Ke Alaula, Volume VI, Number 3, 1 June 1871 — Page 12

12 KE ALAULA.

MELE LANAKILA.
Leo: "OUR SONG OF TRIUMPH." Songs of Gladness

Nau-we pu! nau-we pu! Me-le a o-li ha-le-lu; Me-le i ke A-ku-a mau. Me-le i ko-na alo-ha ia'u. Me-le i ko-na mai-kai e; Me-le i ko-na ki-ai mai. Me-le a o-li, me-le a mau; Nau-we pu i ka na-ni ma-o. Nau-we pu! Nau-we pu! Me-le a o-li ha-le-lu.
2 Nauwe pu! nauwe pu!
Mele a oli halelu.
Mele i kana i hai mai,
Kana olelo maikai ae;
Mele i kona make no'u;
Mele i kona ala hou.
HUI--Mele a oli, mele a mau; &c.
3 Nauwe pu! nauwe pu!
Mele a oli halelu.
Mele i kona kii mau ia'u,
E hoopakele i ka po,
Mele i kona koko e,
Koko holoi a maemae.
HUI--Mele a oli, mele a mau; &c.
4 Nauwe pu! nauwe pu!
Mele a oli halelu.
Mele i kuu Ola kuu Iesu--
Mele i kona alii mau--
Mele i kona uwao no'u,
I pii kuu uhane i ke ao.
HUI--Mele a oli, mele a mau; &c.
WAIKOLOA.

AMAHUI KULA SABATI. KA HALAWAI MAKAHIKI ELIMA, MA HONOLULU, IUNE. 1871

                Ua hoomakaia ka wehe mua ana o ka Halawai Makahiki o ka Ahahui Kula Sabati o ka Pae Aina Hawaii, ma ka la 6, ka Poalua mua o Iune o ka M. H, 1871, ma ka rumi halawai o Kawaiahao.
                C. J. Laiana, Peresidena; Z. P. Poli, Kakauolelo. O ka nui o na lala i hiki mai he kanaiwakumamakolu lakou.
                He mea pono ke hoike aku, ekolu la halawai ai keia Aha ma ke ao, a elua hoi ma ka po; ma ka auwina la o ka Poalua, la 6 o Iune, hora 3 a ma ka auwina la Poalima, la 9, hora 3. A elua hoi halawai akea ana imua o ka lehulehu, ma ka Poakolu, Iune 7, hora 7½ ahiahi, ma ka rumi nui o Kawaiahao, a ma ka Poaha, Iune 8, hora 7½ ahiahi, ma Kaumakapili.

Halawai akea ma Kawaiahao.

                Halawai akea ka Aha imua o ka lehulehu ma Kawaiahao. Ua weheia na hana me ka himeni, a me ka Pule a ka Makua, o Rev. T. Koana. Mahope iho, ua wehewehe mai la o Rev. H. Manase, Kahu Ekalesia o Pukaana, ma Kealia, Kona Hema, Hawaii, i kona manao no keia kumumanao:
                "Heaha la na mea e lana'i ka manao o na kamalii e hele mau mai i ke Kula Sabati?"
                Penei kana.
                1. E himeni pinepine.
                2. E hoike aku na kumu i ko lakou ano aloha i ka lakou mau haumana, aolc me ka huhu.
                3. E imi na kuma i na moolelo kupono i na kamalii liilii maloko o ka Baibala, e like me ka moolelo o Iosepa, a pela'ku.
                4. E hoolako ke kula Sabati okoa i na Alaula, a e haawi wale aku i mea heluhelu na lakou.
                5. E hoopokole i ka manawa kula.
                6. E ao aku na kumu i na kamalii liilii i pule pokole.
                Na ka Paresidena o ka Aha i hookui hou mai i keia manao oia ka hiku o na mea e lana'i ka manao o na kamalii.
                7. E hoano hou i na hana i kela Sabati i keia Sabati.
                A i ka pau ana o keia, na Rev. Mr. Tomikina o ka ua kanilehua o Hilo i kokua mai i keia kumumanao. He mau olelo waiwai nui kana i piha i ka momona, aka, ua nele lakou i ka hoike aku, no ka paa ole. Ina paha i haku ia ma ka pepa, ina la ua lilo ia mau olelo ao momona i waiwai no keia Aha. A o Mr. Kealoalii o Waihee, Maui, kekahi i hoike manao i keia po. Maikai ka hana. Lana ka manao o na lala o ka Aha, a hoi aku ka lehulehu me ka olioli a me ka mahalo.

Halawai Akea ma Kaumakapili.

