma na luakini o keia hoomana, koe wale no ke kii alopeke, he ano lio hihiu. He mau haneri ipukukui nui ma ka pa lukini, he mau ipu pohaku i kalai ia, a he mau ipu keleawe kekahi. Ua malama ia he mau lio keokeo ma na pa luakini Sinetu. Malama mau la keia mau lio keokeo liilii me ka hanai mau ia i na manawa a pau. He mau akua paha keia mau lio; noho paha na uhane iloko o ka lio. Iloko o ka luakini he nui na mea nani keleawe, a me ke gula.
                Nani ke kuihewa o ka poe i lohe ole i ka ke Akua olelo. Aia a loaa ia makou ka olelo o keia aina e ao makou ia lakou no Iehova ke Akua oiaio.
                E aloha nui ia aku ka poe apau o kuu aina hanau e heluhelu nei i ke ALAULA. No lakou au i moe uhane ai i kekahi mau po aku nei i hala. Na'u na O. H. KULIKA.
                Kobe, Iapana, Malaki 18, 1871.

KA BIKELE.

                He nui na ano o keia wahi holoholona liilii. Eia ma Hawaii nei kekahi mau ano. Aia ma na aina haole he nui loa. Eleele kekahi, ulaula kekahi, omaomao kekahi, onionio kekahi, a melemele kekahi. Aia iloko o ka lepo, a malalo o na ahulaau o na ululaau, kahi i noho ai.
                Aia ma Hinedu kekahi ano bikele eleele. He makemake loa keia wahi bikele i na aila momona, e laa ka waiu bata. Ua kakauia ka moolelo no kekahi o keia mau holoholona nana i hoohemo ae i kekahi paahao noloko ae o kekahi halepaahao nui, a ua hoopaaia ua kanaka nei ma kekahi keena maluna loa. Hele malu mai kona makamaka i ka po me ka manao e hoolele aku i ke kaula a hiki aku iluna, i ka puka o ua keena nei, i mea e hookuukuu mai ai ka paahao iaia iho iwaho o ka hale. I hoao aku nae ka hana aole hiki. No ke kiekie loa o ka halepaahao iluna, aole hiki loa aku i kahi e hopuia'i e ka paahao e kiei ana ma ka puka makani. Hoi aku la ua makamaka nei, a loaa kekahi bikele, lawe pu mai me kekahi waiu bata, a me na kaula kupono. A hliki hou i kahi o ka halepaahao a mawaho iho, lawe iho la oia i kekahi lopi humuhumu a nakii ihola i ka piko a paa i ke kino o ka bikele. Alaila hamo iho la oia i kauwahi waiu bata ma ka ihu o ka bikele, a kukuli aku la iaia ma ka paia o ka hale me ka hookupono i kona ihu iluna, e pii pololei aku ai i ka puka o ke keena o ua paahao nei. O ka honi mau no hoi ia o ua bikele nei i ka waiu bata mamua iho, e kuhihewa ana oia aia aku iluna. O kona pii mau aku no ia, e kauo ana i kahi kaula lopi, a hiki loa iluna, lalau mai ka lima o ka paahao, a loaa iaia ka piko o ke kaula. Alaila nakii hou iho la kona makamaka malalo he aho lawaia. Huki aku la ka paahao, a loaa. Pela i hoopii hou ia he kaula nui ae, a loaa ke kaula nui kupono no ka hana i manaoia, pakele ua paahao nei.

KA WAIWAI O KA HANA LIMA.

                He wahine Polani--ke Countess o K. e noho ana ma Parisa. He pine omau ano e kona--mahope o ke aniani a ma kahi pohaku uliuli i hoopuni ia e na pohaku makamae he iwakalua, he mau------. Heaha ka oukou i manao ai? He kii kanaka anei? Aole. He wahi lauoho paha? Aole. Heaha la?
                Aole paha e koho pololei anei oukou, a e hai aku no au; he mau pine maoli eha, i hookekee ia ma ke ano o ka hoku e kau ana ma ia pohaku uliuli. No keaha la kona kau ana i pine ano e loa e like me ia? Eia ka haina.
                O kana kane he alii ma Polani, a ua hahao ia iloko o ka hale paahao no ka manao ia ana he enemi malu ia no ke aupuni. Iloko o kahi lua hohonu, poeleele kahi i hoo ia. Aole malamalama. Aole maopopo iaia ina ua ao, a ina he po paha. Aole mea kamailio pu me ia, no ka mea, ua papa loa ia ka hele ana o kekahi kanaka i o na la; o ke kahu o ka hale paahao, aole no i ae ia e ekemu ia ia.
                Aole no he hana kana, i mea e hooluolu ai ka noho ana ilaila. Hala na la, na hebedoma, na malama, aia no ia iloko o kona luapaahao. Aole lawe ia e hookolokolo ia. Aloha ino ia kanaka i kona popilikia ana. Kaumaha launa ole ia i ka noho ana ilaila. Manao ia e pupule ana paha ia—aole like kona noonoo ana me mamua.
                Ina no he wahi hana lima nona, pomaikai auanei. I kona haha ana i ke kuka i kahi la, loaa iaia eha mau pine. Uwe iho la no kona olioli nui. Kahaha paha oe me ka i ana "eha pine! heaha ka waiwai nui a ia mau pine eha?"
                Lalau oia ia lakou a hoolei ma ka papahele o kona hale paahao. Ma na lima me na kuli kona kolo ana a haha ma o a maanei e huli ana a loaa ia lakou. I ka loaa hou ana, kona hoolei hou no ia a imi hou no. Ina ua komo oe ma kona hale paahao ua ike auanei iaia ma kona mau kuli e haha ana me kona lima ma ka pouli o ke keena i loaa hou i keia mau pine eha ona! Oia wale no kana hana a hala ae na makahiki eono o ka hoopaahao ia ana; ua hookuu ia mai a ae ia e hoi i kona home. I ke kali ana iaia e hookuu e haha wale ana ma ka pouli, e huli ana i keia mau pine.
                I ka haalele ana i ka hale paahao lawe pu no ia i keia mau pine eha—kona mau haku hana o na makahiki eono. O kona mau hoa aloha maikai loa lakou, no ka mea ua hoolako ia ia i wahi hana no kona mau lima. A ua lilo ia mau pine eha i pine omau no kana wahine, a me kona manao ua oi ka waiwai mamua o ke gula. Na lakou i hoopuka mai i kana kane.

                "O ka olelo akahai oia ke pale aku i ka huhu, o ka olelo huhu hoi, oia ke hoala ae i ka inaina."