Ke Alaula, Volume VI, Number 9, 1 December 1871 — Page 36
36 KE ALAULA.
HELE HANA.
Leo: "OUR WORK SONG."—Song of Salvation.
Ha-na no Ie-su I ka-he-a mai, Ha-na i o-la no; Hana a ko-a pu Lo-he no ke pu-le ae. Lau-na Ie-su, a a-lu pu, Ki-ai po-no i ku-paa mau. Ha-na a mau i ke-ia wa mai-kai--- E ka Ma-ku-a e hoo-ma-lu mai.----
2 Hana no Iesu, hana aloha no,
Hana a oli pu,
Hana a imi i ka nani mau,
Hana ikaika no.
HUI--Launa Iesu a alu pu,
Kiai pono i kupaa mau;
E ka Makua, e hoomalu mai,
Lohe no ke pule ae.
3 Hana no Iesu, oo ke kihapai,
Hana a ohi no,
Hana na uhane me na lima e,
Hana, kokoke po.
HUI—Launa Iesu a alu pu,
Kiai pono i kupaa mau;
E ka Makua, e hoomalu mai,
Lohe no ke pule ae.
4 Hana no Iesu, ohi mau a pau,
Hana me Iesu pu;
Hana no ka lei nani e ma o,
Hana i ola mau.
HUI—Launa Iesu a alu pu,
Kiai pono i kupaa mau,
E ka Makua, e hoomalu mai,
Lohe no ke pule ae.
ka heluhelu baibala, ka heluhelu Alaula haule ka malama i ka makua, i ke kumu, i ke Akua, haule ke aloha i kekahi i kekah, ia Iesu. A, auwe! U'oki, ua lawa.
4 E mihi ano i kea mau hewa he nui wale, a e noi aku i ke Akua e kala mai, e holoi, e hoopau ma o Iesu Kristo la, a e hoohuli mai ia oukou ma ka pono, i komo oukou iloko o ka makahiki hou me ka mama me ka maikai, me ka hoomaka ma ka la mua e malama pono i ka Haku, a hoomau i ka malama ana a pau ke ola i loaa ke ola o ka uhane ma ka lani.
Nana ma ka pau ana 'ku
O ka makahiki nei,
I ko Iesu ahonui,
Aole wiki e hoopai;
Noi ae, e kala wale
I na hewa o kakou;
Noi e ae e komo aku
I ka makahiki hou.
HE PIELE KOE.
I ka hoi ana o kekahi keonimana i hele e makaikai ma na mauna keokeo, ua ike oia i ke kau ana o kekahi keikikane uuku ma ke kai, e paa ana i ka pahu i piha i ka lepo.
"Heaha iloko o kau pahu?" wahi a ke keonimana. "He koe."
"He koe! a heaha kau e hana nei me lakou?"
"E kuai ana. Elua no ke keneta. Aole loaa i na lawaia ma na mauna, nolaila, pii au ma na awawa e eli a hali mai e kuai i maunu no lakou."
"Pehea kou uku ana no ka holo loihi ana ma ke kaa?"
"Aole au i uku ia, balaki au i na kaamaa buti o ka mea malama kaa."
Pela, he hana e ka! aole o ka piele koe wale no.
"Ae, pela ka loaa ana o kuu ola. He umikumamalima dala ko'u i keia manawa, i loaa mai ma ia hana, a akahi no a hoomakaia ke kau lawaia."
He keiki akamai no. "A o keia wale no anei ka mea au i manao ai e hana?"
"Aole loa. I ka hooilo, hele au i ke kula ma Veremoneta, a lilo elua dala i ka hebedoma no ka ai, a pela aku." "Aole he home kou?" "Aole."
"Aole anei he makuakane?" "Aole no." "Aolo anei he makuwahine kou?"
"Aole. Aole o'u hoahanau. Ia'u no ka imi ana i na pono no'u; a ma keia hope aku e hele ana au i ke kula nui."
"I ke kula nui! Ke kula nui hea?"
"I Ameseta. He kula maikai paha ia?"
"Ae oia kekahi o na kula oi ma keia aina; aole nae e hiki ana oe ilaila."
"E ike aunei oe i ka hiki ana ilaila."
"Maikai kau e ka piele koe. Aole oe e pilikia ana, aole kanalua iki makou nou."
O ke keiki me ka manao paa, me ua keiki nei e loaa no iaia ka naauao. Aole oia hilahila no kona ilihune, aole no hoi hilahila i ka hana.
