Ke Alaula, Volume VI, Number 8, 1 November 1871 — Page 29
KE ALAULA.
BUKE VI. HONOLULU, NOVEMABA, 1871. HELU 8.
MA RIA ME KONA ENUHE SILIKA.
He keiki maikai o Ma ria, a aohe mea e ae ana i malama a aloha ai, o kona makuwahine mai wale no. A o kona manao nui e kokua iaia me ka hana i na mea e olioli ai oia; a ma kekahi mea, ua hiki iaia ke kokua me ke akamai, oia ka malama i na enuhe kilika.
Ma keia hana i loaa ai ke ola i kekahi poe ilihune o na Vaudoi; ua oi ke kumu kuai o ke kilika i hanaia e keia poe mamua o ko na kilika e ae.
O kekahi enuhe me kona papa kilika, ua nana mau ia e Maria, mai ka manawa i puka mai ai ia mailoko mai o ka hua, kahi moe ai i na malama eono.
O ka nui o kona hale, ua like ia me ke poo o ke pine, a, i ka puka ana iwaho ewalu paa wawae. Molowa ole o Maria i ka hanai mau ana i na lau kilika, i keia enuhe. No kona ai pinepine me ka hoonuu, i ka pau ana o ka malama hookahi ua ai oia i hookahi auneki lau kilika. Ua like ke kaumaha o na lau ana i ai ai me ka pa 60 o ke kaumaha o kona kino ponoi. Ai no a nui ae a hemo ka ili, a pela ia i ai a nui ae a hemo pinepine ae ka ili; a like kona kaumaha me ka pa haneri o ka kaumaha mua. Alaila hoopuka ka enuhe i ka lopi kilika mailoko mai ona a owili ae, a pau na la he umi, ua eono mile ka loihi o ka lopi.
Ka manawa ia e nana pinepine ai, a malama pono ai o Maria, me kona makuwahine, i keia enuhe ma ke ao a ma ka po, i ike koke i ka wa e pau ai ka hana a ka enuhe, no ka mea he pono ma ia manawa e waiho i ka enuhe, ma kahi e kokoke ana i ke ahi i make ia, a hiki ke lawe i ka kilika. Ua maopopo ia Maria, ina hana ole i keia hana, lilo kela enuhe i mu, a i ka wa e lele aku ai e moku ka popo lopi, a lilo ke kilika i mea ole.
Olelo ka makuwahine ia Maria i kekahi po, e hele oe e hiamoe, a e noho au a e kiai i na enuhe kilika. Aka, ike keia keiki aloha ua oopa kona mama. Nolaila, olelo oia i kona mama e hele oe e hiamoe mamua, a na'u e kiai i na popo.
E Maria, mai pani iki oe i kou mau maka a ala wau, aka e lawe oe i kekahi buke kahiko, a e hoopaa i kekahi mau lalani o kekahi mele kahiko o na keiki Vaudoi i hoopaa a mele ai ma na awawa a pau, a he mea keia e paa ai ka oiaio o ka olelo a ke Akua maloko o ko lakou ekalesia a hala na makahiki he nui wale, i ka wa i haalele ai ka nui a huli ma ka hoomana Roma.
Eia na lalani i haawiia ia Maria e hoopaa:
"Paulele i ka Moi lani
I hiki i kona hale nani;
Paulele ole, aole e hele
I kela home hemolele."
Olelo oia, e hana ana no au e like me ke kauoha, a i kona manao e hana ana no. Aka, eha na lihilihi o kona mau maka, a ano pio ke kukui, a manao oia e hiki iaia ke hoomoe i kona poo iloko, a kiai i ka popo kilika.
Noonoo nui oia i na lalani i paa naau, a hoomanao i ka mino aka ole ma ka maka lenalena o kona makuakane i ka po i make ai oia i ka wa i hai aku ai kana wahine i keia mau lalani iaia. Alaila nana o Maria i na hoailona ma ka aoao mua o kela buke kahiko, a hiamoe ihola no.
Ae, ua hiamoe, a ala ae la oia i ke kani ana o ka mu (he enuhe ia mamua), e lele ana noloko o kona popo, a e owili kilika ana ma ka hale.
Ua poho ke kilika, ala ae la kona mama, i ka lohe ana i kona uwe kaumaha. Ua maopopo ia Maria ka nui o kona hewa. Uwe oia ma kahi moe o kona mama, me ka manao aole hiki iaia ke hilinai iaia iho.
O ke keiki maikai a hana hewa e like me keia hana, ua loaa iaia kekahi haawina aole e nalowale hou.
Hoopaa o Maria ma kela ano keia ano hana. Aole makemake e hiamoe i ka manawa kupono e kiai.
Ina elua tausani me eiwa haneri enuhe kilika alaiia lawa ka lakou hana no ka pauna kilika hookahi. Aka ina hana na lanalana i ka punawelewele iwakaluakumamahiku tausani lanalana i lawa no ka pauna punawelewele hookahi.
F. M.
"Manomano no na mea
A Iehova i hana'i."