Ke Alaula, Volume VI, Number 8, 1 November 1871 — Page 32
KE ALAULA. 32
HE HONI NO KE KUIIA.
Leo: "A KISS FOR A BLOW."--Silver Song.
He a-ha ke ku-mu e po-mai-kai ai? A pau ka hu-hu me ka e-ne-mi mai? Ka ru-la i po-no ke hoo-paa ia ae, E pai no ke i-no i ho-ni mai-kai. I ho---ni mai-kai---I ho----ni mai-kai---Ma ka nau-we ana 'e ma o a maa-nei, E pai no he i-no i ho-ni mai-kai. I ho-ni mai-kai, I ho-ni mai-kai E pai no ke i-no i ho-ni mai-kai.
2 Mai mua mai no, mai ka wa kamalii,
A ui a oo ma ke ao e nauwe nei,
Ka mea hoolaulea a laulea mai,
Ke pai no ke ino i honi mai kai.
HUI--I honi maikai &c.
3 A kui na hoa, a kulaina mai,
A nou ka pohaku a ka i ka lae,
Aloha kakou a e hoomanao ae,
E pai no ke ino i honi maikai.
HUI--I honi maikai, &c.
4 A aa mal lakou la e hoohakaka,
A hoopuka mai i na hua paapaa,
E hoomaikai aku, mai aa e hoopai,
E pai no ke ino i honi maikai.
HUI--I honi maikai, &c.
5 A hoomaauia a hoopaaia'e,
A hao wale ia a pau ka waiwai,
Hoohalike me Iesu i pepehiia'e,
E pai no ke ino i honi maikai.
HUI--I honi maikai, &c.
HE POWA AIHUE EHIKU DALA.
He kanaka e hele ana i kahi e hele ai. Halawai oia ma ka ululaau me kekahi powa. "E haawi mai oe i kau mau dala," wahi ana, "a i ole e kipu au ia oe."
"Malia paha ua hemahema, ua nele keia powa, ua pilikia loa paha, nolaila paha kona hooweliweli ikaika mai ia'u;" pela ka nalu ana o ua kanaka hele nei, a olelo oia i ka powa, me ke aloha, "eia na dala eono e lawe oe, a na ke Akua oe e hoopomaikai, aloha."
"Alia, alia," wahi a ka powa, "ike au hookahi dala i koe ia oe, homai ia dala ia'u."
"Kainoa e oluolu mai ana oe, ehiku wale no o'u mau dala, ua haawi aku au i eono ia oe, a koe ka hiku ia'u i mea e pono ai au ma kuu hele ana."
"Aole, aole, homai ke dala ehiku ia'u, a i ole, e kipu au ia oe."
Heaha kou manao no keia powa? He pookela o kanaka pupuka a pua.
Owai la kona inoa?
O Hehi Sabati. Ua haawi mai ke Akua i eono la nou, no ka hana ana i na mea e pili ana i ke kino. Aole oe i oluolu no na la eono, aole ana, aa no e noi aku i ka hiku o ka la, i ka la Sabati, ko ke Akua la ponoi ana i hoolaa ai nona iho. A no kona ae ole i kou noi ana, lawe wale, powa wale oe i keia la nou iho. Loko ino ea. Nui wale keia poe aihue powa wale, kamalii me na makua kekahi.
E Hie, e hai paanaau mai oe i ke kanawai eha no ka hoomanao i ka la Sabati. Pualu mai oukou a pau.
HAINA O NA NINAU MA OKATOBA.
1, 2, 3.—Nana ma Oihana 9:1, 3, 5.
4, 5.—1 Samuela 3:3, 10.
6, 7.—1 Samuela 3:15, 18.
8, 9.—Puk. 2:6. Puk. 2:2. Heb. 11:23.
10.—Mataio 18:3; 19:13; 21:15, 16.
KE KEIKI KOA.
Owai la ke keiki koa io? O ke keiki aa e kui aku, a kui mai me ka puupuu lima, me ka laau paha ke hana ino ia mai; oia anei ke keiki koa io? Aole paha, he kuhihewa ia. O ke keiki koa io ma ka nana aku, he keiki makau ole ia; he keiki wiwo ole. Eia nae ke keiki koa io, ke keiki akahai, a noho malie; aole make e hakaka me ka mea hana ino mai; ke keiki i malama i kona waha, a hoopuka ole mai i na olelo ino a haumia, oiai e haule ana na olelo ino a na keiki e ae mao a mao; ke keiki e aa e kokua i ka mea palupalu e pale aku i ka mea ikaika; ke keiki i hilahila ole i ka hoike ana i kona aloha i ke Akua, a me kona ku ana iluna no Iesu, oia ke keiki koa io, a kanaka makua e lilo oia i koa ikaika no ka pono.