Mai hilahila i kekahi hana pono; ua oi ka maikai o ka hapawalu i loaa pono mai, mamua o na dala i loaa ma ka hana kolohe ana.
E Pita, eia kau mele e mele ai:
Hana mau, mai hilahila,
Balaki buti, mahi no,
I loaa na hapawalu,
Mea kokua mahina hou.
Mea uku no ke Alaula,
No na palapala e,
No ka hele i ke kula,
I loaa ke akamai.
NA HAINA O NA NINAU BAIBALA NO NOVEMABA.
1—E nana ma Luka 16:19, 31. 2—1 Samuela 2:19. 3—Kinohi 37:3, 32. 4—Oihana 9:39. 5—Ioane 21:7. 6—Daniela 3:21, 27. 7—Mataio 5:40. 8—Ioane 19:23.
E Rebeka, e hoopaanaau i keia pauku mele maikai:
Mai kuamuamu
Na keiki liilii e,
I koonei poe ohule,
Ka poe kahiko nei,
Na elemakule hina,
A me na makapo,
Na luwahine kolo,
E hana maikai no.
NA NINAU BAIBALA NO DEKEMABA.
1—Owai ke kanaka e oo palau ana a lilo i kaula mahope?
2—Owai ka i halawai pu me ia a kau i kona aahu maluna iho ona? He hoailona ia no ke aha?
3—Owai ka i lawe kupanahaia i ka lani?
4—Owai ka i ike maka aku a lilo i hope nona?
5—Heaha kekahi hana mana me ka aahu o kona hope?
6—Heaha iloko o ka ipuhao, a pehea i pau ai?
7—Heaha ka hana kupanaha i loaa ai ke koi lipi i poholo iloko o ka wai?
8—He mau keiki ehia i hoopauia e na bea elua? A heaha ko lakou hewa?
KE KUMU LAAU OOI KUPANAHA O NU HOLANI.
O na laau ooi, ua oi ke kumulaau o ka mokupuni o Nu Holani, oia ke kumu laau ooi a kalakala loa. Ua nui ka lau o keia kumu laau e like me ka lau o ka pua nana la, ma ka aoao malalo he mau mea ooi, a maluna o na mea ooi he mau kuku lua ole.
Ua hai mai kekahi keonimana e hoiliili i kela ano keia ano laau no ka hoike laau ma Parisa, ua anaia kekahi o keia kumulaau kupanaha, he 32 kapuai ke anapuni, a he 142 kapuai ke kiekie. No ka ikaika o ke kuku o keia laau, ina e alualuia na lio ma kahi i nui loa ai keia laau, a pili keia mau lau ooi i na lio, o ko lakou make no ia i ka huki kupaka ana. Ua ike no au wahi ana, i kekahi malihini i hooakaka mai i ka make oiaio ana o kona lio i ka mai huki, i ka manawa e hele ana oia i kahi o keia mea oni.
Ua hai mai kekahi keonimana o ke Komi e Hoike, i ka wa e hele lio ana makou maloko o ka ululaau, lalau kekahi kanaka opiopio (me ka ike ole i ke ano o keia laau,) i kekahi lala o keia mea ooi, i ka wa e holo lio ana, a lolo koke kona lima, ua paa loa e like me ka pohaku.
E ku koke mai ana he kanaka malama bipi, i ka ike ana i kona lima, o ka holo mai no ia me ka olelo, ua maopopo ia'u ke ano o keia mea, a hiki ia'u ke hoopau. Holo oia a ako i ka lau o kekahi mea ano like me ke kalo, no ka mea ua ulu pu ka mea make ma ka mea e pale ai i ka pilikia, ma kahi hookahi ma na wahi nahelehele, a i ka lomilomi ana i kona lima me keia lau pau ka lolo.
Ua like loa keia hana me ka hana a na keiki ma Amerika. Ina eha ka ili i na mea ooi, alaila anai lakou i kahi i komo ai ka mea oioi, me kekahi lau o ka Doka i hoowaliia, a olelo lakou penei, "E hemo ae e ka mea ooi, e komo ae ka mea hoola."
E na keiki he nui na mea ooi, e makau o lalau oukou me ka ike ole, a eha a pehu, a lolo, a kupaka, a make. Ua lalau nae, ea, ua pili, ua komo ka mea ooi iioko o oukou, e pehu ana, e lolo a kupaka ana, e make anei? Heaha ka lau e ola'i? Ke koko o Iesu wale no. E lawe a hoopili ia i ola. F. M.
KE ALAULA,
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.
25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
L. LAIANA, Luna Hoopuka.