Ke Alaula, Volume VI, Number 10, 1 January 1872 — Page 38
38 KE ALAULA.
Ua laweia imua o ka aha na lawehala, oia hoi ka poe i hoopiia no ka hana i kekahi mau karaima. A iwaena o keia poe i hoopiia he mau keikikane eha, elua no Kohala, a elua no Hilo. He mau keiki kupono i ka hele i ke kula Sabati, a i ke kula maoli. He aha la ke karaima i hoopiiia ai lakou? Eia, ka aihue; ka wawahi ana i ka hale e aihue i ka lole, a o ka aihue i ke dala. I ka ninauia ana e ka lunakanawai, ua hoole lakou aole lakou i hewa. Ua imi lakou i na loio akamai e kokua a e hoopakele. A ua hooikaika na loio e hoopakele, aka ma ka waha o na hoike ua akaka i ke kiure ua hewa io no. A ua hoopaiia no lakou e hana oolea ma ka halepaahao, i ehia la makahiki. Ua hoopaaia lakou i ke kaulahao a laweia aku la.
Aloha ino na keiki aihue. Ma ko lakou manao e nalo loa ana no ko lakou hewa. A pehea, aole anei i loaa ko lakou hewa? A ke manao nei anei oukou o lakou wale no na keiki aihue? Aole paha. Nui na keiki aihue, aihue i na mea liilii, i ka hua moa, hua piki, hua piku, i ka moa, i ka waiu, i na peni, i ke dala paha a me na mea he nui wale, he mau mea liilii kahi a he mau mea nui kahi.
E Ioane, heaha ke kanawai no ka aihue? "Mai aihue oe." A ina e aihue kekahi, a imi oia e hoonalo, e nalo anei? Aole. E ike pono oukou, e loaa auanei ko oukou hewa, a e hoopili ia mai ka hoopai kupono.
Ua aihue anei kekalii o oukou? E wikiwiki i ka hoihoi i ka mea i aihueia. E wikiwiki o paa i ka lima o ka makai. E wiki i ka hoihoi me ka mihi o make e, a loaa, a hoopai mai ke Akua.
E Iosepa e hoopaa i keia mele.
Mai aihue kamalii,
Hilahila auanei;
Hu mai no, a ikeia,
Loaa no, a hoopaiia.
Mere, owai ke kanaka i aihue i ka wa o Iosua? Iosua 7:1.
Zebedaio, heaha kana i aihue ai? Iosua 7:21.
Kopa, ma ke aha i loaa ai? Iosua 7:16, 18.
Iuliana, heaha ka hoopai? Iosua 7:24, 25.
Harieta, mahea i kakauia ai keia mau huaolelo "O ka mea i aihue, mai aihue hou aku oia?"
PALAPALA MAI IAPANA MAI.--Helu 6.
KO BE, IAPANA, Sepatemaba 18, 1871.
KA "ALAULA;" Aloha oe:
He mau wahi hunahuna mea hou ka'u i loaa i loko o keia mau la, e pili ana i na akua a me ka hoomana ana a na kanaka o keia aina. Iloko o na la he umikumamalima i kaa hope ae nei, wahi a na kamaaina, ua hoomahaia na uhane o ka po, oia na uhane o na kanaka hewa i hoonohoia ma ka po; ma kahi hoopai. Ua weheia na ipuka o ka po, a ua hooluoluia na uhane e noho la malaila. Ua ae ia lakou e holoholo io a i anei, a hala na la he umikumamalima, hoihoi hou ia lakou iloko o kahi hoomaemae, me ka hoopai. Manao na kanaka, aia ka nui o ko lakou kupuna ma kahi hoopai; nolaila ua lilo keia mau la hooluolu o ka po, i mau la hoohauoli no na kanaka. Hele huakai lakou i ka po me ka pahu kani, me na kukui a me na lama. I ke ao hoi lilo lakou i ka ahaaina, ka inu mea ona, a me na hana lealea. Pela mau i kela makahiki keia makahiki, i ka malama o Sepatemaba loaa hou ua mau la hooluolu no na uhane o ka po.
O ka la 14 o keia malama he la nui ia ma Kobe nei. He la holoholo keia no na akua o ka aoao hoomana pegana o ke aupuni; oia ka hoomana Sinnetu. Aole no he mau akua kii o keia aoao hoamana, aka ua hanaia na hale hoomana a me na wahi hoano e hoonohonoho akua ai. Ua hanaia he kii hale uuku he ono kapuai paha ke kiekie a ua like paha me ia ka laula; ua uhi ka lanai e puni ana ua hanaia na bele e hookani, a me na lei, a me na kaula gula. Ua hanaia keia hale liilii ma ke ano o ka luakini nui a lakou ma Kobe nei. Ua hoonohoia keia kii hale maluna o na laau nui, a i keia la nui i oleloia ai maluna, ua amo ia keia maluna o na poohiwi o na kanaka a ua kaihele, me ka huakai hanohano loa ma na alanui. Ua hanaia hoi he mau hale kaa nui me ka nani loa, a maloko ua hoonohoia na kaikamahine i pena ia na papalina, a hooluuia na lehelehe na lakou e hookani i na pahu kani, i ka wa i amo ia ai kela mau hale kaa maluna o na poohiwi o na kanaka. Ua uhiia o luna o keia mau hale kaa me na lole kilika ulaula nani loa. Ma hai a puni ua hoonaniia me na kii laau i okiokiia me ke akamai loa. He kii liona, he kii lio, kii kanaka, kii manu, ia, waa, hale, deragona me he puhi la. O keia mau mea a pau, ua okiia noloko o ka laau, a he nani loa no i ka nana aku e puni ana na hale kaa i amoia ma ka huakai a na akua.