                Ma ka lua o ka po i halawai akea'i keia Aha ma ka luakini o Kaumakapili. He lehulehu na kanaka i hoakoakoa mai. Ua nui hoi na mea i hoike mai i na mea hou o ko lakou mau Kula Sabati, mawaena o na mea haiolelo i keia po. Aole e poina iki ana i ke anaina i na olelo ao a Rev. J. Manuela o Kaneohe, Oahu, a me Rev. Mr. Pilia, ke kahu hou o Kaukeano, Honolulu nei.
                I na la hope i halawai ai keia Aha ma ka Poalima, la 9, a me ka Poaono, la 10 o Iune, ua heluhelu mai na elele o kela kula keia kula i ko lakou mau hoike a me he mea la i ka nana'ku i ka hapanui o na hoike, he mau mea no e lana'i i ko kakou manao i keia oihana Euanelio ma Hawaii nei, ke kokua mai ka Haku nui o ka Malawaina i ka kakou hana.
                E eu, e na koa e, e hoomaka kakou i ka hana o ka makahiki hou me ka lana o ka manao. O ko kakou kokua, ke Akua no ia; ke alihi kaua maikai. E hahai kakou mamuli ona. E hoouka aku, a e hoouka hou aku, mai paupau aho, no ka mea, Owau no me oukou i na manawa a pau, wahi a ke alihikaua. E hoomanawanui oukou me he poe koa maikai la no Iesu Kristo.
                Mai hoopalaleha kakou i ka hana maikai; no ka mea, i ka wa pono e ohi auanei kakou, ke hoonawaliwali ole kakou.

                Elua keiki e paani ana malalo o ka malu o kekahi laau hua. Haule mai la kekahi huua o ua laau nei. Loaa koke i kekahi o laua. Hoopaapaa mai la kona hoa. "Na'u ka hua, no ka mea owau ka i ike i kona haule ana." Hoole aku la keia. "Aole. Na'u ka hua, no ka mea, owau ka i lalau mua." Maalo ae ana kekahi keiki nui, a ninau i ke kumu o ko laua hoopaapaa. Hai aku la laua. I aku la oia, "Na'u e hooponopono iwaena o olua. Haawi mai i ka hua ia'u." Haawi no hoi laua i ka hua iloko o kona lima. Alaila, wawahi ae la oia i ka hua. Haawi ae la i ka hapalua o ka iwi i ke keiki mua me ka olelo iho "O kau keia, no ka mea, o oe ka i ike i kona haule ana." A o ka hapalua o ka iwi i koe, haawi ae la i ka lua o laua me ka olelo, "O kuu keia, no ka mea, o oe ka i lalau mua i ka hua." A o ka io, lawe iho la ia nona iho, me ka olelo "O ka'u keia, no kuu luhi."
                Pela hoi kekahi poe hoopaapaa a hoopii imua o na loio.

KE ANIANI HELU MANAWA.

                He aniani helu manawa keia e kau ana maluna o ka pakaukau, a ke kiei nei kahi wahine i ka holo ana o ka manawa. Ke ike nei oukou i keia aniani, ua wiwi o waenakonu, a ua mohala aku iluna, a ilalo hoi. Ua hoopihaia ko luna i ke one makalii loa, a mawaenakonu he wahi puka uuku. Malaila kahi e puka aku ai ke one a haule aku iloko o ke aniani malalo. Pela ke kahe ana a pau loa ke one iloko o ke aniani lalo. Alaila hoohuliia kela aoao maluna, a kahe hou aku ke one iloko o kela aniani e like me mamua. O kekahi mau aniani o keia ano, he aniani helu hora; no ka mea, hookahi hora ka manawa e pau ai ke kahe ana o ke one mai kekahi aniani a iloko o kekahi. A o kekahi, he aniani helu i ka hapa hora, a i ka minute paha. I ka wa kahiko, oia no ka wati helu manawa o ka hale. A mahope mai ua loaa na wati maoli a kakou e ike nei i keia wa.

                BAKA.--Ua hoolaha ke kahuna ao palapala o ke Aupuni o Farani, he palapala i na kahukula a pau a na kula nui a me na kula liilii, e papa ana i na haumana a pau, aole lakou e puhi i ka baka, aole hoi e nau i ka baka.

                Ma ke alanui o ka poe hewa mai hele oe.
                Mai hele hoi ma ka aoao o ka poe hewa,
                No ka mea, aole o lakou hiamoe, ke hana hewa ole aku.
                Ua lele hoi ka hiamoe ke hoohina ole ia kekahi e lakou. SOLOMONA.

                O ka maka i hoowahawaha i kona makuakane.
                A hoole hoi aole e malama i kona makuawahine.
                E kiko iho ka poe koraka o ka awawa ia mea.
                A e ai iho no ka poe aeto opiopio.
SOLOMONA.