MALAMA PONO I KOU KEENA.
E Harieta, e malama pono oe i kou keena. Aole o'u keena, huikau makou na makua na keiki ma ke keena hookahi, he wahi paku lole wale iho no ka palena. Pela paha—ua ike au i na hale o oukou, aohe keena kupono i ke keiki hookahi, huikau io no na makua na keiki. Aka he keiki nui oe e Pita, e kii oe i mau pou, e eli i mau lua, e kukulu a paa, a i mau laau hoomoe kekahi, a e noi aku i ka makuakane i lole, i moena paha, i papa paha, a e kokua oia ia oe i ka hana ana i paku kupono; me ka puka komo, a me ka puka aniani liilii i malamalama kou keena. A i papa, i moena paha ma lalo, a i laau moe; hoole oe i ka moe malalo ma ka lepo, me na uku, me na ilio, na popoki, I moe haole ka pono. Ahea ala na makua Hawaii? E pau ka moe ana ma ka lepo.
A paa kou keena e Harieta, e noi aku i ka makuakane i noho, i papa kaukau, i pahu lole, i pahu palapala a papa palapala paha, i mau pine lole, kahi e kau ai ka lole, i pulumi kekahi, i pa holoi, i pika wai a bakeke wai, i kopa, i kawele.
A, e hoomaemae oe i kou keena i kela la keia la, mai molowa oe, ea. E hooponopono i kou mau lole, i kau mau palapala ma ka pahu, ma ka papa paha. Malaila oe e waiho ai i na buke, i ke Alaula, i ka Hae Hoonani, i ole e ekaeka a nahaehae.
E noi aku i ka makua i pepa, i ipu inika, i kila, i hiki ia oe ke palapala aku i kou makamaka. Mai palapala kolohe nae oe, o huhu na makua, a hoole aole kuai hou i mau mea kakau nau. Mai huhu oe a wawahi wale i kou papa pohaku a me kau bola wai, a haehae ino i kou lole. E lilo oe i kaikamahine noho malie a maemae.
E hoopaa i keia pauku himeni:
I like au me Iesu,
Ke kumu maikai e,
Maemae, a hemolele,
Haahaa a akahele
A oluolu mai.
HUI—I like au me Iesu,
I like au me Iesu,
I like au me Iesu,
Ke kumu maikai e.
Aia kona leo ma ka Hae Hoonani aoao 18.
NA NINAU HOU NO NOVEMABA.
1—O wai ke kanaka i paluia kona mau mai hehe e na ilio? Mahea i kakauia'i?
2—He makuwahine i hana i lole komo uuku no kana keiki, owai ka makuwahine? Owai ke keiki? Mahea i kakauia'i?
3—Owai ke keiki punahele a hoaahuia i ke kapa komo onionio? Mahea?
4—He wahine manawalea a hana i na kapa komo he nui wale no na wahinekanemake, owai kona inoa? Mahea i kakauia'i?
5—Owai kai aahu i ke kapa komo o ka lawaia? Mahea i maopopo ai?
6—He mau kanaka pono ekolu i hooleiia iloko o ka imu wela loa, ua wela anei ko lakou kapa? Owai ko lakou mau inoa? Mahea?
7—Heaha ka Iesu olelo ke lawe hewa ia kou kapa komo? Heaha ke ano?
8—Heaha ke ano o ko Iesu kapa komo?
E Hilo, e hoopaa oe i ka pauku ma Ma taio 6:31,
Kealoha e, eia kau mele e hoopaa ai.
He lole nani a aiai,
Pau ole i ka nahaehae,
Mae ole kona wai hooluu,
Ka pono ia o Iesu.
AOLE I LOAA.
Aole pololei ka haina a ke Kula Sa bati o Waipio no ka ninau ma Iulai. He nui wale na holoholona a me na manu i ikeia ma Oihanakahuna, mokuna 11. Aole aha holoholona, a eha manu wale no. E hoao hou oukou. Mai paupauaho, e hoomanawanui, a loaa mai paha.
KE ALAULA,
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.
25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ke ope hookahi; ME KA HOOKAA MUA IA MAI.
L. LAIANA, Luna Hoopuka.