I ke amoia ana o ka hale akua a me na hale kaa, hele aku a loaa i ua akua nei he anuu, he ahua, a he uwapo paha ma ke alanui, hoopupu ua akua nei, a holoke io a i anei ma ke alanui maluna o na poohiwi o na kanaka me ka ikaika loa. Pela i hookaakaaia a hoolealeaia na kanaka e na hana maalea a na kahuna hoomanamana. Pakele ke ola o kekahi o ka poe amo akua i ka haule ana ilalo o ka hale akua i ka wa i hoopupu ai a holoke i o a i anei. Ekolu kanaka i eha i ua la la. He mau kahili kekahi i halihali ia me ka huakai o na akua, a me na ipukukui hele po. He lio keokeo kekahi i malama mau ia ma ka pa luakini o ua akua nei, oia kekahi i alakai hele ia ma ua huakai akua nei. He nui na tausani kanaka ma na alanui e makaikai i keia huakai.
Aloha wale ka naaupo o na lahui i ike ole ia Iehova ke Akua io, a lilo wale i ka hoomana ana i na mea e. Me ke aloha, na'u na
O. H. KULIKA.
“Mai kuamuamu aku oe i ke kuli; aole hoi oe e waiho i ka mea e hina ai mamua o ka makapo; aka e makau oe i kou Akua. Owau no o Iehova." Oihanakahuna 19:14.
SUKI HAO.
HELU 2.
Ua makau o Suki Hao ia Paulo Olomana, a manao aole paha e hiki iaia ke hana i kekahi mea e pono ai oia, aka pule wale no nona kana hana. Makau i ka olelo aku. Aka, ma ka llilo ana i ka noonoo, ma ka nana ana i ke ano e ana o Paulo ke loaa iaia ke alohaia mai e Iesu, ano e ka hale, ano e ka noho ana, loaa ka hauoli, ka pomaikai, auhee aku ka pouli, komo ka malamalama, pau ke ano mehameha a neoneo o kona wahi, a mahope komo oia iloko o ka home lani, ala mai ka manao e hoao e hana i kekahi mea e pono ai oia.
Hilahila oia i kona makau, a hoohiki e hoopau. Nalu oia penei, e hiki paha ia'u ke hana i kekahi mea no Iesu ma ka hoao ana e kokua ia Paulo ka elemakule. E hoao no au. Mai ia manawa mai, komo mau ka inoa o Paulo iloko o na pule a Suki. A makaala oia i loaa ka manawa kupono e hana nona i kekahi mea hoohauoli, a hoopomaikai iaia. Ua pau iki kona makau i kona helehelena ino a me kona ano oolea. Aole oia i kipa aku ma kapa alanui i ole oia e halawai pu me ia, aole makau i ka maalo ana ma kona hale ke pouli mai la. Ma kona aloha ana ua hanai i wahi apo e hui ai kona naau me ko ka elemakule i mehameha me kona ike ole no nae.
I kekahi kakahiaka, i ko Suki hele ana i ke kula, ike oia i kekahi poe keiki kolohe e hoonaukiuki ana i kekahi elemakule ma ke alanui holo oia a hiki ilaila, nana aku la, aia hoi o ua Paulo Olomana nei, ua elemakule nei. Piha oia i ka inaina a hooweliweli i ka poe hana ino mai me ua olelo hoomainoino he nui wale. Ala mai no ka makau kahiko o Suki, aka aole oia i hoomaau i ka makau. A manao oia ka manawa kupono keia e hiki ai ia'u ke kokua iaia. Komo koke oia iwaena o na keiki kolohe a lalau, a lawe malie i ka papale weluwelu o ka elemakule mai ka lima o kekahi keiki e hoomakaukau ana i ka wai lepo loa e hoppiha ai i ua papale nei, a kau emoole ia maluna o ke poo o ka elemakule, me ka olelo ukiuki, "E, hilahila ole oe e Kale Polona, kainoa he keiki maikai oe, a makau i ka hana ino me keia i ka elemakule." Oki koke ae la ka hana kolohe a na keiki, a ku me ka hilahila ia lakou iho, me ka haohao loa i ka wiwo ole o Suki. Kii oia i na mea paahana a ka elemakule i helelei iloko o ka lepo, i kona haule ana, a hoihoi a waiho ma kahi maloo.
A ninau oluolu oia i ka elemakule e noho ana ma ka lepo, "Ua eha paha oe, hiki anei ia'u ke kokua ia oe?" Aole oia i nana, aole hoi i pane mai. Oni ae oia, a hoao e ala iluna, nui nae ka eha; nana mai la oia me ka maka kapukapulani, a makau loa o Suki. Kahea aku oia i kekahi mau kanaka. "E hele mai, ua eha loa paha ka elemakule nei i ka haule ana, na oukou paha e malama iaia, ua pilikia au i ke kula. Ae oluolu mai lakou e malama. A hele aku o Suki i i ke kula. Nani ke aloha! A—alia, e hoomaha iki. Aole i pau.
E Robaka, e hoopaa oe i keia wahi mele:
Mau, e mau ka hele ana
I ke kula Sabati;
Mau, e mau ka hoopaa ana
Na pauku, na himeni.