Ke Alaula, Volume VI, Number 5, 1 August 1871 — Page 17

KE ALAULA.
BUKE VI. HONOLULU, AUGATE, 1871. HELU 5.

O LILIA OHUMU.

                Hele mai oe e Rahela liilii, na'u paha oe e malama, wahi a Lilia, aka, aole o'u makemake e hele pu oe, he keiki liilii oe a uwe wale, a hoololohi, a hina pinepine, a pilikia au ia oe. Puka hope paha au i ka hoike, a pau e kekahi mau hana, mau mele maikai, mau hana hoolealea, hoohauoli, a minamina au no ka iko ole. E noho paha oe me ka makuahine e hoolealea iaia ma kou paani ana.
                Kahaha! e Lilia, aole anei oe he keiki liilii mamua, a makemake e hele pu me a'u i na hoike, i na ahaaina kula, a i uka i ka ululaau e ohi i na pua nani i mea lei no kou poo? A ua hoole anei au, a hoonoho ia oe ma ka hale me ka ilio, a popoki, a moa, a puaa liilii paha? Aole paha; ua hele pu no kaua, me ka waiho wale aku no i ka hale me na holoholona.
                Ae, ae, ua hoomana oau i kehahi manawa, wahi a Lilia, a hoi mai kaua ua pau ka poi, ke kalo, ka uala, ka io bipi maloo, i ka puaa, i ka moa, i ka popoki, a ua aihueia ke ko e kekahi keiki kolohe. A ua huhu loa oe ia'u no ke noi ikaika e hele pu me oe i ka hoike.
                U'oki, u'oki e Lilia. Mai pakike mai oe i kou makuahine, he kaikamahine liilii no o Rahela, aka e hiki no iaia ke hele i ka hoike, a lealea no oia i ka ike i na hana hoolealea, a lohe i na mele maikai a ka Haku Mele Hawai i haku ai no ka hoike. E hele pu oia me oe, a e malama pono oe iaia i ole e hoehaia, a nalowale aku paha.
                Minamina! makau wale ka ko'u makuahine o hina, a eha, a auwana wale o Rahela, wahi a Lilia ia Naki, kekahi hoakula e kali ana ma ka puka nona, he keiki nui ka hoi ia a hiki ke malama iaia iho me Lala. Aka, he bebe wale iho no ka keia, a e mau ana kona bebe ana a——
                Alia oe e Lilia, aole make olelo pela no kou kaikaina uuku, ho mai oia ia'u, a na'u no ia e malama pono me ka olioli i ko kaua hele ana i ka hoike, wahi a Naki. Ea e Rahela liilii, e lalau oe i ko'u lima a hele pu kakou.
                Ae, e hele pu oia me oe, a ia oe ka luhi i ka malama ana, aole paha emo e mihi oe i kou ae ana a haalele aku, wahi a Lilia.
                Aole paha au e haalele ana, e paa ana kona lima i ko'u a hiki i ka hale hoike, e hiipoi ana au iaia a hoopili ma ko'u poli, wahi a Naki. He wahi kaikaina ko'u mamua aku nei, nui kuu aloha iaia, ua like kona nui me ko Rahela, paani pu no maua, a holoholo, a pee, a hooho, eia no au loaa ole ea, uuku a huhu aku au iaia i kekahi manawa no kona ninini ana i kuu ipu inika a paumaele kuu lole keokeo, a me kuu pepa kakau. Aka, pau koke ae la ko'u huhu, a aloha, a hiipoi, a aha? loohia oia i ka mai, i ka piva, a wela mai ia, ua lapaau ia no, mahuahua nae ka mia, a hala kekahi mau la, lawe ke Akua iaia nona iho. Kaumaha loa kuu naau, a helelei ka waimaka. Nui kuu aloha i kuu kaikaina liilii, kuu makamae. A ke mau nei kuu aloha ina keiki liilii ke ike aku e like me Rahela liilii nei.