Ke Alaula, Volume VI, Number 4, 1 July 1871 — Page 16
16 KE ALAULA.
HELE OLI KULA SABATI.
Leo: "SUNDAY SCHOOL VOLUNTEER SONG."--Fresh Laurels.
Nau-we ae ka-kou, na ho-a ko-a nei, Ha-na no Ie-su, a pai-o po-lo-lei; E hoo-kani ae i ko-na ma-na e, Ha-na mau a hea Iesu. A-la e, A-la e, Me-le ae, me-le ae, O-li pu, o-li pu i ka nau-we a hu-a-kai. Nau-we na po-kii i ke ku-la Sa-ba-ti, Hoo-paa na pau-ku, a me-le pa, ko, li, E hoo-pi-li mau ma-mu-li o ke Lii; Ha-na mau a hea Iesu. Nau-we ae ka-kou, a me-le o-li pu; I ka ai-na ao a wai ka-ka-he mau; Hu-i hu-i mai a nau-we o li pu; Ha-na mau a hea Ie-su.
2. Nauwe ae kakou, eia'e Iesu ke Lii,
Nana e kena mai hoolohe a hahai,
Mai ku a makau ke poi mai na ku e;
Hana mau a hea Iesu
Ala e, ala e, mele ae, mele ae,
Oli pu, oli pu, i ka nauwe huakai,
Hana mau a hea Iesu.
HUI--Ala e, ala e, mele ae, mele ae, &c.
3 Nauwe ae kakou ma ke ala ololi
I ke ola mau ma kahi nani e,
I na pua maikai a luhe ole ae;
Nauwe ae kakou a pii a kikoo mau
I ka lei maikai maluna ma ke ao,
Hana mau a hea Iesu.
HUI--Ala e, ala e, mele ae, mele ae, &c.
WAIKOLOA.
PALAPALA MAI IAPANA MAI.—Helu 3.
KE ALAULA; Aloha oe:
I ke ku ana mai o ka moku lawe leta loaa mai ia'u na helu elua o ke Alaula, ko Ianuari a me ko Feberuari. He mea e hauoli ai kuu naau i ka loaa ana mai i keia mau elele eheu mama i lele mai maluna ae o na ale loloa o ka moana Pakipika a hiki mai i kuu home nei ma na ae kai o Asia. Ko ka olelo a Solomona 25:25, "O ka wai huihui i ka mea makewai la, oia ka olelo hooluolu mai ka aina loihi e mai."
No ka Olelo Iapana.
O ka maua hana nui e noho nei, oia no ke ao i ka olelo o ka aina; a ke hoomaka nei e loaa. He mau huaolelo uuku ua like ka pane ana me kekahi mau huaolelo Hawaii, aka ua okoa ke ano ma ka unuhi ana. Eia kekahi oia mau huaolelo. Hai aku; eia ke ano; e wiki oe. Kani, he bele, he mea hookani. Hookano, he mea e. Hito, he kanaka ia. Hookano hito, he kanaka e ia. O ka ilio ua kapaia he ino. O ka moa ua kapaia he tori. O ka uwala ua kapaia he imo.
Ua unuhiia ka euanelio a Ioane iloko o ka olelo Iapana e kekahi misiona i i hiki mua mai i keia aina, a ke ao nei maua i ka heluhelu ma ka mokuna akahi. Pauku 1. "I kinohi ka Logou, me ke Akua ka Logou, a o ke Akua no ka Logou." Penei ma ka olelo Iapana: "Hajime ni Michi wa ari, Michi wa Kami to tomo ni ari, Michi wa Kami nari." O kami, oia ka huaolelo no ke Akua. Ma ke kakau ana nae a na Iapana, he mau huaolelo ano e nae ke kakau iho--me ka awili pu i na hua Pake. He lahui ao nui keia i ka heluhelu. O ka hapa nui paha o na kanaka ua ike i ka heluhelu.
No na mea ai.
I keia wa ua piha ka aina mahiai i ka huita, a me ka hua mea hana aila, he hua makalii e like me ka hua makeke. Hookahi malama i koe, a oo ka palaoa, alaila e kanu ia ka laiki. Oia ka ai nui a ka lehulehu. Loaa hoi ia makou na uala kahiki, ka uwala maoli, na pi, (peas) na pine, na hua alani. He okoa nae ko nei mau alani, aole he nui a momona e like me ko Hawaii, he liilii a mananalo.
He mau ano hua o na aina anu kekahi he piki, (peach) he pea, a me ke kele, (cherry.) O ka maia, ka niu, ke kuawa, ka hala, ka piku, a me ka manago, ua nele loa ma keia aina.
Eia kekahi mea ano e i ai ia ma keia aina. O ka ohe nunui, ka ohe hawai a kakou la, he nui ia ma keia aina. I ka wa i hoomaka ae ai ka opuu ana ae o na ohe hou, e like me na pohuli maia, laweia lakou he mea ai. Bailaia ma ka ipuhao, a he mea ono no keia mau pohuli ohe i ka hoao ana iho.
No ka malama Keiki ana.
He lahui aloha a menemene hoi keia i na keiki a lakou. Ua malama pono ia na keiki a ka poe kuonoono. I ka wa liilii, ewalu la mai ka hanau ana mai, ua kahiia ke poo o ke keiki a nemonemo ka puniu. O kekahi poe waiho lakou i ke kauwahi lauoho o ke keiki ma hai o ke poo a puni. He mea mau ke kahi ana oluna o ke poo a hiki i ka wa e elemakule ai ke kanaka. I ka wa i hoomaka ai ke keiki e hele, hookomoia na kamaa. O na kamaa o ka Iapana no lalo wale no o ka wawae, a ua hoopaaia me na kaula i hoopii ia ma ke kowa o ka manamana nui. O na kamaa no ka wa malie he mauu i ulanaia a maikai. I ka wa ua a kelekele hookomo lakou i na kamaa laau i hoopili ia mai malalo o ka wawae me na kaula. I ka wa e komo aku ai i ka hale weheia na kamaa.
No ka poe nonoi.
Ma na kulanakauhale nui, he poe ilihune makilo a nonoi dala. Ua aahuia lakou me na welu pelapela, a i ka nana aku pilikia kekahi o lakou i ka pololi. Nonoi mai lakou me ka leo haahaa me ke kulou ilalo, "i wahi keneta na'u." Ma na luakini hoomanamana kahi e loaa nui aku ai keia poe makilo nonoi dala. He mea e ehaeha ai ka naau ka ike ana i ko lakou pilikia. He mea i ike ole ia kela ma Hawaii, ka make ana o kekahi poe i ka pololi.
No ka mahiai ana.
He lahui makaukau loa keia i ka mahiai. Ua piha loa na aina o kahakai nei i na mea kanu. O na pali, a me ka wahi panoa loa oia na wahi i koe i mahi ole ia. Aole i palauia ka aina, me na ho wale no ka mahiai ana. Malama loa ia na mahina ai aole i waihoia i ka nahelehele. Makaala loa lakou me na ho e waele i ka nahelehele i ka wa e hoomaka ae e ulu mai. Malama loa lakou e kipulu i ka aina, e hoomomona ai i ka lepo i mea e hoohua nui mai ai.
O ka lepo kanaka, lepo bipi, lepo lio, ka opala mauu, malama loa ia a kau maluna o ka aina mahiai i mea e momona ai ka lepo. I keia malama o mei nei, uliuli a nani loa na kihapai a pau mai o a o. Ua loloa ka huita, ua opuu iho ka palaoa, ua pua mai na pua melemele o ka hua aila, ua hoomaka iho ka ulu ana o ka laiki pulapula i lulu paapu ia i mea e kanu aku ai ma na loi laiki. Eia kekahi mea a'u i ike ai no ke kanu laiki. Kakau iho ka mea mahi laiki he pule i ke Akua o ka poe mahiai, owili ia keia pule ma kekahi laau liilii a hou ia ka laau iloko o ka loi kahi i luluia ka hua laiki, a waihoia keia pule malaila a ulu ae ka laiki. Ua like keia hana a na Iapana hoomanakii me ka'u i heluhelu ai ma ka Moolelo Hawaii; no ka pule hoomanamana a ka poe lawaia, a me ka poe mahiai i ka wa kahiko ma ko kakou aina o Hawaii. Aloha wale ka naaupo o ka poe i ike ole i ke Akua oiaio.
No na Kahawai a me na Kiowai.
Ua ike keia lahui i ka waiwai nui o ka wai; a ua malama loa ia ka wai. Hanaia na kiowai nui mauka, a ma na kahawai. Ua hanaia keia mau kiowai i na kau i hala me ka luhi nui. Elieli ia na auwai ma na aoao pali kahi e hookahe ai ka wai. I ka wa ua, hoopihaia na kiowai a pau e lawa ai ka wai no na loi laiki i ka wa la. He mau eka ka palahalaha o kekahi o keia mau kiowai. Aole e nele ka hua p ka aina i ka nui o ka wai i hoahuia no ka wa la.
Me ke aloha, na'u na
O. H. KULIKA.
Kolee, Iapana, Mei 18, I871.